ဦးနု - အိန္ဒိယပြည်၌ဟောပြောသောဗုဒ္ဓတရားတော်များ

ပဋိစ္စသမုပ္ပါဒ် တရားတော်

၁၉၆၂ ခု ဇန်နဝါရီလ ၁၁ရက် နေ့က အိန္ဒိယပြည်နယူးဒေလီ မြို့၌ နိုင်ငံတော်ဝန်ကြီးချုပ် ဦးနုဟောပြောသော ပရိယတ္တိနှင့် ပဋိပတ္တိအကြောင်း ဟောပြောချက်မှာ အောက်ပါအတိုင်းဖြစ် ကြောင်း။

အမျိုးသား ရူပဗေဒ ဓာတ်ခွဲစိတ်ရာဌာနကြီးရဲ့ အဖွဲ့ဝင်အပေါင်း တို့ခင်ဗျား။

ခင်ဗျားတို့ဟာ သိပ္ပံပညာရှင်တွေအနေနဲ့ ခင်ဗျားတို့ရဲ့ ဝတ္တရား ဟာ တခြားမဟုတ်၊ ခင်ဗျားတို့ကိုယ်တိုင် သဘာဝတရားသစ်တွေကို ရှာဖွေဖို့နဲ့ တခြားသိပ္ပံပညာရှင်တွေ ရှာဖွေတွေ့ရှိသွားတဲ့ သဘာဝ တရားဟောင်းတွေကို စမ်းသပ်စစ်ဆေးကြည့်ရှုဖို့ ဝတ္တရားပဲ ဖြစ်တယ် လို့ ကျွန်တော် နားလည်ထားပါတယ်။ အဲဒါကြောင့် ဒီကနေ့ ခင်ဗျား တို့နဲ့ အခုလိုတွေ့ရတဲ့အခါမှာ နှစ်ပေါင်း ၂၅၀၀ ကျော်လောက်က ခင်ဗျားတို့ရဲ့ အိန္ဒိယနိုင်ငံတော်ကြီးမှာ ရှာဖွေတွေ့ရှိခဲ့တဲ့ သဘာဝ တရား ဟောင်းကြီးကို ခင်ဗျားတို့ရှေ့မှာ ကျွန်တော် ချပြလိုပါတယ်။

ဒီသဘာဝ တရားဟောင်းကြီးဟာ တခြား မဟုတ်ပါဘူး။ လူနတ် ဗြဟ္မာ အစရှိတဲ့ ၃၁ ဘုံမှာ ကျင်လည်နေရတဲ့ သတ္တဝါတွေ အားလုံး ဒုက္ခအပေါင်းက လွတ်ကင်းစေနိုင်တဲ့ သဘာဝ တရားကြီးပဲ ဖြစ်ပါတယ်။ ဒီသဘာဝ တရားကြီးကို တွေ့ရှိတဲ့ ပုဂ္ဂိုလ်ကြီးဟာလဲ တခြားမဟုတ်ပါဘူး၊ အိန္ဒိယပြည်ကြီးရဲ့ သားကောင်း ရတနာတစ်ဆူ ဖြစ်တဲ့ ဂေါတမမြတ်စွာဘုရား သခင်ပဲ ဖြစ်ပါတယ်။

သိပ္ပံပညာရှင်များ ခင်ဗျား ..

ဒီတရားကြီးကို ဂေါတမမြတ်စွာဘုရားသခင်ဟာ အကျဉ်းချုပ် ပြီး အခုလို ဟောထားခဲ့ပါတယ်။ ရှေးဦးစွာ ကျွန်တော် ပါဠိလိုရွတ်ပြ ရပါစေ၊ သည်းခံပြီး နားထောင်ကြပါ။ ပါဠိလို ရွတ်ပြီးမှ ကျွန်တော် အဓိပ္ပာယ်ကို ရှင်းပြပါ့မယ်။

ပဋိစ္စသမုပ္ပါဒ် ပါဠိ

အဝိဇ္ဇာပစ္စယာသင်္ခါရာ၊ သင်္ခါရပစ္စယာဝိညာဏံ၊ ဝိညာဏ ပစ္စယာနာမရူပံ၊ နာမရူပ ပစ္စယာသဠာယတနံ၊ သဠာယတန ပစ္စယာ ဖဿာ၊ ဖဿပစ္စယာဝေဒနာ၊ ဝေဒနာပစ္စယာ တဏှာ၊ တဏှာပစ္စယာ ဥပါဒါနံ၊ ဥပါဒါန ပစ္စယာ ဘဝေါ၊ ဘ၀ပစ္စယာ ဇာတိ၊ ဇာတိပစ္စယာ ဇရာမရဏ သောကပရိဒေဝ ဒုက္ခ ဒေါမနဿုပါယာသာ သမ္ဘဝန္တိ၊ ဧဝမေတဿ ကေ၀လဿ ဒုက္ခက္ခန္ဓဿ သမုဒယော ဟောဘိ။

အဝိဇ္ဇာယတွေဝ အသေသ ဝိရာဂ နိရောဓာ သင်္ခါရ နိရောဓော၊ သင်္ခါရနိရောဓာ ဝိညာဏနိရောဓော။ ဝိညာဏနိရောဓာ နာမရူပနိရောဓော၊ နာမရူပနိရောဓာ သဠာယတနနိရောဓော၊ သဠာယတန နိရောဓာ ဖဿနိရောဓော၊ ဖဿနိရောဓာ ဝေဒနာနိရောဓော၊ ဝေဒနာနိရောဓာ တဏှာနိရောဓော၊ တဏှာနိရောဓော ဥပါဒါနနိရောဓော၊ ဥပါဒါနနိရောဓော၊ ဥပါဒါန နိရောဓော ဘဝနိရောဓော၊ ဘဝနိရောဓာ ဇာတိ နိရောဓော၊ဇာတိနိရောဓာ ဇရာ မရဏ သောက ပရိဒေ၀ ဒုက္ခ ဒေါမနဿပါယာသာ နိရုဇ္ဈန္တိ ဧဝမေတဿ ကေ၀လဿ ဒုက္ခက္ခန္ဓဿ နိရောဓော ဟောတိ၊

အမှန်တရားကို မမြင်ကြ

သိပ္ပံပညာရှင်များခင်ဗျား ...

ယခု ကျွန်တော်ရွတ်ခဲ့တဲ့ ပါဠိတော်ကို ကျွန်တော်ရှင်းပြပါရစေ။ လောဘ၊ ဒေါသ၊ မောဟဆိုတဲ့ ကိလေသာပိတ်ဖုံးထားတဲ့အတွက် အမှန်တရားကို သတ္တဝါတွေ မသိမြင်ကြပါ။ အမှန်တရားတွေကို မသိ မြင်တဲ့အတွက် သတ္တဝါတွေဟာ ကောင်းစားချမ်းသာချင်လို့ အဆက် မပြတ် ပြုပြင် အားထုတ်နေကြပါတယ်။ ဒီလိုပြုပြင် အားထုတ်နေကြ တဲ့အတွက် ဝိညာဉ်သစ်တွေ အဆက်မပြတ် ဖြစ်ပေါ်နေပါတယ်။ ဒီဝိညာဉ်သစ်တွေ အဆက်မပြတ် ဖြစ်ပေါ်နေတဲ့အတွက် ရုပ်နဲ့နာမ်တွေ အဆက်မပြတ် ဖြစ်ပေါ်နေပါတယ်။ ဒီလိုရုပ်နဲ့ နာမ်တွေအဆက်မပြတ် ဖြစ်ပေါ်နေတဲ့အတွက် အာယတနခြောက်ပါးခေါ်တဲ့ မျက်စိ၊ နား၊ လျှာ၊ ကိုယ်၊ စိတ်ဆိုတာတွေ အဆက်မပြတ် ဖြစ်ပေါ်နေပါတယ်။ ဒီလို မျက်စိ၊ နား၊ နှာ၊ လျှာ၊ ကိုယ်၊ စိတ် ဆိုတာတွေ အဆက်မပြတ် ဖြစ်ပေါ် နေတဲ့အတွက် တစ်လောကလုံးမှာရှိနေတဲ့ သက်ရှိသတ္တဝါတွေ သက်မဲ့ အရာဝတ္ထုတွေနဲ့ ထိတွေ့မှုတွေ အဆက်မပြတ် ဖြစ်ပေါ်နေပါတယ်။ ဒီလိုထိတွေ့မှုတွေ အဆက်မပြတ် ဖြစ်ပေါ်နေတဲ့အတွက် ကောင်းတယ်၊ မကောင်းဘူးဆိုတဲ့ ခံစားမှုတွေ အဆက်မပြတ် ဖြစ်ပေါ် နေပါတယ်။ ဒီလိုခံစားမှုတွေ အဆက်မပြတ် ဖြစ်ပေါ်နေတဲ့အတွက် တောင့်တမှုတွေ အဆက်မပြတ် ဖြစ်ပေါ်နေပါတယ်။ ဒီလိုတောင့်တမှုတွေ အဆက်မပြတ် ဖြစ်ပေါ်နေတဲ့အတွက် စွဲလမ်းမှုတွေ အဆက်မပြတ် ဖြစ်ပေါ်နေ ပါတယ်။ ဒီလို စွဲလမ်းမှုတွေ အဆက်မပြတ် ဖြစ်ပေါ်နေတဲ့အတွက် ဗြဟ္မာတွေ၊ နတ်တွေ၊ လူတွေ၊ ငရဲ၊ တိရစ္ဆာန်၊ ပြိတ္တာ၊ အသူရကာယ်တွေ ဖြစ်စေနိုင်တဲ့ ဘဝတွေ အဆက်မပြတ် ဖြစ်လာရပါတယ်။ ဒီလို ဗြဟ္မာတွေ၊ နတ်တွေ၊လူတွေ၊ ငရဲ၊ တိရစ္ဆာန်၊ ပြိတ္တာ၊ အသူရ ကာယ်တွေဖြစ်စေနိုင်တဲ့ ဘဝတွေ အဆက်မပြတ်ဖြစ်နေတဲ့အတွက် ဗြဟ္မာတွေ၊ နတ်တွေ၊ လူတွေ၊ ငရဲ၊ တိရစ္ဆာန်၊ ပြိတ္တာ၊ အသူရကာယ်တွေ အဆက်မပြတ် ဖြစ်နေရပါတယ်။ဒီလို ဗြဟ္မာတွေ၊ နတ်တွေ၊ လူတွေ၊ ငရဲ၊ တိရစ္ဆာန်တွေ၊ ပြိတ္တာတွေ၊ အသူရကာယ်တွေ အဆက် မပြတ် ဖြစ်နေရတဲ့အတွက် အိုရခြင်း ဆင်းရဲတွေ၊ သေရခြင်း ဆင်းရဲ၊ စိုးရိမ်ကြောင့်ကြရခြင်း ဆင်းရဲတွေ၊ ငိုကြွေးမြည်တမ်းရခြင်း ဆင်းရဲတွေ၊ ကိုယ်မှာခံစားရတဲ့ ဆင်းရဲတွေ၊ စိတ်မှာခံစားရတဲ့ ဆင်းရဲတွေ၊ စိတ်ထဲမှာမချိမဆံ့ ပူပန်ရခြင်း ဆင်းရဲတွေ၊ အဆက်မပြတ် ဖြစ်ပေါ် နေရတယ်။

လောဘ၊ ဒေါသ၊ မောဟဆိုတဲ့ ကိလေသာတွေ ချုပ်ငြိမ်းပြီး အမှန်တရားတွေ မြင်တာနဲ့ တစ်ပြိုင်နက် သတ္တဝါတွေဟာ ကောင်းစား ချမ်းသာချင်လို့ ပြုပြင်အားထုတ်နေရတဲ့ အခြေက လွတ်မြောက်သွားပြီး၊ ဒီလိုလွတ်မြောက်သွားတဲ့အတွက် ဝိညာဉ်သစ်တွေ မဖြစ်တော့ဘူး။ ဒီလိုဝိညာဉ်သစ်တွေ မဖြစ်တော့တဲ့အတွက် ရုပ်သစ်နာမ်သစ်တွေ မဖြစ်တော့ဘူး။ ဒီလိုရုပ်သစ် နာမ်သစ်တွေမဖြစ်တော့တဲ့အတွက် အာယတန ခြောက်ပါးခေါ်တဲ့ မျက်စိ၊ နား၊ နှာ၊ လျှာ၊ ကိုယ်၊ စိတ်ဆိုတာတွေ မဖြစ်တော့ဘူး၊ ဒီလိုမျက်စိ၊ နား၊ နှာ၊ လျှာ၊ ကိုယ်စိတ်ဆိုတာတွေ မဖြစ်တော့တဲ့အတွက် သက်ရှိသတ္တဝါတွေ သက်မဲ့ အရာဝတ္ထုတွေနဲ့ ထိတွေ့မှုတွေဆိုတာ မဖြစ်တော့ဘူး၊ ဒီလို ထိတွေ့မှုတွေဆိုတာ မဖြစ်တော့တဲ့အတွက် ခံစားမှုဆိုတာ မဖြစ်တော့ဘူး။ ဒီလို ခံစားမှုတွေဆိုတာ မဖြစ်တော့တဲ့အတွက် တောင့်တမှုဆိုတာ မဖြစ်တော့ဘူး။ ဒီလိုတောင့်တမှုဆိုတာ မဖြစ်တော့တဲ့အတွက် စွဲလမ်းမှုဆိုတာ မဖြစ်တော့ ဘူး။ ဒီစွဲလမ်းမှုဆိုတာမဖြစ်တော့တဲ့အတွက် ဗြဟ္မာတွေ၊ နတ်တွေ၊ လူတွေ၊ ငရဲ တိရစ္ဆာန်၊ ပြိတ္တာ၊ အသူရကာယ်တွေ ဖြစ်စေနိုင်တဲ့ ဘဝတွေ မဖြစ်တော့ဘူး။ ဒီဘဝတွေ မဖြစ်တော့တဲ့အတွက် ဗြဟ္မာတွေ၊နတ်တွေ၊ လူတွေ၊ငရဲ၊ တိရစ္ဆာန်၊ ပြိတ္တာ အသူရကာယ်တွေမဖြစ်ရတော့ဘူး။ ဒီလို ဗြဟ္မာတွေ၊ နတ်တွေ၊ လူတွေ၊ ငရဲ၊ တိရစ္ဆာန်၊ ပြိတ္တာ၊ အသူရကာယ် တွေ မဖြစ်ရတော့တဲ့အတွက် အိုရခြင်း ဆင်းရဲတွေ၊ သေရခြင်း ဆင်းရဲ တွေ၊ စိုးရိမ်ကြောင့်ကြကြရခြင်း ဆင်းရဲတွေ ငိုကြွေးမြည်တမ်းရခြင်း ဆင်းရဲတွေ၊ ကိုယ်မှာခံစားရတဲ့ ဆင်းရဲတွေ၊ စိတ်မှာခံစားရတဲ့ ဆင်းရဲ တွေ၊ စိတ်ထဲမှာ မချိမဆံ့ပူပန်ရခြင်း ဆင်းရဲတွေမဖြစ်ပေါ်နိုင်တော့ဘူး။

သိပ္ပံပညာရှင်များခင်ဗျား ...

ကျွန်တော်ရဲ့ ရှင်းလင်းချက်ကို ကြားနာပြီးတဲ့နောက် သတ္တဝါ တွေ အခု ကျွန်တော်ပြောခဲ့တဲ့ ဒုက္ခပင်လယ်ကြောမှာ အဆက်မပြတ် မျောနေရတာဟာ တခြားကြောင့်မဟုတ်။ လောဘ၊ ဒေါသ၊ မောဟ တွေ ပိတ်ဖုံးနေတဲ့အတွက် အမှန်ကို မမြင်နိုင်တာကြောင့်ဘဲ ဖြစ်တယ် ဆိုတာကို ကောင်းစွာ သဘောပေါက်နိုင်ကြပါပြီ။ နောက်ပြီးတော့ လည်း ဒီလောဘ၊ ဒေါသ၊ မောဟတွေ ချုပ်ငြိမ်းပြီး အမြင်မှန်ကို မြင် နိုင်ရင် ဒီဒုက္ခတွေက လွတ်မြောက်မယ်ဆိုတာကိုလည်း ကောင်း ကောင်း သဘောပေါက်နိုင်ကြပါပြီ။

အဲဒီတော့ သိပ္ပံပညာရှင်များ ခင်ဗျား ....

အမြင်မှန်ရအောင် ဒီလောဘ၊ ဒေါသ၊ မောဟတွေကို ဘယ်လို အမြစ်ဖြတ်ကြမလဲ။