ဦးကျော်ဇေယျ - မြန်မာ့သမိုင်းဝင်အထင်ကရစာချုပ်ကြီးများ

          ၁၉၄၅-ခုနှစ်၊ သြဂုတ်လ (၁၉) ရက်နေ့တွင် ကျင်းပပြုလုပ် ခဲ့သော“နေသူရိန်ပြည်သူ့အစည်းအဝေးကြီးတွင် ဖက်ဆစ်တိုက်ဖျက်ရေး၊ ပြည်သူ့လွတ်လပ်ရေးအဖွဲ့ချုပ်ဥက္ကဋ္ဌ(PB.F) မျိုးချစ်ဗမာ့တပ်မတော်နှင့် ပြည်သူ့ပြောက်ကျားတပ်ဖွဲကများ၏ စစ်သေနာပတိချုပ်ဗိုလ်ချုပ်အောင်ဆန်းက မိန့်ခွန်းပြောကြားခဲ့သည်။ ထိုမိန့်ခွန်းထဲတွင်မျိုးချစ် ဗမာ့တပ်မတော်ကိစ္စကို ဤသို့ ထည့်သွင်းပြောကြားခဲ့လေသည်။ 

          “... နိဂုံးမချုပ်မီ တပ်မတော်ကိစ္စကိုလည်း ပြောချင်ပါသေးတယ်၊ အခုကျွန်တော်တို့ တပ်မတော်ကို နာမည်သာရှိတဲ့ ဗြိတိသျှအစိုးရရဲ့ မြန်မာပြည်တပ်မတော်ဆိုတာထဲသိမ်းသွင်းမယ်လို့ သာမန်ဆိုထားတယ်၊ အဲဒါကို ကျွန်တော်တို့မရှင်းတဲ့ အချက်တွေ အများကြီးရှိတယ်။ ဒါကြောင့်ကျွန်တော်တို့လိုလားတဲ့ အချက်များအတိုင်းအဖွဲ့ချုပ်ကြီးက ဒီအစည်းအဝေးကြီးမှာ တပ်မတော်နဲ့ပတ်သက်ပြီး တောင်းဆိုချက်တွေ တင်ကြလိမ့်မယ်၊ ဒီအတိုင်း တိုင်းပြည်က ထောက်ခံမယ်ဆိုရင် ကျွန်တော် တို့ တပ်မတော်သားတွေက ကြိတ်မှိတ်ပြီး ဝင်ရောက်လုပ်ကိုင်နိုင်မယ့် အခြေအနေကိုရနိုင်တယ်လို့ ယုံကြည်တယ်၊ ဒါပေမယ့်မလွတ်လပ်တဲ့ မြန်မာပြည်ရဲ့တပ်မတော်ထဲမှာတပ်မတော်မှာရှိတဲ့ လူ ၁ဝဝ-မှာ ၉၉ယောက်ဟာ ဖြစ်နိုင်ရင် အမှုမထမ်းလိုကြဘူးဆိုတာကိုလည်း လေးလေးနက်နက် ခင်ဗျားတို့သိစေချင်တယ်၊ ဒါကြောင့်လွတ်လပ်တဲ့ တိုင်းပြည်အောက် တပ်မတော်ပြန်ရောက်နိုင်အောင်ခင်ဗျားတို့ကလွတ်လပ်ရေးကိုအေးအေးချမ်းချမ်းရယူပေးနိုင်တဲ့ တိုင်းပြည်ညီညွတ်ရေးကို ပြည့်သူ့လွတ်လပ်ရေးအဖွဲ့ချုပ်ကြီးမှာဝင်ရောက်ပြီး ရအောင်လုပ်ပေးကြပါလို့ နောက်ဆုံး မှာချင်တယ်။ 

          ထို့ပြင်“ဗမာ့တပ်မတော်အဆို”ကိုဒီးဒုတ်ဦးဘချိုက တင်သွင်း၍ ဗိုလ်ချုပ်အောင်ဆန်းက ထိုအဆိုကို ပြန်လည်ဖတ်ပြ ရှင်းလင်းကာ ထပ်ဆင့်တင်သွင်းခဲ့လေသည်။ ထိုအဆိုကို မျိုးချစ်ပါတီ ခေါင်းဆောင် ဝန်ကြီးဟောင်း ဦးအေးနှင့် ကရင်အမျိုးသားခေါင်းဆောင် မန်းဘခိုင်တို့က ထောက်ခံသွားခဲ့ကြသည်။

          ထိုနေသူရိန်ပြည့်သူ့အစည်းအဝေးကြီးက ချမှတ်လိုက်သော ဆုံးဖြတ်ချက်များကိုလည်း ဗမာပြည်မြို့နယ်အသီးသီးတွင် လူထုအစည်းအဝေးပွဲကြီးများကျင်းပ၍ တခဲနက်ထောက်ခံဆုံးဖြတ်ခဲ့ကြ၏။ ဖက်ဆစ်တိုက်ဖျက်ရေး၊ ပြည်သူ့လွတ်လပ်ရေးအဖွဲ့ချုပ်ကြီးနှင့် ဆက်သွယ်ထားလျက် ရှိကြသော လူထုလူမျိုးရေးလူတန်းစားအဖွဲ့အစည်း၊ သမဂ္ဂအသီးသီးတို့ကလည်း နေသူရိန်ဆုံးဖြတ်ချက်များကို အလေးအနက်ထောက်ခံကြောင်း ဆုံးဖြတ်ခဲ့ကြသည်။ ဖက်ဆစ်တိုက်ဖျက်ရေး ပြည်သူ့လွတ်လပ်ရေးအဖွဲ့ချုပ်ကြီး၏ခေါင်းဆောင်မှုဖြင့် ဗမာနိုင်ငံပြည်သူလူထုကြီး၏ နိုင်ငံရေးစိတ်ဓာတ်များမည်မျှ ပြင်းထန်နေကြောင်း၊ ပြည်သူလူထုကြီးမည်မျှ စည်းလုံးညီညွတ်လျက်ရှိနေကြောင်းကို ဗြိတိသျှအာဏာပိုင်တို့သိရှိကြသောအခါ ထိုစဉ်က မဟာမိတ်စစ်ဌာနချုပ်ရုံးစိုက်ထားသော သီဟိုဠ်ကျွန်း (ယခု သီရိလင်္ကာနိုင်ငံ) ကန္နီမြို့သို့ ဗမာ့တပ်မတော်ကိစ္စနှင့်စပ်လျဉ်း၍ တိုင်ပင် ဆွေးနွေးရန် မဟာမိတ် စစ်သေနာပတိချုပ် “လော့ဒ် မောင့်ဘက်တန်” က ဗမာနိုင်ငံ ခေါင်းဆောင်များကို ဖိတ်ခေါ်ခဲ့လေသည်။ 

          ထိုသို့ဖိတ်ခေါ်ချက်အရ ဖက်ဆစ်တိုက်ဖျက်ရေး ပြည်သူ့လွတ်လပ်ရေးအဖွဲ့ချုပ်ကြီးမှ ၁၉၄၅ခုနှစ်၊စက်တင်ဘာလ ၄-ရက် နေ့တွင် အောက်ပါပုဂ္ဂိုလ်များ ပါဝင်သော ကိုယ်စားလှယ်အဖွဲ့ တစ်ဖွဲ့ကို ကန္နီမြို့သို့ စေလွှတ်ခဲ့၏။

-

ထိုကိုယ်စားလှယ်အဖွဲ့တွင် -

                ၁။  ဗိုလ်ချုပ်အောင်ဆန်း

                ၂။  ဗိုလ်လက်ျာ (တောခို) 

                ၃။  ဗိုလ်နေဝင်း 

                ၄။  ဦးဘဖေ (ဘကြီးဘဖေ၊ ကွယ်လွန်)

                ၅။  သခင်သန်းထွန်း (ကွန်မြူနစ်ခေါင်းဆောင်၊ ကျဆုံး) 

                ၆။  ကိုညိုထွန်း (သံအမတ်ကြီးဟောင်း)

                ၇။  စောဘဦးကြီး (ကေ အင် ဒီ အို ခေါင်းဆောင်၊ ကျဆုံး) 

                ၈။  ဗိုလ်ဇေယျ (ကွန်မြူနစ်၊ ကျဆုံး) 

                ၉။  ဗိုလ်ကျော်ဇော (တောခို) 

              ၁၀။  ဗိုလ်မောင်မောင် (သံအမတ်ကြီးဟောင်း)

              ၁၁။  ဗိုလ်ဇော်မင်း တို့ ပါဝင်၏။

          ၁၉၄၅ခုနှစ်၊ စက်တင်ဘာလ၆ရက်နေ့နှင့်၇ရက်နေ့များတွင် မဟာမိတ်စစ်သေနာပတိချုပ် လော့ဒ်မောင့်ဘက်တန်နှင့် ဗိုလ်ချုပ်အောင်ဆန်းခေါင်းဆောင်သော မြန်မာကိုယ်စားလှယ်အဖွဲ့တို့သည် ဆွေးနွေးကြပြီးနောက် အောက်ပါ သဘောတူညီ ချက်များပါဝင်သော “ကန္ဒီစာချုပ်” ကို လက်မှတ်ရေးထိုးခဲ့ကြလေသည်။

ကန္ဒီစာချုပ်ပါ အချက်များ 

(က)    မျိုးချစ်ဗမာ့တပ်မတော်ကို တကွဲတပြားစီ ဖျက်သိမ်း၍ တစ်ဦးစီ

          စစ်တပ်အတွင်းသို့ သိမ်းသွင်းရန်ဟူသော ဗြိတိသျှအစိုးရ၏ 

          မူလရည်ရွယ်ချက်ကို ရပ်ဆိုင်းထားမည်။ 

(ခ)      ဗမာ့တပ်မတော်အား မြန်မာနိုင်ငံစစ်တပ်အတွင်းသို့ ပူးပေါင်း

          လိုက်ရန် သဘောတူသည်။ 

(ဂ)      ဗမာ့တပ်မတော်အတွင်း၌ ဆက်လက်အမှုထမ်းရွက်လိုသူ

          ကျန်းမာရေးနှင့်ပြည့်စုံသည့် တပ်သား ၅၂၀၀ နှင့် အရံ ၃ဝဝဝ ကို

           လက်ခံရန် သဘောတူသည်။

(ဃ)    တပ်မတော်ဗိုလ် ၂၀၀ နှင့် အရံဗိုလ် ၂၀၀ ကို လက်ခံရန်

           သဘောတူသည်။

(င)     တပ်မတော်သားများနှင့် သက်ဆိုင်သော ကိစ္စအဝဝကို စုံစမ်းရန် အတွက်

          မဟာမိတ် ကိုယ်စားလှယ်၊ တပ်မတော်ကိုယ်စားလှယ် တို့ ပူးတွဲကာ

          အဖွဲ့ ဖွဲ့စည်း၍ ဆောင်ရွက်ရန် သဘောတူသည်။

(စ)     တပ်မတော်သားများသည် လစာ၊ ခွင့်ရက်၊ ဆေးဝါးကုသခွင့် စသော ရသင့်

          ရထိုက်သည့် အခွင့်အရေးများကိုလည်း ရရှိစေရန် သဘောတူသည်။