သော်တာဆွေ - ဂေါ်ဋီကာ

 

          သင်၏ဘဝတာ ဂေါ်ခရီးသည် ပြန့်ပြူးသာယာရှိပါစ။ ကျွန်ုပ်တို့ မြန်မာစကားတွင် ငါးပိဖုတ်၊ ငရုတ်သီးထောင်းမှ ဆရာမပြ နည်းမကျဟု ဆိုသည်။ ကျွန်ုပ် သင့်ကို ဂေါ်သင်တန်း ပေးလိုသည်။ အင်္ဂလိပ်နည်း၊ မြန်မာနည်း၊ (“နင်ချစ်တာ ငါ သိပါတယ်ဟယ်”ဟု ဆိုရသော) ကချင် နည်း၊ (“အပေါ့လေးမွှား ... သည်တွင်သွားက တောဖျားနတ်က ဖမ်းစား တတ်၏။ ငတေညစ်၊ နှစ်တွယ် ... တွယ်လို့၊ သက်နှစ်ဆယ် အရွယ် ရှိကာမှ ငါသိတယ်လေး ... အဝေး”ဟု ညည်းယူရသော) ရှေး ကရင် နည်း။ ရှင်းရှင်းနှင့် ဘွင်းဘွင်းကြဲရသော မြောက်ပိုင်းရှမ်းပြည် ဂေါ်နည်း၊သော်တာဆွေ မထိ တထိနှင့် ပလီတီတီကြံရသော တောင်ပိုင်းရှမ်းပြည် ဂေါ်နည်း၊ ညဉ့် အချိန် မိန်းကလေးအိမ်တွင် နှစ်ယောက်တည်း တွေ့ခွင့်ရှိ၍ စကားရည်ပြိုင် စကားထာဝှက်ရသောအင်းသားဂေါ်နည်း၊ (တောင်ပိုင်းရှမ်းပြည်၌ရှိသည်။) လက်ဖက်တောင် အတက်အဆင်း လက်ကမြင်းရသော ပလောင်နည်း၊ အကာလ ညဉ့်အခါ အပေါက်နှိုက်ရင်း ချစ်တင်းနှော ရသော တောင်ပိုင်း ရခိုင် နည်း၊ မြင်လျှင်မြင်ချင်း ရွှေခြေချင်းကို ချီးမွမ်းရသော ရွှေမန်းသူ ဂေါ်နည်း၊ စစ်ဝတ်စစ်စားနှင့် ဂျစ်ကားပေးစီးရသော မေမြို့သူ ဂေါ်နည်း

ကျောက်ကုန်သည်ဟန်ပြရသော မိုးကုတ် မိုးကောင်းသူ ဂေါ်နည်း၊ ရန်ကုန် အကြား၊ မန္တလေး စကား၊ မော်လမြိုင် အစားဟု ဆိုသည့် အတိုင်း “သောက်စားကြီးပါပေဗျာ”ဟု ချီးကျူး၍ဂေါ်ရသော ရွှေမြိုင်သူ လုံးကြီး ပေါက်လှတို့ကို ဂေါ်နည်း စသည့် ဒေသန္တရ နယ်လှည့် ဂေါ်နည်းတို့အပြင် ရန်ကုန်မြို့ ပေါ်၌ ဆေးလိပ် ခုံဂေါ်နည်း၊ အပ်ချုပ်ဆိုင် ဂေါ်နည်း၊ အထည်ဆိုင် ဂေါ်နည်း၊ ကုန်စုံဆိုင်ဂေါ်နည်း၊ ဆိုင်စာရေးမ ဂေါ်နည်း၊ ထီစာရေးမ ဂေါ်နည်း၊ အရပ်သူဂေါ်နည်း၊ ကျောင်းသူဂေါ်နည်း၊ ကောလိပ်သူ ဂေါ်နည်း၊ နာ့စ်မဂေါ်နည်း၊ စာရေးမဂေါ်နည်း၊ ကဗျာဆရာမ ဂေါ်နည်း၊ မိဘပေးစား မှ ယူမည်ဆိုသော အိမ်တွင်းပုန်း သူဌေးသမီး ဂေါ်နည်း။ (ဟင် ... နောက် ဘာကျန်သေးလဲ၊ ဪ ... ရှိသေး) မျက်ရည် ပေါက်ကြီးငယ်ကျရသော ဆရာသန်းဆွေ၏ဂေါ်နည်း စသည့် ဂေါ်နည်းမျိုးစုံ အဖုံဖုံကို လေ့လာ ကျွမ်းကျင်ခဲ့သော ဆရာ့ထံသို့ လာရောက် ဆည်းကပ်ပါ။ ဂေါ်သင်တန်း ယူလှည့်ပါ။ ဆရာ့ထံ နည်းနာခံ၍ မစွဲဘူးဆိုပါလျှင် ဆရာ ရဲရဲကြီး အာမခံ လိုက်မည်။ ဆရာ့ နှမကို ချက်ချင်း ယူသွားပါ။ ဟင် ... လောကမှာ ဤမျှအာမခံရဲသော ကြော်ငြာရှင် ရှိပါသေးသလော။ (နောက်မှ ဘာဖြစ်ဖြစ် လေ၊ ပထမ ကိုယ့်ကျောင်း လူလာဖို့အရေးကြီးတာ) ဘုရားစူးစေ့ တကယ် ပါ။ သင့်အတွက် ဆရာ ကူညီစမ်းပါရစေ။ လာခဲ့ပါ။ ဆရာ မျှော်နေမယ်နော်။ (အမယ်လေး ... ကျောင်းသားလိုချင်မှန်းသိသာလိုက်တာကွာ။ အို ... ရှက်နိုင်ပါဘူးလေ။) 

မှတ်ချက်။      ။ ကျောင်းသားဦးရေကို ကန့်သတ်ထားသည်။ လာသမျှ ထက်ပို၍ လက်ခံလိမ့်မည်မဟုတ်။

          ပထမ ကျောင်းဝင်ကြေးမလို၊ ရမ် သို့မဟုတ် ဝီစကီကွာဒ် ပုလင်းကြီး တစ်လုံး။

          နေ့စဉ်ကြေး ပိုင့်ဒ် ပုလင်းငယ်တစ်လုံး။

          သင်တန်းမှာ သင်၏ အခြေခံဂေါ်ရည်ဂေါချင်းကိုလိုက်၍ ဖြစ်သည်။ သင် ဂေါ်မစွံခဲ့ပုံတို့ကို မရှက်မကြောက် ပြောပြရမည်။

          ဆရာ့ကို တွေ့ရန်အချိန်။ 

          နံနက် ၆ နာရီမှ ညနေ ၆ နာရီ။ 

          ညနေ ၆ နာရီမှ နံနက် ၆ နာရီ။

          တစ်ရက်လျှင် ဤနှစ်ချိန်သာ တွေ့နိုင်သည်။ ဆရာ့မှာ အလုပ် များလွန်လွန်းလို့ အချိန်ကို ကန့်သတ်ထားရသည်။

          မှတ်ချက်။        ။ ဆရာ့ကို အိမ်မှာ မတွေ့ခဲ့သော် လမ်းထိပ် အရက်ဆိုင် ကို လိုက်ခဲ့ပါ။

          လူကြီးလူငယ်၊ လက်ဝဲလက်ယာမရွေး လက်ခံသည်။ သို့ သော် ဂုဏ်သရေရှိသူဖြစ်ကြောင်း ထောက်ခံစာပါရမည်။ ဤသည်မှာ အခြား မဟုတ်။ အရက်ဆိုင်နှစ်ဆိုင်မှ အချိန်မရွေး အကြွေးရကြောင်း မန်နေဂျာ၏ လက်မှတ်ဖြစ်သည်။ (ဤအချက်သည် အရေးကြီးဆုံးဖြစ်ကြောင်း သတိ ပြုခဲ့ပါ။)

                                                                                                                              

  (ပုံ) သော်တာဆွေ 

ဂေါ်ဝိဇ္ဇာဆရာကြီး

 

          ကျွန်တော့်မှာ ဆရာကြီး မဟာဆွေ၏ သားတပည့်ပီပီ အသက်ကြီး လာလေလေ အသောက်ကြီးလာလေလေ ဖြစ်ရကား လစဉ် ရသမျှ ဝတ္ထုရေးခကလေးနှင့် မသောက်လောက်တော့သဖြင့် မိမိကိုယ်တိုင် ဂေါ်မစွံ ဖြစ်ပါလျက် အလုပ်မရှိ၍ အလုပ်လက်မဲ့ အသင်းဖွဲ့ သကဲ့သို့ အစ်မကြီး ခင်မျိုးချစ် အကြံပေးသည့်အတိုင်း ဖော်ပြပါ မဟုတ်ကဟုတ်က ကြော်ငြာ ကို ရေးလိုက်ပါသည်။ သောက်ရှက်ကင်းမဲ့စွာ အစ၌ ဖော်ပြထားသော ဆိုင်းဘုတ်ကို အိမ်တွင် ချိတ်လိုက်ပါသည်။ သုံးရက်မြောက်နေ့တွင် ...

          “ဗျို့ ... ဦးသော်တာဆွေ ... ဦးသော်တာဆွေ ရှိပါသလား”

          အချိန်မှာ နံနက် ၉ နာရီခန့် ရှိပေပြီ။ သို့သော် ကျွန်တော် အိပ်ရာက မထသေး။ ညက အရက်ဆိုင်မှ တရုတ်ပေသီးဖြင့် တွက်ချက် မှတ်သား ထားလိုက်သော ကြွေးစာရင်းတွေ မှန်မမှန် ပြန်လှန်တွေးတော နေပါသည်။ နောက်ထပ် ပိုင့်ဒ်တစ်လုံးနှင့် ဘဲကင်တစ်ခြမ်း ထပ်ယူ မယူ ဇဝေဇဝါဖြစ် နေခိုက် အထက်ပါခေါ်သံကို ကြားရသည်နှင့် ခေါင်းရင်းက ကျူထရံချပ် ကို လုပ်လိုက်ရာ ... ။

          “အလို ... ဖိုးကြည်လင်တို့၊ ဖိုးမြသန်းတို့၊ ဖိုးအောင်လင်းတို့ ပါလား။ စောစောစီးစီး ဘာကိစ္စ၊ စာပေသစ်တရား ဟောဦးမလို့လား။ ကိုသန်းတင်ပါ ဘာလုပ်မခေါ်ခဲ့တုန်း။ လာ ... လာ ... အိမ်ပေါ် တက်ကြ”

          သူတို့သည် ကွန်မြူနစ်စာပေသစ်သမားများဖြစ်ကြောင်း မိတ်ဆွေ သိပြီး ဖြစ်ပါလိမ့်မည်။ အိမ်ပေါ်ရောက်ကြသောအခါ သူတို့အထဲ၌ အညှက် ဆုံးဖြစ်သလောက် အသွက်ဆုံးဖြစ်သော အောင်လင်းက ...

          “စာပေကိစ္စ မဟုတ်ပါဘူးဗျာ၊ ဂေါ်ပေကိစ္စ” 

          “ဘယ်သူ့အတွက်လဲ” 

          “ဟောဒီ ကျားပျံကြီး”

          လက်သန်းလုံးလောက်ရှိသော မျက်မှန်ရွဲကြီးနှင့် မြသန်းကို ညွှန်ပြ သဖြင့် ...

          “အလို ... ကိုမြသန်းက ကလောင်နာမည် ပြောင်းလိုက်သလား။ ဆိုရှယ်လစ် ကိုဘဆွေက ကျားကြီး၊ ခင်ဗျားက ကျားပျံကြီးဆိုတော့ သူ့ထက်တောင် တစ်လုံးပိုနေတာပေါ့”

          အောင်လင်းကပင် ... 

          “ကလောင်နာမည် ပြောင်းတာ မဟုတ်ဘူး။ ဂေါ်ပွဲတစ်ခုမှာ ကျန်ရစ် ဖြစ်ရင်း အလိုလို ဒီနာမည်ရလာတာ။ ကဲ ... ဒီအကြောင်းက နောက်မှ ရှင်းတာပေါ့။ အခု ကျုပ်တို့လာရင်းကတော့ သူ့ကို ကျောင်းအပ်ဖို့ပဲ။ လက်ခံနိုင်မယ် မဟုတ်လား”

          “ဒါကတော့ ကျုပ် ကြော်ငြာထဲပါတဲ့ စည်းမျဉ်းအတိုင်းပဲ”

          “အသိမိတ်ဆွေချင်းဖြစ်သော်လည်း မလျှော့နိုင်ဘူး”ဟူသော အမူ အရာနှင့် ပြောလိုက်ပါသည်။ ဤတွင် လူလည် လူပါးဖြစ်သော အောင်လင်း က “ကဲ ... ကျားပျံကြီး ထုတ်စမ်းကွာ”ဟု ဆိုလိုက်သည်၌ မြသန်း၏ လွယ်အိတ်ထဲမှ ၀ှိုက်လေဘယ်လ် ဝီစကီ ကွာဒ်ပုလင်းကြီး ပေါ်ထွက်လာပါ တော့သည်။

          ကျွန်တော့်မှာ ဆန့်တန်းအပ်သောလက်ဝယ် သပြာထောင်ထုပ်ကို ရဘိသို့ များစွာပင် နှစ်ထောင်းအားရရှိလှ၍ အိပ်ရာထ မျက်နှာမသစ် သေးဘဲလျက် စိုစွတ်လာသောသွားရည်ကို ကျွင့်ခနဲ မျိုချလိုက်ပြီး ...

          “အင်း ... ဒါတော့ ဟုတ်ပြီ၊ နောက်အရက်ဆိုင်နှစ်ခုက အချိန် မရွေး အကြွေးရကြောင်း ထောက်ခံစာကော”

          အောင်လင်းကပင် မြသန်း အင်္ကျီအိတ်ထဲမှ စာရွက်နှစ်ခုကို ဆွဲထုတ် လိုက်ပြီး ...

          “ဟော့ဒါက မြေနီကုန်းထိပ် အဝိုင်းကြီးရှေ့ဆိုင်က အကြုံရဲ့ လက်မှတ်၊ ဟော့ဒါက ရှမ်းလမ်းနဲ့ မအူပင်လမ်းထောင့် ခေါက်ဆွဲဆိုင်က အယန် လက်မှတ်”

          ကျွန်တော်သည် စာရွက်နှစ်ရွက်ကို သေချာစွာ ကြည့်ရှုပြီး ... “အင်း ... ဟုတ်တယ်၊ ဒီဆိုင်တွေက အကြုံနဲ့ အယန်ကို ကျုပ် ကောင်းကောင်း သိတယ်။ “လူတွေ မူးအောင် ပုလင်းထောင်ပေးတာ တို့ အယန်၊ လိုချင်သမျှကို အကြွေးပေးတာ တို့အကြုံ”လို့တောင် ကျုပ် သီချင်း ဆိုလေ့ရှိတာပဲ။ ကဲ ... ဒါဖြင့် အဖေ့နာမည်နဲ့ အသက် နေရပ်လိပ်စာ တွေပြော၊ တစ်ခါတည်း ကျောင်းသားလက်ခံစာရင်း သွင်းလိုက်မယ်”

          ကျွန်တော်သည် လက်ခံစာရင်းစာအုပ်၌ မြသန်း ပြောသည်များကို ရေးမှတ်ပြီးနောက် ...

          “ကဲ ... ဆရာတပည့်အဖြစ်နဲ့ ဂေါ်သင်တန်း ပေးရမယ်ဆိုတော့ တပည့်ရဲ့ အခြေခံ အရည်အချင်းကို သိထားဖို့လိုတယ်။ မှန်တဲ့အတိုင်း သာပြော၊ ပညာ ဘယ်အထိ သင်ဖူးလဲ။ ယူနီဘာစီတီမှာ နေခဲ့ဖူးသလား”

          “ဘီအေ အောင်ပါတယ်” 

          “အို ... ဂွဒ် ...၊ များသောအားဖြင့် မိန်းကလေးတွေ သွားရည်ကျတတ်တဲ့ နောက်ဆွယ် ဒီဂရီကလေးနဲ့ပဲ” 

          “နို့ပြီး ... ကွန်မြူနစ်သင်တန်းလည်း တက်ခဲ့ဖူးပါတယ်”

          မောင်ကြည်လင်က ဝင်၍ ထောက်ရာ ...

          “အင်း ... ဒါလည်း ကောင်းပါတယ်၊ သို့သော် တချို့စာအုပ် ကလေးတွေ မတောက်တခေါက်ဖတ်ပြီး သူတို့ကိုယ်သူတို့ ကွန်မြူနစ် ဆိုပြီး တောင်မကျ မြောက်မကျဖြစ်နေတဲ့ ဟာကလေးတွေလို လူ့ခွစာ ဖြစ်နေမှာ စိုးရတယ်”

          အောင်လင်း “ဟာ ... မဖြစ်ရပါဘူး၊ သင်တန်းကို နည်းလမ်း တကျ အစအဆုံး တက်ခဲ့တာပဲ။ စိတ်ချပါ။ ကွန်မြူနစ် အနယ်ထိုင်ပါပြီ။ တကယ့် ကွန်မြူနစ်တစ်ယောက်ရဲ့ ယဉ်ကျေးမှု၊ စိတ်ဓာတ်မြင့်မြတ်မှု၊ အမြော်အမြင်ရှိမှုတွေနဲ့ ပြည့်စုံပါပြီ”

          “ဒါဖြင့် ကောင်းပါပြီလေ၊ နို့ပြီး ... ကျုပ် သိထားတာ တစ်ခု မေးရဦးမယ်။ သာဓုက တာရာ့ကို နှိပ်ထားတာထဲမှာ မြသန်းနဲ့ ကြည်လင် ဟာ တာရာရဲ့ နောက်လိုက်တပည့် လက်ကိုင်တုတ် ဖြစ်ခဲ့တယ်လို့ ရေး တယ်။ ဒါ မှန်ပါသလား၊ ရှင်းရှင်းပဲ ပြောစမ်းပါ”

          ကြည်လင်နှင့် မြသန်းမှာ တစ်ယောက်မျက်နှာ တစ်ယောက် ကြည့် နေကြသည်။ အတော်ကြာမှ အောင်လင်းက ...

          “ဒါကတော့ ဒီလိုပါ၊ သာဓုက ရေးမယ်ဆိုလည်း ရေးစရာ ဖြစ်ခဲ့ပါ တယ်။ အမှန်က အစဦးမှာ သူတို့ဟာ တာရာနဲ့ စာပေသစ် သဘောချင်း ကိုက်ညီမယ်ထင်ပြီး ပူးပေါင်းခဲ့ကြတယ်။ တာရာမဂ္ဂဇင်းထဲမှာ ဝင်ရေး ခဲ့ကြတယ်။ တက်တိုးက တာရာကို ဝေဖန်တဲ့အခါမှာ ကိုယ့်ရေးဘက်တော် ရယ်ဆိုပြီး တာရာ့ဘက်က ကူညီခဲ့ကြပါတယ်။ နောက်တော့မှ တာရာရဲ့ စာပေသစ်ဟာ ဝတ်လစ်စလစ်အလှ (Naked Beauty)၊ ရွှေအိုရောင် (Ragged Gold) ၊ ပင်မရေစီး: (Mainstream)စသည်ဖြင့်အင်္ဂလိပ် စကားလုံးတွေ တိုက်ရိုက်ပြန်ထားတဲ့ စကားလုံးတွေသာ တချို့ လူ နားမလည်အောင်သစ်ပြီး အကြောင်းအရာကျတော့ ဘာမှ မသစ်ဆန်းတာ သိရလို့ တာရာနဲ့ ခွဲထွက်ခဲ့ကြပါတယ်။ အခုတော့ တာရာနဲ့ စာပေရေးရာ မှာ လုံးဝမပတ်သက်တော့ပါဘူး။ ကျုပ်တို့ဆိုလိုတဲ့ စာပေသစ်က စကားလုံးရေးသားမှု “ဟန်”ထက် အကြောင်းအရာတည်းဟူသော “ပစ္စည်း”ကို ပဓာန ထားပြီး တိုင်းပြည် လူထုရဲ့ ဘက်တော်သား”

          ကျွန်တော်က ဖြတ်၍ ...

          “ကဲ ... တော်ပါတော့လေ ကိုအောင်လင်း၊ ကျုပ်က ခင်ဗျားကို စာပေသစ် တရားဟောခိုင်းနေတာ မဟုတ်ပါဘူး။ မြသန်းကို ဂေါ်သင်တန်း ပေးဖို့အတွက်သာ တာရာနဲ့ ဘယ်လို ပတ်သက်ခဲ့သလဲ သိချင်လို့ မေး တာပါ”

          “နေပါဦး၊ ဂေါ်သင်တန်းပေးဖို့ နဲ့ တာရာနဲ့ ပတ်သက်ခဲ့တာနဲ့ ဘယ်လို စပ်ဆိုင်နေလို့လဲ”

          “ဆိုင်ပါသော်ကော ကိုအောင်လင်းရယ်၊ ဆိုင်ပါသော်ကော၊ ကျုပ် ပြောမယ်ဗျ။ ကျုပ် တာရာ့ကို ကောင်းကောင်းသိတယ်။ ဒီငနဲဟာ လူမှုရေး ရာမှာ အင်မတန် အူကြောင်ကြောင်နိုင်တယ်။ ကဲ ... ဖြတ်မေးရဦးမယ်။

          မောင်မြသန်းဟာ တာရာနဲ့ တစ်ခါက ရင်းရင်းနှီးနှီးပေါင်းသင်း ဆက်ဆံခဲ့ ဖူးတယ်ဆိုတာတော့ ခင်ဗျားတို့ မငြင်းနိုင်ဖူးပေါ့ ”

          “ဟုတ်ပါတယ်၊ ဒါတော့ ဝန်ခံရပါမယ်”

          “ကဲ ... ဒါဖြင့် ဘာမှ စောဒက မတက်ကြနဲ့တော့၊ ကျုပ် အတိ အကျ ပြောလိုက်တော့မယ်။ တာရာရဲ့ အူကြောင်ကြောင် ဖြစ်မှုတွေဟာမောင်မြသန်းကို ကူးစက်နေတယ်။ ကျုပ် သူ့မျက်နှာမြင်တာနဲ့ သိတယ်။ ဒီအူကြောင်ကြောင်ဖြစ်မှုဟာ မနုဿ ဂေါ်ဂနိုက်ဇေးရှင်းရဲ့ အောင်မြင်မှုမှာ ဘယ်လောက် ဆိုးရွားတဲ့ အတားအဆီးကြီးလဲဆိုတာ ခင်ဗျားတို့ စဉ်းစား ကြည့်ရင် သိနိုင်တယ်။ သန်းဆွေ ကြည့်ပါလား၊ သူ့ရဲ့ ဝမ်းတွင်းပါ အူကြောင်ကြောင်ဖြစ်မှုကြောင့် ဂေါ်ပွဲဟူသမျှ သူချည်း နောက်ကောက်ကျ ကျန်ရစ်တာချည်းပဲ။ ကျုပ် မေမြို့ရောက်တုန်းကလည်း သူ့ကို အကွဲထိုး သွားတဲ့ မဟာ ကပ္ပတိန်တစ်ယောက်နဲ့ စေ့စပ်ပြီး စီးနေတာ တွေ့ခဲ့ရ တယ်။ ဒါတွေထားလေ၊ ကျုပ်တို့လုပ်ငန်းကို ပြောကြစို့၊ အခု မောင်မြသန်း မှာ နဂိုက ဂေါ်မစုံရုပ်ရည် အမူအရာရှိနေရတဲ့အထဲ အဇာတသတ်မင်းသား ဒေဝဒတ်ထံ တပည့်ခံမိသလို တာရာနဲ့ ပေါင်းသင်းမိလို့ တာရာရဲ့ အူကြောင် ကြောင်ဖြစ်မှုတွေ ကူးစက်နေတဲ့အတွက် ကျုပ်က သူ့ကို ဂေါ်သင်တန်းပေး