သော်ဇင်အုံး - စာကြည်တိုက်ကလေးကဗျာများ

စာကြည့်တိုက်

 

စာကြည့်တိုက်ကို သွားကြမယ် 

ကိုယ်ဖတ်ချင်တာ ဖတ်ပါကွယ်

 

သူငယ်ချင်းတွေ တူတူပျော် 

ဗဟုသုတ ရတယ်နော်

 

ပင်လယ်ပျော်နဲ့ တောင်တန်းသား 

စာအုပ်ထဲမှာ ရှိတယ်ဗျား

 

ရေခြားမြေခြား ကလေးတွေ 

ငါတို့လိုပဲလေ

 

သိချင်တာတွေ သိကြဖို့ 

စာအုပ်လေးတွေ ဖတ်ကြစို့။

 

 

မေမေ ဝတုတ်တုတ်

 

မိုးလင်းမိုးချုပ် 

အလုပ်ရှုပ် 

မေမေ ဝတုတ်တုတ်

 

ဖိုးဝရုပ်နဲ့ မတူပါ 

မေမေ ပိုလှတာ

 

ပါးပြင်ပေါ်မှာ 

ပါးကွက်ကြား 

သားသားမွှေးဖို့ဗျား။

 

 

 

 

နံနက်ခင်း

 

ငှက်သံလေးတွေ ကြားရပြီ 

နံနက်လင်းတော့မည်

 

ဘွားဘွားဆီက ရွတ်သံကြား 

ဗုဒ္ဓမြတ်တရား

 

ငြိမ်းချမ်းပါစေ သတ္တဝါတွေ 

မေတ္တာပို့လို့နေ

 

အမျှဝေလို့ ကုသိုလ်ပွား

အားလုံးရစေသား။

 

လယ်တဲလေး

 

လယ်ကွင်းထဲက တဲလေးမှာ 

ဘိုးဘိုးဘွားဘွား နေကြတာ

 

မိုးတွင်းအခါ စပါးစိုက်

ဆောင်းမှာ ရိတ်သိမ်းလိုက်

 

နွေရာသီမှာ နားကြတယ် 

နောင်နှစ်စိုက်ဖို့ကွယ်

 

ချိုးလေးတွေရယ် ကူသံပေး 

လယ်ကွင်းထဲက လယ်တဲလေး။

 

ဈေးဝယ်သွား

 

ဈေးကိုသွားမယ့် မေမေရယ် 

သားသားလိုက်ခဲ့မယ်

 

မေမေကြိုက်တာ ဝယ်လိုက်ပါ 

သားသားစားမယ်ဗျာ

 

ဆွဲခြင်းကြီးက လေးနေလား 

သားသားဆွဲမယ်ဗျား။