မြိတ်ဆရာတော်ဘဒ္ဒန္တဝိသုတမဟာထေရ် - မိုးကုတ်ဝိပဿနာ

နိဒါန်း 

          ဤမိုးကုတ်ဝိပဿနာ သစ္စာလေးပါးတရားတော်စာအုပ် သည် ကျေးဇူးတော်ရှင် အဂ္ဂမဟာပဏ္ဍိတ မိုးကုတ်ဆရာတော် ဘုရားကြီး၏ ဥပနိဿယခံ တပည့် ရာဇဒတ္တိယ အဂ္ဂမဟာကမ္မဋ္ဌာနာစရိယ ဘွဲ့တော်ရ တနင်္သာရီတိုင်း၊ မြိတ်မြို့၊ မိုးကုတ်ဝိပဿနာ ဓမ္မရိပ်သာ၊ အရှေ့သိမ်ကျောင်းတိုက်ကြီး၏ ပဓာန မဟာနာယက မြတ်ဆရာတော် ဘဒ္ဒန္တဝိသုတ မဟာထေရ် အရှင်သူမြတ်၏ ဆဋ္ဌမမြောက် ထွက်ပေါ်လာ သော ဝိပဿနာကျမ်းစာအုပ် ဖြစ်ပါသည်။

          ပထမဆုံးထုတ်ဝေသောဆရာတော်ဘုရား၏ ဝိပဿနာ ကျမ်းစာအုပ်မှာပဋိစ္စသမုပ္ပါဒ်သန်တန်းတရားတော် စာအုပ် ဖြစ်ပါသည်။ ယင်း ပဋိစ္စသမုပ္ပါဒ်သင်တန်းတရားတော် စာအုပ် မှာ ၂၂-၃-၁၉၉၁ မှ ၂၈-၃-၁၉၉၁ ထိ ရန်ကုန်မြို့၊ မိုးကုတ်ဝိပဿနာ အဖွဲ့ချုပ်ကြီးတွင် ဟောကြားတော်မူသည့် ပဋိစ္စသမုပ္ပါဒ်တရားတော်များကို စုပေါင်း၍ တရားဓမ္မ အားထုတ် သစ်စ သဒ္ဓါဖြူလွင် ယောဂီသူတော်စင် သင်တန်းသူ၊ သင်တန်းသားများ ပဋိစ္စသမုပ္ပါဒ်တရားတော်ကို အခြေခံကျကျ ကြေညက်စေရန်နှင့် လေ့လာသူ တရားသက်ဝင် ယောဂီသူတော်စင်များ ပဋိစ္စသမုပ္ပါဒ်တရား ထပ်ပွားကြေညက်စေရန် အတွက် ရည်ရွယ်ချက်ဖြင့် ထုတ်ဝေသော စာအုပ်ဖြစ်ပါသည်။ 

           ဒုတိယမြောက် စာအုပ်မှာ ပဋိစ္စသမုပ္ပါဒ် ဒိဋ္ဌိသတ် သစ္စာလေးပါးတရားတော် စာအုပ်ဖြစ်ပါသည်။ ယင်းစာအုပ် မှာ ၂၂-၃-၁၉၉၂ မှ ၂၈-၃-၁၉၉၂ ထိ ရန်ကုန်မြို့၊ မိုးကုတ်ဝိပဿနာ အဖွဲ့ချုပ်ကြီးတွင် ဟောကြားတော်မူသည့် သစ္စာလေးပါးတရားတော်များကို စုပေါင်း၍ ထုတ်ဝေသော စာအုပ် ဖြစ်ပါသည်။ ယင်းစာအုပ်သည် ပဋိစ္စသမုပ္ပါဒ် သင်တန်း တရားတော် စာအုပ်ကို လေ့လာမှတ်သားကာ ပဋိစ္စသမုပ္ပါဒ်တရား အခြေခံရရှိ ကြေညက်ပြီး ရဟန်း ရှင်, လူ တရားသက်ဝင် ယောဂီသူတော်စင်တို့အတွက် သက်သေ သာဓက ဝတ္ထုများဖြင့် တန်ဆာဆင်၍ စုံလင်ပြည့်ဝ အချက် ကျကျ ပဋိစ္စသမုပ္ပါဒ်ဖြတ်ပုံ၊ ဒိဋ္ဌိသတ်ပုံများကို ဟောကြား ပြသထားခြင်းကြောင့် ကြည့်ရှုလေ့လာ မှတ်သားပြီး တရားခွင် ဝင်ကြသောအခါ အချိန်တိုတိုနှင့် ဝိပဿနာဉာဏ် ရင့်သန်နိုင် ကြစေရန် ရည်သန်ချက်ဖြင့် ထုတ်ဝေသော စာအုပ် ဖြစ်ပါ သည်။

          တတိယမြောက် စာအုပ်မှာ ခန္ဓာဉာဏ်မြင် ဒိဋ္ဌိစင် သစ္စာလေးပါး တရားတော် စာအုပ် ဖြစ်ပါသည်။