မောင်မြင့်ကြွယ် - မြွေမြွေချင်းခြေမြင်

ဘာလင်

(၁၉၄၅) မေလ (၁၄)ရက် 

မိန့်ခွန်းများကို စတင်ပြောကြားချိန်သို့ ရောက်ရှိသောအခါ ဗိုလ် မှူးချုပ် ရော်ဘင်ဆန် ကမ်ပီယံ ဂျူနီယာအရက်မူးနေလေပြီ။ သူ စကားပြောရာတွင် လျှာမလိပ်ပါ။ ဟိုယိမ်း သည်ယိုင်လည်း မဖြစ်ပါ။ အရက် မူးသည့် ဟန်ပန်မျိုးလည်း လုံးဝမရှိပါ။ သို့ရာတွင် စာနယ်ဇင်းဆရာများ ၏ စားပွဲ၌ရှိနေသူ သတင်းထောက်အားလုံးနှင့် သူ့အကြောင်း ကောင်းကောင်းသိသူများက သူအရက်မူးနေသော အရိပ်လက္ခဏာများကို မြင် နိုင်ကြပါ၏။ ကျွဲပခုံးနှင်သဏ္ဌာန်တူသော ပခုံးကြွက်သားကြီးများ ကြွတက် လာမှု၊ အပြာရောင် မျက်လုံးများပေါ်သို့ မျက်ခွံများအိတွဲကျဆင်းလာမှု၊ အများသူငါကြားနိုင်လောက်အောင် တတွတ်တွတ် ရေရွတ်ပြောဆိုနေမှု တို့သည် ကလေးဆရာဝန်တစ်ယောက်က ကလေးတစ်ယောက် ဝက်သက် ပေါက်တော့မည့် အရိပ်လက္ခဏာအား ရှင်းလင်းပြတ်သားစွာ တွေ့မြင် နေရသလို သူ့အကြောင်းသိသူများအတွက် ထင်ရှားသော အရိပ် လက္ခဏာများပင် ဖြစ်ကြပါပေသည်။ ၎င်းအပြင် ဗိုလ်မှူးချုပ် ကမ်ပီယံ အရက်မူးသည့်အခါ ဝရုန်းသုန်းကားဖြစ်လာနိုင်သည့် အလားအလာများ လည်း ရှိနေပေသည်။ ထို့ကြောင့် သူတို့က မည်သူ့ကိုမှ မကြည့်ကြတော့ ဘဲ ဗိုလ်မှူးချုပ် ကမ်ပီယံကိုသာ အကဲခတ်နေကြသည်။

ထိုနေ့က မဟာမိတ်တို့၏ စုပေါင်း ဗိုလ်ရှုခံပွဲကို ပြုလုပ်ခဲ့သည်။ မဟာမိတ်တို့ဘက်မှ တပ်ရင်းအားလုံးက ဘာလင်မြို့တွင်းရှိ ပျက်စီးနေသော လမ်းများပေါ်တွင် တပ်စိတ်တစ်စိတ်စီ ပါဝင်ချီတက်လာကြသည်။ မဟာမိတ်တပ်ပေါင်းစု၏ စစ်သေနာပတိကလည်း အားလုံးပါ၀င်ချီတက်

ခွင့်ရရှိအောင် အတတ်နိုင်ဆုံး လိုက်လျောခွင့်ပြုထားသည်။ ဗိုလ်ရူခံ စင်မြင့်ပေါ်တွင် ထိုင်ရန် ရောက်ရှိလာကြသော တပ်မတော် အရာရှိကြီးများ ကလည်း အလွန်များပြားလှံပါသည်။ ထိုပုဂ္ဂိုလ်ကြီးများသည် ထိုနေ့ညနေ “ ပိုင်းတွင် အမေရိကန် စစ်ဌာနချုပ်၌ ကျင်းပပြုလုပ်သော ထမင်းစားပွဲ၌ မိန့်ခွန်းများပြောကြသည်။

ယနေ့ကျင်းပသော ချီတက်ဂုဏ်ပြုပွဲသို့ ရုရှဗိုလ်ချုပ်ကြီးအချို့ တက်ရောက်လာကြပြီး သူတို့က ကမ်ပီယံကို မှတ်မိသွားကြကြောင်း သိ သာထင်ရှားသည်။ သူမှန်းသိဖို့ကလည်း လွယ်ကူလွန်းလှပါ၏။ ကျပ်နေအောင် ချုပ်ထားသော တိုက်ပွဲဝင်ဂျာကင်အင်္ကျီပေါ်၌ ဆုတံဆိပ်ဖဲပြား “တန်းလေးတန်း တပ်ဆင်ထားသည်။ ဘယ်ဘက်အင်္ကျီလက်ပေါ်တွင် ပင်လယ်ရပ်ခြား၌ ပါဝင်တိုက်ခိုက်ခဲ့သော အထိမ်းအမှတ် ဖဲပြားငါးခုနှင့် ထိုဖဲပြားတန်းများပေါ်တွင် ပထမကမ္ဘာစစ်အတွင်းက ရရှိခဲ့သော အထိမ်း အမှတ်အရစ်လေးရစ်၊ နဝမမြောက် တပ်တော်၏ တောက်ပသော ပခုံးတံဆိပ်ပြောင်လက်နေသော ဘွတ်ဖိနပ်ရှည်များထဲသို့ ထိုးထည့်ထားသော မြင်းစီးဘောင်းဘီ၊ ပြီးတော့ ညာဘက်တွင် ငွေရည်စိမ်ထားသော ဒသမ (၄၅) ဘို့ ခြောက်လုံးပြူးနှင့် ဘယ်ဘက်တွင် စမစ်အင်ဝက်ဆင် ဒသမ(၃၇၅) မက်ဂနမ် ခြောက်လုံးပြူးသေနတ်တို့ကို ချိတ်ဆွဲထားသော မြင်းစီးခါးပတ်၊ ပြောင်လက်နေသော ဟဲလ်မက်ပေါ်မှ ကြယ်သုံးပွင့် စသည်တို့က အဆင့်မြင့် အရာရှိကြီးများ အလွန်ပေါများလှသော ဤ အခမ်းအနားတွင် ကမ်ပီယံကို ထင်းထင်းကြီး ပေါ်လွင်နေစေသည်။ ပြီး

တော့ ရုရှတို့ကလည်း ကမ်ပီယံနှင့် မိတ်ဆွေဖြစ်ချင်ကြသည်။ သို့ရာတွင် ကမ်ပီယံက သူတို့အား မျက်နှာထား တင်းတင်းနှင့် ဆက်ဆံခဲ့သည်။

သို့တိုင်အောင် ထမင်းစားပွဲကျင်းပနေသော အခန်းကျယ်ကြီးထဲတွင် ရုရှ စစ်ဗိုလ်များသည် သူ့ကိုတွေ့တိုင်း တပြုံးပြုံးနှင့် ဖန်ခွက်မြှောက်ပြပြီး နှုတ်ဆက်လေလေ ကမ်ပီယံက အရက်ကို ပိုသောက်ပြီး ပါးစပ်က တတွတ်တွတ် ရွတ်လေလေ ဖြစ်နေလေတော့သည်။ မည်သည့်နေရာကိုပဲ ကြည့်ကြည့် တပ်မတော်အရာရှိကြီးများကိုသာ တွေ့ရပါလိမ့်မည်။ စားပွဲများကို အင်္ဂလိပ်အက္ခရာ အီးပုံသဏ္ဌာန်ချ ထားပြီး နာမည်ကြီးပုဂ္ဂိုလ်များကို အက္ခရာ အီး၏ ကျောရိုးဖြစ်သော ထိပ် စားပွဲရှည်ကြီးတွင် နေရာချထားသည်။ ဤကဲ့သို့သော ထမင်းစားပွဲများကို ကျင်းပပေးခြင်းဖြင့် အောင်ပွဲခံ မဟာမိတ်တို့အကြားတွင် ဆက်ဆံရေး ပိုမိုကောင်းမွန်လာစေလိမ့်မည်ဟု ထိပ်ပိုင်းအရာရှိကြီးများက ယူဆနေ့ ကြသည်။ ထိုအခမ်းအနားများသို့ သတင်းစာဆရာများကို အမြဲတစေ ဖိတ်ကြားလေ့ရှိပြီး သတင်းစာဆရာများကလည်း အစားအသောက်ကောင်းကောင်းနှင့် ယမကာကောင်းကောင်းတို့ကို မှီဝဲသုံးဆောင်ရမည်ဖြစ်သဖြင့် တက်ရောက်လေ့ရှိကြသည်။ ရူးစဗဲ့၊ ချာချီနှင့် စတာလင်တို့ သည်လွန်ခဲ့သော ဖေဖော်ဝါရီလက ဥရောပတိုက်အတွက် အပိုင်းအခြား သစ်များကို ရေးဆွဲခဲ့ကြပြီး ယခုလောလောဆယ်တွင် ဘာလင်ကို လေးခြမ်းစိတ်ရန် စီစဉ်နေကြသည်။ ထိုကိစ္စက အရာရှိကြီးများကို ခေါင်းကိုက်စေခဲ့သည်။ကမ်ပီယံသည် ယောလ်တာ သဘောတူညီချက်ကို လက်မခံ ကြောင်း သတင်းစာဆရာများက သိထားကြသည်။ သူက အမေရိကန်တို့ သည် အနှေးနှင့်အမြန်ဆိုသလို ရုရှတို့နှင့် ရင်ဆိုင်ရတော့မည်ဖြစ်သဖြင့် အမေရိကန်စစ်တပ်သည် ဘာလင်မှ မော်စကိုအရောက် တောက်လျှောက်ဆက်လက်ချီတက်သွားသင့်သည်ဟုပင် တစ်ကြိမ် နှစ်ကြိမ်ခန့်

ပြောခဲ့ဖူးသည်။ ထို့ကြောင့် ကမ်ပီယံတစ်ယောက် အရက်နင်းကန်သောက်နေသည်ကိုလည်းကောင်း၊ ကမ်ပီယံ၏ ကိုယ်ရေးလက်ထောက် ဒုဗိုလ်မှူးကြီး ဂျိမ်းစ်ဟန်ဆယ်ဖရင့်ချ်၏ အပေါ်နှုတ်ခမ်းအပေါ်ဘက်တွင် ချွေးစို့ လာသည်ကိုလည်းကောင်း၊ ကမ်ပီယံ၏ ညာဘက်တွင်ရှိသော ဗြိတိသျှ စစ်ဗိုလ်၏ မသက်မသာမျက်နှာထားကိုလည်းကောင်း အကဲခတ်ရင်း

စောင့်ကြည့်နေကြသည်။ ထိုပုဂ္ဂိုလ်များသည် အပျက်မြင်သမားများ မဟုတ်ကြပါ။ သို့ရာတွင် ဒုတိယကမ္ဘာစစ်ကြီး ပြီးစီးသွားပြီဖြစ်သဖြင့် ယခုအချိန်တွင် သတင်းကောင်းရရှိရေးမှာ အဓိကဖြစ်နေသည်။ ကမ်ပီယံ ပြုလုပ်သမျှသည် သတင်းကောင်းဖြစ်နိုင်စရာရှိသည်။

ဂျိမ်းစ်(ဂျင်မ်)ဖရင့်ချ်သည် သူ့ရှေ့တွင်ရှိသော ဝိုင်အရက်ခွက်ကို မသောက်ဘဲ ကမ်ပီယံအား စာနယ်ဇင်းဆရာများက အကဲခတ်နေကြ သည်ကို စောင့်ကြည့်ရင်း သူ့ကုလားထိုင်ပေါ်တွင် ဆောင့်ကြောင့်ကြီးထိုင် နေသည်။ သူသည် အဆောက်အအုံအပြင်ဘက်သို့ တစ်ကြိမ်ရောက်ခဲ့ ပြီးလေပြီ။ သူက ကမ်ပီယံ၏ယာဉ်မောင်း ဆာဂျင်ကြီး ဘောဘဲဟောင်း ဝပ်အား သူက အချက်ပြလိုက်သည်နှင့်တစ်ပြိုင်နက် မော်တော်ကားကို ခပ်မြန်မြန်မောင်းထွက်ဖို့ အဆင်သင့်ဖြစ်နေစေရန် မှာကြားခဲ့ပြီး ဖြစ် သည်။ ဟောင်းဝပ်သည် တံခါးပေါက်ဝနား၌ ရှိနေပြီး ဖရင့်ချ်က သူ့ဆီ သို့ လှမ်းလှမ်းကြည့်နေသည်။ ဟောင်းဝပ်က ခပ်ဖြည်းဖြည်းခေါင်းညိတ်ပြ လိုက်၏။ ဘုရားသခင် ကျေးဇူးကြောင့် သည်ဘက်မှာ အဆင်ပြေနေပေ သေးသည်။ သူ့သူငယ်ချင်းမိတ်ဆွေများနှင့် သူ့ရန်သူများ သောက်သောက် လဲသေခဲ့ကြသည်ကို မြင်ခဲ့ရသော ငါးနှစ်တာနောက်ပိုင်းတွင် ဖရင့် သည် ဘုရားသခင်ထံ၌ သိပ်ဆုတောင်းလေ့မရှိတော့ပါ။ သူအကျင့်ပျက် သွားခဲ့သည်။ သို့ရာတွင် သည်ကနေ့ည၌ ဗိုလ်မှူးချုပ်ကမ်ပီယံ ရုပ်ပျက် ဆင်းပျက်မသောင်းကျန်းပါစေနှင့်ဟု တိုးတိုးတိတ်တိတ်ကလေးကျိတ်၍“ဆုတောင်းနေမိသည်။ ကမ်ပီယံသည် မသင့်လျော်သောအချိန်တွင် မပြော သင့်သောစကားများကို မသင့်လျော်သော ပုဂ္ဂိုလ်များအား ပြောကြားခဲ့ သောကြောင့် မဟာမိတ်တပ်ပေါင်းစု၏ စစ်သေနာပတိက ကမ်ပီယံအား အရေခွံခွာပစ်သကဲ့သို့ ခပ်ကြမ်းကြမ်း အရေးယူခဲ့ပုံများကို ဖရင့်မျှော်မြင် ခဲ့ဖူးပါသည်။ သူ နောက်တစ်ကြိမ် ထပ်မမြင်လိုတော့ပါ။ ယခုလောလော ဆယ်တွင် ကမ်ပီယံသည် အိုက်ဆင်ဟောင်ဝါနှင့် အဆင်မပြေဖြစ်နေရာ နောက်တစ်ကြိမ် စကားပြော ထပ်မှားသွားပါက ကြီးကြီးကျယ်ကျယ် အရေးယူခံရပေလိမ့်မည်။ စစ်ကြီး ပြီးဆုံးသွားချိန်တွင် အစစအရာရာ သည် “နိုင်ငံရေး’ နယ်ပယ်ထဲသို့ ရောက်ရှိသွားကြသည်။ နိုင်ငံရေးနယ် ပယ်ထဲသို့ ရောက်ရှိနေသော ကမ်ပီယံသည် ယခုအနေအထားနှင့် အံမဝင် ခွင်မကျဖြစ်နေလေသည်၊

အိုက်ဆင်ဟောင်ဝါ၏ ရုံးအဖွဲ့မှ ဗိုလ်ချုပ်က မက်တတ်ရပ်လိုက် ပြီး အားလုံးငြိမ်သွားအောင် သူ့ဖန်ခွက်ကို ဓားတစ်ချောင်းနှင့် ခေါက် လိုက်သည်။ ဆူညံနေသော အသံများသည် လေသံနှင့် ခပ်တိုးတိုးစကား ပြောကြတော့သည့်အဆင့်သို့ ရောက်အောင် ငြိမ်ကျသွားချိန်တွင် ထိပ် ဆုံးစားပွဲ၏အလယ်၌ ထိုင်နေသော ဗြိတိသျှဗိုလ်ချုပ်ကြီးအား မိန့်ခွန်း ပြောကြားပေးပါရန် သူက မေတ္တာရပ်ခံလိုက်လေသည်။ဗိုလ်ချုပ်ကြီး ဆာအန်သိုနီရှပ် မတ်တတ်ရပ်လိုက်စဉ် အားလုံးက ဝိုင်း၍ ဩဘာပေးလိုက်ကြသည်။ ဗြိတိသျှစစ်ဗိုလ်များကမူ အသံများ အက်ကွဲလာသည်အထိ အော်ဟစ်၍ အားပေးလိုက်ကြ၏။ ဗိုလ်ချုပ်ကြီး ရှပ်က “ဒုတိယကမ္ဘာစစ်အတွင်းက မဟာမိတ်တို့၏ အားသွန်ခွန်စိုက် ကြိုးပမ်းမှုများနှင့် ရဲရင့်စွာတိုက်ခိုက်ခဲ့ကြပုံများကို အနိမ့်အမြင့်မရှိသော နှာခေါင်းသံဖြင့် မိန့်ခွန်းပြောကြားလေတော့ရာ ကမ်ပီယံကို အကဲခတ် နေသော ဖရင့်ချ်၏နားထဲတွင် တဝီဝီနှင့် နားငြီးစရာဖြစ်လာရလေသည်။ ဗိုလ်ချုပ်ကြီး ဆာအန်သိုနီရှပ်သည် ပြောရင်းနှင့် ပို၍ စိတ်ပါလက်ပါ ဖြစ်လာသည်။ ကမ်ပီယံက သူ့ဘယ်ဘက်၌ရှိသော ဗြိတိသျှစစ်ဗိုလ်တစ် ယောက်အား တစ်ခုခုလှမ်းပြောလိုက်ရာ ထိုပုဂ္ဂိုလ် ခေါင်းထောင်လာ တော့သည်။ ထိုပုဂ္ဂိုလ်၏မျက်နှာပေါ်တွင် သဘောမကျသော အရိပ်အ ယောင်များကို ထင်ထင်ရှားရှားမြင်တွေ့နေရသည်။ ဒုက္ခပါပဲဟု ဖရင့်ချ် ကစိတ်မသက်မသာနှင့် တွေးလိုက်၏။

ဗိုလ်ချုပ်ကြီးရှပ်၏ မိန့်ခွန်းကို လိုက်၍ ရေးကူးဟန်ဆောင်နေ သော သတင်းစာဆရာများဆီသို့ ဒုဗိုလ်မှူးကြီး ဖရင့်ချ်လှမ်းကြည့်လိုက် ၏။ ဆီလ်မောလ်ဒင်သည် သူ့စာရေးစက္ကူကတ်ပြားပေါ်၌ ဟိုခြစ် သည့် ခြစ်လုပ်နေသည်ကို တွေ့လိုက်ရသည်။ ဆီလ်မောလ်ဒင် ရေးဆွဲသောတပ်မတော်သားများ၏ ကာတွန်းရုပ်ပုံများနှင့်ပတ်သက်၍ ကမ်ပီယံကမကျေနပ်သဖြင့် အိုက်ဆင်ဟောင်ဝါထံ တိုင်ကြားခဲ့ဖူးသည်။ ဆီလ်မောလ်ဒင်ကလည်း လက်တုံ့ပြန်သည့်အနေနှင့် ဆိုးဆိုးရွားရွား ကာတွန်းပုံတစ်ပုံ ရေးဆွဲ၍ ကမ်ပီယံကို အပုပ်ချခဲ့ဖူးသည်။ 'ဆီလ်ရေ၊ မင်း ခေါင်းမော့ မကြည့်လိုက်ပါနဲ့ကွာ'ဟု ဖရင့်ချ်က ကျိတ်၍ ဆုတောင်းလိုက်ပြန်၏။

ဗိုလ်ချုပ်ကြီးရှပ်က“ပူးပေါင်းဆောင်ရွက်မှုစိတ်ဓာတ်နှင့် ပစိဖိတ် ဒေသမှ တိုက်ပွဲများအကြောင်း' ဆက်မိန့်ခွန်းခြွေနေသည်။ ဗိုလ်ချုပ်ကြီး များ၏ မိန့်ခွန်းများကို နားရည်ဝနေသော ဖရင့်ချ်က ထိုမိန့်ခွန်းသည် တော်တော်နှင့် ပြီးဆုံးလိမ့်မည်မဟုတ်ကြောင်း သိလိုက်သည်။ မြန်မြန် အဆုံးသတ်ပါတော့ဗျာဟု ဖရင့်ချ်က တွေးလှိုက်သည်။ ကမ်ပီယံသည်

ဘရန်ဒီခပ်များများကို ဖန်ခွက်ထဲသို့ လောင်းထည့်ပြီး ရေသောက်သလို သောက်နေလေသည်။ ဖရင့်ချ်က ခေါင်းခါလိုက်မိ၏။ သည်ပုဂ္ဂိုလ်သည် အံ့သြစရာကောင်းသော စစ်သားစစ်စစ်တစ်ယောက်ဖြစ်သည်။ သူသည် လူစွမ်းကောင်းတစ်ယောက်ဖြစ်ကြောင်း အငြင်းပွားစရာမလိုသူပင် ဖြစ် သည်။ သို့တိုင်အောင် သူသည် ထိပ်ပိုင်းမှ ပုဂ္ဂိုလ်များအကြားတွင် ထူးထူး ခြားခြားလူကြိုက်နည်းသူဖြစ်နေရသည်။ သူသည် မြောက်အာဖရိကနှင့် စစ်စလီကျွန်းတို့တွင် ရွပ်ရွပ်ချွံချွံဦးဆောင်၍ တိုက်ခိုက်ပေးခဲ့သည့်တိုင်အောင်၊ သူသည် တတိယဂျာမန်နိုင်ငံတော်အတွင်းပိုင်းသို့ နက်နက်ရှိုင်း ရှိုင်းရောက်ရှိအောင် အံ့ဩဖွယ်ရာ ထိုးဖောက်ဝင်ရောက်နိုင်ခဲ့သဖြင့် ` တစ်ကမ္ဘာလုံး၏ချီးကျူးမှုကို ခံယူခဲ့ရသည့်တိုင်အောင်၊ အမေရိကန်တပ်မတော်တစ်ခုလုံးတွင် စစ်သေနင်္ဂဗျူဟာကို သူ့လောက် တစ်ဖက်ကမ်းခပ် တတ်မြောက်သူမရှိသည့်တိုင်အောင်၊ ဆုံးဖြတ်ချက်များကို နောက်ဆုံး ချမှတ်ပေးနိုင်သူများ၏အမြင်၌ သူသည် စိတ်ပျက်စရာကောင်းသူ၊ ဒုက္ခပေးသူတစ်ယောက်အဖြစ် ယူဆခံနေရသည်။ သူသည် စစ်ဖြစ်နေသည့် ကာလတွင် လက်မလွှတ်နိုင်သော ပုဂ္ဂိုလ်တစ်ယောက်ဖြစ်သော်လည်း အခု စစ်ကြီးပြီးဆုံးသွားချိန်တွင် အလွန်ဆိုးရွားသော ဝန်ထုပ်ဝန်ပိုးကြီး တစ်ခု ဖြစ်နေရလေပြီ။ '

ဖရင့်ချ်သည် ဗိုလ်ချုပ်ကြီးရှပ်၏ ပို၍ ပြတ်ပြတ်သားသားရှိလာ သော လေသံကိုကြားလိုက်ရသဖြင့် မိန့်ခွန်းပြီးဆုံးတော့မည်ဖြစ်ကြောင်း သိလိုက်ရသည်။ သူ့မိန့်ခွန်းကို ငြီးငွေ့နေကြသည်မှာ သိသာလှသည်အပြင် စာနယ်ဇင်းဆရာအချို့သည် သူ့မိန့်ခွန်းကို လုံးဝနားမထောင်ကြ

တော့ဘဲ အချင်းချင်းဗြောင်စကားပြောဆိုနေကြလေပြီ။ . “သည်တော့ ကျုပ်တို့က သာယာသော အနာဂတ်ကာလကို မျှော်မှန်းရင်း...”

ဗြိတိသျှဗိုလ်ချုပ်ကြီးက တိုးတိုးတီးတိုး သဖန်းပိုးလုပ်နေသော အသံများကို လွှမ်းသွားအောင် အသံမြှင့်၍ ပြောလိုက်၏။

“နာဇီတွေကို တိုက်ပွဲမှာ ရဲရဲဝံ့ဝံ့ရင်ဆိုင်ပြီး နာဇီတပ်တွေပျက် ပြုန်းသွားအောင်၊ ပြီးတော့ နယ်စပ်ကို ပြန်ရောက်တဲ့အထိ ပြန်ဆုတ်သွား ရအောင် ဇွဲနပဲနဲ့ မလျှော့ဘဲတိုက်ခိုက်ခဲ့ကြတဲ့ ဆိုဗီယက်တပ်မတော်ကို ကျုပ်က ဆုတောင်းပြီး အရက်တစ်ခွက် သောက်ပါ့မယ်”

သူက ဖန်ခွက်ကို မြှောက်လိုက်ရာ အခန်းထဲရှိ ပုဂ္ဂိုလ်အားလုံး မတ်တတ်ရပ်လိုက်ကြပြီး အနီးအနားမှ ပုဂ္ဂိုလ်များနှင့် ဖန်ခွက်ချင်းထိ၍ ခပ်တိုးတိုးဆုတောင်းလိုက်ကြသည်။ ဘာသာပြန်သူများက ဗိုလ်ချုပ်ကြီး ရှပ် ပြောလိုက်သည်စကားကို အဓိပ္ပာယ်ပြန်၍ ပြောပြလိုက်ကြသည်။ ဤတွင် တစ်မျက်နှာလုံး ပြုံးနေသော ရုရှအရာရှိများသည် ထိုင်ရာမှ ခုန်ထလိုက်ကြပြီးနောက် သူတို့၏ ဖန်ခွက်များကို ဗိုလ်ချုပ်ကြီးရှပ်၏ ဖန် ခွက်နှင့်ထိလိုက်ကြ၏။ ပြီးတော့ လူအပြည့်ရှိနေသော သူတို့ရှေ့ဘက်မှ စားပွဲများဆီသို့ ပြုံးပြရင်း ခေါင်းညိတ်လိုက်ကြသည်။ ထိပ်ဆုံးစားပွဲဆီ သို့ မျက်နှာမူနေကြသောပြုံးနေသည့်မျက်နှာများနှင့် မြှောက်ထားကြသော လက်များအကြားမှ ကမ်ပီယံကို လှမ်းမြင်လိုက်ရသော ဖရင့်ချ် ဟီးချ၍အော်လိုက်မိ၏။ ကမ်ပီယံသည် သူ့အားဆွဲထူမည့်ပုဂ္ဂိုလ်ကို အန်တုရန် စောင့်နေသည့်အလား သူ့ကုလားထိုင်ပေါ်တွင် ဆက်ထိုင်နေသည်။ ဖရင့်ချ်သည် ကုလားထိုင်ပေါ်မှ ထလိုက်ပြီးနောက် ဆာဂျင်ကြီးဟောင်းဝပ်အား မော်တော်ကားကို တံခါးပေါက်ဝသို့ မောင်းယူခဲ့ရန်နှင့် စက်ကို အဆင်သင့်နှိုးထားရန် အချက်ပြလိုက်သည်။ ဖရင့်ချ်သည် သတိကြီးစွာ

ထားပြီး စားပွဲကိုကွေ့ပတ်၍ တပ်တော်မှူးနောက်ဘက်သို့ တိုးကပ်သွား သည်။ သို့ရာတွင် ဖရင့်ချ်တစ်ယောက် ကမ်ပီယံအနားသို့ မရောက်မီကမ်ပီယံ ဘယ်ဘက်ရှိ ဗြိတိသျှစစ်ဗိုလ်က ခေါင်းငုံ့ပြီး သူ့အား စကား ပြောလိုက်သည်ကို ဖရင့်ချ် မြင်လိုက်ရသည်။

ဗြိတိသျှစစ်ဗိုလ်က ပြောလိုက်၏။ ..

“ခင်ဗျားက ရုရှတွေရဲ့ ကျန်းမာရေးအတွက် ဆုမတောင်းတော့ ဘူးလား ခင်ဗျာ..”

“ဘယ်တော့မှ ဆုမတောင်းဘူးကွ..”

ကမ်ပီယံက ခပ်ငေါက်ငေါက်ပြန်ပြောလိုက်၏။ သူ့အသံနေ အသံထားက အခန်းထဲ၌ ကြွက်စီကြွက်စီဖြစ်နေသော အသံဗလံများကို လွှမ်းမိုးသွားပြီး ငြိမ်သက်သွားစေခဲ့သည်။ လှုပ်ရှားမှုများသည်လည်း လမ်းခုလတ်တွင် ရပ်တန့်သွားကြလေသည်။ ဦးခေါင်းအားလုံးက ထိပ်စားပွဲ ဆီသို့ လှည့်ကြည့်လိုက်ကြ၏။ ဗြုန်းခနဲ ငြိမ်ကျသွားမှုကြောင့် ကမ်ပီယံ

နောက်ထပ်ပြောလိုက်သော စကားလုံးများကို အားလုံးပြတ်ပြတ်သားသား ကြားလိုက်ကြရသည်။

“ကျုပ်က သူတို့ကျန်းမာရေးအတွက် ဆုတောင်းပေးမယ့်အစား ကိုယ့်လည်ပင်းကို ကိုယ်ဖြတ်ပစ်လိုက်မယ်လို့ အဲဒီရုရှတွေကို ပြောလိုက် စမ်း၊ ကျုပ်အသက် သိပ်မကြီးသေးခင် သူတို့နဲ့ စစ်တိုက်ရလိမ့်ဦးမယ်ထင်တယ်လို့လည်း ပြောလိုက်စမ်း၊ ပြီးတော့ ကျုပ်က ကျုပ်နဲ့ဖက်ပြိုင်ပြီး စစ်တိုက်ရမယ့်လူတွေအတွက် ဘယ်တော့မှ အရက်မသောက်ဘူးလို့ ပြောလိုက်”

ထိတ်စရာ လန့်စရာကောင်းလောက်အောင် ငြိမ်ကျသွားတော့ သည်။ ဖရင့်ချ်က သူ့လှုပ်ရှားမှုကို လူမသိစေဘဲနှင့် ကမ်ပီယံအနားသို့ တိုးကပ်သွားရန် ကြိုးစားလိုက်သည်။ သို့ရာတွင် တင်းမာနေသော ထို အခြေအနေကို ဖျက်ဆီးပစ်လိုက်ပါက “ရုတ်ရုတ်သဲသဲဖြစ်လာလိမ့်မည် ဟု သူ့စိတ်ထဲက တစ်ထစ်ချစိုးရိမ်နေမိသည်။ ကမ်ပီယံ လှမ်းစကားပြော လိုက်သောစကားပြန်သည် မျက်နှာဖြူဖွေးသွားပြီး ကယ်ဆယ်မည့်သူကို ဘယ်ညာလှည့်၍ ရှာဖွေလိုက်၏။ ကယ်မည့်သူ ဝေးလေပြီ။

“ချီးမှပဲ၊ သူ့ကို ပြောပြလိုက်စမ်း” ကမ်ပီယံက အော်ငေါက်ပစ်လိုက်၏။

 “ဒါ အမိန့်ပေးနေတာကွ..' “ဗိုလ်ချုပ်ကြီး”

ဗြိတိသျှစစ်ဗိုလ်က ကမ်ပီယံ၏ လက်ကိုကိုင်ရင်း ပြောလိုက်၏။

ကမ်ပီယံက သူ့ကို ယင်ကောင်တစ်ကောင်ပမာ ခါချပစ်လိုက်၏။ ပြီးနောက် မတ်တတ်ရပ်လိုက်ရာ အခြားပုဂ္ဂိုလ်များထက် မြင့်သွားလေတော့သည်။ စည်ပိုင်းသဏ္ဌာန် ရင်ဘတ်တစ်ခုလုံး ဖုံးအုပ်သွားအောင် တံဆိပ်များချိတ်ဆွဲထားသော ရာထူးအမြင့်ဆုံး ရုရှဗိုလ်ချုပ်တစ်ယောက် ၏ နားရွက်နားသို့ကပ်၍ စကားပြန်က တိုးတိုးကလေး ပြောပြနေစဉ် ကမ်ပီယံက ရုရှတို့ကို ဒေါသနှင့် စိုက်ကြည့်နေသည်။ ရုရှဗိုလ်ချုပ်၏ မျက်လုံးများသည် ပြူးကျယ်လာကြသလို နှလုံးခုန်သံနှစ်ချက်ခန့်ကြာအောင် သူတို့နှစ်ယောက်သည် တစ်ယောက်ကိုတစ်ယောက်က စိုက်ကြည့် နေကြပြီးနောက် ရုရှဗိုလ်ချုပ်က စားပွဲကို လက်နှင့်ခပ်နာနာပုတ်ရင်း စကားပြန်ကို ရုရှဘာသာနှင့် တစ်စုံတစ်ရာကို ပြောလိုက်သည်။ စကားပြန်က ခေါင်းညိတ်ပြလိုက်ပြီးနောက် သတိအနေအထားနှင့်'မတ်တတ် ပြင်လုပ်ရင်း ကမ်ပီယံကို ပြောလိုက်၏။

“ဗိုလ်ချုပ်ကလည်း ခင်ဗျားအပေါ်မှာ အဲဒီသဘောထားအဝိုင်း သူထပ်မျှထားရှိပါတယ်တဲ့၊ သည်တော့ ဘာပဲဖြစ်ဖြစ် အရက်တစ်ခွက်လှုပ်လှုပ်ရှားရှားမလုပ်နိုင်ခင် ကမ်ပီယံက ဟက်ဟက်ပက်ပက်

ရယ်ချလိုက်သလို နောက်တစ်စက္ကန့်အကြာတွင် ရုရှဗိုလ်ချုပ်ကလည်း ရယ်ချလိုက်လေတော့သည်။ သူတို့နှစ်ယောက်၏ ရယ်မောမှုက တင်းမာ မှုကို ပျောက်ကွယ်သွားစေခဲ့သဖြင့် လူတိုင်းစတင်၍ ရယ်မောကြလေပြီ၊ မြတ်စွာဘုရား ... ကျုပ်ကတော့ တတိယကမ္ဘာစစ် စဖြစ်ပြီလို့ ထင် လိုက်မိတာဗျဟု ပြောလိုက်သော သတင်းစာဆရာတစ်ယောက်၏အသံကို ဖရင့်ခ်ကြားလိုက်ရသည်။ “ကျုပ်ကလည်း အဲဒီလို ထင်လိုက်မိတာ ပါဗျာ” ဖရင့်ချ်က တွေးလိုက်ပြီး ကမ်ပီယံ၏နောက်ဘက်သို့ တိုးကပ်သွား လေတော့သည်။

ဖရင့်ချ်က သံမှန်နှင့် ပြောလိုက်၏။

“ကျွန်တော့်ကို ခွင့်ပြုပါခင်ဗျာ၊ ဗိုလ်ချုပ်ကြီးရဲ့ မော်တော်ကားအပြင်ဘက်မှာ ရောက်နေပါပြီ”

ကမ်ပီယံက သူ့ကို စူးစူးဝါးဝါးမျက်နှာထားနှင့် မော့ကြည့်လိုက်၏။ သို့ရာတွင် ဖရင့်ချ်က နောက်မဆုတ်ပါ။