မောင်ပေါ်ထွန်း - မကြံကောင်းမစည်ကောင်း

မူရင်းစာရေးဆရာ၏အမှာ

          “မိုးလေဝသအကြောင်းကို လူတိုင်း ပြောနေကြသည်။ သို့သော်လည်း မိုးလေ ၀သကောင်းအောင် ဘယ်သူမှ ဘာမှ မလုပ်နိုင်ကြ” ဟူသည့် ဆိုရိုးစကားရှိသည်။

          ထိုစကား မမှန်တော့ပါ။ ယခုအခါ ကမ္ဘာ့အင်အားကြီး နှစ်နိုင်ငံတို့မှာ ကမ္ဘာ တစ်ဝန်းမှ မိုးလေဝသအခြေအနေကို ထိန်းချုပ်နိုင်သည့် စွမ်းအားတွေ ရှိနေကြပြီ။ အမေရိကန်နိုင်ငံနှင့် ရုရှနိုင်ငံတို့ ဖြစ်သည်။ အခြားနိုင်ငံတွေကလည်း အမီလိုက်နိုင်အောင်

          သွေးရူးသွေးတန်း ကြိုးစားနေကြသည်။ လျှပ်စစ်စွမ်းအင်ကို အာကာသထဲသို့ ပို့လွှတ်ခြင်းအပါအဝင် သဘာဝဓာတ်စင် တို့၏ အစွမ်းသတ္တိကို လေ့လာစူးစမ်းမှု လုပ်ငန်းကို ၁၈၀၀ပြည့်လွန် နှောင်းပိုင်းကာလမှ စ၍ သိပ္ပံပညာရှင် နီကိုလာတေဆလာ'ကစတင်ပြုလုပ်ခဲ့သည်။ ယခုအခါ ယင်းလေ့လာ စူးစမ်းမှုသည် လက်တွေ့အကောင်အထည် ပေါ်လာခဲ့ပြီ။

          အကျိုးဆက်ရလဒ်ကတော့ ကြီးမားလှသည်။ မိုးလေဝသကို ကမ္ဘာလောက ကြီး၏ ကောင်းကျိုးအတွက် အသုံးပြုနိုင်သလို ကမ္ဘာဖျက်လက်နက်အဖြစ်လည်း အသုံးချ နိုင်ခြင်းပင် ဖြစ်သည်။

          “Nicola Tesla (1956-1943) ဆာဘီးယားနိုင်ငံဖွား အမေရိကန်လျှပ်စစ်အင်ဂျင်နီယာ နှင့် ရူပဗေဒသိပ္ပံပညာရှင်း၊ ပြန်လှန်လျှပ်စီး” (၁၈၈၁)ကို ရှာဖွေတွေ့ရှိ။ ရေဒီယိုနှင့် လျှပ်စစ်နည်းပညာ တိုးတက်ရေးအတွက် ဆင့်ပွားကိရိယာများနှင့် နည်းစနစ်ပေါင်း အမြောက်အမြားကို တီထွင်ခဲ့။

          ၁၉၆၉ခုနှစ်တွင် တီထွင်မှုတစ်ခုကို အမေရိကန်မူပိုင်ခွင့်မှတ်ပုံတင်ရုံးက မူပိုင်ခွင့်ပေးခဲ့သည်။ ယင်းမှာ ပင်လယ် ရေငွေ့ အတုများကို ကမ္ဘာ့လေထုအတွင်းသို့ ပို့လွှတ်ခြင်းစနစ်ကို တီထွင်ခြင်းအတွက် ဖြစ်သည်။

          ၁၉၇၁ခုနှစ်တွင် ဂြိုဟ်များ၏ မျက်နှာပြင်ဧရိယာများအား အားပြင်းသော ဓာတ်ရောင်ခြည် ပေးခြင်းစနစ်ကို တီထွင်ခြင်းအတွက် ဝက်စတင်ဟောက်စ် အီလက်ထရောနစ်ကော်ပိုရေးရှင်းအား မူပိုင်ခွင့်လက်မှတ် ထုတ်ပေးခဲ့သည်။

         ၁၉၇၀ပြည့်လွန် အစောပိုင်းကာလတွင် စစ်တပ်က သုတေသနပြုနေသည့် မိုးလေဝသနှင့် ရာသီဥတု ပြုပြင် ပြောင်းလဲရေးလုပ်ငန်းကို အမေရိကန်အောက်လွှတ်တော်ခန့် သမုဒ္ဒရာနှင့် ပြည်တွင်းမိုးလေဝသ ပတ်ဝန်းကျင်သန့်ရှင်းရေးကော်မတီက ကြားနာစစ်ဆေးခဲ့ရာ၊ ကာကွယ်ရေးဌာနတွင် နျူကလီးယားလက်နက်များနှင့် တွဲဖက်၍ အသုံးပြုနိုင်သည့် ဒီရေလှိုင်းများကို တီထွင်ရန် စီမံကိန်းရှိကြောင်း သိရှိခဲ့ရသည်။

          ကမ္ဘာဖျက်လက်နက်ဆန်းများကို အပြိုင်အဆိုင် ထုတ်လုပ်မှုအန္တရာယ်သည် အမေရိကန်နှင့် ရုရှတို့အကြား အလွန်အမင်း ကြီးမားလာခဲ့ခြင်းကြောင့် ရန်ပြုရန် ရည်ရွယ်ချက်ဖြင့် မိုးလေဝသ ပြုပြင်ပြောင်းလဲခြင်းကို ဆန့်ကျင်ဟန့်တားသည့် ကုလသမဂ္ဂသဘောတူစာချုပ်ကို အမေရိကန်နှင့် ရုရှတို့က ၁၉၇၇ခုနှစ်တွင် လက်မှတ်ရေးထိုးခဲ့ကြသည်။

          သို့သော်လည်း ယင်းစာချုပ်သည် မိုးလေ၀သပြုပြင်ပြောင်းလဲမှု စမ်းသပ်ခြင်းလုပ်ရပ်ကို မတားဆီးနိုင်ခဲ့ပါချေ။ ၁၉၇၈ခုနှစ်တွင် မိုးအတုရွာသွန်းခြင်းကို ဝစ်စ်ကွန်ဆင်ပြည်နယ် မြောက်ဘက်၊ ခရိုင်ခြောက်ခု၌ စမ်းသပ်ပြုလုပ်ခဲ့သည်။ တစ်နာရီ ၁၇၅မိုင်နှုန်း မုန်တိုင်းတိုက်ခတ်မှုကြောင့် ဒေါ်လာသန်း ၅၀ဖိုးခန့် ပျက်စီးဆုံးရှုံးခဲ့ရသည်။ တစ်ချိန်တည်းတွင် ရုရှားကလည်း အလားတူ စမ်းသပ်မှုများကို လုပ်ကိုင်လျက်ရှိသည်။

          ၁၉၉၂ ခုနှစ်တွင် "ဝေါလ်စထရိဂျာနယ်သတင်းစာကြီး၏ ဖော်ပြချက်အရ “အီလတ်အင်တဲလီးဂျင့်စ် တက္ခနိုလိုဂျီစ်” အမည်ရှိ ရုရှားကုမ္ပဏီတစ်ခုက “မိုးလေဝသကို အမိန့်ပေးမည်”ဟူသော ကြွေးကြော်သံကို သုံးလျက် မိုးလေဝသထိန်းချုပ်ရေးစက်ကိရိယာများကို ထုတ်လုပ်ရောင်းချနေကြောင်း သိရှိရသည်။ ထိုစက်ကိရိယာများကို ကမ္ဘာ့ နိုင်ငံတိုင်းက ဝယ်ယူနိုင်သည်။ ဆိုခဲ့သည့်အတိုင်း အင်အားကြီးနှစ်နိုင်ငံစလုံးက မိုးလေဝသထိန်းချုပ်ရေး စမ်းသပ်မှုများကို ဆက်လက်လုပ်ကိုင် နေကြသောကြောင့် မိုးလေဝသနှင့် ရာသီဥတု ပြောင်းလဲမှုတွေ ဖြစ်ပေါ်လာသည်။ ၁၉၈၀ပြည့်လွန် အစောပိုင်းက ထူးဆန်းသော မိုးလေဝသအခြေအနေကို စာနယ်ဇင်းများက အောက်ပါအတိုင်း သတင်းပေးခဲ့ကြသည်။

          'ကာလီဖိုးနီးယားပြည်နယ်၊ ကမ်းရိုးတန်းမှ မိုင် ၈ဝဝခန့်အကွာတွင် ပုံမှန်ထက်လွန်ကဲသည့် လေထုဖိအား လွန်ခဲ့သည့် နှစ်လခန့် တည်ရှိခဲ့သောကြောင့် ပစိဖိတ်သမုဒ္ဒရာမှ စွတ်စိုလေငွေ့ ပုံမှန်ရွေ့လျားမှုကို ပိတ်ဆို့ထားခဲ့သည်” ။

(“တိုင်း” မဂ္ဂဇင်း၊ ဇန်နဝါရီ-၁၉၈၁)

ပုံမှန်ထက်လွန်ကဲသော လေထုဖိအား ရပ်ဝန်းတစ်ခုသည် ကမ္ဘာ့အနောက်ခြမ်းမှ အရှေ့ခြမ်းတစ်လျှောက်ပုံမှန်မိုးလေဝသအခြေအနေကို တားဆီးပိတ်ဆို့ထားသကဲ့သို့ ဖြစ်ပေါ်နေခဲ့သည်” 

(နယူးယောက်တိုင်းမ်စ်” သတင်းစာ၊၂၉-၇-၁၉၉၃)

          ဤဝတ္ထုထဲတွင် ဖော်ပြထားသော မိုးလေဝသကပ်ဘေးအားလုံးသည် အမှန်တကယ် ဖြစ်ပါ်ခဲ့ကြသည်။ မိုးလေဝသသည် အကြီးမားဆုံး စွမ်းအားဖြစ်ကြောင်း ကျွန်တော်တို့အားလုံး သိကြသည်။ မိုးလေဝသကို ထိန်းချုပ်နိုင် သူသည်... 

          - မိုးသီးမုန်တိုင်းများနှင့် လေဆင်နှာမောင်းများကို ဖန်တီးပြီး ကမ္ဘာ့စီးပွားရေးလောကကြီး တစ်ခုလုံးကိုဖရိုဖရဲဖြစ်အောင် လုပ်နိုင်သည်။

          -မိုးခေါင်ရေရှားအောင် ဖန်တီးပြီး ကောက်ပဲသီးနှံအားလုံးကို ဖျက်ဆီးပစ်နိုင်သည်။ 

          -မြေငလျင်လှုပ်ခြင်း၊ ဟာရီကိန်းနှင့် ဆူနာမီမုန်တိုင်း တိုက်ခတ်ခြင်းတို့ကို လုပ်နိုင်သည်။ -ကမ္ဘာ့နိုင်ငံအသီးသီးမှ လေယာဉ်ကွင်းများ ပိတ်သွားအောင် ဖန်တီးနိုင်သည်။

          -ရန်သူတပ်၏ စစ်မြေပြင်များကို ဖျက်ဆီးပစ်နိုင်သည်။ 

          အကယ်၍... ကမ္ဘာ့နိုင်ငံရေး ခေါင်းဆောင်ကြီးတစ်ဦးက “မိုးလေဝသအကြောင်းကို လူတိုင်းပြောနေကြတယ်၊ ဒါပေမဲ့ မိုးလေဝသကောင်းအောင် ဘယ်သူမှ ဘာမှမလုပ်ကြဘူး” ဟူ၍ ပြောခဲ့သည်ရှိသော် ကျွန်တော်တို့ လူသားတွေ အားလုံး ကိုယ်ကျန်းမာ၊ စိတ်ချမ်းသာစွာဖြင့် အိပ်ကောင်းခြင်း အိပ်နိုင်ကြပါလိမ့်မည်။

           ဟိသစ္စံ- ထိုစကားသည် မုချအမှန်ဖြစ်ပါ၏။

ဆစ်ဒနီရှယ်လဒန်

ဇာတ်လမ်းအစ

ဂျာမနီ၊ ဘာလင်မြို့

          ယနေ့သည် သူ့အတွက် လူ့လောကတွင် နောက်ဆုံးနေ့ဖြစ်မည် ဆိုတာကို ဆွန်ဂျာဗားဘရပ် နည်းနည်းကလေးမျှ မတွေးမိ။ သူသည် အန်တာဒင်လင်ဒင်လမ်းမကြီး ၏ပလက်ဖောင်းပေါ်တွင် ခြေချင်းလိမ်နေသည့် နွေရာသီ ကမ္ဘာလှည့်ခရီးသည်တွေကြားမှ တွန်းတိုးရင်း မြန်မြန်ထက်ထက် လျှောက်လာခဲ့သည်။ ကြောက်မနေနဲ့၊ စိတ်ကို ငြိမ်ငြိမ်ထား။ သူ့ကိုယ်သူ အားဆေးတင်လိုက်သည်။- မကြာခင်ကလေးက သူ့ ကွန်ပျူတာပေါ်တွင် ပေါ်လာသည့် ခင်ပွန်းသည် ဖရန့်၏ မက်ဆေ့စကားက သွေးလန့်စရာကြီး။

          ဆွန်ဂျာ.. အမြန်သာပြေးတော့၊ အာတေမီးရှားဟိုတယ်ကို သွား၊ နောက်ထပ် မက်ဆေ့ဂျ်မရမချင်းကွန်ပျူတာပေါ်မှ မက်ဆေ့ ရုတ်တရက် ပြတ်တောက်သွားသည်။ ဖရန့်က သူ့စကားကို ဘာကြောင့် ဆုံးမသတ်တာလဲ။ ဘာတွေဖြစ်နေလို့လဲ။

          ဘယ်နည်းနဲ့မဆို “ပရိုင်မာ” ကို ဟန့်တားရမည်ဟု မနေ့ညက တစ်စုံ တစ်ယောက်ကို ဖရန့်ဖုန်းဆက်ပြောသံကို ဆွန်ဂျာ ကြားခဲ့သည်။ 'ပရိုင်မာ” ဆိုတာ ဘယ်သူလဲ။

          အာတေမီးရှားဟိုတယ်အနီးသို့ ရောက်လာပြီ။ သည်ဟိုတယ်က အမျိုးသမီး များကိုသာ လက်ခံသည်။ ငါ ဒီကနေပြီး ဖရန့်ကိုစောင့်နေမယ်၊ သူရောက်လာတော့ အကျိုးအကြောင်း ပြောပြလိမ့်မယ်။

          ဆွန်ဂျာ လမ်းဆုံသို့ရောက်လာသည်။ ယာဉ်ထိန်းအချက်ပြမီးနီသွားသည်။ သူပလက်ဖောင်းပေါ် ရပ်လိုက်သည်။ တစ်စုံတစ်ယောက်က သူ့ကိုဝင်တိုက်သည်။ သူ လမ်းပေါ်လဲကျသွားသည်။ လမ်းဘေးတွင် တရားမဝင်ရပ်ထားသည့် ဇိမ်ခံကားတစ်စီး ရုတ်တရက် မောင်းထွက်ပြီး ဆွန်ဂျာကို တည့်တည့် ဝင်တိုက်တော့မလို ထင်ရပေမယ့် ကံကောင်းလို့ ပွတ်တိုက်ရုံသာ တိုက်သွားသည်။ ချက်ချင်းပင် လူတွေ ဝိုင်းအုံလာကြသည်။ ဘာဖြစ်သွားသလဲ ဘယ်နေရာထိသွားသလဲ စသည်ဖြင့် တစ်ယောက်တစ်ပေါက် စိုးရိမ်တကြီး မေးကြသည်။

          ထိုအခိုက် ဖြတ်သွားသော သူနာပြုယာဉ်တစ်စီး ရုတ်တရက် ထိုးရပ်လိုက်သည်။ သူနာပြုနှစ်ယောက် ကမန်း ကတန်း ပြေးဆင်းလာသည်။

          “ဘာမှ မစိုးရိမ်နဲ့၊ သူ့ကို ကျွန်တော်တို့ ပြုစုပေးပါ့မယ်”

          ထို့နောက် ဆွန်ဂျာဗားဘရပ်ကို ကားပေါ်သို့ ချိတင်ကြသည်။ ကားတံခါးကို ပြန်ပိတ်လိုက်သည်။ ပြီးတော့ ချက်ချင်း မောင်းထွက်လာသည်။ ဆွန်ဂျာကို ထမ်းစင်ပေါ်တွင် တပ်ချည်ကြသည်။ သူက ထထိုင်ဖို့လုပ်ရင်း ငြင်းသည်။

          “ရပါတယ်၊ ကျွန်မ ဘာမှမဖြစ်ပါဘူး” သူနာပြုတစ်ယောက်က ကိုယ်ကိုကိုင်းပြီး ... ။ “မထပါနဲ့ ဖရောဗားဘရပ်"၊ ငြိမ်ငြိမ်လေးနေပါ” ဆွန်ဂျာက အထိတ်တလန့် မော့ကြည့်လိုက်ရင်း ... “ဟင်... ရှင်က ဘယ်လိုလုပ်ပြီး ကျွန်မနာမည်ကို..."

          ထိုအခိုက် သူ့လက်မောင်းသားထဲ ဆေးထိုးအပ်ဝင်သွားတာကို စစ်ခနဲ ခံစားလိုက်ရသည်။ ထို့နောက် ချက်ချင်း လိုပင် တစ်လောကလုံး မှောင်မိုက်သွားတော့သည်။ပြင်သစ်၊ ပါရီမြို့၊အီဖယ်မျှော်စင်ရှိ လေ့လာရေးစားပွဲတွင် မတ်ဟားရစ် တစ်ယောက်တည်း ရှိနေသည်။ မိုးတအုန်းအုန်း ရွာနေသည်ကိုပင် သတိမထားမိ။ တစ်ချီတစ်ချီတွင်လျှပ်ပန်းလျှပ်နွယ်တွေက မိုးစက်တန်းတွေကြားတွင် ဖြတ်ခနဲ ဖျတ်ခနဲ လင်းလက်သွားသည်။

          စိန်းမြစ်၏တစ်ဖက်တွင် ရှဲလော့နန်းတော်နှင့် ထရိုကာဒယ်ရို ဥယျာဉ်တို့ ရှိနေကြသည်။ သို့သော်လည်း မတ်ဟာရစ်ကတော့ ယင်းတို့ကို သတိထားဟန်မတူ။ သူ့စိတ်အာရုံက တစ်ခုတည်းကိုသာ စူးစိုက်နေသည်။ တစ်ကမ္ဘာလုံး သို့ ထုတ်လွှင့်မည့် သတင်းထူးကြီးကိုသာ စိတ်ဝင်စားနေသည်။

          တဖြည်းဖြည်း မိုးရောလေပါ ပြင်းထန်လာသည်။ ဟားရစ်က လက်ကောက်ဝတ်ကို အင်္ကျီလက်နှင့်ကာပြီး နာရီကိုကြည့်လိုက်သည်။ သူတို့ နောက်ကျနေပြီ။ ဒါနဲ့ သူတို့က ညကြီးမင်းကြီး သန်းခေါင်ချိန်မှာမှ ဒီနေရာကို ဘာကြောင့် ချိန်းရတာလဲဟု သူတွေးမိသည်။ သူ့အတွေးမပြတ်ခင်မှာပင် မျှော်စင်ဓာတ်လှေကားတံခါး ပွင့်သွားသံကြားရသည်။ မိုးကြီးလေကြီးထဲ တိုးဝှေ့ပြီး လူနှစ်ယောက် သူ့ဆီလာနေကြသည်။

          ဟားရစ် သူတို့ကို မှတ်မိသွားသည်။ ရင်ထဲ သွားမိသည်။ “ခင်ဗျားတို့ ဘာလို့ နောက်ကျနေရတာလဲ” “ဒီမိုးနဲ့လေကြောင့်ပေါ့ မတ်ရာ၊ ဆောရီးဗျာ... ဆာရီး" 'ကဲ ခင်ဗျားတို့လည်း ရောက်လာပြီ၊ အစည်းအဝေးက ဝါရှင်တန်မှာလုပ်ဖို့ အားလုံးစီစဉ်ပြီးပြီ မဟုတ်လား”

          “ခင်ဗျားကို ပြောချင်တာ အဲဒီအကြောင်းပဲ၊ ဒီကိစ္စကို အကောင်းဆုံး ဘယ်လိုကိုင်တွယ်မယ်ဆိုတာကို ကျွန်တော်တို့ ဒီနေ့တစ်မနက်လုံး အကြာကြီးဆွေးနွေးခဲ့ကြတယ်၊ အဲဒီနောက် ဆုံးဖြတ်ချက်ချ...”

          ထိုအခိုက် ဒုတိယလူက ဟားရစ်နောက်သို့ရွှေ့လာသည်။ ထို့နောက် မမျှော်လင့်သော ဖြစ်ရပ်နှစ်ခု ဆက်တိုက် ဖြစ်ပေါ်သွားသည်။ တုံးတိလေးလံသော အရာဝတ္ထုဖြင့် ဦးခေါင်းကို ပြင်းထန်စွာ အရိုက်ခံလိုက်ရသည်။ ထို့နောက် သုံးဆယ့်ရှစ်ထပ်အမြင့်မှ လမ်းမပေါ်သို့ ဦးစောက်ထိုးကျသွားလေတော့သည်။