မောင်ချောနွယ် - ကဖေး

ကျက်သရေရှိသော လယ်ကွင်းများ

 မြောက်လတ္တီတွဒ် (၁၉)ဒီဂရီ

သီရိခေတ္တရာပြည်ကပါ

ကျက်သရေရှိသော လယ်ကွင်းများကို

 ပိုင်ဆိုင်သော မြို့ကလေးပြည်ပါ။

မိုက်ကယ်အိန်ဂျလိုဗြူနာတီရိုရေ ...

ဗေဒါရီဟာ

သမင်မလေး မဟုတ်ချေဘူးကွဲ

မင်းလို ငါလိုပါပဲ ၊

သားလည်း မွေးနိုင်ပေရဲ့

ဓားလည်း သွေးနိုင်ပါပေရဲ့ကွယ်။

ကောလိပ်နည်းပြဆရာလေးရေ ...

ဟောဒီ ဧရာဝတီမြစ်ကြီးထဲကနေ

ဗေဒါရီရဲ့ အချစ်တွေနဲ့

ဆယ်ခပ်ခဲ့တဲ့ ရေစင်တစ်စက်နဲ့

အချစ်မြို့တစ်မြို့ ဖြစ်တည်ခဲ့။

 ဒို့ပြည်မှာလေ

ဗေဒါရီတို့ပြည်မှာ

နောင်တရအနုပညာရှင် ပြည်လှဖေတို့

ပြည်မှာ ငါတည်ရှိပါတယ်ကွဲ့

မောင်ချောနွယ် တည်ရှိပါတယ်ကွဲ့

မလွယ်ကူတာတွေကို ဝယ်ယူရရှိခဲ့

ဒါကြောင့်ပဲ

ဒုနဲ့ထည်နဲ့ (ထုထည်) ဖြစ်ခဲ့ရတာပေါ့ကွာ။

ဆိုကြပါစို့

အဘိဓမ္မာ ဆိုကရေးတီးရေ ...

ငါးမိနစ်အတွင်း သေစေတဲ့ ဟင်းမလောက်ရည်လိုပဲ

ဆိုကြပါစို့

ဒါဟာ မှန်ခဲ့တယ်

တစ်ခါတုန်း ဧရာက ပတ္တနဂါးမင်းကြီးရဲ့

ပြေးလမ်းကြောင်းဟာ

ဧရာဝတီမြစ်ကြီး ဖြစ်လာခဲ့သတဲ့။

ခုတော့

မြို့ကလေး ပြည်ဟာ

မြို့ကို မိုးရေနဲ့ သန့်စင်ပြီးပါပြီ

သစ်သားဦးနှောက်တွေ

ပုစွန်ဦးနှောက်တွေ

ဝက်ဦးနှောက်တွေ

ပိုးလောက်လန်းတွေကို

လှဲကျင်းပစ်လိုက်တယ်လို့ ဆိုရမှာပေါ့ ။

 မကြာခင် မြို့ကလေးဟာ

 စက်တင်ဘာ ဩဇာသီးတွေနဲ့

ကမ္ဘာကြီးကို ပူဇော်ဖို့

အဆင်သင့်ဖြစ်နေတဲ့ မြို့ကလေးကပြောတယ်

မြင်းလှည်းလေးပေါ်က

သီရိခေတ္တရာ မြို့ကလေးကပြောတယ်

“နှလုံးသားတို့ရဲ့ လယ်ယာမှာ

ကဗျာမရှိရင်

ကမ္ဘာပျက်သုဉ်းသောနေ့ ဖြစ်လိမ့်မယ်” တဲ့။

အိုအောင်မှကျေးဇူးပြုသည်။

ပေဖူးလွှာ။