မောင်ကြည်သန့် - ခေါင်းဆောင်ဟောင်းများမှခေါင်းဆောင်လောင်းများသို့

ဆေးမတွေ့နိုင်သေးသော ရောဂါဝေဒနာကို ခံစားနေရလင့်ကစား မိုဟာမက်အလီ (Muhammad Ali) သည် ဤစာကို ကိုယ်တိုင်ရေးသားခဲ့သည်။ စကားလုံးများ စီကုံးခဲ့သည်။ အထူးဂရုပြုလျက် ထိုးမြဲလက်မှတ် ထိုးပေးခဲ့သည်။ အကြီးကျယ်ဆုံး (The Greatest) ဘွဲ့ခံ မိုဟာမက်အလီသည် မိမိ၏နှလုံးသားထဲမှ ဩဝါဒအဆိုအမိန့်များကို ပွင့်ပွင့်လင်းလင်း ပေးအပ်ခဲ့သည်။ “မည်သည့်အခါမျှ အရှုံးမပေးပါနှင့်၊ ပျော်ပျော်နေနိုင်ရန် ကြိုးစားပါ၊ အခြားသူနှင့် ဆက်သွယ်ဆောင်ရွက်ပါ။ မိမိမှန်သည်ဟု ယုံကြည်ထားသမျှ လုပ်ကိုင်ဆောင်ရွက်ပါ'

မြေကမ္ဘာပေါ်တွင် အသိအမှတ်ပြုခံရဆုံး ပုဂ္ဂိုလ်အဖြစ် ဆက်လက် ရပ်တည်နေ နိုင်ဆဲ မိုဟာမက်အလီသည် ၁၉၆၀ ပြည့်နှစ် ရောမအိုလံပစ်မှ ရွှေတံဆိပ်ဆုရှင် တစ်ဦးအဖြစ် မြင်ကွင်းအတွင်းသို့ ထိုးဖောက် ရောက်ရှိလာခဲ့သည်။ GQ မဂ္ဂဇင်းက Athlete of the Century ဘွဲ့ Sport Illustrated က Sportsman of the 20th Century ဘွဲ့၊ BBC က Sports Personality of the Century ဘွဲ့ တို့ကို အမည်သတ်မှတ်ပေးအပ်ခဲ့သည်။ မိုဟာမက်အလီသည် သည်းခံခြင်း၊ နားလည်မှုရှိခြင်း တို့အတွက် ထောက်ခံအားပေးပြီး စားနပ်ရိက္ခာပြတ်လတ် ငတ်မွတ်နေသူတို့အား အစာရေစာကျွေးမွေးကာ ဆင်းရဲချို့တဲ့သော ကလေး သူငယ်များအား စောင့်ရှောက်ကူညီလျက် ကမ္ဘာလောကကြီးတစ်ခုလုံး လူသား အားလုံးအတွက် ပိုမိုကောင်းမွန်သော နေရာဒေသကြီးတစ်ခုအဖြစ်သို့ ပြောင်းလဲရောက်ရှိသွားစေရန် စွမ်းအားကုန် မြှုပ်နှံဆောင်ရွက်ပေးလျက်ရှိသည်။ ၂၀၀၅ ခုနှစ်တွင် United States’ Presidential Medal of Freedom ဆု ချီးမြှင့်ခံရသည်။

အခက်အခဲ အတားအဆီး ပိုမိုကြီးမားလေ

အောင်မြင်မှုကာလ ပိုမိုထွန်းတောက်လေ

မာတင်လူသာကင်း (အငယ်)က တစ်ကြိမ်တစ်ခါတွင် “မှန်ကန်ရာကိုလုပ်ကိုင်ရန် အချိန်သည် အမြဲ မှန်ကန်နေတတ်သည်” ဟု ပြောဖူးပါသည်။ ထိုစကားနှင့် ပတ်သက်၍ အများစုနှင့် သဘောထားကိုက်ညီနေလိမ့်မည်ဟု ထင်မှတ်မိပါ သည်။ အမှန်ဆိုရလျှင် သိမ်မွေ့သလောက် ခဲရာခဲဆစ်နိုင်လှသော အစိတ်အပိုင်း ရှိနေပါသည်။ မည်သည့်အရာသည် မှန်ကန်မှုရှိသည်ဟု သိနားလည်တတ်ရေး ဖြစ်သည်။ အရေးကြီးသောကိစ္စများကို မည်သို့မည်ပုံ ဆုံးဖြတ်ပါဟု အခြားသူများ အားပြောပြရန် ကြိုးစားမည်မဟုတ်ပါ။ ထိုသို့ အရေးကြီးသော ကိစ္စများကို ကျွန်ုပ် မည်သို့ အဖြေထုတ်ခဲ့ကြောင်း သင်တို့အား မျှဝေ အသိပေးပါမည်။

            ကျွန်ုပ်သည် မိမိပတ်ဝန်းကျင်၌ ဖြစ်ပျက်နေသမျှအပေါ် အမြဲပင် စိတ် ဝင်စားတတ်ပါသည်။ ကျွန်ုပ် နားထောင်ကြည့်သည်။ အကဲခတ်လေ့လာသည်။ ဖတ်ရှုသည်။ ကျွန်ုပ်အတွက် အဓိပ္ပာယ်ရှိစေမည့် အတွေးအခေါ်ခံယူချက်များနှင့် သတင်းအချက်အလက်များကို ရယူပြီး ဘဝတာတစ်လျှောက် အသုံးပြုရန် လိုက်လျောညီထွေမှုရှိအောင် ပြင်ဆင်ညှိနှိုင်းပါသည်။ ခံယူ ရယူလိုက်ပါသည်။ ကျွန်ုပ် ကြိုးစားလုပ်ကိုင်ပါသည်။ နောက်ထပ် ပို၍ လုပ်ကိုင်ပါသည်။ ကျွန်ုပ် လုပ်ကိုင် နေမှုနှင့်ပတ်သက်၍ အဖြစ်နိုင်ဆုံး အကောင်းဆုံး ဖြစ်အောင် ကြိုးစားပါသည်။ ခက်ခဲကြမ်းတမ်းသော အချိန်ကာလများသည် ဤဘဝတာ ကျွန်ုပ်တို့၏ ခရီးရှည် အစိတ်အပိုင်းတစ်ရပ် ဖြစ်ကြောင်း လေ့လာသိရှိထားပါသည်။ သို့ရာတွင် အဆိုပါ စိန်ခေါ်မှုများသည် ဘဝကို စိတ်ဝင်စားစေ နိုင်ပါသည်။ ထိုအချိန်ကာလမျိုးများ တွင် နာကျင်ထိခိုက်စေနိုင်သည်။ စိုးရိမ် ကြောက်ရွံ့ နေစေနိုင်သည်။ အခက်အခဲ အတားအဆီး ပိုမို ကြီးမားလေ အောင်မြင်မှုကာလ ပိုမို ထွန်းတောက်လေ ဖြစ်ပါ သည်။ ကျွန်ုပ် တစ်စုံတစ်ခုကို လုပ်နိုင်မည်ဟု မသေချာမှုကြောင့်ကျွန်ုပ်အတွက် ဖွင့်ပေးလိုက်သော အခွင့်အလမ်း တံခါးကြီးကို ပိတ်ပစ်ခြင်းမပြုရန် ဆုံးဖြတ်ထား ခဲ့ပါသည်။ ကျွန်ုပ် ရည်မှန်းထားသမျှ ပန်းတိုင်သို့ ရောက်နိုင်သော အခါ၌ပင်လျှင် ကျွန်ုပ် ပိုမိုကြိုးစား လုပ်ကိုင်နိုင်သည်နှင့်အမျှ ကျွန်ုပ် ရောက်နိုင်သည့် အတိုင်း အတာထက် ပိုမို ဝေးဝေး ခရီးရောက်နိုင်ကြောင်း တွေ့ရပါသည်။ ထို့ပြင် ခရီးရှည်ကြီး ကိုယ်တိုင်ပင် ဧရာမ စွန့်စားခန်းကြီးတစ်ခုဖြစ်ကြောင်း တွေ့ခဲ့ရပါသည်။

          ပျော်ပျော်နေတတ်ရန်လည်း အရေးကြီးပါသည်။ ကျွန်ုပ်သည် မိမိဘဝကို မိမိ သဘောကျ နှစ်ခြိုက်ပါသည်။ ကျွန်ုပ် မည်သည့် အနေအထားသို့ ရောက်နေ ပါစေ၊ ကျွန်ုပ် မည်သည့်အရာကို လုပ်ကိုင်နေသည်ဖြစ်စေ အတွေ့အကြုံမှ အပြုသဘောဖြစ်မှုကို ရယူခဲ့ပါသည်။ မိမိ ပတ်ဝန်းကျင်ရှိ မည်သူတို့နှင့်မဆို ပေါင်းသင်းဆက်ဆံပြီး ထိုကာလနှင့် လိုက်လျောညီထွေ နေထိုင်ခဲ့ပါသည်။ လူများ အနေဖြင့် သူတို့ကိုယ်ကို သူတို့ အကောင်းမြင်စေ၊ ဖြစ်စေချင်ပါသည်။ ကျွန်ုပ် တတ်စွမ်းသမျှ သူတို့ ရယ်မောပျော်ရွှင်နေအောင် ကြိုးစားခဲ့ပါသည်။

          အဓိကအားဖြင့် ကျွန်ုပ်သည် ဘုရားသခင်ကိုယ်တိုင်နှင့် ကျွန်ုပ်၏ ဘဝ ဖြစ်စေချင်သမျှ အမြော်အမြင်ကြီးမားမှုတွင် သက်ဝင် ယုံကြည်မှုရှိခဲ့ပါသည်။

          ကျွန်ုပ်အနေဖြင့် ငွေကြေးမည်မျှပင် ချမ်းသာချမ်းသာ၊ တန်ခိုးအာဏာ မည်မျှပင် ကြီးမားကြီးမား သူတစ်ပါးအပေါ် မည်မျှပင် ထိန်းချုပ်နိုင် ထိန်းချုပ်နိုင် အရေးမကြီး၊ အထက်ပါ သင်ခန်းစာအားလုံးကို ကျွန်ုပ်အတွက် အခြေခံ လမ်းညွှန်ချက် သဘောထားအဖြစ် ခံယူလျက် ကျွန်ုပ်၏ နှလုံးသားထဲမှ မှန်ကန် သည်ဟု ယုံကြည်လိုက်သောအချိန်တွင် ဆုံးဖြတ်ချက်များကို ချမှတ်လုပ်ဆောင် ခဲ့ပါသည်။ ကျွန်ုပ်ရွေးချယ်ခဲ့မှုများ၏ နောက်ဆက်တွဲအကျိုးတရားများကိုလည်း ကြည်ဖြူစွာ လက်ခံခဲ့ပါသည်။ ကျွန်ုပ်အတွက် “မှန်သည်ဟု ယုံကြည်မှုဖြင့် လုပ်ဆောင်ခဲ့မှုများသည် အရာရာနှင့် အကျုံးဝင်ပါသည်။

Vahid Aaghland 

ဗာဟစ် အယ်လာဂါဘင်

ဥက္ကဋ္ဌ၊ ဘယ်လီ ကလော့ကနား သံမဏိလုပ်ငန်းကုမ္ပဏီ

ဗာဟစ် အယ်လာဂါဘင် (Vahid Alaghband) သည် လန်ဒန်မြို့၌ ဌာနချုပ် ဖွင့်လျက် လုပ်ကိုင်အောင်မြင်နေသူ နိုင်ငံခြားသားတစ်ဦးဖြစ်သည်။တစ်ကမ္ဘာလုံး ဆက်သွယ်လုပ်ကိုင်နေသော သူ့ကုမ္ပဏီသည် ဓာတ်သတ္တုများနှင့်ပတ်သက်၍ အကြီးမားဆုံး ရောင်းဝယ်လုပ်ဆောင်နေသော ကုမ္ပဏီများအနက် တစ်ခု ဖြစ်သည်။ သူသည် အခါအခွင့်ကို အမြဲစောင့်ကြည့်နေတတ်ပြီး အဖြစ်နိုင်ဆုံး အခြေအနေသို့ ရောက်လာသည်နှင့် မိမိရရ အသာစီးယူတတ်သည်။ ဤစာတွင် ကောင်းကျိုးမပြု အခြေအနေဆိုးများနှင့် ရင်ဆိုင်ရသည့်အခါ မိမိ၏ ခဲရာခဲဆစ်ပြဿနာများကို တစ်မူဆန်းသစ်သော ရှုထောင့်မှ ရှုမြင်ပြီးမိမိ၏ ပင်ကို တန်ဖိုးနည်းစနစ်ကို အမြဲ အသုံးချဖြေရှင်းခြင်းဖြင့် အကောင်းမြင်ယုံကြည်တတ်မှု ပေါ်လွင်စေနိုင်ကြောင်း ဆွေးနွေးထားသည်။

ဗာဟစ် အယ်လာဂါဘင်သည် Balli Klockner သံမဏိနှင့် သံမဏိ ကုန်ပစ္စည်း များအုပ်စု ထိပ်တန်းကုမ္ပဏီကြီးကို စတင်တည်ထောင်သူနှင့် ချယ်ယာမင် ဖြစ်သည်။ British Institute of Directors, Confederation of British Industry, World Economic Forum Davos တို့တွင် အဖွဲ့ဝင်တစ်ဦး ဖြစ်သည်။ ဗြိတိသျှ ပြတိုက် ကြီးအတွက် ကူညီထောက်ပံ့သူ၊ Iran Heritage Foundation စတင် တည်ထောင် ရာတွင် ပါဝင်ခဲ့သူ၊ ပံ့ပိုးကူညီသူ၊ Cornell University Council အဖွဲ့ဝင် Pauline Foundation အကြံပေး ဘုတ်အဖွဲ့ဝင်လည်း ဖြစ်သည်။

ထိုငွေရောင်အနားကွပ်ကို ဖွေရှာပါ

ကျွန်ုပ်၏ စဉ်းစားဉာဏ်အရ လူတို့သည် တိမ်တိုက်၏ ငွေရောင်အနားကွပ်ကို ရှာဖွေသင့်ပါသည်။ ထို့ကြောင့် တစ်စုံ တစ်ယောက်သည် အခြားတစ်ယောက် အနေဖြင့် နံနက်ဆယ်နာရီတွင် ကပ်ဆိုက်မှု (disaster) ဟု သတ်မှတ်လိုက်မိ သည့်အရာ တစ်ခုကို မိမိအတွက် ညနေ ငါးနာရီအချိန်တွင် ဖြစ်ထွန်းလာနိုင်ဖွယ် အလားအလာ အခွင့်အလမ်းကောင်း တစ်ရပ် အဖြစ် ကြည့်တတ် ရမည်။ စိန်ခေါ်မှုမှာ ပြဿနာပတ်လည်တွင် ၁၈၀ ဒီဂရီအထိ ရောက်အောင် ရွှေ့နိုင်ပြီး ငွေရောင်အနားကွပ်ကို ရှာကြည့်ရေးဖြစ်သည်။ ကျွန်ုပ်၏ဘဝတွင် ကောင်းကျိုး မပြု အခြေအနေဆိုးများထဲမှ ကျော်နင်းလွတ်မြောက်သွားတိုင်း ကျွန်ုပ်အတွက် အမြဲပင် ပိုမိုအားကောင်းလာတတ်သည်။ ထိုငွေရောင်အနားကွပ်ကို ရှာဖွေ တွေ့ရှိခဲ့သောကြောင့် ဖြစ်သည်။

          အခြားသော အချက်တစ်ချက်မှာ မိမိသည် အကောင်းဘက်မှလည်း ကြည့်တတ်ရမည်။ ဘဝတွင် အသာကလေး ရယူလိုက်နိုင်သော အခွင့်အလမ်း များဖြင့် ပြည့်နှက်နေသောကြောင့်ဖြစ်သည်။ တစ်ခါတစ်ရံတွင် အရာရာအပေါ် အကောင်းမမြင် တတ်လောက်အောင် ဟန်ပန် ပိုနေတတ်သည်။ သို့ရာတွင် စိန်ခေါ်မှုတိုင်း၊ ပြဿနာတိုင်းတွင် အဖြေတစ်ရပ်နှင့် အခွင့်အလမ်းတစ်ရပ် ရှိနေစမြဲပင်။

          ဘဝတွင် ငွေကြေးချမ်းသာမှုနှင့် အောင်မြင်မှုရရှိရေးအတွက် လွယ်ကူ သောနည်းလမ်း မတွေ့မိပါ။ ကျွန်ုပ်နှင့် သိကျွမ်းသူအများစုသည် အောင်မြင်နေ ကြသည်။ အများစုသည် ကျွန်ုပ်အောင်မြင်နေသည်ထက် ပို၍ ပို၍ အောင်မြင်နေ ကြသည်။ အလုပ် ကြိုးစား၍ အောင်မြင်ကြသည်။ မှန်ကန်သော အတွေးအခေါ် ရှိ၍ အောင်မြင်ကြသည်။ စာအုပ်ထဲတွင် ပါရှိညွှန်ကြားသည့်အတိုင်း လိုက်နာကျင့်သုံး၍ အောင်မြင်ကြသည်။ မျက်မှောက်ကာလ စက်မှုနှင့် ငွေကြေး လုပ်ငန်း ဦးဆောင်နေသူ နွယ်ဆက်တို့ အောင်မြင် ကြီးပွားသွားစေသည့် အခြေခံ တန်ဖိုး များကို လိုက်နာကျင့်သုံးနိုင်ခဲ့လျှင် အနာဂတ်နွယ်ဆက်လည်း အဆိုပါ တန်ဖိုး များကို အသုံးပြုကြဖွယ်ရှိသည်။ ပိုမိုပြည့်စုံကောင်းမွန်သော လက်နက် တန်ဆာ ပလာ ပိုင်ဆိုင်လာဖွယ်ရှိသည်။ အတိတ်ကာလထက် ပိုမိုအောင်မြင် ကြီးပွားနိုင် မည့် အနာဂတ်ကာလတစ်ခုကိုလည်း ဆောင်ကြဉ်းနိုင်ကြဖွယ် ရှိပေသည်။