ဗြူဟာခင် - သူလျိုမာယာ

          စစ်မက်ရေးရာအတွက် တစ်ပြည့်တစ်ပြည် တစ်နိုင်ငံတစ်နိုင်ငံ အားကြိုးမာန်တက် နိုင်ထက်စီးနင်း လုပ်ကြံဆောင်ရွက်နေကြသည့် ဤခေတ်ကြီးအတွင်း ကိုယ်တိုင်တွေ့ကြုံရသော စုံထောက်သူလျှိုတို့ အနက် ဣတ္ထိယတို့ စခန်းသွားပုံများလည်း အံ့ဖွယ်သရဲရှိပေ၏။

          အောက်ပါအတ္ထုပ္ပတ္တိကို ဦးစွာပထမ ပဏာမပြု၍ ရွေးချယ်ရခြင်း အကြောင်းကား ဤပြင်သစ်တိုင်းသူ “လူဝီမာရီဟာဘို”ဆိုသူ မိန်းမပျိုကား ရူပနိကာယ်၊ သဒ္ဒနိကာယ်နှင့်တကွ လူအများတို့၏ ထင်မြင်ချက်၊ ရည်မှန်းချက်အရ သူလျှိုမတို့၏ ကြန်အင်လက္ခဏာ အရည်အချင်းနှင့် ပြည့်စုံပြီးလျှင် ယောက်ျားတို့စိတ်ကို လှုပ်ရှားစွဲမက်လောက်အောင် သွေးဆောင်နိုင်သော မာယာတို့နှင့်လည်း ပြည့်စုံရကား ပြင်သစ်ပြည် “ပဲရစ်” မြို့တော်ရှိ ဇာတ်ခုံပေါ်တို့တွင် “ကချေသည် လူလူ” ဟူ၍ အကျော်တစောရှိပေသည်။

          ဂွမ်းပုံကဲ့သို့ ဖြူနုစိုပြည်သောအသားအရေ၊ ထွားကျိုင်းပြေပြစ်သော ကိုယ်အင်္ဂါအစိတ်အပိုင်းနှင့်တကွ ပြာရည်ရွှမ်း၍ ကျယ်ဝန်းသော မျက် လုံးမျက်ဖန်တို့မှာ မခုတ်တတ်သည့်ကြောင်ကဲ့သို့ သူတော်ယောင်ရှိချေ၏တကား။ သို့ပါလျက် သစ်ပင်ပန်းမန်တို့ သိုက်မြိုက်စွာ စီတန်းစိုက် ပျိုး၍ ပဲရစ်မြို့တော်သူ မြို့တော်သားတို့ ဂိုက်ပြည့်ဆိုက်ပြည့် ဖက်ရှင် ထုတ်သော “ဘော်လေဘဒ်စ”ခေါ် သာယာသော လမ်းမတော်ကြီးတွင် သဘာဝဓလေ့အလိုက် သိမ်မွေ့သောပရိယာယ်တို့ဖြင့် ယောကျာ်းတို့ထံမှ ရွှေငွေစိန်ကျောက် လက်ဝတ်လက်စားများကို ပဏ္ဏာလက်ဆောင်အဖြစ် လည်းကောင်း၊ မတတ်သာမူ ဟိုတယ်တွင် တစ်နပ်စာမျှသောညစာအဖို့သော်လည်းကောင်း မြူမြိုက်၍ ပိုင်းလုံးချသည့်အတတ်တွင် ပါရဂူဟု ခေါ်လောက်ပေသည်။ သို့သော် သဘင်အတတ်တွင်ကား အညံ့ဖျင်းဆုံးသော ကချေသည်တစ်ဦးဖြစ်လေသည်။ သို့ကြောင့် ပွဲကြည့်ပရိသတ်တို့ ထက်ကား နောက်ကွယ်ရာ အားလပ်နားနေခိုက်အချိန်တွင် ပိုးပန်းသူ တို့၏ ပွဲတောင်းခြင်းကိုသာ ခံရပေသည်။

          ဤ “လူ”ကဲ့သို့သော မာယာသည် မိန်းမအဆင့်အတန်းအစား တို့ကား လှဂုဏ်မောက်လျက် အသုံးအစားကြီးခြင်း၊ လော်လီခြင်း လွန်ကဲရကား ရသမျှငွေကြေးများမှာ ကုန်ဆုံးပြတ်လပ်ရုံမျှမက ကြွေးရှင် မြည်ရှင်တို့က ကြွေးမှုဝါးရမ်းနှင့် အမြဲတစေ လိုက်လေ့ရှိချေသည်။

          ထိုခြေမျိုးသို့ကျရောက်သော မိန်းကလေးတို့သည်ကား သူလျှို တို့နှင့် နိုင်ငံရေးစုံထောက်ကိုယ်စားလှယ်တို့၏ ခဲရာခဲဆစ် အရေးကြီးသောအချက်တို့ တွေ့ကြုံသည့်အခါ ဣတ္ထိယတို့၏ စစ်ကူကို လိုအပ် သည့်အတိုင်း တည်ကြက်သဖွယ် တွင်ကျယ်စွာ အသုံးချလေ့ရှိကြ၏။

          ဤမာယာသည်ကလေး၏ သင့်လျော်သော အရည်အချင်းတို့ကို မျက်မြင်ဒိဋ္ဌ တွေ့ကြုံသိရှိရကား ကျွန်ုပ်နှင့် ကြံဖော်ကြံဖက် ပါတနာ နှစ်ယောက်သည်သဘောကိုက်ညီသည့်အားလျော်စွာ ဤမိန်းကလေးကို ဦးစွာစတည်၍ အသုံးချရန် ဆုံးဖြတ်ပြီးလျှင် ယောက်ျားတို့ထံမှ ငွေမြူ မြိုက်သော သေးနုပ်သည့် ပိုင်းလုံးအတတ်ထက် သိမ်မွေ့ခန့်ညားသည့်နိုင်ငံရေးစုံထောက်ပညာကို သွန်သင်ဆုံးမပြသကြလေသည်။ ဤအရေး တွင် အဖိုးမဖြတ်နိုင်သောလျှို့ဝှက်သည့်သတင်းများကို ရယူနိုင်ကြောင်း မျှော်တွေးယူဆမိသည်နှင့် လိုက်လျောညီစွာ လူဂီကိုယ်တိုင်ကလည်း သင်ပြသမျှကို အားထုတ်မှတ်သားခဲ့လေ၏။

          မြင်သူတကာ မက်မောလောက်သော ဤမာယာသည်ကလေး၏ ပထမစွန့်စားချက်မှာ ရုရှားပြည်အရေးတော်ပုံတွင် ထမြောက်အောင်မြင် ခဲ့သည်ကို သိဒ္ဓိတင်လောက်ပေသည်။ ကျွန်ုပ်တို့လိုအပ်သောလျှို့ဝှက် သည့်သတင်းတစ်ခုကို ဆောင်ကျဉ်းသည်ပိုးသည်နှင့်အမျှ ထိုက်တန် သော ဆုလာဘ်တို့ဖြင့် ချီးမြှင့်လိုက်၏။

          ယင်းသို့ မပင်မပန်းရရှိသော ငွေကြေးအမြောက်အမြားတို့ဖြင့် ဝတ်စားတန်ဆာ အိမ်မှုခမ်းနားတို့မှစ၍ အထက်တန်းစားလေဒီကြီး သဖွယ်အခြေသို့ ရောက်သွားလေရာ ပဲရစ်မြို့တော်၏ ပေါ်လွင်မြူးထူးရာ အရပ် “ဘော်လေဘဒ်စ”မည်သော လမ်းမတော်တစ်ခွင်နှင့် ဇာတ်ခုံပေါ် တွင် ကျော်ကြားဖူးသည့် “ကချေသည်လူလူ”ကလေးမှာ ပျောက်ချင်းမလှ ပျောက်ကွယ်သွားလေ၏။

          ကြန်အင်လက္ခဏာပြည့်စုံစွာ သက်ရွယ်ငယ်နု တစ်ကိုယ်တည်း။ နေထိုင်သူ ဤမိန်းကလေးကား အပျော်ကြူးသော ဤပဲရစ်မြို့ကြီးဝယ် လူကုံထံ အတန်းအစားများနွှဲသော ပွဲတိုင်းတို့တွင် တင့်တယ်ခံ့ညားစွာ မြင်တွေ့ရခြင်းအားဖြင့် အဘယ်သူများက ထောက်ပံ့လေဘိသနည်းဟု အများသူတို့ စဉ်းစားမရ အံ့ဩကြပေ၏။

          များမကြာမီဒုတိယအကြိမ်မြောက်ဘေးအန္တရာယ်မြားမြောင်သော သူလျှိုလုပ်ငန်းတစ်ခုတွင် အကြောင်းမလှ၊ ဒုက္ခတွေ့ကြုံ၍ အလုံးစုံ ပျက်စီးခြင်းသို့ရောက်လေရာ ကျွန်ုပ်ကိုယ်တိုင်လည်း အသက်ကို လက် လုထွက်ပြေးရလေသည်။ ကျွန်ုပ်တို့အား စေစားသူတို့မှာလည်း ထောင်သောင်းမကသော ငွေကြေးများ ဆုံးရှုံးနစ်နာသည်သာမက ကျော် မကောင်းအောင် ငါးပါးကြီးမှောက်ရခြင်းမှာ ယခုတိုင် ပြန်ပြောင်း၍တွေးဝံ့စရာမရှိအောင်ပင် ဖြစ်ခဲ့ဖူးလေသည်။ ဤသို့ ပျက်စီးရခြင်း အကြောင်းရင်းကား ကျွန်ုပ်တို့ စတည်စီစဉ်စဉ်က ပုထုဇဉ်မှန်သမျှ လူ တို့၌ ဖြစ်ပျက်ရာသော သဘာဝသဘောတရားကို ထည့်သွင်း၍ မစဉ်းစား ဘဲ လစ်လပ်ခဲ့မှုကြောင့်ဖြစ်ချေသည်။

          အကြောင်းသော်ကား ကျွန်ုပ်တို့အထင် မာယာသည် လူဝီကလေး ၏ သည်းစိုင်ညှာနုကလေးသည်ကား ကြက်ပေါင်စေးဖြင့် သွင်းလုပ်ထား သည့်အလား ချစ်ခင်စုံမက်တွယ်တာမှုတို့တွင် ရှိန်းပြီးသည်ဟု တထစ်ချ မှတ်ခြင်း မှားယွင်းသည်နှင့်အမျှ သူ့ခမျာလည်း သွေးနှင့်ကိုယ်၊ သားနှင့် ကိုယ်ဖြစ်သည့်အားလျော်စွာ လျှို့ဝှက်သည့်သတင်းတို့ရယူရန် သွေးဆောင်ညှစ်ထုတ်ရမည့် လူကိုယ်တိုင်အပေါ်ထက် မေတ္တာသက်ဝင် ချစ်ခင်စုံမက်မိချေရကား ကျွန်ုပ်တို့အား ဖောက်လွဲဖောက်ပြန်ပြုကာ အကြံအစည်အလုံးစုံကို ဖော်လေသဖြင့် လူလုံးလက်လုပြေးလွှားကြရလေ သတည်း။ ဤကား ဣတ္ထိယသူလျှိုများကို အသုံးချရာ၌ သတိထားရမည့် အချက်များပင်ဖြစ်သည်။

          ထိုအချိန်မှစ၍ တစ်ခါသေဖူး ပျဉ်ဖိုးနားလည်ဆိုသကဲ့သို့ “လူဝီဟာဘို” အပျိုချောကို သူလျှိုအရာတွင် ယောက်ျားများကျလောက်သော ရူပါရုံနှင့် အမူအရာမှာ ပြောမကုန် အံ့မခန်းစေကာမူ ပါဏုပေတံ အသက်ထက်ဆုံး ဘယ်သောအခါမျှ အသုံးအစွဲမပြုပါတော့ဘူးဟု စိတ်ပျက်စွာ သန္နိဋ္ဌာန်ချလိုက်လေသတည်း။

          ထို့နောက် ဒီသူငယ်မကို မျက်ခြည်ပြတ်သွားလေရာ သူ့ခမျာမှာ လည်း ကြံရာမရသည့်အဆုံး၌ ဥရောပတိုက်တွင်လှည့်လည်၍ ကပြသော ယိမ်းအဖွဲ့ သဘင်တွင် ပါဝင်အမှုထမ်း၍ ပရိယေသန ဝမ်းရေးကျောင်းရလေသည်ဟု ကြားမိ၏။ သို့သော်လည်း တစ်ပါးသောအခါသမယ၌ ဤမာယာသည်မကလေးကိုပင် သုံးကွက်ပေါ်လာပြန်ရာ ၎င်း၏အကူ အညီကိုတောင်းဆိုရန် ပဲရစ်မြို့တော်တွင် အချိန်နှောင်းသည့်ကာလအခါ ဝယ် အလေဏတော ပျော်ရွှင်လိုက်စားသူတို့ မွေ့ရာဟိုတယ်၊ ဘယ် အရေးမကျန် တစ်ညဉ့်လုံးလုံး ဒရောသောပါး လိုက်လံရှာဖွေရပြန်သေး ၏။

          နိုင်ငံခြားသူလျှိုလုပ်ငန်းတွင် အနှစ်သုံးဆယ်တိတိ အမှုထမ်းခဲ့ သည်နှင့်အမျှ တွေ့ကြုံဖူးသည့် ထူးခြားသောအဖြစ်အပျက်အခန်းတို့ တွင် ဤအကြိမ်သည်ကား အံ့ဖွယ်သရဲကြီးပေတည်း။ သို့ကလို အခြင်း အရာတို့သည်လည်း မမျှော်လင့်သည့်အခိုက်အတန့်၌ ဖြည်းညင်းစွာ ပေါ်ပေါက်လာတတ်လေ့ရှိ၏။

          ဖြစ်ဟန်ကား ကျွန်ုပ်မှာ ပြင်သစ်ပြည်ကြီး၏မြို့တော် အေးချမ်း သာယာရေးမှူး သေနာပတိကြီး၏ အလုပ်ဝတ္တရားဆိုင်ရာ သူလျှိုရန်ကို ခုခံကာကွယ်ရေးဌာန၊ နံပါတ် ၅ အဖွဲ့တွင် ကြီးမှူးသူအရာရှိထံမှ မပြော ပလောက်သော စုံထောက်မှုကလေးတစ်ခုကို ရွက်ဆောင်ရန် လက်ခံမိ သည်ကစ၍ ပတ်သက်ရှုပ်ထွေးခြင်းဖြစ်ပေါ်လေသည်။

          ဤအရာရှိ၏ လက်အောက်ငယ်သား အသိုက်အဝန်းတွင် ဟော် လန်ပြည်သား ဒတ်ချ်လူမျိုးတစ်ဦးတစ်ယောက်၏ ပြောရေးဆိုတာနှင့် တကွ ရုပ်ရည်ရူပကာယကိုက်ညီမျှသောအခန်းကို ကွက်စေ့အောင် ဇာတ်ခင်းနိုင်သူ မပေါ်ပေါက်သည့်အခိုက်တွင် ကျွန်ုပ်မှာ လုံးရပ်သဏ္ဌာန် နှင့်တကွဟန်ပန်လေသံပါ ရွေးမရအောင် မိမိကိုယ်ကိုယ်ပြုပြင်ခြယ်လှယ် နိုင်သော သတ္တိထူးတစ်ခုရှိရကား အဆင်သင့်ရွက်ဆောင်ရေး ကြုံပြန် လေသည်။

          ထိုမှတစ်ပါးလည်း ကျွန်ုပ်မှာ ဒတ်ချ်လူမျိုးပိုင် အရှေ့ အိန္ဒိယကျွန်းများတွင် နှစ်ပေါင်းအတော်ကြာ ကိုယ်တိုင်နေထိုင်ခဲ့ဖူးသည့်အားလျော် စွာ ဒတ်ချ်ဘာသာစကားအပြောတွင် အာလုပ်သံနှင့် ရှေးဆန်သောအမူ အရာတို့နှင့်တကွ ပြည့်စုံရကား ဂျာဗားကျွန်းတွင် ပေါက်ဖွားသော “ဘာဂျာ” ဟူ၍ပင် မှတ်ယူထိုက်သည့်ပြင် ဤလူမျိုးတို့၏ ဓလေ့အလျောက် အညိုရောင်ချိုင့်ခွက်အတွင်းမှ ဟော်လန်တိုင်းဖြစ် ဂျင်အရက်ကို ၎င်းတို့နည်းတူ ရေတစ်စုံတစ်ရာ မရောစွက်ဘဲဣန္ဒြေမပျက် သောက်စွမ်း နိုင်၏။

          ဤနံပါတ် ၅ ဌာန သူလျှိုအဖွဲ့ ဝင်အပေါင်းတို့သည် ကျွန်ုပ်နှင့် ကောင်းစွာ အကျွမ်းဝင်သော်ငြားလည်း ကျွန်ုပ်အား လုံးဝ အားထားယုံ ကြည်လောက်သူတစ်ဦးအဖြစ် အမှတ်ထားသည်ဟု မဆိုသာချေ။ သို့ သော်ဤအရေးတွင် စေစားသည်ကို ထောက်ချင့်ရန်သာရှိ၏။ ထိုအချိန် တွင်လည်း ကျွန်ုပ်သော်ကား ပဲရစ်မြို့တော်ကြီးတွင် အလုပ်အကိုင် အတည်တကျမရှိ။ မြောက်သစ်ကိုင်းလွတ်သကဲ့သို့ ယောင်ကန်းကန်း ဖြစ်နေခိုက်၊ အဖွဲ့ကြီးမှူးသူက ခေါ်ငင်သည်ကိုကား အားပါးတရရှိရ၏။

          အကြောင်းတိုက်ဆိုင်သည့်အလျောက် သိရှိရန်အချက်တစ်ခုကား ဥရောပတိုက်အပါအဝင်အသီးသီးသော တိုင်းပြည်တို့မှ သူလျှိုစုံထောက် ဌာနတို့တွင် ကုန်ကျသောစရိတ်တို့ စုပေါင်း၍ တွက်ဆသော် ၁၉၃၇ ခုနှစ်အတွင်းတွင် ရွှေဒင်္ဂါးပေါင်ပေါင်း သုံးကုဋေမျှ ကုန်ကျလေသည်ဟု မှန်းဆသည်ဟု ခိုင်လုံသောသတင်းတစ်ခု ရရှိလေသည်။ ယင်းသို့ သူလျှို စုံထောက်ဌာနတို့က ကုန်ကျသည့်အလျောက် ထိုသူလျှိုတို့ရန်ကို ကာကွယ်တွန်းလှန်ရန် သုံးစွဲရသည့် တစ်ဖက်စရိတ်မှာလည်း သည့်ထက် နည်းမည်မဟုတ်ပေ။ အကျွန်ုပ် ယခု ရွက်ဆောင်ရမည့်လုပ်ငန်းမှာ အတိုက်အခံ တွန်းလှန်ရမည်ဘက်က ဖြစ်၏။

          ကျွန်ုပ် ရုပ်ပြောင်းရုပ်လွှဲ ခင်းကျင်းရမည့်အကြောင်း ဖြစ်ပေါ်လာရခြင်းမှာ ဒတ်ချ်လူမျိုးတစ်ယောက်သည် မြေထဲပင်လယ်အတွင်း လှည့် လည်စောင့်ရှောက်ရန် ချထားသော ပြင်သစ်စစ်သင်္ဘောပေါ်တွင် အမှု ထမ်းသည့် ရေကြောင်းစစ်ဗိုလ်ကလေးတစ်ယောက်ထံမှ စစ်ဘက်ဆိုင်ရာ လျှို့ဝှက်သော အရေးတကြီးသတင်းတစ်ခုကို လာဘ်ပပ်သကာပေး၍ ရရှိယူငင်သွားကြောင်းနှင့် ဆိုင်ရာက စွပ်စွဲလေသည်။ သို့သော်ဤစွပ်စွဲ ချက်မှာ ခိုင်လုံသောသက်သေခံအခြေမရှိရကား ဆိုင်ရာက အရေးယူနိုင် ရန် အခွင့်အလမ်းမရှိသဖြင့် ဤသတင်းကို မပေါက်ကြားရလေအောင် သိပ်သည်းစွာ ဆိုင်းငံ့ထားရလေသည်။ ထို့ကြောင့် ကျွန်ုပ်အား ဒတ်ချ် လူမျိုးတစ်ယောက်အနေနှင့် ရုပ်ပြောင်း၍ ဤအမှုကို စုံစမ်းရန် လွှဲအပ် လေသည်။

          ထိုစစ်ဗိုလ်ကလေး၏ မျိုးရိုးဇာတိမှာ မှူးမတ်မျိုးမှ ဆင်းသက် ပေါက်ဖွားသူတစ်ယောက်ဖြစ်ရကား ဩဇာတန်ခိုး လွှမ်းမိုးထက်မြက် သောအရေးပါအရာရောက်သူတို့နှင့် အားကိုးဖွယ် အဆက်အနွယ်ရှိသည့် ပြင် ကိုယ်တိုင်လည်း မိမိထမ်းဆောင်သည့်ဘက်တွင် စွန့်စားရဲရင့်သူ ဟူ၍ ပိုမိုအရေးကြီးသည်နှင့်အမျှ ဆိုင်ရာဌာန အကြီးအမှူးနှင့်တကွ အေးချမ်းရေးမှူး သေနာပတိကြီးတို့မှာ ခေါင်းချင်းရိုက်မျှ လေးလံသော တာဝန်ဝတ္တရားကြီးတစ်ခု ဖြစ်လေသတည်း။

          ကျွန်ုပ်ဆောင်ရွက်ရမည့် အခွင့်အရေးမှာ ‘တယူလွန်း” မည်သော ပြင်သစ်ပင်လယ်ကမ်းခြေ သင်္ဘောဆိပ်မြို့တစ်မြို့သို့သွား၍ အဆိုပါ ဒတ်ချ်လူမျိုးတစ်ယောက်၏အသွင်ဖြင့် ၎င်းစစ်ဗိုလ်ကလေးအား သွေးဆောင်ခြင်း အနည်းနည်းတို့နှင့် တိုင်းပြည်အကျိုး ပျက်ပြားမှုအတွက် လုံခြုံစွာ လျှို့ဝှက်ထားသော သတင်းတစ်ခုခုတစ်ရာရာကို လှည့်ဖြား၍ ရယူပြီးနောက် ထိုအချက်ကို လက်ကိုင်ပြု၍ သက်သေခံတင်ရန်ဖြစ်လေ သည်။