ပါရဂူ - ဒိဗျာ

                                                     ( ၁ )

                                               နက္ခတ်ပွဲသဘင်

               အနုပညာ၏ မကိုဋ်သရဖူဖြစ်သည့် ဘုရင့်ကချေသည် ဒေဝီမလ္လိကာ သည် သူ၏ သမီးပျို ရုစိရာ ရှောင်တခင်ကွယ်လွန်သွားသဖြင့် သောက ပရိဒေဝမီး တောက်လောင်ပြီးလျှင် အနုပညာနှင့် လူ့အသိုက်အဝန်းကို မုန်း တီးငြီးငွေ့၍ နေလာခဲ့လေ၏။ သာဂလ တစ်မြို့လုံးသည်လည်း မလ္လိကာ ၏ ပရိဒေဝမီးကြောင့် နှစ်နှစ်လုံးလုံး တအုံနွေးနွေး သောကမအေးဖြစ်နေ ပြီးလျှင် ညဉ့်အမှောင်ထဲက ဆီမီးကင်းမဲ့နေသည့် မြို့ရွာကဲ့သို့ အရှိန်အဝါ ဆိတ်သုဉ်း၍နေလေ၏။

          ဒေဝီမလ္လိကာသည် စောင်းတော်ကို ပိုက်လျက်ရှိသည့် သူရဿတီ ဒေဝီမယ်တော် နတ်သမီး၏ ရှေ့မှောက်၌ တာဝန်ဝတ္တရားကို ရိုသေမြတ်နိုး သူပီပီ ပူဆွေးတောက်လောင်နေသည့် သောကကို မျိုသိပ်ဖိနှိပ်လျက် တန်ခူး လပြည့်နေ့ည နက္ခတ်ပွဲသဘင်အခမ်းအနား၌ လူ့လောက၊ လူ့အသိုက်အဝန်း ထဲသို့ တစ်ဖန် ပြန်ဝင်ရန် အဓိဋ္ဌာန်ပြုလိုက်လေ၏။ ။

          သာဂလမြို့ရှိ သာယာကြည်နူးဖွယ် ပြန့်ကျယ်ကြီးမားသည့် ပေါက္ခရဏီ ရေကန်ကြီး၌ ရေပြင်တွင်လည်းကောင်း၊ ကမ်းပြင်တွင်လည်းကောင်း၊ လူစု လူဝေးကြီးသည် လှိုင်းလုံးကြီးများပမာ တလိမ့်လိမ့်လှုပ်ရှား၍ နေလေသည်။

             နေစွယ်ကွယ်ပျောက်ဖို့ရန်မှာ တစ်ပဟိုရ်မျှသာ လိုတော့၏။ သို့ရာတွင် ဘယ်ဆီကို ကြည့်လိုက် ကြည့်လိုက် လူထုပရိသတ်ကြီးသည် ကြိတ်ကြိတ် တိုးနေတုန်းပင် ရှိသေးသည်။ ယင်းလူထုပရိသတ်အလျဉ်ထဲက နက္ခတ် ပွဲသဘင် မဏ္ဍပ်ကြီးမှာ မိုးဥတုကာလ၌ မိုးရေလျှံပြီး မြစ်ရေတိုးသည့်အခါ မြစ်ပြင်ကျယ်ကြီးထဲ၌ စဉ်းငယ်ပေါ်နေသည့် ကျွန်းငယ်နှင့် ပုံသဏ္ဌာန်တူ နေလေသည်။ မဏ္ဍပ်မှာ စရည်းအိုးများ၊ ငှက်ပျောတိုင်များ၊ နတ်လမ်းများ၊ နွေဦးတွင် ပွင့်ဖူးသည့် ရွက်ညွန့် ပန်းမန်တို့ဖြင့် ပြုလုပ်ထားသည့် မုခ်ဦး များဖြင့် ပြင်ဆင်မွမ်းမံထားလေသည်။ ပတ်ဝန်းကျင်၌ကား ပန်းအမျိုးမျိုး၊ အမွှေးတိုင်နံ့အမျိုးမျိုး၊ ရနံ့အမျိုးမျိုးတို့ဖြင့် ထုံသင်းကြိုင်လှိုင်၍ နေလေ သည်။ ဦးခေါင်းပေါ်၌ မောက်ရှည်ကြီးကိုဆောင်းလျက် ကျောပေါ်၌ လွှား ကြီးကို ပိုးထားသော လှံကိုင်မင်းချင်းယောက်ျားများသည် စိုးရိမ်တကြီးဖြင့် မဏ္ဍပ်လမ်းနှင့် မဏ္ဍပ်ထဲတွင်ရှိသော ဂဏလွှတ်တော်အဖွဲ့ ဝင်အမတ်များ၊ ပဒေသရာဇ်များ၊ အနွယ်တော်များ၊ အထက်တန်းလွှာမှ ပုဂ္ဂိုလ်များ၊ လူရတတ် လူကုံထံများ၊ အမျိုးကောင်းသမီးများ၏ နေရာများကို လှိမ့်၍လာသော လူထု ပရိသတ်ကြီး ဝင်မတိုးနိုင်အောင် ကာကွယ်စောင့်ရှောက်နေကြလေသည်။

           နေမင်းသည် မိုးကုပ်စက်ဝိုင်းအောက်သို့ သက်ဆင်းသွားလေပြီ။ မဒ္ဒရဂဏတိုင်းပြည်အတွင်းရှိ သန်မာတောင့်တင်းပြီး ကျက်သရေရှိသည့် မြင်းများကထားသည့် ယာဉ်ရထားများ၊ လှပသော အဝတ်အစားကို ဝတ် ဆင်ထားသူများ ထမ်းပိုးလာသည့် ဝေါများ၊ မြင်းများသည် လူထုပရိသတ် ကြီး၏အလယ်၌ ကာကွယ်စည်းခြားထားသည့် လမ်းမအတိုင်း မဏ္ဍပ်ရှိရာ သို့ လာနေကြလေ၏။ မဏ္ဍပ်လှေကားပေါ်၌ရပ်နေသည့် အခမ်းအနား ကွပ်ကဲသူသည် ခရာကိုမှုတ်လျက် ရွှေပွဲလာဧည့်ပရိသတ်များကို ကြိုဆိုနေ လေသည်။ မဏ္ဍပ်အတွင်းသို့ ဂဏလွှတ်တော်အဖွဲ့ ဝင်အမတ်များ၊ မင်း ပရိသတ်များ ရောက်ရှိလာသည့်အခါ အခမ်းအနားကွပ်ကဲသူသည် ထိုပုဂ္ဂိုလ် များ၏ အမည်နာမ၊ အနွယ်မျိုးရိုး၊ ရာထူးဂုဏ်ထူးတို့ကို ထုတ်ဖော်ကြေညာ လျက် ထိုပုဂ္ဂိုလ်များအား သတ်မှတ်ထားသည့် နေရာထိုင်ခင်းများ၌ အသီး သီးနေရာ ချထားပေးလေ၏။ ယာဉ်ရထားများ၊ မြင်းများ၊ ဝေါများသည် ပါသည့်ပုဂ္ဂိုလ်များကို မဏ္ဍပ်တံခါးဝတွင် ချထားခဲ့ပြီးလျှင် သားမြီးယပ်ကိုင်ဆောင်ထားသည့် ကျေးကျွန်များ အင်္ကျီရှည်ကြီးများကို ဝတ်ထားသည့် အလုပ်အကျွေးများနှင့်အတူ မဏ္ဍပ်ကို လက်ယာရစ်လှည့်ပတ်ပြီး အနောက် ဘက်သို့သွား၍ တန်းစီရပ်နေကြလေ၏။

လူကုံထံအထက်တန်းလွှာမှ အမျိုးကောင်းသား၊ အမျိုးကောင်းသမီး များသည် နက္ခတ်ပွဲသဘင်နှင့် လျောက်ပတ်သင့်တော်မည့် အဝတ်တန်ဆာ များကို မိမိတို့၏အဆင်း၊ မိမိတို့၏မျိုးရိုးဇာတိအလိုက် ဝတ်ဆင်ထားကြ သည်။ ဗြာဟ္မဏမျိုးနွယ်များသည် ရွှေချည်ဖျင်ဖြင့် ရက်ထားသည့် အနီ ရောင်ခေါင်းပေါင်းများကို ဦးခေါင်းတွင် ပေါင်းထားကြသည်။ နဖူးပြင်နှင့် လက်မောင်းများ၌ စန္ဒကူးအဖြူစက်ကို တို့ထားကြသည်။ ပခုံးများပေါ်မှ လွင့်၍နေသည့် ကိုယ်ရုံအင်္ကျီ၏ အောက်ဘက်၌ မပြတ်မသား မြင်တွေ့နေ ရသည့် အစင်းသည် ဖြူဆွတ်နေသည့် အတွင်းခံလုံကွင်း၏အပေါ်၌ အဝါ ရောင် ယဇ်ချည်ကြိုးအသွင်ဖြင့် ပေါ်လွင်၍နေလေသည်။ သူတို့၏ အနား ကွပ်ထားသည့် အဖြူရောင် အတွင်းခံလုံကွင်းသည် ခြေနင်းသို့အထိ ကျနေ လေသည်။ ခတ္တိယမျိုးနွယ်များကမူ ရွှေချထားသည့် လှပသောအဝတ်များကို ဝတ်ဆင်ထားကြသည်။ ရှည်လျား ချွန်ထက်နေသည့် နှာခေါင်း၏ အောက် ဘက်ရှိ နှုတ်ခမ်းမွေးများမှာ ကင်းမြီးကောက်နှစ်ကောင် ထောင်နေသကဲ့သို့ ပါးပြင်သို့ အထိ ထိုးထွက်နေလေသည်။ သူတို့၏ နား၊ လည်ပင်း၊ လက် မောင်း၊ လက်ကောက်ဝတ်များ၌ ရတနာခြယ်စီထားသည့် အဆင်တန်ဆာ များကို ဝတ်စားဆင်ယင်ထားကြသည်။ ကျယ်ပြန့်သည့် ရင်အုပ်မှ သေး သွယ်သည့် ခါးအထိ တင်းကျပ်သည့် အပေါ်ရုံအင်္ကျီကို ဝတ်ထားသည်။ ခါးမှ ဒူးအထိ အနားကွပ်ထားသည့် အတွင်းခံလုံကွင်းကို ဝတ်ထားသည်။ ဒူးမှ ခြေဖဝါးအထိ ခြေနင်းများကို စွပ်ထားကြသည်။ ကျောက်စီဓားမှာ ခါးမှာ တွဲလွဲကျနေလေသည်။ သူကြွယ်များ၏ အဝတ်အစားများမှာ အဖိုး အလွန်ထိုက်တန်သော်လည်း ခပ်ပွပွပင်ဖြစ်လေသည်။ ဂဏလွှတ်တော်အဖွဲ့ ဝင် အမတ်များမှာ ဒူးခေါင်းသို့အထိ ကျ၍နေသည့် သားမွေးအကျီရှည် ကြီးကို ဝတ်ဆင်ထားကြသည်။ အချို့သော ယွန်း(ယဝန) ပဒေသရာဇ်တို့ သည် ဦးခေါင်းပေါ်၌ ခပ်ချွန်ချွန်ဦးထုပ်ကို ဆောင်းထားကြ၏။ ခြေသလုံး အထိ ခပ်ပွပွ သိုးမွေးအကျီရှည်ကြီးကို ဝတ်ထားကြ၏။ ခြေထောက်တွင်မူခြေစွပ်နှင့် ခပ်ချောင်ချောင် ခြေနင်းကို စီးထားသည်။ အချို့ကမူ “အာရယန် အဝတ်ကို ဝတ်စားဆင်ယင်ထားကြသည်။

             အချို့အမျိုးသမီးများ၏ ဆင်ယင်ထုံးဖွဲ့မှု၊ ဝတ်စားဆင်ယင်မှုများမှာ အလွန်ရှုချင့်စဖွယ် ကောင်းလှပေသည်။ ပုလဲသွယ်များဖြင့် ပုံအမျိုးမျိုးဖော် ၍ စည်းနှောင်ထုံးဖွဲ့ ထားသည့် ဆံပင်များ၏ အပေါ်၌ရှိသော လခြမ်း သဏ္ဌာန် ပန်းပွင့်ဦးရစ် မကိုဋ်များမှာ အထူးပင် တင့်တယ်လှပလေသည်။ နား၊ လည်တိုင်၊ လက်ကောက်ဝတ်၊ လက်ချောင်းများ၌ နားတောင်း၊ ပုလဲ သွယ်၊ ဆွဲကြိုး၊ လက်ကောက်၊ လက်စွပ်များ အပြည့်ဝတ်ဆင်ထားကြသည်။ တင်းကျပ်သော ကိုယ်ရုံအင်္ကျီကို ဝတ်ထားသည်ဖြစ်၍ အထက်ပိုင်း၌ မို့ မောက်သော ရင်သားကို မြင်ရသည်။ အောက်ပိုင်း၌ ပြည့်ဖြိုးသော တင် သားကို တွေ့ရသည်။ အလယ်ပိုင်း ခါးသွယ်သွယ်၌မူ ရွှေခါးစည်းကြိုးကို စီးထားသည်။ ရတနာခြယ်စီထားသည့် ထိုခါးစည်းကြိုးမှာ ခါးနှင့်တင်ပါး အကြား အောက်ဘက်သို့ ဝိုက်ကျသွားပြီး တင်သား၏ ပြည့်ဖြိုးပုံနှင့် ဝိုင်း ဝန်းပုံကို အထင်းသား လှစ်ပြနေလေသည်။ ခါးစည်းကြိုး၌ ရွှေခြူကလေး များ ဆွဲထားသည်။ သူတို့၏ အောက်ပိုင်းလုံကွင်းမှာ ခါးစည်းကြိုးမှ ဥဒေါင်း မြီးအသွင် ဖြာကျလျက် ဆေးနီဆိုးပြီး အဆင်တန်ဆာများ ဆင်ထားသည့် ခြေထောက်များ၏အောက်ဘက်၌ ခင်းကျင်းထားသည့် ကမ္ဗလာကော်ဇော များကို ထိပြီးလျှင် ခြေထောက်များကို ဖုံးလွှမ်း၍ထားလေသည်။ ပန်းပေါင်းစုံ တို့၏ရနံ့သည် လူတို့၏ အရှေ့အနောက်တစ်ခွင်တွင် ပျံ့သင်းကြိုင်လှိုင် ၍နေလေသည်။ များသောအားဖြင့် ယွန်း(ဂရိ) အမျိုးသမီးတိုင်းလိုလိုပင် အာရယန်အမျိုးသမီးများ၏ အဝတ်အစားကို ဝတ်စားဆင်ယင်ထားကြ သည်။

              ကောင်းကင်ပြင်၌ တန်ခူးလ လသည် ထွက်စပြုလာလေပြီ။ မဏ္ဍပ် ၏ အောက်ဘက် စင်မြင့်၏ လေးဖက်လေးရပ်၌လည်းကောင်း၊ လမ်းမ ပေါ်၌လည်းကောင်း၊ မီးတိုင်များ ထွန်းညှိထားကြသည်။ ဘုန်းတန်ခိုးကြီး မားသော တရားရှင် ယွန်း(ဂရိ) ဘုရင်မိလိန္ဒလက်ထက်က မဒ္ဒရနိုင်ငံ၏ မဟာသေနာပတိအဖြစ် အမှုထမ်းခဲ့သော အသက်အရွယ်အိုမင်းလှပြီဖြစ် သည့် မိတေဒသသည် ယခု သာဂလ ဂဏနိုင်ငံ၏ ဂဏပတိဖြစ်လာလေသည်။ ဂဏပတိ မိထောဒသဂဏပတိနေရာတွင် ထိုင်လိုက်သည်နှင့်တစ် ပြိုင်နက် မင်္ဂလာတူရိယာများ စတင်တီးမှုတ်ကြလေတော့သည်။ စင်မြင့်၏ အတက်အဆင်း၌ ရပ်နေသည့် အခမ်းအနားကွပ်ကဲသူသည် ခရာကို တစ်ဖန် မှုတ်လျက် “ရွှေပွဲလာပရိသတ်အပေါင်းတို့ခင်ဗျား၊ အနုပညာ၏ မကိုဋ် သရဖူဖြစ်သည့် ပြည့်ကျက်သရေဆောင် နိုင်ငံတော် ကချေသည် ဒေဝီ မလ္လိကာ အခမ်းအနားသို့ ကြွလာပါပြီ” ဟု ဟစ်အော်ကြေညာလိုက်လေ၏။

            ယင်းသို့ ဟစ်အော်ကြေညာလိုက်သောအခါ လူထုပရိသတ် ပင်လယ် သမုဒ္ဒရာပြင်ကြီး၌ လှိုင်းတံပိုး ထသွားလေ၏။ လူထုပရိသတ်အပေါင်းသည် လည်ကိုပင့်လျက် လမ်း၏ နောက်ဘက်သို့ လှည့်ကြည့်ကြလေ၏။

            မီးရှူးတန်ဆောင်များ ကိုင်ဆောင်ထားကြသည့် မြင်းစီးယောက်ျား များ၏ နောက်ဘက်မှ ယာဉ်ရထား၊ ထိုယာဉ်ရထား၏ နောက်ဘက်မှ မီးရှူးတန်ဆောင် ကိုင်ဆောင်ထားသည့် မြင်းစီးယောက်ျားများ၊ ယင်းသို့ ညှပ်ပြီး လိုက်ပါလာကြသည်။ ယာဉ်ရထားသည် ခဏချင်းပင် မဏ္ဍပ်အနီး ရှိ လူထုပရိသတ်ထဲသို့ ရောက်ရှိလာလေ၏။ လူထုပရိသတ်သည် အနုပညာ ၏ မကိုဋ်သရဖူ ပြည့်ကျက်သရေဆောင် မလ္လိကာဒေဝီ အသက်ရှည်စေကြောင်း၊ အောင်မြင်စေကြောင်း ဟစ်ကြွေးဆုတောင်းကြလေ၏။ ပန်းမိုး၊ ပန်းကုံးမိုးကိုလည်း မလ္လိကာ၏ ရထားပေါ်တွင် ရွာချကြလေ၏။ ပန်းနှင့် ပန်းကုံးများစွာတို့မှာ ယာဉ်ရထားထဲ ရောက်သွားပြီးလျှင် ပန်းပွင့်အပုံကြီး ပေါ်တွင် လျှောကျလျက် အောက်ဘက်သို့ လွင့်ကျလာကြလေ၏။ မလ္လိကာ သည် လက်ယှက်၍ ပြုံးချိုသော မျက်နှာ၊ နှိမ့်ချသော ဦးခေါင်းဖြင့် မျက်စိ တစ်ဆုံး ပြန့်ပြူး၍နေသည့် ပရိသတ်လူထုကြီး၏ ကျေးဇူးဥပကာရတင်ရှိသော မျက်လုံးများဖြင့် အရိုအသေပေးခြင်းကို ခံယူ၍နေလေသည်။ မဏ္ဍပ်တွင်း သို့ ရောက်လာသည့်အခါ ကချေသည် မလ္လိကာသည် မင်းပရိသတ်၏ ရိုသေဦးညွတ်မှုကို ခံယူပြီးလျှင် ဂဏပတိ၏အနီးတွင် နေရာယူလိုက်လေ ၏။ မလ္လိကာ၏ ယာဉ်ရထားနောက်မှ ယာဉ်ရထားခြောက်စီးဖြင့် သူ၏ လက်ရွေးစင်တပည့်မများမှာ အနုပညာပြိုင်ပွဲတွင် ဝင်ရောက်ယှဉ်ပြိုင်ရန် အတွက် လိုက်ပါလာကြလေ၏။

             အခမ်းအနားကွပ်ကဲသူက ခရာကို တစ်ဖန်မှုတ်လိုက်ပြန်လေသည်။

မင်္ဂလာ အစပျိုးတူရိယာသံများ ရပ်သွားပြီး စည်တော်ကို ရွမ်းလိုက်လေ သည်။ ကပွဲမစမီ တက္ခသီလာနှင့် မဂဓတိုင်းမှ ပညာသင်ကြားဆည်းပူးပြီး ပြန်လည်ရောက်ရှိလာကြသည့် လုလင်ပျိုများ၏ လက်နက်အတတ်ပညာ ပြိုင်ပွဲ ကျင်းပဖို့အစီအစဉ်ရှိလေသည်။ ထိုပြိုင်ပွဲတွင် အရည်အသွေးကို စမ်း သပ်ပြီးမှသာလျှင် လုလင်ပျိုတို့သည် မဒ္ဒရဂဏတိုင်းပြည်၏ စစ်တပ်တွင် ရာထူးခန့်အပ်ခြင်း ခံကြရမည်ဖြစ်လေသည်။

          အခမ်းအနားကွပ်ကဲသူက ကြေညာလိုက်လေ၏။

          “တရားအမတ်ကြီး မဟာပဏ္ဍိတ် ဒေဝရှရမာ၏မြေး ဝိနယရှရမာ၊ မဟာပဒေသရာဇ် သဗ္ဗတ္ထ၏သား ဣန္ဒရဒီပ၊ ဂဏလွှတ်တော်ဥက္ကဋ္ဌ အာကျာရယပဝဒ္ဓန၏သား ဝသုဓိရ၊ ဂဏလွှတ်တော် မဲအရာရှိချုပ် ပဒေသရာဇ် ကတ္တာဝီရ၏သား သဒ၊ သူဌေးကြီး သမတ္ထက၏သား ဝိရှဏေသ၊ သူ ကြွယ်ကြီး ပရေဆထ၏သား ပိထုသေန..”

          လုလင်ပျိုခြောက်ယောက်တို့သည် စစ်သည်တော်၏အသွင်ဖြင့် ကိုယ် ကာယပေါ်၌ ချပ်မိန်ညိုကို ဝတ်လျက် ဦးခေါင်းပေါ်၌ သံခမောက်ကို ဆောင်း လျက် ပခုံးပေါ်၌ လေးနှင့်မြားကို လွယ်လျက် ခါး၌ ဓားကိုချိတ်ဆွဲလျက် စင်မြင့်ပေါ်သို့ တက်လာကြလေ၏။ မဒ္ဒရဂဏနိုင်ငံ၏ ဂဏပတိလည်းဖြစ်၊ မဟာသေနာပတိလည်းဖြစ်သော အသက်အရွယ်အားဖြင့် အိုမင်းရင့်ရော် လှပြီဖြစ်သည့် မိတေဒသ၏ ရှေ့မှောက်၌ ရပ်ပြီးလျှင် ထိုလုလင်ပျို ခြောက်ယောက်တို့သည် မိမိတို့၏ဓားကို နှာခေါင်းနားအထိ မြှောက်ကိုင်လျက် ဦးခေါင်းကိုညွှတ်၍ ကြေညာလိုက်ကြလေသည်။

          “မဒ္ဒရဂဏနိုင်ငံ သာဂလမြို့သားဖြစ်သော ကျွန်ုပ် မည်သူမည်သူ့၏ သားသည် သေနင်္ဂဗျူဟာ စစ်အတတ်ပညာကို သင်ကြားတတ်မြောက်လာ ခဲ့ပြီဖြစ်၍ တိုင်းပြည်နိုင်ငံ၏တာဝန်ကို ထမ်းရွက်ရန် အသင့်ပင်ရှိနေပါပြီ။ ဂဏနိုင်ငံက ကျွန်ုပ်၏ အရည်အချင်းကို စမ်းသပ်လျက် စစ်တပ်တွင် အမှု ထမ်းရန်အတွက် ကျွန်ုပ်အား ထိုက်တန်သောရာထူးကို ပေးအပ်ပါရန် တောင်းပန်ပါ၏”

          ဂဏပတိသည် လုလင်ပျိုများအား လေးအတတ်ကိုပြိုင်ရန် အသင့် ရှိနှင့်နေကြဖို့ အမိန့်ပေးပြီး အသင့်ရှိနေသော စစ်သည်တော်တစ်ဦးအားအချက်ပေးလိုက်လေ၏။ လုလင်ပျိုတို့၏ လေးတွင် မြားအသင့်တပ်ထား လိုက်ကြလေပြီ။ စစ်သည်တော်သည် မဏ္ဍပ်၏ မျက်နှာကြက်ရှိရာသို့ အရောင်အမျိုးမျိုးရှိသော ဘောလုံးကလေးများကို ပစ်တင်လိုက်လေ၏။ လူထုပရိသတ်သည် ထိုလေးပစ်အတတ်ပြိုင်ပွဲကို စိတ်ဝင်စားစွာဖြင့် ကြည့်နေကြသည်။ လုလင်ပျိုတို့သည် ဘောလုံးပေါင်းများစွာကို လေးဖြင့် ခဲယဉ်းစွာ ပစ်ဖောက်ကြလေသည်။ သေနာပတိနှင့် အကဲဖြတ်တို့သည် ဘယ် လုလင်သည် မြားဘယ်နှစင်းဖြင့် ဘောလုံးဘယ်နှလုံးကို ပစ်ဖောက်သည် ဆိုသည့်အချက်ကို ဂရုစိုက်ပြီး ကြည့်ရှုနေလေ၏။ မဟာသေနာပတိသည် လက်မြောက်လျက် လေးအတတ်ပြိုင်ပွဲ အပြီးသတ်ရန် အချက်ပေးလိုက် လေ၏။

          တစ်ဖန် မဟာသေနာပတိသည် လုလင်ပျိုတို့အား ချပ်မိန်ညိုကို ချွတ် လျက် မိမိတို့သန်ရာလက်နက်တစ်ခုကို ရွေးချယ်ရန် အမိန့်ပေးလိုက်ပြန် ၏။ ဣန္ဒရဒီပနှင့် ဝိနယရှရမာက လှံကိုလည်းကောင်း၊ အခြားသောလုလင် တို့က ဓားကိုလည်းကောင်း အသီးသီးရွေးချယ်လိုက်ကြသည်။ မဟာသေနာ ပတိက အမိန့်ပေးလိုက်လေ၏။

          “လုလင်တိုင်းသည် ကျန်လုလင်အား မိမိ၏ရန်သူဟု သဘောထား လျက် မိမိကိုယ်ကိုကာကွယ်ရင်း ရန်သူများအား ဒဏ်ရာအနာတရဖြစ်အောင် ထိုးခုတ်ရမည်။ ဒဏ်ရာအနာတရဖြစ်အောင် ထိုးခုတ်ရမည်ဆိုသည့် အဓိပ္ပာယ် မှာ ပြင်းပြင်းထန်ထန် ဒဏ်ရာအနာတရဖြစ်အောင် ထိုးခုတ်ရမည်ဟု မဆို လို။ မည်သည့်လုလင်မှ အကောက်ဉာဏ်ကိုသုံးခြင်း၊ အဂတိလိုက်စားခြင်း များကို မပြုလုပ်ရ။ ယင်းနှစ်မျိုးကို ပြုမူက ဂဏနိုင်ငံတရားလွှတ်ရုံးမှ အပြစ် ဒဏ်ပေးခြင်း ခံရလိမ့်မည်”

          မဟာသေနာပတိသည် ကိုယ်ရုံအင်္ကျီကို လေထဲတွင် ဝှေ့ယမ်းလျက် တိုက်ပွဲစပြီဆိုသည့် အမှတ်သင်္ကေတကို ပြလိုက်လေ၏။ မဏ္ဍပ်ထဲ၌ လျှပ် စီးလက်သကဲ့သို့ အချက်ပေါင်းများစွာ ဝင်းခနဲ ဝင်းခနဲ လက်သွားလေ၏။ လုလင်ခြောက်ယောက်တို့သည် နေရာအသီးသီး၌ ရန်သူကို တိုက်ခိုက်ရန် အတွက် ကျောကို လေးသဏ္ဌာန်ကွေးလျက် အစွယ်နှင့် ခြေသည်း လက် သည်းကို ထုတ်ထားသည့် ကျားသတ္တဝါကဲ့သို့ တုန်၍နေကြလေသည်။

          လုလင်တိုင်းသည် ကျန်လုလင်အားလုံးအား မျက်တောင်မခတ် စူးစိုက် ကြည့်ရှုနေကြသည်။ သူတို့၏လက်ထဲရှိ လက်နက်များမှာ တစ်ခဏမျှ မျက်နှာကြက်အောက်ဘက်ရှိ မီးရောင်ကဲ့သို့ ဝင်းလက်ကြိုးပြက်သွားပြီးလျှင် လှုပ်ရှားသွားသည့် မီးညွန့်မီးလျှံကဲ့သို့ သူတို့၏လက်ထဲတွင် တစ်ဖန် ပြန် ငြိမ်သွားကြပြန်လေသည်။

          ကျယ်ပြောလှသည့် လူထုပရိသတ်ကြီးသည် သက်မကို ပင့်လျက် မျက်လုံးအပြူးသားနှင့် စစ်သည်သူရဲကောင်းများ၏ သိမ်မွေ့ လှသည့် လှုပ် ရှားခြင်းနှင့် ရွေ့လျားခြင်းများကို စူးစိုက်ကြည့်ရှုနေကြသည်။ ကြည့်ရှုရင်း ကြက်သီးမွေးညင်းထလာကြလေ၏။ စစ်သည်သူရဲကောင်းများသည် နေရာ ကို ရွှေ့လိုက်၊ ညင်သာသော လေအလာတွင် ယိမ်းယိုင်လှုပ်ရှားသွားသည့် မြက်ပင်များကဲ့သို့ လှုပ်ရှားလိုက် ဖြစ်နေကြသည်။ တစ်ခဏအတွင်း၌ပင် သူတို့၏ စင်းနေသည့်လည်ပင်း၊ အဝတ်မဲ့နေသည့် လက်မောင်း၊ အမွေး တင်းကျမ်းနှင့် ရင်အုပ်၊ တောင့်တင်းသန်မာသည့် ကျောပြင်များမှ ချွေးသီး ချွေးပေါက်ကြီးများ စီးကျလာလေ၏။ သူတို့၏ ကိုယ်ကာယပေါ်၌ နေရာ အနှံ့အပြားတွင် အနီစင်းများထင်လျက် သွေးများ စီးကျလာလေသည်။ သွေးသည် ချွေးနှင့်ရောလျက် ပျံ့နှံ့သွားသည်ဖြစ်၍ သူတို့၏ ကိုယ်ကာယ သည် မြေနီမှုန့်ရောင် ထနေလေသည်။

          မဟာသေနာပတိ၏ ညွှန်ကြားချက်ဖြင့် အခမ်းအနားကွပ်ကဲသူသည် ခရာကိုမှုတ်လျက် သေနင်္ဂဗျူဟာ စစ်အတတ်ပညာပြိုင်ပွဲ အပြီးသတ်ပြီဖြစ်ကြောင်း အချက်ပေးလိုက်လေသည်။ လုလင်များသည် အစစ်အဆေးခံရန် အတွက် မဟာသေနာပတိ၏ ရှေ့မှောက်သို့ ရောက်လာကြ၏။ လုလင် သကိဒနှင့် ပိထုသေန၏ ကိုယ်ပေါ်၌ သွေးအရာနှစ်ခုမျှသာလျှင် ရှိလေ သည်။ လုလင် ဝိရှဏေသ၏ ကိုယ်ပေါ်၌ ဒဏ်ရာသုံးခုစီ ရှိနေလေသည်။

          ဂဏလွှတ်တော်အဖွဲ့ဝင် အမတ်များနှင့် တိုင်ပင်နှီးနှောလျက် မဟာ သေနာပတိက ကြေညာလိုက်လေ၏။

          “ဂဏလွှတ်တော်အဖွဲ့ဝင်များနှင့်အတူ လူထုပရိသတ်အပေါင်းတို့၊ လုလင်သကိဒနှင့် ပိထုသေနသည် ဓားရေး၊ လှံရေး၌ တကယ်ကျွမ်းကျင် လိမ္မာကြောင်း ပြသခဲ့ကြသည်။ ဂဏလွှတ်တော်အဖွဲ့ဝင်အမတ်များ၏ အလို