စိတ်ကူးချိုချိုစာပေ
နတ်နွယ် - ဒေါက်တာကွိတ်
Couldn't load pickup availability
(၂)
ဘယ်လိုမှ မဖြစ်နိုင်ပါ။ သို့သော် သတ်မှတ်ထားသည့်အချိန်မှာပင် တကယ် ဖြစ်ခဲ့သည်။
ငှက်တွေ လန့်ကုန်ကြသည်။ ယုန်ကလေးတွေ စပျစ်ခင်းထဲမှာ အထိတ်တလန့်ပြေးလွှားကြသည်။ ရှဉ့်ကလေးသုံးကောင်သည် ပုန်းအောင်းရ မည်ကို မသိဘဲ မြေပြင်လမ်းအတိုင်း ဒုန်းစိုင်းကြတော့သည်။ သစ်ပင်များ ယိမ်းလှုပ်ကာ သစ်ရွက်စိမ်းများ လွင့်ကြွေကြသည်။ ဖုန်မှုန့်နီနီများ ခြုံလွှမ်း သွားသည်။
ဆန်အကီနို မြို့နယ်အုပ်ချုပ်ရေးမှူးနှင့် မြို့မိမြို့ဖလေးဦးတို့သည် ၄င်းတို့၏လက်ပတ်နာရီများကို တစ်ပြိုင်တည်းကြည့်လိုက်ကြပြီး တစ်ချိန် တည်းမှာပင် ရေရွတ်ညည်းတွားလိုက်ကြသည်။ ၄င်းတို့သည် ဂရိုမူစီခြံဝတွင် ရပ်ထားသော လင်ကွန်းမှန်လုံကားကြီးအနီးတွင် ရပ်နေကြခြင်းဖြစ်သည်။ ထိုနေရာမှကြည့်လျှင် ငလျင်လှုပ်သည်ကို ကောင်းစွာမြင်တွေ့နိုင်ပြီး သူတို့ကို လည်း မည်သူကမျှ မတွေ့ ရှိနိုင်ဟု အုပ်ချုပ်ရေးမှူး ဝိတ်ဒ်ဝိုင်းယက်က ပြောကြားခဲ့သည်။
“ကျွန်ုပ်တို့ အလန့်တကြားဖြစ်သွားတာကို သူတို့ မြင်မသွားစေချင် ဘူး” ဟု သူကဆိုခဲ့သည်။
ယင်းသို့ဖြင့် ယခုအခါ နေပူကြီးထဲတွင် ဖုန်တွေလွင့်တက်လာပြီး သူတို့ပြောသည့်အတိုင်း တကယ်ဖြစ်လာပါတော့သည်။
“ကျုပ်မယုံဘူး၊ ကျုပ်ကိုယ်တိုင်မြင်ရတာတော့ အမှန်ပဲ။ ဒါပေမဲ့ ကျုပ်မယုံဘူး။ ခင်ဗျားနာရီမှာ ၃ နာရီ ၅၅ မိနစ်ပဲလား လက်စ်”
ဖိန်စတိန်ကုန်တိုက်ပိုင်ရှင် ဟဲရစ်ဖိန်စတိန်က မယုံကြည်နိုင်ကြောင်း ကို ပြောဆိုရင်း လက်စတာကပ္ပဝဲကို မေးလိုက်သည်။
“ဟုတ်တယ်၊ ၃ နာရီ ၅၅ မိနစ် စက္ကန့်တောင်မလွဲဘူး”
အကီနို ကူးသန်းရောင်းဝယ်ရေး ကုမ္ပဏီဥက္ကဋ္ဌ လက်စတာကပ္ပဝဲ စတုတ္ထက ဖြေလိုက်သည်။ သူသည် အသက် ၅၅ ဝန်းကျင်ရှိပြီး ဖိန်စတိန် ထက် တစ်လက်မခွဲလောက် အရပ်ပိုမြင့်သည်။ သူက ရှပ်အင်္ကျီအဖြူ၊ ကုတ်အင်္ကျီအနက်စင်းနှင့် ဖြစ်သည်။
ဖိန်စတိန်က အသားညိုပြီး မျက်နှာအမူအရာ ချိုသာပျော့ပျောင်း သည်။ သူက ဘောင်းဘီအဖြူ၊ ကုတ်အင်္ကျီအပြာနှင့် ဖြစ်သည်။ သူ၏ဖိနပ် နှစ်ဖက်မှာ နက်မှောင်ပြီး ပြောင်နေသည်။
“ဒါဆိုရင် သူတို့အနေနဲ့ တကယ်လုပ်နိုင်တာပဲ”ဟု ဖိန်စတိန်က ပြောသည်။
“အင်း၊ သူတို့အနေနဲ့ ဒီအဆင့်အထိ လုပ်နိုင်တာတော့ အမှန်ပဲ” ကပ္ပဝဲက မှတ်ချက်ချသည်။
“သူတို့အနေနဲ့ ဒီအဆင့်ကိုလုပ်နိုင်ရင် ဒါထက်လည်း ပိုပြီးလုပ်နိုင်မှာပဲ”
“ဟုတ်တယ်၊ အုပ်ချုပ်ရေးမှူး ဝိုင်းယက်က ဝင်ပြောသည်။ `သူတို့ က ဘာမဆို သူတို့လုပ်နိုင်တယ်လို့ ပြောတယ်။ ဘယ်လိုငလျင်မျိုးကိုမဆို သူတို့လုပ်နိုင်မယ်တဲ့။ အခုလို အသေးစားမျိုးကလေးကိုလည်း လုပ်နိုင်မယ်။ တကယ့်အကြီးစားကိုလည်း လုပ်နိုင်မယ်”
“ကျုပ်စိတ်ထဲမှာတော့ မယုံချင်ဘူး” ဖိန်စတိန်က ဆိုသည်။ ။
“အမြောက်ကြီးတွေနဲ့ ပိုက်စိပ်တိုက်ပြီး ပစ်ထားတဲ့အတိုင်းပဲ၊ ဖုန်တွေ တထောင်းထောင်းထပြီး ပတ်ဝန်းကျင် အခြေအနေတစ်ခုလုံးဖြစ်နေပုံက အမြောက်ကြီးတွေနဲ့ ပိုက်စိပ်တိုက်ပြီး ပစ်ထားတဲ့အတိုင်းပဲ”
ရပ်ကာ စက်မှုလက်မှုကုမ္ပဏီဥက္ကဋ္ဌ ဒိုအန်ရပ်ကာက ပြောလိုက်ခြင်း ဖြစ်သည်။
“ကဲ... အဲဒီတော့ ဟုတ်ပြီ၊ ကောင်းတဲ့အချက်တွေ အများကြီး ရှိပါတယ်။ အကျိုးဖြစ်နိုင်မဲ့ဟာတွေကို ကျုပ်တို့ စဉ်းစားရမယ်”
ဘွိုင်ဒင်ဟောက်ဆင် မြေယာရောင်းဝယ်ရေးနှင့် ဆန်အကီနို ကုန်သည်ကြီးများ အသင်းဥက္ကဋ္ဌ ဆန်နီဘွိုင်ဒင်ဟောက်ဆင်က ပြောလိုက် သည်။
သူက ရပ်ကာလိုပင် အရပ်အမောင်းခြောက်ပေကျော်သူ ဖြစ်သည်။ သူတို့နှစ်ယောက်စလုံးပင် ချိုသာရည်မွန်သော မျက်နှာများရှိကြသည်။ ၄င်း တို့၏ ဗိုက်များမှာ မသိမသာထွက်နေကြသည်။ သူတို့နှစ်ယောက် အဝတ် အစား ဆင်တူဝတ်ထားခဲ့လျှင် အချို့သောသူများက အမြွှာညီအစ်ကိုဟု ထင်မှတ်ကြရသည်။ သည်ကနေ့တွင်မူ သူတို့ ပန်းရောင်ရှပ်အင်္ကျီများကို ဝတ်ထားကြပြီး အညိုရောင်ဝတ်စုံများနှင့် ဖြစ်ကြသည်။
“ဟုတ်တယ်၊ ကောင်းတဲ့အချက်တွေ ရှိတယ်။ သူတို့က ကျုပ်တို့ကို ငလျင်လှုပ်ပြခဲ့တယ်။ ဒါပေမဲ့ သူတို့အနေနဲ့ ငလျင်ကိုတားနိုင်တယ်လို့ပြောတယ်။ သူတို့သာ တကယ်တားနိုင်ရင် တကယ်ကောင်းတာပေါ့။ ဒီမှာ မြေဈေးတွေ ဘယ်လောက်တက်လာမလဲ၊ သူတို့ကို စိတ်ချရမလား ဝိတ်ဒ်”
“အဲဒါတော့ ကျုပ်မသိဘူး။ ကျုပ်သိတာကတော့ သူတို့လုပ်မယ်ဆို တာကို လုပ်ပြတာပဲ”
အုပ်ချုပ်ရေးမှူး ဝိတ်ဒ်ဝိုင်းယက်က အဖြေပေးသည်။ ဝိုင်းယက်သည် မျက်နှာနီနီ မျက်နှာဝိုင်းဝိုင်းဖြစ်သည်။ သူ၏အင်္ကျီ ကော်လံမှာ အမေရိကန်အလံတံဆိပ် တပ်ထားသည်။ လက်ကိုင်တွင် အစင်း ငါးစင်းပါသော ဒသမ ၄၄ သေနတ်ကို ခါးမှာချိတ်ထားသည်။ အစင်း ငါးစင်းကို သူကိုယ်တိုင် လက်နှင့်လှပစွာ ထွင်းထားခြင်းဖြစ်သည်။ ယင်း အစင်းများသည် လူငါးယောက်ကို ကိုယ်စားပြုသည်ဆိုသည်။ လက်ချောင်း ငါးချောင်းပင် ဖြစ်သည်။
“တစ်လကို ဒေါ်လာရှစ်ထောင်ဆိုတာ မဆိုးပါဘူး။ အများကြီးပေး ပျော်ပါတယ်”
ဘွိုင်ဒင်ဟောက်ဆင်က ပြောလိုက်သည်။
