ဒေါက်တာသန်းထွန်း - မြန်မာ့လူငယ်အသံ

၁။ ဆာမြဘူးကြီးမှူးသည့် တက္ကသိုလ်အက်ဥပဒေ ပြင်ဆင်ရေးကော်မတီ၏ အစီရင်ခံစာမှာ မေလ ပထမသတ္တပတ်တွင် ထွက်ပေါ်လာ၏။ မန္တလေး မြို့၌ မေလ ၉ ရက်နှင့် ၁၀ ရက်နေ့တို့တွင် ကျင်းပသော ဒုတိယမြန်မာ နိုင်ငံလုံးဆိုင်ရာ ကျောင်းသားများ ကွန်ဖရင့်ဝယ် ဤတက္ကသိုလ် ပြင်ဆင် ရေးနှင့် ပတ်သက်၍ ဆောင်ရွက်ရန်အတွက် တက္ကသိုလ်အက်ဥပဒေ ပြင်ဆင်ရေးကော်မတီတစ်ခု ဖွဲ့စည်းရန် ဤကျောင်းသားအဖွဲ့ချုပ် အလုပ် အမှုဆောင်သို့ လွှဲအပ်လိုက်၏။ ကျောင်းသားအဖွဲ့ချုပ် အလုပ်အမှုဆောင်မှာ ကျောင်းပိတ်နေသဖြင့် ဇွန်လ အလယ်လောက်မှသာလျှင် ဤအဆိုပါ တက္ကသိုလ်ပြင်ဆင်ရေးကော်မတီကို ခန့်ထားရန် စည်းဝေး တွေ့ဆုံနိုင်၏။ သို့ခန့်အပ်သော ကျွန်ုပ်တို့ တက္ကသိုလ်အက်ဥပဒေ ပြင်ဆင် ရေး ကော်မတီအဖွဲ့သည် ခန့်ပြီး၍ မကြာမီ တွေ့ဆုံနှီးနှောတိုင်ပင်ကြ၏။ မြဘူး ကော်မတီနှင့်ပတ်သက်၍ တက္ကသိုလ်ကောင်စီကိုလည်း ဇူလိုင်လ တွင် ကျင်းပမည်ဖြစ်၍ ထိုကောင်စီအတွက် ဆုံးဖြတ်ချက်အဆိုများ ပေးပို့ ကြရန် ဇွန်လ သုံးဆယ်ရက်နေ့အထိ တောင်းထား၏။ အစိုးရကလည်း မြဘူးကော်မတီနှင့် ပတ်သက်၍ အကြံဉာဏ်များကို ဇွန်လ ၃၀ ရက်နေ့အထိ လက်ခံမည်ဟု ကြေညာထား၏။ သို့ဖြစ်ရကား ကျွန်ုပ်တို့ကော်မတီ သည် နေ့တိုင်းထိုင်၍ စဉ်းစားဆွေးနွေးကြရ၏။ မြဘူးကော်မတီ အစီရင် ခံစာအချက်တို့ကို ကျွန်ုပ်တို့ အားရပါးရ မစစ်ဆေးနိုင်သော်လည်း အဓိက စည်းမျဉ်းများတွင်ကား ကျွန်ုပ်တို့အားလုံး တစ်သဘောတည်းဖြစ်၏။ ကျွန်ုပ်တို့ စဉ်းစားရသမျှမှာ အားလုံးသဘောတူညီချက် ရသမျှချည်းဖြစ်၏။

၂။ ကျွန်ုပ်တို့သည် မြဘူးကော်မတီ အစီရင်ခံစာနှင့်ပတ်သက်၍ အရေးကြီးအရာပါသော အချက်များစွာတို့တွင် ၎င်းကော်မတီနှင့် သဘောမကိုက်ညီ သည်ကို တွေ့ရှိရ၏။ သို့ရာတွင် မြဘူးကော်မတီအစီရင်ခံစာ ပါရှိသမျှ အသေးအဖွဲပါ အပြစ်တင်ရေးသားရန် မလိုရကား အရေးကြီး အရာ ပါသော ထောက်ခံချက်များနှင့်စပ်လျဉ်း၍ သာ စဉ်းစားပါကြောင်း။

၃။ ဤမြဘူးကော်မတီအစီရင်ခံစာနှင့် ပတ်သက်၍ တက္ကသိုလ်ကျောင်းသားများသည် အထူးမကျေနပ်ဖြစ်နေကြ၏။ အကယ်၍ ကျွန်ုပ်တို့၏ ထင်မြင် ချက်များကို အထူးသဖြင့် တက္ကသိုလ်ကောင်စီတွင် အပြင်အပမှ တက္ကသိုလ်အရာရှိနှင့် အစိုးရအရာရှိမဟုတ်သောသူ အများအပြား ပါဝင် ရန် အရေးနှင့် တက္ကသိုလ်နှင့်ကောလိပ်ကျောင်းများ ဆက်သွယ်ရေး ၂ ရပ် နှင့် စပ်လျဉ်း၍ ကျွန်ုပ်တို့၏ ထင်မြင်ချက်များကို အသစ်တက္ကသိုလ် အက်ဥပဒေတွင် ထည့်သွင်းပါက တိုင်းပြည်နှင့်တကွ ကျောင်းသားများအား လက်ခံဖွယ်ရာ ဖြစ်လိမ့်မည်ဟု ကျွန်ုပ်တို့ ယူဆပါကြောင်း။

၄။ မြဘူးကော်မတီ အစီရင်ခံစာတွင် စာပိုဒ်များနှင့် ထောက်ခံချက်များကိုနံပါတ်တပ်မထားသဖြင့် စာညွှန်းရန် ခက်ခဲသည့်အတွက် ဝမ်းနည်းဖွယ်တစ်ရပ် ဖြစ်ပါကြောင်း။

၅။ ရန်ကုန်တက္ကသိုလ်သည် စာစစ်တက္ကသိုလ်အဖြစ်သာ ရှိသင့်သည် သို့မဟုတ်ကျောင်းအိပ်ကျောင်းစား စာသင်တက္ကသိုလ်အဖြစ်သာ ရှိသင့်သည်ဟူသော ပြဿနာကို ကျွန်ုပ်တို့ ကြာရှည်လေးမြင့်စွာ စဉ်းစားကြပါကြောင်း။ ကျွန်ုပ် တို့ အဖို့မူကား နာမည်ပညတ်လောက်ကို ဂရုမထားလို၊ မည်သည့် တက္ကသိုလ်မဆို ၎င်းတည်ရှိရာ တိုင်းပြည်၏ အခြေအနေကိုလိုက်၍ ဖြစ်စမြဲပင် ဖြစ်၏။ သို့ရာတွင် ထိုတက္ကသိုလ်ကို အသစ်စီမံအုပ်ချုပ်နည်း စဉ်းစားရာ၌ ၎င်းလက်ရှိ အခြေအနေကိုလည်း ပေယျာလကန်၍ မဖြစ်ပေ။ သေချာစွာ စစ်ဆေးကြည့်ပါမူကား ယခု ရန်ကုန်တက္ကသိုလ်သည် စာသင် ကျောင်းလည်း မမည်၊ ကျောင်းအိပ် ကျောင်းစားကျောင်းဟုလည်း မဆိုသာ၊ ကျောင်းသားများကို စာသင်ရာတွင် ကောလိပ်ကျောင်းများတွင်သာ လုံးဝသင်ကြသည်ကို တွေ့ရ၏။ ရံဖန်ရံခါ ကောလိပ်ကျောင်း အချို့တို့မှကျောင်းသားများကို ချွေတာရေး၊ သက်သောင့်သက်သာရေးအတွက်သာ ပူးပေါင်းသင်ကြားပြသကြ၏။ ၎င်းပြင် များစွာသော ကျောင်းသားများမှာ လည်း အိမ်ပြန်အိမ်စား ဖြစ်ကြ၏။ သို့ရာတွင် ဆိုခဲ့ပြီးသည့်အတိုင်း ကျွန်ုပ်တို့သည် အမည်ပညတ်ကို မလိုက်လို၊ ယခုလက်ရှိ အခြေအနေအရ တက္ကသိုလ်ကို ရှေ့သို့မည်သို့ပြုပြင် သင့်သည်ကိုသာ စဉ်းစားသွားမည်ဖြစ်ပါကြောင်း။ -

၆။ ယေဘုယျလိုက်လျှင်မူကား ယခုလက်ရှိအတိုင်း ရန်ကုန်တက္ကသိုလ် ရှိစေလို၏။ တတ်အားနိုင်သော ကျောင်းသားများသည် ကျောင်းအိပ် ကျောင်းစား နေလိုသည်ဟု မြဘူးကော်မတီ၏ ရေးသားချက်ကို ကျွန်ုပ်တို့ သဘောတူ ပါ၏။ ထိုသို့ မနေနိုင်သော ကျောင်းသားများအတွက် ဆင်းရဲ၍ သင့်လျော် သော ကျောင်းသားများအား စကောလားရှစ်များ ပိုမိုပေးရန်နှင့် ထိုက်သင့် သော ကျောင်းဆရာများကို ပညာရေးဌာနက စတိုင်ပင်ထောက်ပံ့ရန် ဆိုသောအချက်ကိုလည်း သဘောတူပါ၏။ ၎င်းပြင် အပြင်အပ တစ်သီး တခြား ဆင်းရဲနွမ်းပါး ထိုက်တန်သော ကျောင်းသားများအား ကူညီရန် ရန်ပုံငွေ စုဆောင်းရန်လည်း ကျွန်ုပ်တို့က အထူးတိုက်တွန်းကူညီလိုပါ၏။ သို့ရာတွင် ယခုကဲ့သို့ ပြုလုပ်သော်ငြားလည်း ထိုက်သင့်သော ဆင်းရဲသောကျောင်းသားများအားလုံးအတွက် လုံလောက်မည်ဟု မထင်ပါ။

၇။ သို့ဖြစ်ရကား အားလုံးဆင်းရဲသော ကျောင်းသားများအား တက္ကသိုလ် ပညာ ရရန်အတွက် တစ်ခုတည်းသော နည်းလမ်းဟု ကျွန်ုပ်တို့အထူး ယုံကြည်သော အရာကား နောက်ဆုံးတက္ကသိုလ် စာမေးပွဲအောင်ပြီး၍ ကောလိပ် များတွင် နေသော စာသင်ကျောင်းသားများ သင်ကြားအပ်သော အချိန်စေ့ ပြီးသော အခါမျိုး၌ အခြားအလွတ်ကျောင်းသားများကို ရိုးရိုးတက္ကသိုလ် စာမေးပွဲအားလုံးကို ဝင်ရောက်ဖြေနိုင်ရန် ခွင့်ပြုခြင်းပင်ဖြစ်ပါကြောင်း။ ထို့ကြောင့် ဤဆိုခဲ့ပြီးသောနည်းအရလည်းကောင်း၊ ဆိုလတ္တံ့သော စည်းကမ်းများအရလည်းကောင်း။ ၁။ တက္ကသိုလ်သို့ ဝင်ခွင့်ရသော ကျောင်းသားတိုင်း ဥပစာတန်း စာမေးပွဲကို အလွတ်ဝင်ခွင့်ရ၍၊ တစ်ဖန် ဒီဂရီစာမေးပွဲကန့်သတ်သော အချိန် ပြီးနောက် ဝင်ခွင့်ရရန်။

၂။ အစိုးရဆေးကျောင်းမှလည်းကောင်း၊ အစိုးရလက်မှုစက်မှု ပညာသင်ကျောင်းမှလည်းကောင်း၊ ဘီအိုစီကောလိပ်မှလည်းကောင်း၊ လိုင်စင် လက်မှတ်ရသော ဥပစာတန်းလည်းအောင်သောသူတိုင်း ၃ နှစ်မျှ ဆရာဝန် သို့မဟုတ် စက်ဆရာ အင်ဂျင်နီယာအဖြစ် ပြုလုပ်ပြီးနောက် အမ်ဘီဘီအက်စ် စာမေးပွဲကိုလည်းကောင်း၊ အင်ဂျင်နီယာ ဘီအက်စ်စီ စာမေးပွဲကိုလည်းကောင်း၊ ဝင်ခွင့်ပေးရန် (အကယ်၍ ဤကဲ့သို့ အမ်ဘီဘီအက်စ်အောင်သော ကျောင်းသားများ ဗြိတိသျှဆေးဘက် ဆိုင်ရာ ကောင်စီက အသိအမှတ်မပြုလျှင် `ဘယ်ကဲ့သို့ ပြုလုပ်လျှင်အသိအမှတ်ပြုမည်ဖြစ်ကြောင်း စုံစမ်းပြောပေးစေလိုပါကြောင်း။

၈။ အဆိုပါ စည်းကမ်းချက်များအပြင် အားလုံးအလွတ်ဝင်ကျောင်းသားများအတွက်ဖြစ်စေ၊ အချို့အတွက်ဖြစ်စေလိုသည်အလျောက် အောက်ပါ စည်းကမ်းချက်များကို ထားနိုင်ပါကြောင်း။

၁။ လောကဓာတ် ဒီဂရီဘွဲ့ထူး သို့မဟုတ် ဒီပလိုမာလက်မှတ်အတွက်အတန်းအစားအရ လိုအပ်သော လက်တွေ့အလုပ်ကို အသိအမှတ် ပြုအပ်သော ဓာတ်ခွဲရုံတွင် လုပ်ဖူးကြောင်း သက်သေခံစာတင်ပြရန် သို့မဟုတ် ထိုလက်တွေ့အလုပ် သင်ကြားရန်အတွက် တက္ကသိုလ်ကျောင်းတွင် အခြားကျောင်းနေ ကျောင်းသားများနေရသော ကာလ အပိုင်းအခြား တစ်ဝက်မျှနေရမည်ဟု စည်းကမ်းထားရန်။

၂။ ကောလိပ်ကျောင်းသားမဟုတ် အလွတ်ဖြေသူများအတွက် ရီဂျစ် စတာ မှတ်ပုံတင်စာရင်း တစ်ခုထား၍ စာမေးပွဲမဖြေမီ သုံးလကကြိုတင်၍ ၎င်းတို့၏ နာမည်များကို မှတ်ပုံစာရင်းသွင်းထားစေရန်။

          ဤကဲ့သို့ စည်းကမ်းထားလျှင် ကျွန်ုပ်တို့၏ အထက်ပါအလွတ်ပညာသင် တို့အတွက် ထင်မြင်ချက်တို့မှာ မလုပ်နိုင်ဖွယ်မရှိဟု ယူဆပါကြောင်း။

၉။ ၎င်းပြင် တက္ကသိုလ်အက်ဥပဒေတွင် ရက်ဂူလေးရှင်း နံပါတ် ၉ အခန်း၆ နှင့် အလားတူသတ်မှတ်ချက်များကို ထုတ်ပယ်ရန် ကျွန်ုပ်တို့ တိုက်တွန်း ပါကြောင်း၊ မည်သည့်ကောလိပ်ကျောင်းသားမဆို ၎င်းသင်အပ်သော စာကို အချိန်စေ့အောင် သင်ယူပြီးသည့်နောက် ၂ နှစ် ကျဖူးသည်ဖြစ်စေ၊ ၁ နှစ်ကျဖူးသည်ဖြစ်စေ သို့မဟုတ် လုံးဝစာမေးပွဲ မဖြေဘူးသည်ဖြစ်စေ၊ အလွတ်စာမေးပွဲ ဝင်သင့်ပါကြောင်း။ ဤအရေးနှင့်ပတ်သက်၍ မြဘူး၊ ကော်မတီက တစ်နှစ်ကျဖူးသော ကျောင်းသားများကို အလွတ်စာမေးပွဲဝင်ခွင့်ပေးသင့်သည်ဟု ထောက်ခံချက်မှာ လုံလောက်သည်ဟု ကျွန်ုပ်တို့ မယူဆကြောင်း။ ကျောင်းသားတစ်ဦးသည် မိမိဖြေဆိုအံ့သော စာမေးပွဲ အတွက် အချိန်စေ့အောင် သင်ပြီးသမျှကာလပတ်လုံး အလွတ်စာမေးပွဲဖြေနိုင်အောင် တစ်နှစ်ကျရဦးမည်ဆိုသည်မှာ ယုတ္တိ အထူးမတန်လှပေ။

၁၀။ အလွတ်ဖြေဆိုသော ကျောင်းသားများကို ခွင့်မပြုလိုသည့် အကြောင်းများမှာ ၂ ရပ်ဟု တွေးဆစရာရှိပါကြောင်း။ ပထမ အကြောင်းကား ဤကဲ့သို့ အခွင့်အရေးသည် တက္ကသိုလ်ပညာ၏ အတန်းအစား လျော့ဖွယ်ရာ ဖြစ်သည်ဟူသော အရာပင်ဖြစ်လေသည်။ ဤတွင် ကျွန်ုပ်တို့သည် ဤကဲ့ သို့ ထင်မြင်ချက်မှာ အထူးမှားသည်ဟု ယူဆပါကြောင်း။ တက္ကသိုလ် သည် မိမိ၏အတန်းအစားကို မိမိအလိုရှိသလို သတ်မှတ်နိုင်ကြောင်း။ ထိုအတန်းအစားကို မည်သူမဆို အလွတ်ဖြေဆိုသူဖြစ်စေ ကောလိပ် ကျောင်းသားအဖြစ်ဖြင့် ဖြေဆိုသူဖြစ်စေ ရရှိရမည်ဖြစ်ကြောင်း။ ထို့ ကြောင့် ဤကဲ့သို့ အတန်းအစားမီသော အလွတ်ဖြေဆိုသူများသည် ဒီဂရီ ဘွဲ့ထူးကို ရသင့်ရထိုက်သည်မှာ အထူးထင်ရှားလှပေကြောင်း။ ထိုကဲ့သို့ တက္ကသိုလ်စာမေးပွဲများ၏ အတန်းအစားများမှာ မြင့်နေသမျှ ကာလပတ် လုံး အလွတ်ဖြေဆိုသူများအား ခွင့်ပြုသဖြင့် တက္ကသိုလ်ဘွဲ့များမှာ ဘယ်နည်းနှင့်မျှ အတန်းအစားလျော့၍ ဈေးပေါသွားမည် မဟုတ်ပေ။ အကယ်၍ တက္ကသိုလ်ဆရာများသည် အလွတ်ဖြေဆိုသူများအား စာဖြင့် ဖြစ်စေ၊ ၎င်းတို့ အားလပ်ချိန်တွင်ဖြစ်စေ စာသင်ကြားပါက ၎င်းတို့ သင်ကြားအပ်သော တက္ကသိုလ် အလုပ်ဝတ္တရား ပေါ့ပျက်စရာအကြောင်း ရှိပါကြောင်း၊ ထိုသို့ သင်ကြားခြင်းကို အထူးတားမြစ်ပါက အလွတ်ဖြေဆို သူများကို ခွင့်ပြုသဖြင့် ဘယ်ပုံဘယ်နည်း တက္ကသိုလ်ပညာ၏ အတန်း အစား လျော့သွားစရာရှိကြောင်း တွေးတောရန် ခဲယဉ်းလှပေကြောင်း။ ဤသို့ ထင်မြင်ယူဆသောသူများအား စကားပိုမပါ ရှင်းရှင်းတိုတိုနှင့် အကြောင်းပြပါရန် ကျွန်ုပ်တို့က မေးမြန်းလိုကြောင်း။

၁၁။ ကျွန်ုပ်တို့ ယခုအကြံပေးရာတွင် ကျောင်းသားအများ ကောလိပ်ကျောင်းသို့ မလာမှာလည်း စိုးရိမ်ဖွယ်ရာမရှိပေ။ အဘယ့်ကြောင့်ဆိုသော် တခမ်း တနား ဆန်းပြားကြီးကျယ်သော ကျောင်းတော်အဆောက်အအုံများ ပျော် စရာ၊ ပါးစရာ၊ ကစားစရာ၊ နေစရာ၊ သင်စရာ အခမ်းအနားများကားကျောင်းသားတိုင်းနှင့် ကျောင်းသားတိုင်း၏ မိဘတို့ကို အထူး စိတ်သန်းထွန်း ဆွဲဆောင်သဖြင့် တတ်နိုင်သောသူတိုင်း ကောလိပ်ကျောင်းသို့ လာမည်မှာ မြေကြီးလက်ခတ်မလွဲဟု ဆိုနိုင်ကြောင်း။ ဤသို့ဖြစ်ရကား တက္ကသိုလ်မှာ အလွတ်ဆိုသူများအား ခွင့်ပြုသဖြင့် ဘယ်နည်းနှင့်မျှ ဆုံးရှုံးစရာမမြင်ချေ။

၁၂။ ဤအကြောင်းမှအပ ဤကဲ့သို့ အလွတ်ဖြေဆိုသူများအား ခွင့်ပြုခြင်းသည်အလုပ်အကိုင်ရှိ၍ ထောက်ပံ့စရာလူများသော အစိုးရဘက်တွင်ဖြစ်စေ၊ အခြားဘက်များတွင်ဖြစ်စေ ရှေ့သို့ တိုးတက်ချင်သောသူ များစွာအား အထက်တန်းပညာကို သင်လိုသော စိတ်ဖြစ်ဖွယ်ရာ ရှိပါကြောင်း။ ဤ ကဲ့သို့ ငွေအားမတတ်နိုင်၍ အထက်တန်းပညာရလိုသော သူများသာလျှင် အလွတ်ဖြေဆိုသူများဖြစ်မည်ဖြစ်ကြောင်း၊ တက္ကသိုလ်စာမေးပွဲ အတန်း အစားသည် မြင့်မြင့်ရှိနေလျှင် ထိုစာမေးပွဲအောင်နိုင်သည့် အလွတ်ဖြေဆို သူမှာ သာမညလူများထက် အရည်အချင်းရှိသူပင်ဖြစ်လေသည်။ ဤ အကြံဉာဏ်များကို စဉ်းစားရာတွင် ရန်ကုန်တက္ကသိုလ် တစ်ခုတည်းသာမြန်မာပြည်တွင် ရှိသည်ဟူသည့် အချက်ကို အထူးသတိပြုသင့်ပါကြောင်း။

၁၃။ အထက်ကပြဆိုခဲ့ပြီးသည့်အတိုင်း တခမ်းတနားတက္ကသိုလ်တွင် နေရ ထိုင် ရသည်ကိုထောက်၍ တတ်နိုင်သော ကျောင်းသားများသည် ကျောင်းအိပ်ကျောင်းစား ဖြစ်ကြမည်ဖြစ်ကြောင်း။ စင်စစ်အားဖြင့် ရန်ကုန်မြို့တွင် မိဘရှိသော များစွာသော ကျောင်းသားများပင် ကျောင်းအိပ်ကျောင်းစား အဖြစ် နေလိုကြကြောင်း။ သို့သော် ထိုကဲ့သို့ မနေလိုသော ကျောင်းသား များအတွက် အဘယ်ကဲ့သို့ ထားမည်နည်း။ ရန်ကုန်မြို့တွင် မိဘများနှင့် နေထိုင်သော ကျောင်းသားများအား အိမ်ပြန်အိမ်စားအဖြစ် လက်ခံသည် မှန်သော်လည်း ဆွေမျိုးသားချင်းများနှင့် နေထိုင်သော ကျောင်းသားများ အားကား ရံဖန်ရံခါ ကျောင်းအိပ်ကျောင်းစားအဖြစ် နေရမည်ဟု အတင်း အကျပ်တိုက်တွန်းသည်ကို ကျွန်ုပ်တို့ တွေ့ရှိရပါကြောင်း၊ မြို့ထဲတွင် နေခြင်းသည် စရိတ်သက်သာချောင်ချိ၍ စားရေးသောက်ရေးမှာလည်း ကောလိပ်ကျောင်းများထက် မချို့ယွင်းဟု ကျွန်ုပ်တို့ ယုံကြည်ကြောင်း။ သို့ဖြစ်ရကား ရန်ကုန်မြို့တွင် မိဘများနှင့်နေထိုင်ကြသော ကျောင်းသား များအပြင် ဘီအေ၊ ဘီအက်စ်စီအတန်းများကို သင်ကြားကြသောကျောင်းသားအားလုံးအား ၎င်းတို့၏ မိဘ သို့မဟုတ် အုပ်ထိန်းသူများက စာဖြင့် အကြောင်းကြားက မြို့ထဲတွင်နေရန် အခွင့်ပြုထိုက်ကြောင်း။

၁၄။ တက္ကသိုလ်သည် ၎င်းကောင်စီက ၎င်းကောင်စီလူကြီးများထဲကဖြစ်စေသို့မဟုတ် ပြင်ပတိုင်းပြည်ဘက်တွင်လည်းကောင်း၊ ပညာရေးဘက်တွင် လည်းကောင်း၊ ဆောင်ရွက်နေသော ပုဂ္ဂိုလ်များထဲကဖြစ်စေ ၎င်းအဓိ ပတိချန်ဆယ်လာလူကြီးကို ရွေးကောက်တင်မြှောက်ရန် အခွင့်အရေးရရှိ ထိုက်ပြီဟု ကျွန်ုပ်တို့ လေးလေးနက်နက်ယူဆကြောင်း၊ တက္ကသိုလ်သည် ကိုယ်ပိုင် အုပ်ချုပ်လုပ်ကိုင်ရသော အဆောက်အအုံဖြစ်သည့်အတိုင်း ၎င်း၏ အကြီးအမှူးနာယကအဖြစ်ဖြင့် တင်မြှောက်လိုသူအား တင် မြှောက်နိုင်ရန်မှာ အထူးလျော်ကန် သင့်မြတ်လှပေကြောင်း၊ ထိုသို့ ရွေးကောက် တင်မြှောက်ခံရသော ချန်ဆယ်လာ အဓိပတိသည် ဘုရင်ခံထက် တက္ကသိုလ် အရေးများကို ပိုမိုနီးစပ်စွာ သိ၍ စိတ်ဝင်စားလိုက်စားဖွယ်ရာ ရှိကြောင်း။ ၎င်းပြင် မည်သည့်အချိန်မဆို တက္ကသိုလ်နှင့် လက်ရှိအစိုးရ တို့ အငြင်းပွားကြပါက ထိုကဲ့သို့ ရွေးကောက်သော အဓိပတိသည် တက္ကသိုလ်ဘက်မှ အထူးပြောပေးမည်ဖြစ်ကြောင်း။ ဘုရင်ခံသာ အဓိပတိ ဖြစ်နေပါက ကြားမှလည်းကောင်း၊ လက်ရှိအမတ်ချုပ် အစိုးရဘက်မှလည်းကောင်း နေရန် အကြောင်းရှိပေကြောင်း။

၁၅။ မြဘူးကော်မတီသည် တက္ကသိုလ်နှင့် ကောလိပ်ကျောင်းများ ဆက်ဆံရေးနှင့်ပတ်သက်၍ တက္ကသိုလ်ကောင်စီတွင် အာဏာရှိ/မရှိ ဟူသောအချက် ကို အစီရင်ခံစာ နံပါတ် ၁၃ နှင့် ၁၄ ၎င်းနောက် ၂၆ မှ ၂၈ တို့တွင် စဉ်းစား ဆွေးနွေးကြကြောင်း။ သို့ဆွေးနွေးရာ မြဘူးကော်မတီက တက္ကသိုလ်ကောင်စီတွင် အာဏာမရှိဆိုသောစကားမှာ အခြေအမြစ် ကျကျနနမရှိဟု ဆိုကြောင်း၊ ဤစကားကို ထောက်ခြင်းအားဖြင့် မြဘူးကော်မတီဝင် လူကြီးတို့ တက္ကသိုလ်အတွင်းရေးကို ကောင်းစွာမသိကြောင်း ထင်ရှားလှ ပေသည်။ တက္ကသိုလ်ကောင်စီသည် အာဏာမရှိဟူသည့် အချက်မှာ အထင်မျှသာမဟုတ်၊ တကယ်အစစ်အမှန်ပင်ဖြစ်ကြောင်း။ ယခုလက်ရှိ ဒုတိယအဓိပတိ၏ ကောက်ချက်တစ်ခုအရဆိုသော် တက္ကသိုလ်ကောင်စီ အစည်းအဝေးများတွင် ၎င်းမင်းဘားလူကြီးများသည် မေးခွန်းများ မမေး နိုင်ဆိုကြောင်း။ တစ်ဖန်အခြား ၎င်းကောက်ချက်အရကား တက္ကသိုလ်ကောင်စီ၏ ဆုံးဖြတ်ချက်များသည် ဆီနိတ်အဖွဲ့နှင့် ကောလိပ်ကျောင်း အုပ်ချုပ်ရေးအဖွဲ့များသို့ “ထောက်ခံချက်” အနေမျိုးသာဖြစ်သဖြင့် ဆီနိတ်နှင့် ကောလိပ်အုပ်ချုပ်ရေးအဖွဲ့တို့အပေါ် မည်သို့မျှ တာဝန်မတည်