ဒေါက်တာမတင်ဝင်း - ကြည်စင်ပွင့်လင်းသောစိတ်အထာဖြင့်

သီဟစစ်သူကြီး

          “သီဟ၊ စဉ်းစားဆင်ခြင်ပြီး ပြုထိုက်တဲ့အမှုကို ပြုလော့။ သင်လို လောကမှာ ထင်ရှားတဲ့သူတွေရဲ့ စဉ်းစားဆင်ခြင်ပြီးပြုလုပ်တာဟာ ကောင်းတယ်”

          (ဝိနယ၊ မဟာမဝဂ္ဂ၊ ၆- ဘေသဇ္ဇက္ခန္ဓက၊ သီဟသေနာပတိ ဝတ္ထု)”

          မဇ္ဈိမဒေသလို့ ဗုဒ္ဓသာသနာနဲ့ပတ်သက်တဲ့စာပေတွေမှာ ရေးသား ဖော်ညွှန်းလေ့ရှိကြတဲ့ဒေသဟာ အိန္ဒိတိုက်ငယ်  ဖြစ်ပါတယ်။ အိန္ဒိယတိုက် ငယ်လို့ ခေါ်ဆိုရလောက်အောင် အင်မတန်ကျယ်ပြောတဲ့အပြင် ဟိမဝန္တာတောင်စဉ်တောင်တန်းကြီးနဲ့ မြစ်ကြီးမြစ်ငယ် အသွယ်သွယ် စီးဆင်းပြီး တောတောင်ရေမြေအရလည်း တင့်တယ်သာမောတဲ့အတွက် အလွန် ရှေးကျတဲ့ အချိန်ကာလကတည်းက လူမျိုးကြီးငယ်အသွယ်သွယ်တို့ ဝင် ရောက်ပြီး အခြေချခဲ့ကြပါတယ်။ 

          အဲသည်လို အခြေချလာကြတဲ့ လူမျိုးစုများဟာ ပင်ကိုက ပါလာ တဲ့ အယူအမျိုးမျိုးနဲ့အခြေချမိတဲ့ဒေသက ရှိနှင့်ပြီး အယူအမျိုးမျိုးတို့ကို ပေါင်းစပ်ကာ ထူးခြားဆန်းပြားတဲ့ ကိုးကွယ်ယုံကြည်မှုဆိုင်ရာ ဂိုဏ်း အမျိုးမျိုးကို တည်ထောင်ခဲ့ကြပါတယ်။အဲဒါကြောင့်အိန္ဒိယတိုက်ငယ်ကိုအယူဝါဒများကိုးကွယ်ယုံကြည်မှုများရဲ့မွေးဖွားရာမြေလို့တောင်မှ အနောက်နိုင်ငံစာပေများမှာ တင်စားပြောဆိုကြပါတယ်။

          မြတ်စွာဘုရား ပွင့်တော်မမူခင်ကတည်းက အယူဝါဒအမျိုးမျိုးဟာရှိနေနှင့်ပြီးပါပြီ။မြတ်စွာဘုရား ပွင့်တော်မူပြီးတဲ့နောက်မှာလည်းအဲဒီဂိုဏ်းဆရာကြီးများဟာရှိနေဆဲပဲ ဖြစ်ပါတယ်။ အဟောကောင်းအ

ပြောကောင်းတဲ့ ဂိုဏ်းဆရာကြီးများကို တိတ္ထိဆရာကြီးများလို့ ခေါ်ဆို ကြပါတယ်။

          အဲဒီတိတ္ထိဆရာကြီးများမှာဂိုဏ်းကွဲအမျိုးမျိုးရှိတတ်ပါတယ်။အဲဒီဂိုဏ်းတွေဟာမြတ်စွာဘုရားပွင့်ချိန်တုန်းကပဲ ရှိတယ်။ အခု မရှိတော့ဘူးလို့ အချို့သောလူငယ်များက ထင်တတ်ကြပါတယ်။ အခုလည်း ပုံစံအမျိုးမျိုးနဲ့ ရှိနေတာပါပဲ။ အခုဖော်ပြမယ့် နိဂဏ္ဏတို့လို အယူဝါဒမျိုး တွေလည်း ရှိနေကြပါသေးတယ်။ နိဂဏ္ဏတို့ရဲ့ ရေ မြေ သစ်ပင် သစ်သီး သစ်ပွင့်တို့မှာ အသက်ရှိတယ်လို့ယူဆတဲ့ အယူဝါဒမျိုးလည်း ယခုခေတ် တိုင် ရှိနေပါတယ်။ ကျင့်စဉ်များ ပိုမိုများပြားလာတာကတော့ အိန္ဒိယတိုက် ငယ်ထဲကို နောက်ထပ်ဝင်ရောက်လာတဲ့ လူမျိုးများနဲ့အတူ ပါလာတဲ့ အယူဝါဒထဲက အချက်အလက်သစ်များ ထပ်ပြီးပါလာလို့ပဲ ဖြစ်ပါတယ်။

          အခုတင်ပြမယ့်သီဟစစ်သူကြီးနဲ့ပတ်သက်တဲ့ဇာတ်ကြောင်းမှာသီဟစစ်သူကြီးဟာနိဂဏ္ဍဂိုဏ်းဆရာကြီးတစ်ပါးရဲ့ တပည့်ဖြစ်ပါတယ်။ အဲသည်လိုဇာတ်ကြောင်းတွေ အတော်များပါတယ်။ တိတ္ထိတွေကလည်း အဟောက ကောင်းအပြောကကောင်းသနဲ့စည်းရုံးတဲ့နေရာမှာလည်းတော်တတ်ကြပါတယ်။သူတို့ကကျော်ကြားထင်ရှားတဲ့သူတွေကို ရအောင် စည်းရုံးလေ့ရှိကြပါတယ်။ ထင်ရှားသူများ၊ ဘုန်းကြီးတန်ခိုးကြီးမားသူ များ၊ သြဇာကြီးသူများ၊ ချမ်းသာကြွယ်ဝသူများက တောင်ကိုးကွယ်တယ်လို့ဆိုတော့သူတို့ကိုလူပြိန်းများက ပိုမိုအထင်ရောက်ကြပါတယ်။

      ဒါဟာခေတ်တိုင်းခေတ်တိုင်းရဲ့သဘာဝဖြစ်ပါတယ်။ သီဟစစ်သူကြီးဟာ နှယ်နှယ်စစ်သူကြီးမဟုတ်ပါဘူး။ လစ္ဆဝီမင်းသားများရဲ့ လွှတ်တော်ကို တက်ရောက်ခွင့်ရတဲ့ စစ်သူကြီးတစ်ယောက်ဖြစ်ပါတယ်။

          လွှတ်တော်မှာမင်းသားများဆုံတွေ့ကြတဲ့အခါတိုင်း သာကီဝင်'မင်းသားကဘုရားအဖြစ် ပွင့်ထွန်းတော်မူလာတဲ့ မြတ်စွာဘုရားနဲ့ ပတ် သက်ပြီး ပြောကြဆိုကြတာကို သီဟစစ်သူကြီး ကြားရပါတယ်။ မြတ် စွာဘုရားက ဘယ်လိုတရားမျိုးကိုဟောတော်မူလိုက်တယ်။ မြတ်စွာဘုရားရဲ့တပည့်သားသံဃာများကဘယ်လိုကျင့်ကြံနေထိုင်ကြတယ်။ မြတ်စွာဘုရားရဲ့ဘုန်းတော်ကဘယ်လိုစသည်ဖြင့် မြတ်စွာဘုရားရဲ့ တပည့်ဒါယကာဒါယိကာမများဖြစ်တဲ့ လစ္ဆဝီမင်းသားများက ပြောကြ တာကို သီဟစစ်သူကြီး အကြိမ်ကြိမ်ကြားရပါတယ်။

          သီဟစစ်သူကြီးဟာ တခြားမင်းသားများပြောကြဆိုကြတာကို တစ်စတစ်စနဲ့စိတ်ဝင်စားလာပါတယ်။ တစ်နေ့တခြားစိတ်ဝင်စားလာတဲ့သီဟစစ်သူကြီးကသူ့ဆရာနိဂဏ္ဌထံကိုရောက်တဲ့အခါမှာသူကိုယ်တိုင်မြတ်စွာဘုရားထံကိုသွားပြီးတွေ့ချင်ပါတယ်။မေးမြန်းလေ့လာချင်ပါတယ်လို့ပြောကြည့်ပါတယ်။သူ တိတ္ထိဆရာရဲ့တပည့်ဆိုတော့ စိတ်ပါဝင်စားလွန်းလို့သာ သွားချင်နေတာ ဖြစ်ပုံပေါ်ပါတယ်။ သရဏဂုံတော့ ဘယ်မှာတည်ပါဦးမလဲ။ သူ့အဖို့ လေ့လာတဲ့သဘောလောက် သွား ချင်နေတာလို့ သူ့ဘာသာသူ ထင်ပါလိမ့်မယ်။ 

           တိတ္ထိဆရာနိဂဏ္ဏကလည်း သူ့ကိုယ်သူ ယုံကြည်စိတ်ခိုင်မာထက်သန်တဲ့သူမဟုတ်တဲ့အတွက် သီဟစစ်သူကြီးကို မြတ်စွာဘုရား နောက် ပါသွားမှာ စိုးရိမ်ပါလိမ့်မယ်။ အဲဒါကြောင့် မသွားဖို့ တားမြစ် ပါတယ်။အဲသည်လို ဆရာဖြစ်သူကတားလိုက်မသွားဖြစ်ဘဲနေလိုက်နဲ့နှစ်ခါကျော်လို့သုံးခါမြောက်တဲ့ အချိန်မှာတော့ သီဟစစ်သူကြီးဟာ မသွားဖို့ သူ့ဘာသာသူ မထိန်းနိုင်တော့ပါဘူး။ အဲဒါကြောင့် ဆရာဖြစ် သူကိုလည်း ခွင့်မတောင်းတော့ဘဲ မြတ်စွာဘုရားဆီကို ရောက်အောင် သွားဖြစ်ခဲ့ပါတယ်။ 

           မြတ်စွာဘုရားထံကို ရောက်တော့ အရှင်ဘုရားဟာ အကရိယ ဝါဒ ရှိတယ်။ မပြုလုပ်ဖို့ တရားဟောတယ်။ မပြုလုပ်ဖို့ဝါဒနဲ့ တပည့် သာဝကများကို ဆုံးမတယ်လို့ သိရတယ်လို့ သိခဲ့ကြားခဲ့ရပါတယ်။အဲဒီလိုပြောသူတွေဟာ မှန်မှန်ကန်ကန် ပြောရာရောက်ပါသလားလို့ သူ သိလိုတဲ့ ကိစ္စကိုပဲ မေးလျှောက်တော့တာပါပဲ။ 

          မြတ်စွာဘုရားရှင်က“သီဟ၊ ငါဘုရားကမကောင်းတဲ့ကိုယ်အလုပ်၊နှုတ်အပြော၊စိတ်အကြံနဲ့အကုသိုလ်မှန်သမျှကို မလုပ်ဖို့ဟောတယ်။ ကောင်းတဲ့ ကိုယ်အလုပ်၊ နှုတ်အပြောနဲ့ စိတ်အကြံနဲ့ ကုသိုလ်မှန်သမျှကို လုပ်ဖို့ ဟောတယ်။ အဲဒီဝါဒတွေနဲ့ တပည့်တွေကို ဆုံးမတယ်” စတဲ့တရားများကို မြတ်စွာဘုရားက ဟောတော်မူလိုက်ပါ တယ်။

          သီဟစစ်သူကြီးဟာ မြတ်စွာဘုရား ဟောကြားတော်မူတဲ့တရားကိုတစ်ခါတည်းနားလည်သဘောပေါက်ပြီး မြတ်စွာဘုရားကို အလွန် ကြည်ညိုသွားပါတယ်။အဲဒါကြောင့်ရိုရိုသေသေကန်တော့ပြီးရတနာသုံးပါးကိုယနေ့မှစ၍ အသက်ထက်ဆုံးကြည်ညိုကိုးကွယ်တဲ့ ဥပသကာအနေနဲ့သူ့ကိုမှတ်ယူတော်မူပါရန်လျှောက်ထားတောင်းပန်ပါတယ်။

          အဲဒီလိုလျှောက်ထားတဲ့အတွက် ဒီဆောင်းပါးခေါင်းစဉ်မှာဖော်ပြခဲ့တဲ့“သီဟ၊ စဉ်းစားဆင်ခြင်ပြီးပြုထိုက်တဲ့အမှုကို ပြုလော့။ သင့်လိုလောကမှာထင်ရှားတဲ့သူတွေရဲ့စဉ်းစားဆင်ခြင်ပြီး ပြုလုပ်တာဟာကောင်းတယ်”ဆိုတဲ့ သတိပေးစကားကို မြတ်စွာဘုရားက မိန့်ကြား တော်မူလိုက်ခြင်း ဖြစ်ပါတယ်။

          မြတ်စွာဘုရားရဲ့ အဲဒီလို သတိပေးစကားကို မိန့်ကြားလိုက်ခြင်းကိုလည်း သီဟစစ်သူကြီးကအလွန့်အလွန်ပဲ ကျေနပ်သွားပါတယ်။ သူက တိတ္ထိများရဲ့ဣန္ဒြေမဲ့မှု တစ်နည်းဆိုရင် အဆန်မရှိလို့ ဟန်ရှိအောင်ကြိုးပမ်းမှုများကို မြင်ခဲ့ သိခဲ့တဲ့သူဖြစ်ပါတယ်။ တိတ္ထိများထံမှာ သူ တပည့်ခံစဉ်ကတိတ္ထိဆရာများဟာစုဝေးပြီးတံခွန်တွေထောင်ကာ သီဟစစ်သူကြီးဟာ ငါတို့ရဲ့တပည့်ဖြစ်ပြီဆိုပြီး ဝေသာလီမြို့တစ်မြို့လုံး ကို လှည့်လည်ကြွေးကြော်ခဲ့ဖူးပါတယ်။ အဲဒီလို ကြွေးကြော်ကြတာကို ခံခဲ့ရစဉ်ကတည်းက ထက်မြက်တဲ့သူပီပီတစ်ခုခုတော့ နေရာမကျဖြစ်နေပြီဆိုတာကို သီဟစစ်သူကြီးအနေနဲ့ ခံစားခဲ့ရဖူးပါလိမ့်မယ်။

          သီဟစစ်သူကြီးက တိတ္ထိတွေလုပ်ပုံနဲ့ မြတ်စွာဘုရားရဲ့ စဉ်းစဉ်းစားစား ပြုလုပ်တာ ကောင်းတယ်ဆိုတဲ့ မိန့်ကြားတော်မူချက် ကွာဟ ခြင်းမက ကွာခြားပုံကို လျှောက်ထားပါတယ်။ အဲဒီနောက် တပည့်တော် ဟာ နှစ်ကြိမ်မြောက်လည်းရတနာသုံးပါးကိုဆည်းကပ်ကိုးကွယ်ပါတယ်၊ယနေ့မှစ၍အသက်ထက်ဆုံးမြတ်စွာဘုရားကို ဆည်းကပ် ကိုးကွယ်တဲ့သူအနေနဲ့ တပည့်တော်ကို မှတ်ယူတော်မူပါလို့ လျှောက် ထားပါတယ်။

          မြတ်စွာဘုရားက “သီဟ၊ သင့်အိမ်ဟာ ကာလရှည်ကြာ နိဂဏ္ဌ တို့အတွက် ရေတွင်းသဖွယ် ဖြစ်ခဲ့တယ်။ သင့်အိမ်ကို လာတဲ့ နိဂဏ္ဌ တွေကို ဆွမ်းလှူထိုက်တယ်လို့ သိနားလည်ပါ”လို့ မြတ်စွာဘုရားကမိန့်တော်မူပါတယ်။ အဲဒီလိုမိန့်တော်မူတဲ့စကားကို ကြားရတဲ့အခါ သီဟ စစ်သူကြီးဟာ မြတ်စွာဘုရားအပေါ်မှာ အတိုင်းထက်အလွန် ကြည်ညို သွားပါတော့တယ်။

          သူ့ကိုသူ့ဆရာများနဲ့သူ့ဆရာတို့ရဲ့အသိုက်အဝန်းကရဟန်းဂေါတမဟာငါ့အားသာလှူရမယ်၊ တခြားသူများကို မလှူရဘူး။ ငါ့ တပည့်တွေအားသာ လှူရမယ်၊ တခြားသူများရဲ့ တပည့်တွေကို မလှူ၊ ရဘူး။ ငါ့အားလှူမှ အကျိုးများမယ်။ ငါ့တပည့်တွေကို လှူမှ အကျိုးများ မယ်၊ တခြားသူများကို လှူတာ အကျိုးမများဘူး။ ထို့အတူပဲ တခြား သူများရဲ့ တပည့်တွေကို လှူတာ အကျိုးမများဘူးလို့ ပြောထားတာကို ကြားခဲ့ရဖူးပါတယ်။ အဲသည်လို ကြားထားတဲ့စကားနဲ့ မတူပါဘဲ နိဂဏ္ဏ တွေကိုလည်း လှူပါလို့ တိုက်တွန်းတော်မူတာကို တပည့်တော် ကြားရ တာ အလွန်ပဲ အားရကျေနပ်မိပါတယ် ဘုရား။

          နိဂဏ္ဏများကို လှူဖို့ကိစ္စကိုတော့ တပည့်တော်ဟာ အခြေအနေ အချိန်အခါကို သိပါမယ် ဘုရား။ တပည့်တော်ကို    သုံးကြိမ်မြောက်လည်း ရတနာသုံးပါးကို ယနေ့မှစ၍ အသက်ထက်ဆုံး ဆည်းကပ်ကိုးကွယ်သူ လို့ မှတ်ယူတော်မူပါဘုရားလို့ သီဟက လျှောက်ထားပါတယ်။ကျွန်မဟာ သီဟစစ်သူကြီးကို မြတ်စွာဘုရား ဆုံးမတဲ့စကားကို အရင့် အရင်ကလည်း ဖတ်ဖူးပါတယ်။ အလားတူ ဇာတ်ကြောင်းတစ်ခုလည်း ရှိပါသေးတယ်။ အဲဒီဇာတ်ကတော့ ဥပါလိသူကြွယ်ဆိုတဲ့ နိဂဏ္ဏတို့ရဲ့ တပည့်တစ်ယောက်နဲ့ ပတ်သက်ပါတယ်။ သူကတော့ မြတ်စွာဘုရားကို ဝါဒပြိုင်ဖို့ရာ မြတ်စွာဘုရားထံတော်မှောက်ကိုအရောက်သွားခဲ့သူဖြစ်ပါတယ်။သူတို့ဆရာကြီးက ဥပါလိကို မလွှတ်ချင်ပါဘူး။ ဘာဖြစ်လို့ လဲဆိုတော့ သူ့တပည့်တော်တော်များများကို သူဆုံးရှုံးပြီးပြီ ဖြစ်လို့ပါပဲ။ ဥပါလိက မြတ်စွာဘုရားရဲ့ဝါဒကို သူပြိုင်နိုင်ပါတယ်၊ ပြိုင်နိုင်လေက်အောင် သူ့မှာ သူတို့ရဲ့ ဝါဒအခံ ရှိတယ်ဆိုပြီး သွားခဲ့တာ ဖြစ်ပါတယ်။

          မြတ်စွာဘုရားရဲ့ ဆုံးမစကားကို ကြားနာပြီးတဲ့နောက် ဝါဒပြိုင် ဆိုင်လိုတဲ့ ဥပါလိဟာ မြတ်စွာဘုရားရဲ့ လေးနက်တဲ့အယူဝါဒကို ပြိုင် ဆိုင်ဖို့ရာ သူတို့ဝါဒမှာ အနှစ်မရှိဘူးဆိုတာကို သိသွားပြီး မြတ်စွာဘုရား ထံမှာ တပည့်ခံခဲ့ပါတယ်။ မြတ်စွာဘုရားကလည်း သီဟစစ်သူကြီးကို ဆုံးမခဲ့တဲ့နည်းအတိုင်း ဥပါလိကို ဆုံးမပါတယ်။ ဥပါလိကလည်း သီဟ စစ်သူကြီးလိုပဲ အလွန်ဝမ်းမြောက်ဝမ်းသာ ဖြစ်ခဲ့ပါတယ်။

          ဥပါလိဟာနိဂဏ္ဏတို့ကိုသူတို့အိမ်ထဲကို ဝင်ခွင့်မပေးတော့ပါဘူး။ စားသောက်စရာများကိုပေးကမ်းကျွေးမွေးဖို့ အိမ်အပြင်မှာပဲ ပြင်ဆင်ထားပါတယ်။ သူ့ကို တွေ့ချင်တယ်ဆိုတဲ့အခါ ထွက်ပြီးတွေ့ပေမယ့် နိဂဏ္ဏတို့ကို သူက ဦးညွတ်တာအရိုအသေပြုတာမျိုးမလုပ်တော့ပါဘူး။ သူဟာဉာဏ်မျက်စိပွင့်သွားပြီဖြစ်လို့ဘယ် သူ့ကိုရိုသေမြတ်နိုး ဦးနှိမ် ချိုးရမယ်၊ ဘယ်သူ့ကိုဖြင့် သာမန်အနေအထားဖြင့် ဆက်ဆံရမယ်ဆိုတာ ကို ခွဲခြားသိမြင်သွားခဲ့ပြီ ဖြစ်ပါတယ်။

          မြတ်စွာဘုရားက “သီဟ၊ စဉ်းစားဆင်ခြင်ပြီး ပြုလော့။ သင့်လို လောကမှာ ထင်ရှားတဲ့သူများအနေနဲ့ စဉ်းစားဆင်ပြီးပြုလုပ်ဆောင်ရွက်မှုဟာအရေးကြီးတယ်”လို့ဆုံးမတဲ့စကားကိုလူတိုင်းကောင်းစွာနှလုံးသွင်းသင့်ကြပါတယ်။ ထင်ရှားတဲ့သူဆိုတာ ဘာပဲလုပ်လုပ် လူသိတာ