ဒေါက်တာခင်စန်းရီ - စီမံခန့်ခွဲမှုဆိုင်ရာအမေးအဖြေများ

မေး - Team ပုံသဏ္ဌာန်နဲ့ အလုပ်လုပ်ကြတဲ့အခါ ဘယ်လိုအချက်တွေက အရေးကြီးပါသလဲ။ အဲဒီအချက်တွေရဲ့ အရေးပါဆက်နွှယ်မှုကို ရှင်းပြစေလိုပါတယ်။

ဖြေ - Team ဆိုတာ လူနှစ်ဦး၊ ဒါမှမဟုတ် နှစ်ဦးထက်ပိုတဲ့လူတွေနဲ့ ဖွဲ့စည်းထားပြီး သတ်မှတ်ထားတဲ့ အလုပ် ရည်မှန်းချက်ပြီးမြောက်အောင် တစ်ဦးနဲ့တစ်ဦး အပြန် အလှန်ဆက်သွယ်ညှိနှိုင်း ပူးပေါင်းဆောင်ရွက်တဲ့ အဖွဲ့ အုပ်စုကိုခေါ်ပါတယ်။ လူတိုင်းဟာ Team တစ်ခု မဟုတ် တစ်ခုမှာ အဖွဲ့ဝင်အဖြစ် ပါဝင်နေပါတယ်။ ဥပမာ- လူတိုင်းဟာ မိသားစုဝင်ဖြစ်ပါတယ်။ သင်တန်း သားတစ်ဦးဟာ သင်တန်းရဲ့ အဖွဲ့ဝင် ဖြစ်ပါတယ်။ဘောလုံးသမားတစ်ဦးဟာ ဘောလုံးအသင်းရဲ့ အဖွဲ့ဝင်ဖြစ်ပါတယ်။ အလုပ်မှာ ဝန်ထမ်းတစ်ဦးဟာ Management Team နဲ့ Project Team တွေ အဖွဲ့ဝင်ဖြစ်ပါတယ်။ လုပ်ငန်းတွေမှာ ဖွဲ့စည်းပုံအရ Formal Team တွေ Groups တွေကိုဖွဲ့ထားပါတယ် ဌာနတစ်ခု၊ ဌာနစုတစ်ခုဟာ Team တစ်ခုဖြစ်ပါတယ်။

          Team Work လို့ပြောတဲ့အခါမှာ သာမန် အလုပ် လုပ်ဖို့ ဖွဲ့ထားတဲ့အဖွဲ့တွေနဲ့ ကွဲပြားတဲ့အချက်ကတော့ တခြားလူသတ်မှတ်ပေးတဲ့အလုပ်တွေကို ပြီးမြောက်အောင်ဆောင်ရွက်တာချည်းမဟုတ်ဘဲ ဘာလုပ်သင့် သလဲ၊ ဘာလုပ်မလဲ၊ ဘယ်လိုလုပ်မလဲ စတဲ့ဆုံးဖြတ် သတ်မှတ်ချက်တွေကို အုပ်စုဝင်၊ အဖွဲ့ဝင်တိုင်းက ပါဝင်သဘောတူ ပူးပေါင်းသတ်မှတ်ပြီး သတ်မှတ်ထား တဲ့ ရည်မှန်းချက်ကို ပြီးမြောက်အောင် လူတိုင်းပါဝင် လုပ်ဆောင်တာပဲဖြစ်ပါတယ်။

          လုပ်ငန်းအဖွဲ့အစည်းတွေမှာ ယေဘုယျအားဖြင့် Entrepreneurial team နဲ့ Self-managing team ဆိုပြီးနှစ်မျိုးတွေ့နိုင်ပါတယ်။ Entrepreneurial team တွေကို နောက်ခံပညာရပ်ကျွမ်းကျင်မှု မတူတဲ့လူတွေနဲ့ ဖွဲ့စည်း ထားပြီး စိတ်ကူးစိတ်သန်းကောင်းတွေရဖို့၊ ပစ္စည်းနဲ့ဆောင်ရွက်မှုတွေ ဆန်းသစ် တီထွင်မှုတွေ ပြုလုပ်နိုင်ဖို့ အတွက် အဖွဲ့ဝင်တွေဟာ အတူတကွပူးပေါင်း ဆောင် ရွက်မှုတွေပြုကြပါတယ် Self-managing team တွေကိုတော့ အလုပ်ရည်မှန်းချက် ပြီးမြောက်အောင် ဆောင်ရွက်ဖို့ တာဝန်ပေးထားပြီး အလုပ်လုပ်တဲ့ အခါမှာ အသေးစိတ်အနီးကပ်ကြီးကြပ်မှုတွေ မပြုလုပ် တော့ဘဲ ကိုယ့်ဘာသာ ညှိနှိုင်းပြီး အလုပ်ပြီးမြောက် အောင် ဆောင်ရွက်စေပါတယ်။

          ဘယ်လို Team မျိုးမှာပဲဖြစ်ဖြစ် Cooperation ဆိုတဲ့ ပူးပေါင်းဆောင်ရွက်ခြင်းဆိုတာ အရေးအကြီး ဆုံးပါ။ အားကစားပွဲနိုင်ဖို့အတွက် ပါဝင်တဲ့ အားကစား သမားအချင်းချင်း အချိတ်အဆက်မိဖို့လိုအပ်သလို အလုပ်တစ်ခု ပြီးမြောက်အောင်မြင်ဖို့အတွက် အလုပ် (Team) မှာပါတဲ့ အဖွဲ့ဝင်တွေဟာ အချိတ်အဆက်မိပြီး အတူတကွ အကျိုးတူပူးပေါင်းဆောင်ရွက်ဖို့လိုပါတယ်။ လူတစ်ဦးစီ သီးခြားလုပ်ပြီးရတဲ့ ရလဒ်ထက် စုပေါင်း လုပ်တဲ့ရလဒ်က သာလွန်ဖို့ လိုပါတယ်။ တစ်နည်းအား ဖြင့် စုစုပေါင်းရလဒ်ဟာ တစ်ဦးစီရလဒ် စုစုပေါင်းထက် ပိုတာကို ဆိုလိုပါတယ်။ ထင်း တစ်ချောင်းစီကို ချိုးရ လွယ်ပြီး ထင်းစည်းကို ချိုးရမလွယ်တဲ့ ဥပမာလိုပါပဲ။ ကိုင်းကျွန်းမှီ၊ ကျွန်းကိုင်းမှီဆိုတဲ့ ဥပမာလည်းရှိပါတယ်။ ဒီလို အပြန်အလှန်အကျိုးပြုပြီး သီးခြားစီရှိနေတဲ့ အခါမှာ မရနိုင်တဲ့ရလဒ်၊ ဒါမှမဟုတ် အင်အားကို Synergy လို့ခေါ်ပါတယ်။ ပူးပေါင်းခြင်းကြောင့် ရလဒ်တွေ၊ အင်အားတွေဟာ နဂိုထက်ပိုလာမယ်ဆိုရင် Positive Synergy လို့ခေါ်ပြီး ရလဒ်တွေ အင်အားတွေ နဂိုထက်လျော့သွားမယ်ဆိုရင်တော့ Negative Synergy လို့ ခေါ်ပါတယ်။ Team နဲ့ အလုပ် လုပ်တဲ့အခါမှာ Positive Synergy ရဖို့အရေးကြီးပါတယ်။ ဒါပေမဲ့ Team တစ်ခုဖွဲ့စည်းတာဟာ တခြား လူတွေရဲ့ ဆောင်ရွက်မှု၊လုပ်ဆောင်မှုတွေ တက်လာအောင် လုပ်တာ တစ်ခု တည်းမဟုတ်ဘဲ အဖွဲ့မှာပါဝင်တဲ့လူ တစ်ဦးကျစီက ကိုယ့်ရဲ့ လုပ်ဆောင်မှုတွေကို အဖွဲ့အစည်းပုံသဏ္ဌာန်နဲ့ ဘယ်လိုလုပ်ကြမလဲ ဆိုတာကိုလည်း စဉ်းစားဖို့လိုပါ တယ်။ တစ်ဦးတစ်ယောက်စီ သီးခြားနေတဲ့အခါမှာ ကိုယ့်စိတ်တိုင်းကျ နေထိုင်လုပ်ကိုင်လို့ ရပေမယ့် အဖွဲ့ အစည်းပုံသဏ္ဌာန်နဲ့ လုပ်ကြတဲ့အခါ ကိုယ်ကိုယ်တိုင်နဲ့ Team မှာ ပါဝင်သူတွေကို ပြုပြင်မှု ပြောင်းလဲမှုတွေ လုပ်ပြီး ညှိနှိုင်းယူကြရပါတယ်။ သဘောထားကွဲလွဲမှု တွေရှိနိုင်ပေမယ့် ရည်မှန်းချက် ပေါက်မြောက်ဖို့အတွက် ညှိနှိုင်းနိုင်မယ်ဆိုရင် Team ဟာ အလုပ်ဖြစ်တဲ့ အဖွဲ့ အုပ်စုဖြစ်လာမှာပါ။

          အဖွဲ့အစည်း (Team) ပုံသဏ္ဌာန်နဲ့ အလုပ်လုပ် တဲ့အခါ တစ်ဦးနဲ့တစ်ဦး ယုံကြည်မှု (Trust) ဟာလည်း အလွန်အရေးပါတယ်။ Team စဖွဲ့ကတည်းက အဖွဲ့ ပုံသဏ္ဌာန်နဲ့ လုပ်တာ၊ အဖွဲ့မှာပါဝင်တာတွေဟာ ပို အကျိုးရှိမယ်၊ အလုပ်ဖြစ်မယ်ဆိုတာကို ယုံကြည်မှ တခြားအဖွဲ့ဝင်တွေနဲ့ ပူးပေါင်းဆောင်ရွက်လို့ ရပါတယ်။ တစ်ဦးနဲ့တစ်ဦး သံသယရှိရင် ပဋိပက္ခဖြစ်ပြီး အလုပ် မတွင်နိုင်ပါဘူး။ Team မှာ တစ်ဦးနဲ့ တစ်ဦး ယုံကြည် လေးစားမှုရှိပြီး အလုပ်ဖြစ်အောင် ပူးပေါင်းဆောင်ရွက် နိုင်ဖို့လိုပါတယ်။ Team တွေမှာ သဘောထား ကွဲလွဲမှု၊ယှဉ်ပြိုင်မှုတွေရှိနိုင်ပေမယ့် တစ်ဦးရဲ့ အမြင်ကို ရှင်းပြတဲ့ အခါ တခြားသူတစ်ဦးက သေသေချာချာ နားထောင် သလို ကိုယ့်အမြင်ကိုလည်း တင်ပြနိုင်ခွင့်ရှိဖို့ လိုအပ်ပြီး လူတိုင်းသဘောတူနိုင်တဲ့ တတိယအမြင်သစ် တစ်ခုကို ဝိုင်းဝန်းဖော်ထုတ်ဖို့ လိုပါတယ်။ ဒီလိုညှိနှိုင်းမှု၊ ယုံကြည် လေးစားမှုမရှိဘဲ တင်းမာမှု၊ ပြိုင်ဆိုင်မှုနဲ့ ပဋိပက္ခတွေ ရှိမယ်ဆိုရင် Team မှာ Negative Synergy ဖြစ်တဲ့ ဆုတ်ယုတ်မှုတွေ ဖြစ်လာနိုင်ပါတယ်။

          Team တိုင်းမှာ အဖွဲ့ခေါင်းဆောင်နဲ့ အဖွဲ့ဝင် တွေရှိပါတယ်။ ထိရောက်တဲ့အဖွဲ့ အုပ်စုတစ်ခု ဖြစ် မဖြစ် ဆန်းစစ်လို့ရပါတယ်။ အဖွဲ့ ခေါင်းဆောင်ဟာ ပြတ်ပြတ်သားသား ဆုံးဖြတ်ချက်ချနိုင်သူ ဖြစ်ရပါမယ်။ စွန့်စားမှုအတော်အသင့်ယူနိုင်ရပါမယ်။ အစီအစဉ် တွေကို စနစ်တကျ ချမှတ်နိုင်ပြီး အဖွဲ့ကိုပံ့ပိုး ကူညီနိုင် သူ၊ အလုပ်ဝိုင်းလုပ်နိုင်သူဖြစ်ရပါမယ်။ အဖွဲ့ဝင်တွေကို အသိပေးသင့်တဲ့ ကိစ္စရပ်တွေ အသိပေး ရပါမယ်။ တရားမျှတသူ၊ သတ္တိရှိသူဖြစ်ပြီး အဖွဲ့ဝင်တွေကို အားပေးတတ်သူ၊ လွတ်လပ်ခွင့်ပေးတတ်သူ ဖြစ်ရ ပါမယ်။ အဖွဲ့ဝင်တစ်ဦးချင်းဟာလည်း အုပ်စုအပေါ် ယုံကြည်ပြီး စိတ်တက်ကြွစွာ ပါဝင်လိုသူ ဖြစ်ရပါမယ်။ ပူးပေါင်းဆောင်ရွက်နိုင်သူဖြစ်ပြီး ယုံကြည် ကိုးစား စိတ်ချရသူ ဖြစ်ရပါမယ်။ အဖွဲ့ဝင်ဖြစ်တာကို ဂုဏ်ယူသူဖြစ်ရပါမယ်။ Team တစ်ခုလုံးအနေနဲ့ကတော့ စိန်ခေါ်လောက်တဲ့ရည်မှန်းချက်တွေ ရှိနေရပါမယ်။ အဖွဲ့ဝင် တိုင်းမှာပြောရေးဆိုခွင့် ရှိရပါမယ်။ အဖွဲ့ဝင်တွေရဲ့ ပါဝင်မှု၊ အောင်မြင်မှုကို အသိအမှတ် ပြုရပါမယ်။ အဖွဲ့ဝင်တွေရဲ့ တိုးတက်မှုအတွက် သင်တန်းလေ့ကျင့် မှုတွေရှိရပါမယ်။ အဖွဲ့ဝင်အချင်းချင်း ရိုင်းပင်းပြီးကောင်းမွန်တဲ့ဆက်ဆံရေးရှိဖို့ လိုအပ်ပါမယ်။