ဒဂုန်တာရာ - ပန်းနုရောင်နှစ်ကာလများ

ပန်းနုရောင် နှစ်ကာလများ

သမီးလေးမွေးနေ့

ခရမ်းနုရောင်သစ်ခွ ပင်စိမ်းပင်မြ

ချယ်ရီပေါက်စ မြတ်လေးပေါက်စ

နှင့် သင်းပျံ့နှာဆွ ရနံ့ မွှေးမြ

ပြင်သာကျောက်မှ ဆည်းလည်းသံချွင်ချွင်ခ

ဈေးပိတ်နေ့က ငါ့စာကြည့်ခန်းမှ

ကွီလေးမွေးနေ့ကျင်းပ ငါ့စာကြည့်ခန်းမှ

မီးလင်းဖိုဘေးက သခင်ကိုယ်တော်မှိုင်းရုပ်တု

သူ့နောက်မှ ကပ်လျက်နေရ

ငါ၏ဓာတ်ပုံနောက်က ဂျပန်ဒေါင်းရုပ်

နံရံတစ်ဖက်က လောကနတ်ရွှေချည်ထိုးပန်းချီကား

ငြိမ်းချမ်းရေးအမှတ်အသား စည်းစုပ်ခတ်ဟန်

ပြီး နံရံတစ်ဖက်က မင်းသားမင်းသမီးကဟန်

အာရှပစိဖိတ် ငြိမ်းချမ်းရေးညီလာခံ

ပီကင်းသွားဓာတ်ပုံ စာအုပ်စင်များမှ

အက်ဆစ် အနဂ္ဂ ကက်ဆက်ခွေရစ်

ဟစ်အော်ပေါက်ကွဲ လူငယ်ပေါက်ခံစားမှု

ရယ်သံမောသံ ဆူညံပျော်ရွှင်

ဇွန်းသံပန်းကန်သံ တေးသံရောယှက်

အိပ်မက်ထဲကအဆိပ်တွေ ဦးနှောက်မှမရှိတာကိုး

ပဲ့တင်သံများ ရိုက်ခတ်နေလေ၏

စာကြည့်ခန်းနှင့်

ကပ်လျက်အခန်းမှ ငါ၏အိပ်ခန်း

စာကြည့်ခန်းမှ အပျိုမလေးများ

ပျိုမျစ်နုသစ် အချစ်လူငယ်များ

သူ့ခေတ်တေးသံ သူ့ခေတ်ခံစားမှု

ပေါ့ပါးမျှဝေ ရွှင်လန်းနေစဉ်

ငါလျှင် လန်းဆတ် ဆယ်ကျော်သက်နာရီပြန်လှည့်

ပန်းနုရောင် နှစ်ကာလများ

သူတို့အရွယ်

ဆယ်ကျော်သတ်နှစ် ၁၆ နှစ်တွင်

အမြင့် ကိုလိုနီခေတ် ကြုံဖြစ်ရကား

အမျိုးသားလွတ်လပ်ရေးလှုပ်ရှားမှု

ကျောင်းသားဘဝ သမိုင်းကဏ္ဍ

ရေမွှေးဆွတ်သ မော်လမြိုင်ဇရပ်

ရွှေတိဂုံပစ္စယံ ရွှေရောင်ပြက်မှာ

ငါလျှင် သမိုင်းစခဲ့ရာ

ရွှေချည်မျှင်ရက်

ဖြိုးပြက်ပတ္တမြားရောင် ပန်းချီကားချပ်

စာအုပ်ထပ်တွေ တိပ်ခွေပြန့်ကြဲ

တည်ရှိ ပန်းပွင့်တွဲလောင်း ပန်းစိုက်ဖိတ်စဉ်

မွှေးယစ်ထုံသန်း မွေးနေ့လန်းရွှင်

ကြည်ကြည်လင်လင် ငါလျှင်တွေးတော

လွတ်လပ်ရေးအကြောင်း မျိုးဆက်သစ်အကြောင်း

ပြန်ပြောင်းပေါ်ကာ ဆန်းသစ်လာသည်

ပန်းနုရောင်နှစ်ကာလများ

ဒဂုန်တာရာ

၁၆-၉-၂၀၀၂

ဗြူးတီးမဂ္ဂဇင်း၊ မတ်၊ ၂၀၀၃။