Other Websites
ထိန်ဝင်း - ၁၉၇၄ဦးသန့်အရေးအခင်း
Couldn't load pickup availability
(ကမ္ဘာ့ကုလသမဂ္ဂ အထွေထွေအတွင်းရေးမှူးချုပ်ဟောင်းဖြစ်သော ဦးသန့်သည် ၁၉၇၄ ခုနှစ်၊ နိုဝင်ဘာလ ၂၅ ရက်၊ တနင်္လာနေ့တွင် အမေရိကန် နယူးယောက်မြို့ရှိ ဆေးရုံတစ်ရုံ၌ ကွယ်လွန်အနိစ္စရောက်သွားသည်။ ထိုသတင်းများနှင့် ပတ်သက်ပြီး နိုင်ငံခြားမှ ပေးပို့ရရှိသည့် အေအက်ဖ်ပီသတင်းများ၊ ယူပီအိုင်သတင်းများနှင့် အေပီသတင်း များကို နောက်ဆက်တွဲအဖြစ် ဆက်လက်ဖော်ပြအပ်ပါသည်။ ။ ဘာသာပြန်သူ)။
ကုလသမဂ္ဂ၊ နိုဝင်ဘာ၂၅။ ။ ကုလသမဂ္ဂ အထွေထွေအတွင်းရေးမှူးချုပ်ဟောင်း ဦးသန့်သည် နယူးယောက်မြို့ရှိ ဆေးရုံတစ်ရုံ၌ ယနေ့ကွယ်လွန်အနိစ္စရောက်သွားကြောင်း ဖြင့် ကုလသမဂ္ဂက ထုတ်ပြန် ကြေညာလိုက်သည်။ ပါးတွင်ဖြစ်ပွားသော ကင်ဆာရောဂါ ကြောင့် ကွယ်လွန်သွားခြင်းဖြစ်သည်။ ကွယ်လွန်ချိန်တွင်အသက် ၆၅ နှစ် ရှိပြီဖြစ်သည်။
ဦးသန့်ကို နိုဝင်ဘာ ၂၂ ရက်နေ့က ဆေးရုံသို့တင်ပို့ခဲ့သည်။ လွန်ခဲ့သည့် ၁၃ လ က ဆေးရုံတက်ပြီး ပါးမှ ကင်ဆာအကျိတ်များသည် တဖြည်းဖြည်း ပွားများလာကာ ယခုကဲ့သို့ ကွယ်လွန်သွားခြင်းဖြစ်သည်။
ဦးသန့်သည် သူ့ဘဝမှတ်တမ်းများကို ရေးသားနေခိုက်ဖြစ်သည်။ မကျန်းမာသော ကြောင့် ရေးလက်စများကို ခေတ္တ ရပ်နားထားသည်။
ကုလသမဂ္ဂ အထွေထွေအတွင်းရေးမှူးချုပ်အဖြစ်မှ ၁၉၇၁ ခုနှစ်၊ ဒီဇင်ဘာ ၃၁ ရက်နေ့တွင် အနားယူခဲ့သည်။ နယူးယောက်မြို့၏ မြောက်ဘက်ရှိ ဟာရီဆန်မြို့ကလေးသို့ ပြောင်းရွှေ့နေထိုင်သည်။
ဦးသန့်ကို ၁၉၀၉ ခု၊ ဇန်နဝါရီ ၂၂ ရက်နေ့တွင် မြန်မာနိုင်ငံ၊ ပန်းတနော်မြို့၌ ဖွားမြင်ခဲ့သည်။ အင်္ဂလိပ် ဘာသာပြကျောင်းဆရာ၊ ထို့နောက်ပြန်ကြားရေးဌာန၊ ညွှန်ကြား ရေးဝန် စသည့်တာဝန်များကို မြန်မာနိုင်ငံ၌ ထမ်းဆောင်ခဲ့သည်။
ပြည်သူ့ဆက်ဆံရေးလုပ်ငန်းနှင့် ပြန်ကြားရေးလုပ်ငန်းများတွင် ကြီးမားသည့် တာဝန်များကို ထမ်းဆောင်နေရာမှ ကုလသမဂ္ဂဆိုင်ရာ မြန်မာနိုင်ငံ၏ အမြဲတမ်း ကိုယ်စားလှယ်တော်ကြီးအဖြစ် တာဝန်ပေးအပ်ခြင်းခံခဲ့ရသည်။
ထိုသို့အမြဲတမ်း ကိုယ်စားလှယ်အဖြစ် ထမ်းဆောင်နေစဉ် ထိုအချိန်က ကုလသမဂ္ဂ အထွေထွေ အတွင်းရေးမှူးချုပ် ဒက်ခ်ဟမ္မားရှိုးလ်သည် အာဖရိကတွင် လေယာဉ်ပျက်ကျပြီး ကွယ်လွန်သွားခဲ့သည်။
ဒက်ခ်ဟမ္မားရှိုးလ် ကွယ်လွန်သွားသဖြင့် ဦးသန့်အား ကုလသမဂ္ဂအထွေထွေ အတွင်းရေးမှူးချုပ်အဖြစ် ၁၉၆၃ ခုနှစ်၊ နိုဝင်ဘာ ၃၀ ရက်နေ့တွင် ရွေးကောက်တင် မြှောက်ခြင်းခံရသည်။ သို့သော်လည်း ဒက်ခ်ဟမ္မားရှိုးလ်၏အတွင်းရေးမှူးချုပ်သက်တမ်း ကုန်ဆုံးသည်အထိ ယာယီအတွင်းရေးမှူးချုပ်အဖြစ် တင်မြှောက်ခြင်းသာဖြစ်သည်။
၁၉၆၆ ခုနှစ်တွင် ယင်းသက်တမ်းကုန်ဆုံးရာ ဦးသန့်ကိုပင် အထွေထွေအတွင်း ရေးမှူးချုပ်အဖြစ် အုပ်စုဝင်နိုင်ငံများ၊ ကြားနေနိုင်ငံများအားလုံးတို့က တညီတညွတ်တည်း ပြန်လည် ရွေးကောက်တင်မြှောက်ကြပြန်သည်။ ဒုတိယအကြိမ်မြောက် အထွေထွေအတွင်း ရေးမှူးချုပ်အဖြစ် ရာထူးသက်တမ်းကုန်ဆုံးသော ၁၉၇၁ ခုနှစ်၊ ဒီဇင်ဘာ ၃၁ ရက်နေ့အထိ တာဝန်ထမ်းဆောင်သွားသည်။
ဦးသန့်၏ ကျန်းမာရေးမှာ ၁၉၇၃ ခုနှစ်ကတည်းက စတင်ချွတ်ယွင်းလာခဲ့သည်။ လွန်ခဲ့သည့်နှစ် ဒီဇင်ဘာလအတွင်းက ဦးသန့်သည် ဆုတစ်ခုယူရန်ရှိခဲ့သည်။ သို့သော်လည်း မိမိ၏ကျန်းမာရေးအခြေအနေ မကောင်းကြောင်း၊ ထို့ကြောင့် ဆုကို ကိုယ်တိုင် တက်ရောက် ယူနိုင်မည် မဟုတ်ကြောင်း ဝမ်းနည်းစွာ အကြောင်းကြားအပ်ပါသည်ဟု စာရေးပြီး တောင်းပန်ခဲ့ဖူးသည်။
ဦးသန့်သည် စေတနာ သဒ္ဓါတရားထက်သန်သူ၊ အလှူအတန်းရက်ရောသူ၊ တည်ငြိမ်လေးနက်ရင့်ကျက်သူ၊ စိတ်နှလုံးသား မြင့်မြတ်သူအဖြစ် ကုလသမဂ္ဂသံတမန်အသိုက်အဝန်းက သူ့ကိုချစ်ခင်လေးစားကြသည်။ ထိုသို့သော ပုဂ္ဂိုလ်ကြီး ကွယ်လွန်အနိစ္စ ရောက်သွားကြောင်း ကြားသိရသည့်အတွက် ကုလသမဂ္ဂ သံတမန်အသိုက်အဝန်းနှင့် ကုလ သမဂ္ဂအမှုထမ်း၊ အရာထမ်းများလောကတွင် ကြီးစွာဝမ်းနည်းပက်လက်ဖြစ်သွားကြသည်။
ဦးသန့်သည် လူသားအားလုံးတို့၏ လွတ်လပ်ခွင့်နှင့် ငြိမ်းချမ်းစွာနေခွင့်တို့အတွက် ထာဝရကြိုးပမ်းခဲ့သူ ဖြစ်သည်။ မည်သည့်ပြဿနာကိုမဆို သမာသမတ်ကျစွာ ရှုမြင်သုံးသပ် ပြီး အကောင်းတရားများ ဖြစ်ထွန်းရေးအတွက် ဆောင်ရွက်ခဲ့သူဖြစ်သည်။
သို့သော်လည်း ဘယ်လ်ဂျီယန်၊ ကွန်ဂိုနိုင်ငံ (ယခု ဇိုင်ယာနိုင်ငံ) နှင့် ပတ်သက်၍ ဦးသန့် ဆောင်ရွက်ချက်များသည် ထင်သလောက် အောင်မြင်ခြင်း မရှိခဲ့ချေ။ နောက်ပိုင်း တွင် ဗီယက်နမ်စစ်ပွဲကို ညှိနှိုင်းဆွေးနွေးခြင်းဖြင့် အဆုံးသတ်နိုင်အောင် ကိုယ်တိုင်ကိုယ်ကျ ပါဝင် ကြိုးပမ်းခဲ့သည်။
၁၉၆၇ ခုနှစ်မှစပြီး သူ၏လုပ်ဆောင်ချက်များ မှန်ကန်ကြောင်းကို သာဓကပြရန် ကြိုးပမ်းလာရသည်။ သူ့အပြုအမူများကြောင့် အာရပ်-အစ္စရေး ၆ ရက်ကြာစစ်ပွဲသည် ပိုမိုလျင်မြန်စွာ ဖြစ်ပွားသွားရခြင်းဖြစ်ကြောင်း စွပ်စွဲချက်များဖြင့် ရင်ဆိုင်လာရသည်။
ထိုအချိန်က ဂါဇာကမ်းမြောင်ဒေသနှင့် ဆိုင်းနိုင်းသဲကန္တာရအတွင်း၌ ရှိနေကြသော ကုလသမဂ္ဂ၏သံခမောက် အပြာဆောင်း ငြိမ်းချမ်းရေးထိန်းသိမ်းသည့်တပ်များ ပြန်လည် ရုပ်သိမ်းသွားရေးကို အီဂျစ်သမ္မတ နာဆာ(ကွယ်လွန်)က ပြင်းထန်စွာတောင်းဆိုခဲ့သည်။ ထိုတောင်းဆိုချက်ကို လျင်မြန်စွာ လိုက်လျောသည့်အတွက် ဦးသန့်ကို ဝိုင်းဝန်းဝေဖန် ခဲ့ကြသည်။
ဦးသန့်သည် ကုလသမဂ္ဂတပ်များ ရုပ်သိမ်းရေးကိုရပ်တန့်ရန် ကိုင်ရိုမြို့သို့ ချက်ချင်း သွားရောက်ပြီး ဆောင်ရွက်ခဲ့သေးသည်။ လုံခြုံရေးကောင်စီ၏ တောင်းဆိုချက်ဖြင့် အနည်းဆုံးတစ်ရက်တန်သည်၊ နှစ်ရက်တန်သည် ဆိုင်းငံ့ထားနိုင်ပါလျက်နှင့် ဦးသန့်၏ အလောသုံးဆယ် ဆုံးဖြတ်အမိန့်ပေးသောကြောင့် စစ်ပွဲပိုမိုလျင်မြန်စွာ ဖြစ်ပွားလာရခြင်း ဖြစ်ကြောင်းများကိုပါ ဝေဖန်ကြသည်။
ဦးသန့်အနေဖြင့်မူ ထိုသို့ကုလသမဂ္ဂတပ်များ အီဂျစ်မြေပေါ်တွင် တပ်စွဲထားစေခြင်း သည် မည်သည့်နိုင်ငံတကာ သဘောတူညီချက်မျှမရှိဘဲ တပ်စွဲထားစေခြင်းဖြစ်သည် ဟူသော ယုံကြည်ချက်ကို ကိုင်စွဲထားလျက်ပင်ရှိသည်။
ယင်းတပ်များကို ကုလသမဂ္ဂ အထွေထွေအတွင်းရေးမှူးချုပ် ဒက်ခ်ဟမ္မာလ်နှင့် သမ္မတနာဆာတို့၏ပုဂ္ဂိုလ်ရေးသဘောတူညီမှုအရ ၁၉၅၆ခုနှစ်က တပ်စွဲစေခဲ့ခြင်းဖြစ်သည်။
၁၉၇၄ ခု၊ ဦးသန့် အရေးအခင်း ဦးသန့်ရေးသားနေသည့် သူ၏ဘဝမှတ်တမ်းများသည် ယင်းအာရပ်-အစ္စရေး ၆ ရက်ကြာစစ်ပွဲအချိန်ကာလအထိ ရေးပြီးဖြစ်နေပြီး ၆ ရက်ကြာစစ်ပွဲ၏ အရင်းခံများ အကြောင်းကိုပါ ထည့်သွင်းရေးသားထားလိမ့်မည်ဟု မျှော်လင့်ကြသည်။
ကုလသမဂ္ဂ အထွေထွေအတွင်းရေးမှူးချုပ် ကွတ်ဝါးဟိမ်းသည် အရှေ့အလယ်ပိုင်း ဒေသသို့ ခရီးထွက်နေသည်။ ၎င်းပြန်လာသောအခါ ကုလသမဂ္ဂတွင် ဦးသန့်အတွက် ဝမ်းနည်းကြောင်း အထိမ်းအမှတ်အဖြစ် အစည်းအဝေးတစ်ရပ် ကျင်းပရန်ရှိသည်ဟု ကုလသမဂ္ဂအရာရှိများက ထုတ်ဖော်ပြောဆိုသည်။ ကွတ်ဝါးဟိမ်းသည် ကြာသပတေးနေ့၌ ပြန်လည် ဆိုက်ရောက်လာလိမ့်မည်ဖြစ်ကြောင်း ခန့်မှန်းရသည်။
ဈာပနအစီအစဉ်များကို အပြီးအပြတ် မစီစဉ်ရသေးချေ။ သို့သော်လည်း ဦးသန့်၏ ရုပ်ကလာပ်ကို ကုလသမဂ္ဂတွင်ထားရှိရန် ဒမတ်စကပ်မြို့ သို့ရောက်ရှိနေသည့် ကွတ်ဝါးဟိမ်း က ဆွေးနွေးလျက်ရှိသည်။ ဗုဒ္ဓဟူးနေ့ မွန်းလွဲပိုင်းမှ ကြာသပတေးနေ့ မွန်းလွဲပိုင်းအထိ ကုလသမဂ္ဂတွင်ထားရန် အလားအလာရှိသည်။ ရုပ်ကလာပ်ကို ကုလသမဂ္ဂ ဖျန်ဖြေရေး အခန်း (Mediation Room) အနီးတွင် ထားရှိလိမ့်မည်ဟုလည်း မျှော်လင့်ရသည်။
ဒက်ခ်ဟမ်းမားရှိုးလ်နှင့် ကုလသမဂ္ဂဆိုင်ရာ အမေရိကန်သံအမတ်ကြီး အက်ဒ်လေ စတီဗင်ဆင်တို့၏ ရုပ်အလောင်းများကို ကုလသမဂ္ဂသို့ ပို့ဆောင်ထားရှိရန် အကြံပြုချက်များ ရရှိခဲ့ဖူးသည်။ သို့သော် ဤသို့ဦးသန့်၏ ရုပ်အလောင်းကို ကုလသမဂ္ဂသို့ ပို့ဆောင်ထား ခြင်း၊ ကြီးမားစွာဂုဏ်ပြုခံရခြင်းနှင့် ပတ်သက်၍ ဦးသန့်သည် ပထမဦးဆုံးပုဂ္ဂိုလ်ဖြစ်သည်။
ဦးသန့် ကွယ်လွန်သည့်နေ့မှာပင် ကျင်းပနေဆဲ ကုလသမဂ္ဂညီလာခံတွင် ဝမ်းနည်း ကြောင်းကို ပြောဆိုကြသည်။ သို့သော်လည်း ဦးသန့်အတွက် ဝမ်းနည်းသည့်အထိမ်းအမှတ် ညီလာခံကို ထပ်မံ၍ သီးသန့်ကျင်းပမည်ဖြစ်ရာ သောကြာနေ့ သို့မဟုတ် တနင်္လာနေ့တွင် ကျင်းပဖွယ်ဖြစ်ရာ အကြောင်းရှိသည်။
တနင်္လာနေ့ ညနေပိုင်းအစည်းအဝေးကို အချိန်နောက်ကျပြီးမှ ကျင်းပနိုင်သည်။ ယင်းအစည်းအဝေးတွင် အထွေထွေ ညီလာခံများဆိုင်ရာ လက်ထောက်အတွင်းရေးမှူးချုပ် ဘရက်ဖို့မို့စ် (အမေရိကန်ပြည်ထောင်စု)က အောက်ပါ ကွတ်ဝါးဟိမ်း၏ ဝမ်းနည်းကြောင်း သဝဏ်လွှာကို ဖတ်ကြားတင်သွင်းသွားသည်။
“ကမ္ဘာ့ကုလသမဂ္ဂ၏ တတိယမြောက် အထွေထွေအတွင်းရေးမှူးချုပ်ဖြစ်ခဲ့သူ ဦးသန့်ကွယ်လွန်ကြောင်းကို ကြားသိရသောအခါ လှိုက်လှဲစွာ ဝမ်းနည်းကြေကွဲမိပါသည်။ မိမိတို့၏ ကုလသမဂ္ဂအဖွဲ့အစည်းကြီး အကျပ်အတည်းပေါင်းစုံနှင့် ရင်ဆိုင်နေရချိန်၊ ကုလသမဂ္ဂဝင် နိုင်ငံများအချင်းချင်း မတူကွဲလွဲမှုများနှင့် ပဋိပက္ခမှုများ ပြင်းထန်နေချိန်တွင် ဦးသန့်သည် အထွေထွေအတွင်းရေးမှူးချုပ် ဖြစ်လာသူတစ်ဦးဖြစ်ပါသည်။
ထို့ကြောင့် ဦးသန့် ပထမဦးဆုံးဆောင်ရွက်ရမည့် တာဝန်များသည် မတူကွဲလွဲမှု များအကြား တံတားခင်း ဆက်သွယ်ပေးရန်၊ တည်ငြိမ်မှုရရန်နှင့် အမြင်တူ၊ အတွေးတူ၊ ယုံကြည်ချက်တူ ပူးပေါင်းမှု ရရှိစေရန်တို့ပင်ဖြစ်ပါသည်။
အပြောင်းအလဲများနှင့် ချောက်ချားဖွယ် မတည်ငြိမ်မှုများ ရောပြွမ်းနေသော ကာလတစ်လျှောက်တွင် ဦးသန့်သည် ၁၀ နှစ်ပတ်လုံး ကုလသမဂ္ဂကို ဦးစီးဦးရွက်ပြု ခဲ့ရသူဖြစ်ပါသည်။ ဆိုးဝါးလှသည့် အခြေအနေများ လျော့ပါးတည်ငြိမ်အောင် ကြိုးပမ်းရာ၌ သူ၏စကားလုံးများ၊ သူ၏တည်ငြိမ်မှုများနှင့် သူ၏အားထုတ်မှုများသည် အရေးကြီးသော အရင်းခံချက်များဖြစ်ပါသည်။
အခြေခံ မူဝါဒများနှင့်ပတ်သက်လာလျှင်လည်း သူ၏ထင်မြင်ချက်ကို မဆိုင်းမတွ တင်ပြတတ်သူဖြစ်သည်။ သူ တာဝန်ထမ်းဆောင်နေရသည့် ကာလတစ်လျှောက်လုံးတွင် လည်း အဖွဲ့ဝင်နိုင်ငံများ အားလုံးအပေါ်တွင် ယုံကြည်မှုကို ထားရှိနိုင်ခဲ့သူဖြစ်သည်။
နိုင်ငံရေးပဋိပက္ခများ ရှုပ်ထွေးစွာဖြစ်ပေါ်နေသည်ကို ဖြေရှင်းရာတွင်လည်း ကောင်း၊ အဖွဲ့ကြီး၏ စီးပွားရေးနှင့် လူမှုရေးများ တိုးတက်မြင့်မားအောင် အားထုတ်ကြိုးပမ်း ရာတွင်လည်းကောင်း ဦးသန့်သည် အတွင်းရေးမှူးချုပ်အနေဖြင့် အားသွန်ခွန်စိုက်ဆောင်ရွက်တတ်သူဖြစ်သည်။ သူ့ကိုယ်ကျိုးစီးပွားကို စွန့်လွှတ်ထားတတ်သူဖြစ်သည်။ ထိုမျှမက သူ၏ကျန်းမာရေးကိုပင် ဂရုမစိုက်တော့ဘဲ တာဝန်ဝတ္တရားများထဲမှာ အပြီးတိုင် မြှုပ်နှံထားသူဖြစ်သည်။
ကျွန်ုပ်တို့အများစုသည် ဦးသန့်၏ မိတ်ကောင်းမိတ်ဆွေများဖြစ်ခဲ့ကြပါပြီ။ သူ၏ လူသားဆန်မှု၊ လူသားများအပေါ် ချစ်ခင်လေးစားတတ်မှု၊ တည်ကြည်လေးနက်မှုများသည် ကျွန်ုပ်တို့အဖို့ ချီးကျူး၍မကုန်၊ တန်ဖိုးထား၍မခန်းအောင် ဖြစ်ရပါပြီ။
ကျွန်ုပ်တစ်ဦးတည်းအဖို့မူ ဦးသန့်သည် ကျွန်ုပ်၏ မိတ်စစ်ဆွေစစ်ဖြစ်ပြီး သူ၏ ကြီးမြင့်သည့် ပညာဉာဏ်၊ ပြည့်ဝသည့် ညှာတာထောက်ထားတတ်မှု၊ ရင့်ကျက်သည့် စေတနာသဒ္ဓါတရား စသည်များကို တစ်သက်ပတ်လုံး မေ့နိုင်တော့မည် မဟုတ်ပါ။
ဤကမ္ဘာမြေပေါ်တွင် ငြိမ်းချမ်းရေးတိုးတက်ခိုင်မာရေးနှင့် တရားမျှတရေးတို့အတွက်သူ့ကိုယ်ကျိုးမှန်သမျှ စွန့်လွှတ်ပြီးဆောင်ရွက်ခဲ့သူတစ်ဦးအဖြစ်ကျွန်ုပ်တို့အားလုံးကဦးသန့်ကိုထာဝရသတိရနေကြမည်သာဖြစ်ပါသည်စသည်ဖြင့်ကွတ်ဝါးဟိမ်း၏သဝဏ်လွှာတွင်ပါရှိသည်။











