တက္ကသိုလ်နေ၀င်း - စက္ကင်းလေဒီ

အခန်း (၁)

          သူမသည် အမေရိကန်သမ္မတကတော်အဖြစ် သတင်းစာ ကွန်ဖရင့်တစ်ရပ် ကျင်းပ နေပေသည်။

          မျက်နှာချင်းဆိုင်ခုံများတွင် သတင်းစာအသီးသီးနှင့် ကြေးနန်းသတင်းဌာနများ မှ သတင်းထောက်အမျိုးသားနှစ်ဆယ်၊ အမျိုးသမီးနှစ်ဦးတို့သည် မှတ်စုစာအုပ် ကိုယ်စီ နှင့်ထိုင်နေကြသည်။

          သူမကို ဝဲယာညှပ်ပြီး ထိုင်နေကြသူနှစ်ဦးကတော့ သမ္မတကတော်၏ သတင်း ပြန်ကြားရေးအတွင်းရေးမှူး နိုရာအမည်ရှိ အမျိုးသမီးနှင့် နေ့စဉ်အစီအစဉ်များ ကြီးကြပ်ခန့်ခွဲရသူ အမျိုးသမီး အတွင်းရေးမှူး အော်ရမ်တို့ပင် ဖြစ်လေသည်။

          သတင်းစာဆရာတို့က အမေရိကန်သမ္မတကတော်အား မေးခွန်းတွေအမျိုးမျိုး မေးကြသည်။ သူမကလည်း မဆိုင်းမတွ ကောင်းစွာ ပြန်ဖြေနိုင်လေသည်။

          “မော်စကိုမြို့မှာ ကျင်းပမယ့် အပြည်ပြည်ဆိုင်ရာ အမျိုးသမီးများညီလာခံကို တက်ရောက်မယ်ဆိုတာ ဟုတ်ပါသလား”

          သတင်းထောက်တစ်ဦးက ထပ်မေးရာ သူမက ... “ဟုတ်ကဲ့ ကျွန်မက အဲဒီအမျိုးသမီး ညီလာခံကို တက်ဖို့အစီအစဉ်ရှိပါတယ်” ဟု ပြန်ဖြေလိုက်သည်။ ယင်း “အမျိုးသမီးတွေ တန်းတူအခွင့်ရရှိရေးနဲ့ ပတ်သက်လို့ရော... မော်စကို ညီလာခံ ကျရင် ဆွေးနွေးဖို့ ရည်ရွယ်ပါသလား”

           “ကျွန်မ အဲဒီအကြောင်းကို အကျယ်တဝင့် တင်ပြဆွေးနွေးဖို့ ရည်ရွယ်ပါတယ်”

          ဤသို့လျှင် မေးခွန်းတွေ တစ်ခုပြီးတစ်ခု ထမေးသည်ကို သူမက သွက်လက်စွာ ပင် ပြန်ဖြေနိုင်ခဲ့လေသည်။

          သတင်းစာကွန်ဖရင့် ပြီးသွား၍ သတင်းထောက်များ ပြန်သွားကြသောအခါ သူမသည် ဝန်ကြီးများအစည်းအဝေးလုပ်သည့် ကက်ဘိနက် အခန်းတွင်းသို့ ဝင် သွားလေသည်။

          ထိုအခန်းတွင် ရုပ်မြင်သံကြားစက် တစ်ခုရှိပြီး ယင်းစက်ရှေ့တွင် လူအချို့သည် ထိုင်၍ စောစောက သတင်းစာကွန်ဖရင့် လုပ်ပုံကို ဤအခန်းမှ ထိုင်ကြည့်နေကြ သည်။

          ထိုလူအုပ်စုထဲတွင် တုတ်တုတ်ခိုင်ခိုင်လူကြီးတစ်ယောက်လည်း ပါဝင်လေသည်။ သူကား ရုရှားထောက်လှမ်းရေး (ကေ ဂျီဘီ) အဖွဲ့ အကြီးအကဲ ဗိုလ်ချုပ်ကြီး ပီထရော့ဗ်ပင်ဖြစ်သတည်း။

          သူသည် ပြုံးရွှင်စွာဖြင့် လက်ခုပ်တီးပြီး သြဘာပေးလိုက်သည်။ “ကောင်းလိုက်တာကွာ...၊ ဘာမှ ပြောစရာမရှိအောင် အလွန်ပိရိသေသပ်တာပဲ။ သဘာဝလည်းကျတယ်။ ဒါကြောင့် မင်းကို အထူးပဲချီးကျူးပါတယ်” ။

          ဗိုလ်ချုပ်ကြီးပီထရော့ဗ်က ဤသို့ချီးကျူးပြောဆိုလိုက်ချိန်တွင် သူ၏နောက်တွင် ရှိနေကြသော ဗိုလ်မှူးကြီး ဇူဘာ၊ အမျိုးသမီး၏ချစ်သူ ရာဇင်နှင့်၊ တခြား အမည် မသိသူနှစ်ယောက်တို့ကပါ လက်ခုပ်တီး၍ ချီးကျူးသြဘာပေးကြလေသည်။

          ဤသို့ဝိုင်းဝန်း ချီးကျူးသြဘာပေးကြရသည့်အကြောင်းကား အောက်ပါအတိုင်း ဖြစ်ပေသည်။

          စောစောက သတင်းစာ ကွန်ဖရင့်ကျင်းပပြီး သတင်းထောက်များ၏ မေးခွန်း များကိုဖြေကြားခဲ့သူမှာ အမေရိကန်သမ္မတကတော် အစစ်မဟုတ်။ သမ္မတကတော် နှင့် ရုပ်ချင်းရွေးမရအောင် ချွတ်စွပ်တူသော ရုရှားအမျိုးသမီးတစ်ဦး ဖြစ်လေသည်။ သူမ၏ နာမည်က ဗီရာဗာဗီလိုဗာဖြစ်ပြီး အားလုံးက အတိုကောက် ဗီရာဟုခေါ်ကြသည်။

          ဗီရာသည် ရုရှားလျှို့ဝှက်ထောက်လှမ်းရေး(ကေ ဂျီဘီ)အဖွဲ့ ၏ အထူးစီမံ ချက်တစ်ရပ်အဖြစ် အမေရိကန် သမ္မတကတော် ဘီလီအမည်ရှိ အမျိုးသမီးဟန်ဆောင် ပြီး သူလျှိုလုပ်ငန်းများလုပ်ရန် ကြိုတင်ပြင်ဆင်လေ့ကျင့်ပေးခြင်းပင် ဖြစ်လေသည်။

          ယင်းသို့ ကြိုတင်ပြင်ဆင်ခဲ့သည်မှာ အတော်ကြာသွားပြီဖြစ်လေရာ အဆင်သင့် ဖြစ်လောက်ပြီဟု ယူဆရသဖြင့် နောက်ဆုံးအကြိမ် လေ့ကျင့်ခန်းလုပ်သည့်သဘော ဝတ်စုံပြည့်လေ့ကျင့်မှုကို တကယ့် အမေရိကန်ပြည် သမ္မတအိမ်တော်၌ သတင်းစာ ကွန်ဖရင့်တစ်ရပ် ကျင်းပနေဟန် အစမ်းလေ့ကျင့်ကြည့်ကြခြင်းပင် ဖြစ်သည်။

          ထောက်လှမ်းရေး(ကေ ဂျီဘီ ) အကြီးအကဲ ဗိုလ်ချုပ်ကြီး ပီထရော့ဗ်တို့က ဤ ကက်ဘိနက်အစည်းအဝေးခန်းမှ နေ၍ ရုပ်မြင်သံကြားစက်ဖြင့် ဗီရာ၏သရုပ်ဆောင်မှု ကို အကဲခတ်ကြည့်ရင်း သဘောကျလွန်း၍ ယခုလို ချီးကျူးလိုက်ကြခြင်းပင် ဖြစ်သည်။

          ပီထရော့ဗ်၏ဘေးနားတွင် ရှိနေသူ ထောက်လှမ်းရေးအရာရှိ ရာဇင်ဆိုသူကတော့ အမျိုးသမီး ဗီရာ၏ချစ်သူ ဖြစ်လေသည်။

          ဗီရာသည် ရုရှားပြည်မှ ပြဇာတ်သရုပ်ဆောင် ပြဇာတ်မင်းသမီးတစ်ဦး ဖြစ်လေ သည်။ သည် “ဒါဖြင့် ဗီရာ... မင်းက အဆင်သင့်ဖြစ်ပြီဆိုပါတော့”

          ဗိုလ်ချုပ်ကြီး ပီထရော့ဗ်ကပြုံး၍မေးလိုက်ရာ အမေရိကန်သမ္မတကတော်အသွင် ဝတ်စားဆင်ယင်ထားသူ ဗီရာက ပြုံးလိုက်၏။

          “ဟုတ်ကဲ့ရှင့်။ ကျွန်မကတော့ အဆင်သင့်ဖြစ်ပါပြီ” “အေး ကောင်းပြီ... ဒါဖြင့် ငါက ဝန်ကြီးချုပ်ဆီသွားပြီး သတင်းပို့လိုက်တော့မယ်”

          ပြောပြောဆိုဆို ပီထရော့ဗ်သည် ကျေနပ်အားရဟန်ဖြင့် ထွက်သွားလေသည်။

          သူတို့ ယခု ဝတ်စုံပြည့်လေ့ကျင့်ကြသည့်နေရာကား မော်စကိုမြို့ရှိ အာဏာပိုင် များ၏ဌာနချုပ် ကရင်မလင်နန်းတော်ကြီး၏ တစ်နေရာ လျှို့ဝှက်အဆောင်တစ်ခုပင် ဖြစ်ပါသတည်း။