ဇော်ဇော်အောင် - ရိုမန်တစ်အလွမ်း

ရိုမန်တစ်အလွမ်း

ရိုမန်တစ်ဝါဒ/ROMANTICISM ဟာလည်း သဘာဝ တရားကြီးရဲ့ အစီ အမံကို မလွန်ဆန်နိုင်ဘူး။ နောက်တက်လာတဲ့ သရုပ်မှန်ဝါဒ/ REALISM သဘာဝဝါဒ/ NATURALISM တို့ကို နေရာ ဖယ်ပေးလိုက်ရတာပါပဲ။ ဒါပေမဲ့ တစ်ဖက်က ပြန်စဉ်းစားရင် ဒီလိုရှိတယ်။ နေရာ ဖယ်ပေးလိုက်ရတာ ဆိုပေမဲ့ လုံးဝ ပျောက်ကွယ်သွားတာ မဟုတ်ဘူး။ ရိုမန်တစ်ဝါဒရဲ့ အနှစ် အသားဖြစ်တဲ့ (ဝါ) ဗဟိုချက်ဖြစ်တဲ့ (အနုပညာသမားဟာ သူ့ခံစားမှုကို ဖော်ထုတ်မျှဝေတယ်) ဆိုတဲ့ အယူအဆဟာ လုံးဝ ပျောက်ကွယ်သွားပြီလို့ ပြောလို့ မရဘူး။ အထူးသဖြင့် အနုပညာသမားနဲ့ ဝေဖန်ရေးဆရာ၊ ပညာရှင် မဟုတ်တဲ့ သာမန်လူ၊ သာမန် အနုပညာ ပရိသတ်တွေ အဖို့ကတော့ (ခံစားရတဲ့ အတိုင်း အနုပညာကို ဖန်တီးတယ်။ ခံစားမှုကို ထုတ်ဖော်ပြသတယ်) ဆိုတဲ့ အယူအဆကို သဘောကျ လက်ခံကြတယ်။ (ဒီနေ့အထိ) ကိုပဲ။ အနုပညာသမားတွေ ကိုယ်တိုင်က (ဘယ်သူဘယ်ဝါ ခံစားခြယ်မှုန်းသည်၊ ဘယ်သူဘယ်ဝါ ခံစားတင်ပြသည်) စသည်ဖြင့်ပြောကြတယ်။ ကျွန်တော်တို့ဆီမှာလည်း (ခံစားတင်ပြသည်၊ ဘယ်သူခံစား ခြယ်မှုန်းသည်) လို့ လုပ်နေကြတုန်းပဲ။ ဒီဝတ္ထုဖတ်ရတာ၊ ဒီရုပ်ရှင်ကြည့်ရတာ (သိပ် ခံစားရတာပ်) လို့လည်း ပြော တက်ကြတယ်။ ဒါကြောင့် ရိုတန်တစ်ဝါဒ / ROMANTICISM ဟာကျွန်တော်တို့ဆီမှာ ရှိနေတုန်း (လူကြိုက်များနေတုန်း) ပဲလို့ ပြောရင် ရသေးကြောင်း တင်ပြခဲ့ပါတယ်။