ဇေယျာလင်း - ဇေယျာလင်းလက်ရွေးစင်

ပြင်ပအသွင်အပြင်များကိုတင်ပြရုံသက်သက်

ခုတင်တစ်လုံး

သစ်သားခုတင်တစ်လုံး

 သစ်သားနှစ်ယောက်အိပ် ခုတင်တစ်လုံး

 နှစ်လက်မထူ မွေ့ရာ

စောင်နှစ်ထည် တစ်ထည်သပ်သပ်ရပ်ရပ် ခေါက်သိမ်း

တစ်ထည် ဖရိုဖရဲ ကစဉ့်ကလျား

ခေါင်းအုံးသုံးလုံး နှစ်လုံးဆင့် ညာဘက်

ဘယ်ဘက်မှာ တစ်လုံးတည်း အိပ်ရာ မပေါ်

ခြင်ထောင် အမိုးပေါ် ဘေးသားတွေ ပစ်တင်ထား

လူယောက်ျားတစ်ယောက်

ခုတင်ပေါ် လှဲပြီး ဗလာစာအုပ်ထဲ

စာတွေရေးနေတယ်

ဘယ်ဘက်က ကွက်လပ်ကိုကြည့်လိုက်

စာတွေရေးလိုက် ကြည့်လိုက်

လမ်းမကြီးပေါ်က ဘတ်(စ)ကားသံတွေ

ကားဟွန်းသံတွေ အော်သံတွေ အိပ်ခန်းထဲ ဝင်ဝင်လာပြီး

ထွက်ထွက်သွားတယ်

ထမင်း ဟင်းချက်သံ အိုးခွက် ပန်းကန်ဆေးသံ

 တိတ်ဆိတ်

အဲဒီ တိတ်ဆိတ်သံကို သူနားစွင့်နေတယ်

ဒီကဗျာထဲမှာ သူထည့်ရေးတယ်

သူ့ကိုသူ မပါတာ သူထည့်ရေးတယ်... ။

 

 

၄၅သန်းတန်ယုံကြည်မှု

ဘုရားသခင်ရဲ့ ကွန်မြူနစ်တိုင်းပြည်မှာ

လယ်သမားတွေ ( ) ခရစ်တော်ကို

ပြန်လည်တပ်ဆင်နေကြတယ်

လယ်သမားသုံးယောက် အင်္ကျီကျွတ်တွေနဲ့

လန်ကွတ်တီပဲပတ်ထားတဲ့ ခရစ်တော်

ရုပ်တုဟာ ဒူးညွတ်ကွေးပြီး တစ်ယောက်ကိုမှီ

တစ်ယောက်က ဘယ်ဘက်ပခုံးငုတ်ထဲ

ဘယ်ဘက်လက်တံကို လူလိုထိုးသွင်း

တတိယလူဟာ တိုက်အိုထဲက ထွက်လာတယ်

ခရစ်တော်ရဲ့ ညာဘက်လက်တစ်ဖက်လုံး

 ပခုံးမှာ မြင့်မြတ်စွာထမ်းလို့

ယနေ့တရုတ်ပြည်တွင် ခရစ်ယာန်ဘာသာဝင်

၄၅ သန်းထက်မနည်း ရှိကြောင်း သတင်းထုတ်ပြန်

 Newsweek မေ၊ ၁၆၊ ၂၀၁၄

တိုင်းပြည်စီးပွားရေး ဦးမော့လာတာနဲ့အမျှ

ဒီအနောက်တိုင်း ဘုရားသခင်ဝါဒ

 (ဥရောပကို ခြောက်လှန့်ခဲ့တဲ့ တစ္ဆေကြီး)

မြေအောက်ဝတ်ပြုကျောင်းတွေထဲက

နေ့အလင်းရောင်ထဲ စမ်းသပ်ထွက်ခွင့်ရ

 

ရာစုနှစ်များစွာ သွေးစွန်းဆူးခက်သရဖူနဲ့

 ဘုရားဝိညာဉ်ပူးသားတော်ဟာ လူဖြစ်မှုဝေဒနာနဲ့

ဦးခေါင်းညာဘက် လည်လိပ်ဇက်ကျိုးလို့

အလုပ်ကြမ်းနဲ့ ပညာပေးစခန်းကများ

ပြန်ရောက်ရှိလာသလား အောက်မေ့ရ

(အောက်မေ့ဖွယ်ခန်းမမှာ) လက်ဝါးကပ်တိုင်ပေါ် ပြန်တင်ဖို့)

 

သိုးမည်းတွေရှာဖွေဖို့

ဝိညာဉ်တွေကယ်တင်ဖို့

ဘုရားသခင်ရဲ့ အာဏာနီ

 နှုတ်ထွက်စကား ကမ္ဘာအနှံ့ဖြန့်ဖို့

အဖဘုရားသခင်

ယုံကြည်သူများရဲ့ ကယ်တင်ရှင်

 တနင်္ဂနွေဟာ အရှင့်အတွက်

ကျန်ခြောက်ရက်ဟာ ပြည်သူနဲ့ ပါတီအတွက်

 ဘုရားသခင်ရဲ့ လက်ဝါးကပ်တိုင်းပြည်

ရှေ့ဆက်လှမ်းကြ ခရစ်ယာန်စစ်သည်

ပြည်သူ့တရုတ်ပြည်ရဲ့ ပစ္စည်းမဲ့ရောင်နီ။ ။

၁၁-ဇွန်လ-၂၀၀၅

 

အာဖဂန်နစ္စတန်

ဝတ်ပြုချိန်ဟာ လူမရွေးဘူး

ဗလီထဲနေရာမဆံ့တော့လို့

လမ်းပေါ်ဆင်းဝတ်ပြုကြတယ်

အို. . . စင်ကြယ်မှုကို ယုံကြည်သော

တံစဉ်ကောက်ကောက်

 နှာခေါင်းကောက်ကောက်တွေနဲ့

တစ်ပါးတည်း နေရောင်အောက်မှာ

 ဂျုံခင်းတွေကို ရာဇာဝင်လို

ရိတ်သိမ်းကြတယ် တောင်တန်းတွေရဲ့ ဟိုဘက်မှာ

မိုးခြိမ်းသံထွက်ပြေးတဲ့

အမြောက်သံ ပေါက်ကွဲသံတွေ

လမ်းဘေးဆံသဆိုင်မှာ

ဆံပင်တွေညှပ်ကြ

မုတ်ဆိတ်တွေသကြ

စစ်ဝင်ခိုနေတဲ့

 ဆေးရုံအိုမှာ

အနာဂတ်ပါ ပြတ်လပ်နေတဲ့

ခြေပြတ်လက်ပြတ်တွေ

ကြောက်မက်ဖွယ်ရာထဲ

ရုပ်ကြွင်းဖြစ်သွားကြတဲ့

ကာလစားကလေးတွေ

 

မရှိတဲ့ ထိုးဆေးထဲမှာ

 ယုံကြည်ချက်မရှိ

မရှိတဲ့သောက်ဆေးထဲမှာ

မျှော်လင့်ချက်မရှိ

 ပိုလို့တောင်မရှိတဲ့'ဒရစ်”ပိုက်ထဲမှာ

 အမှန်တရား ပိုလို့တောင်မရှိ

 

ဟော... ဟိုဘက်မှာခုတင်က

တစ်ယောက်လည်း အလားတူ

 စစ်က သူ့ကို အပြီးအပိုင်

ပြေငြိမ်းခွင့်ပေးလိုက်ပြီ

ဘဝက ပြောတယ်

ကြိုက်ဈေးရရင်

စစ်ပွဲတစ်ပွဲ ရောင်းရန်ရှိတယ်

ကန်တော့ပါရဲ့

အိမ်ရှင်တွေ စစ်သွားတိုက်နေကြတယ်

အလောင်းတွေ ပေါပေါလောလော

မျောခဲ့တဲ့ မြစ်ထဲမှာ

ချာတိတ်တွေ ရေဆင်းကူးကြတယ်

ရေထဲမြုပ်နေတဲ့

တင့်ကားခေါင်မိုးပေါ်ကနေ

ဒိုင်ဗင်ထိုးဆင်းကြတယ်

ရယ်မောသံကလွဲလို့

ဆေးကြောလို့ မရတော့တဲ့ စီးဆင်းခြင်း • • • • ။    ။

                                         ချယ်ရီမဂ္ဂဇင်း