စာရင်းပညာရှင်တစ်ဦး - စာရင်းကိုင်လောကမှပြဿနာများ

၁။ (၁)ဘဏ်တိုးကို ကုန်ထုတ်လုပ်မှုစာရင်းမှာ ထည့်မလား     

      

          ဆရာရှင့်..

         ကျွန်မက လက်ထောက်စာရင်းကိုင်တစ်ယောက်ပါ။ ကျွန်မအထက်မှာ စာရင်း ကိုင်တစ်ယောက်ရှိပါသေးတယ်။ ကျွန်မတို့ စာရင်းဆွဲရတဲ့လုပ်ငန်းက ကုန်ထုတ်လုပ် မှုလုပ်ငန်း တစ်ခုပါ။ ကျွန်မတို့ လုပ်ငန်းက စက်ရုံတည်တာနဲ့ စက်တွေဝယ်တာမှာ ဘဏ်ကချေးငွေ တော်တော်များများ ရယူထားတာရှိလို့ လစဉ် ဘဏ်ကိုအတိုးပေးရ ပါတယ်။ 

          ဘဏ်တိုးကို ကျွန်မက ဘဏ္ဍာရေးစရိတ်လို့ သတ်မှတ်ပြီးတော့ အရှုံးအမြတ် စာရင်းဆွဲမှ စီမံခန့်ခွဲရေးစရိတ်တွေအောက်မှာ ပေါင်းပြီးပြပါတယ်။ အဲဒါကို ကျွန်မ အထက်စာရင်းကိုင်က ကုန်ထုတ်လုပ်မှု စာရင်းထဲ ထည့်ဆွဲရမယ်လို့ ဆိုပါတယ်။

          ထုတ်လုပ်မှုစာရင်းမှာ စက်ရုံဝန်ဆောင်စရိတ်ပဲ ထည့်ရမယ်လို့ နားလည်ထား ပါတယ်။ စက်ရုံဝန်ဆောင်စရိတ်ထဲမှာ ဘဏ်ချေးငွေပေါ် အတိုးကို ထည့်ဆွဲတာ မှန်ပါ သလား။

                                                                                                                                     မမွှေးမွှေး 

                                                                                                                                 (ဆပ်ပြာစက်ရုံ)

 

          ဘဏ်ချေးငွေပေါ်အတိုးကို ထုတ်လုပ်မှုစရိတ်ထဲထည့်ရင် စက်ရုံထွက် (၂) တစ်ယူနစ်တန်ဖိုးမှာတိုးပြီး ကုန်လက်ကျန်တန်ဖိုးမှာ များနေပါ လိမ့်မယ်။ကုန်ထုတ်လုပ်မှုစာရင်းဆွဲရတဲ့ ရည်ရွယ်ချက်ကပစ္စည်းတစ်ခု ထုတ် လုပ်ပြီး ရောင်းလိုက်ရင် ဘယ်လောက်တွက်ချေကိုက်သလဲသိဖို့၊ ပထမထုတ်လုပ်မှု တန်ဖိုး ဘယ်လောက်လဲ၊ ငါထုတ်လုပ်တဲ့ ပစ္စည်းတန်ဖိုးကဈေးကွက်မှာ သူများပစ္စည်းထက် ဈေးပိုသလား၊ ဈေးချိုသလား စသည်ဖြင့် ထုတ်လုပ်ခြင်းလုပ်ငန်းကို လုပ်သင့် မလုပ်သင့် သိရအောင် ဆွဲပြကြရတာပါ။

          ဘဏ်တိုးကို ထုတ်လုပ်မှုတန်ဖိုးထဲမှာထည့်တော့ ကိုယ်ထုတ်လုပ်တဲ့ပစ္စည်းက ဒီလောက်တန်ဖိုးရှိတယ်လို့ တစ်ခါတည်းသိနိုင်တော့လုပ်ငန်းကို စီမံခန့်ခွဲတဲ့နေရာမှာ ပိုပြီးလွယ်ကူ အဆင်ပြေစွာ ဆုံးဖြတ်နိုင်တာပေါ့။ တချို့က ဘဏ်ချေးငွေရယူမထားပေမယ့် စီမံခန့်ခွဲ ရေးရှုထောင့်ကကြည့်ပြီး မိမိရင်းနှီးငွေရဲ့ လက်ရှိ ပေါက်ဈေးနဲ့ ရသင့်ရထိုက်တဲ့ အတိုး ငွေကိုပါ ထည့်သွင်း(လျာထား)ပြီး ထုတ်လုပ်မှုစရိတ်မှာ ထည့်တတ်ကြပါတယ်။

          စာရင်းသဘောမှာ စာရင်းသီဝရီအပြင် လုပ်ငန်းရဲ့ အုပ်ချုပ်မှုအဖြစ်ကိုပါ ထည့်သွင်း စဉ်းစားတာကြောင့် မှန်ပါတယ်။ ဒါကြောင့် ခုကိစ္စမှာလည်း ဘဏ်တိုးကို ကုန်ထုတ်လုပ်မှု ထဲ ထည့်ဆွဲတာ မမှားပါဘူးလို့ ဆိုနိုင်ပါတယ်။

 

စကားချပ်

          ဤအဖြေနောက်တွင် ဤစကားဝိုင်းသို့ ပါဝင်ဆွေးနွေးတင်ပြလာသည့် စာရင်းပညာ ရှင်များ၏ ဆွေးနွေးချက်များနှင့် စာရင်းပညာရှင် တစ်ဦး၏ ပြန်လည်ဆွေးနွေးချက်ကို စာဖတ်သူများအတွက် အကျိုးရှိမည်ဟုယူဆ၍ တဆက်တည်းဖော်ပြအပ်ပါသည်။

 

စာရင်းချစ်သူတစ်ဦး၏ ဆွေးနွေးချက် 

          ကျွန်တော်က Account Care ဂျာနယ် စထွက်ကတည်းက ရှားရှားပါးပါး စာရင်းနဲ့ ပတ်သက်တဲ့ ဂျာနယ်တစ်စောင်ဆိုပြီး ဝမ်းသာ အားရဖတ်ပါတယ်။ သူငယ်ချင်း စာရင်းသမားတွေကိုလည်း လက်တို့ပြီး စာရင်းဂျာနယ်တစ်စောင် ထွက်လာတဲ့အကြောင်းပြောပါတယ်။ ကျွန်တော့်အနေနဲ့ပြောရရင် ဆရာ့ဆရာကြီးများရဲ့ အတ္ထုပ္ပတ္တိ ကဏ္ဍတွေ၊ ဆရာကြီး ဦးမော်သန်းရဲ့ ကော်ပိုရိတ်အုပ်ချုပ်ရေးဆိုတဲ့ ရှားပါးဆောင်းပါးတွေဟာ ကျွန်တော့်အကြိုက်ကဏ္ဍတွေပါ။ ပိုကြိုက်တဲ့ကဏ္ဍလေးကတော့ မေးကြ-ကြကဏ္ဍပါ။ စာရင်းသမား နောင်လာနောက်သားတွေ အတွက် မေးချင်ရာမေးခွင့်ရတဲ့ ကဏ္ဍဖြစ်လို့ တော်တော် သဘော ကျပါတယ်။ ဒါပေမဲ့ အတွဲ(၁)၊ အမှတ် (၁)မှာပါတဲ့ မေးကြ-ဖြေကြ ကဏ္ဍကိုဖတ်ပြီး ဘဝင်မကျမိတဲ့ အကြောင်းတစ်ခု ပေါ်လာပါ တယ်။ .....မြို့၊ ဆပ်ပြာစက်ရုံက မမွှေးမွှေး ရဲ့မေးခွန်းကိစ္စပါ ဆရာ ခင်ဗျား။

          မမွှေးမွှေးက သူတို့ရုံးမှာ သူ့အထက်က Chief Accountant က ဘဏ်တိုးကို ကုန်ထုတ်လုပ်စာရင်းဆွဲတဲ့အခါ စက်ရုံဝန်ဆောင် စရိတ်ထဲ ထည့်ဆွဲတာကို သိပ်သဘော တွေ့ဟန်မတူလို့ သူက Assistant ဆိုတော့ Chief ကို မလွန်ဆန်ရဲလို့ ဆရာ့ထံ မေးလိုက်တာပါ။ သူ့မေးခွန်းမှာကတည်းက ဘဏ်တိုးဖြစ်ပါလျက် စက်ရုံဝန်ဆောင် စရိတ်ထဲ ထည့်ဆွဲတာကို ရှင်းရှင်းလင်းလင်းနားလည်သဘောမပေါက်လို့ ဆရာ့ ထံမေးတဲ့ပုံပေါ်ပါတယ်။ ဒါကို ဆရာက ပြန်လည်ဖြေကြားရာမှာ ဒီလိုရေးထားတာ တွေ့ရပါတယ်။ 

           ဘဏ်တိုးကို ထုတ်လုပ်မှုတန်ဖိုးထဲမှာ ထည့်တော့ ကိုယ်ထုတ် လုပ်တဲ့ ပစ္စည်းက ဒီ လောက်တန်ဖိုးရှိတယ်လို့ တစ်ခါတည်းသိနိုင်တော့ လုပ်ငန်းကို စီမံခန့်ခွဲတဲ့နေရာမှာ ပိုပြီး လွယ်ကူ အဆင်ပြေစွာ ဆုံးဖြတ်နိုင်တာပေါ့။

          ဒါကြောင့် ခုကိစ္စမှာလည်း ဘဏ်တိုးကို ကုန်ထုတ်လုပ်မှုထဲ ထည့်ဆွဲတာ မမှားပါ ဘူးလို့ ဆိုနိုင်ပါတယ်။

          ကျွန်တော်က မမွှေးမွှေးနဲ့ သဘောချင်းတူပါတယ်ဆရာ ခင်ဗျား။ ဘဏ်တိုးကို စက် ရုံဝန်ဆောင်စရိတ်ထဲ ထည့်ဆွဲတာကို ဘယ်လိုမှသဘောမပေါက်ဘူး ဖြစ်နေပါတယ်။ လက်ခံ လို့လည်းမရပါဘူး။

          ကျွန်တော် ခုလိုရေးတာ စိတ်မရှိပါနဲ့ ဆရာ။ ဆရာ့ကို ကျွန်တော် မမြင်ဖူးပါဘူး။ ပညာအရရော စေတနာအရပါ ဆရာ့ကို ကျွန်တော်လေးစားပါတယ်။ Account Care ဂျာနယ်မှာဆရာ့လို ပုဂ္ဂိုလ် တစ်ယောက်ရှိခြင်းဟာ စာရင်းသမားတွေအတွက် တော်တော် အကျိုးရှိနိုင်တယ်လို့ နားလည်ထားပါတယ်။   ခုကိစ္စမှာ ကျွန်တော်က အထွန့်တက်ပြီး ဆရာ့ကို စော်ကားတာမျိုး လုံးဝမဟုတ်တာတော့ ဝန်ခံပါရစေ ဆရာ။

          ကျွန်တော်နားလည်ထားတဲ့ ကုန်ထုတ်လုပ်စာရင်းဆိုတာ ကုန် ထုတ်လုပ်ငန်း တစ်ခုမှာ ထုတ်လုပ်ကုန်စည်တစ်ခုရဲ့ တစ်ယူနစ်တန်ဖိုး (Unit Cost) ကိုဖြစ်စေ၊ စုစုပေါင်းထုတ်လုပ်မှု တန်ဖိုး(Cost of Porduction) ကိုဖြစ်စေ သိဖို့ ဆွဲကြတာပါ။ ကိုယ်ထုတ်လုပ်တဲ့ ကုန်စည်တစ်ခုရဲ့ တန်ဖိုးက ဈေးကွက်မှာ သူများပစ္စည်းတွေနဲ့ ယှဉ်ရင် နည်းသလား၊ များသလားဆိုတာ လုပ်ငန်းရှင်တိုင်းက အဓိက သိချင်ကြပါတယ်။ ထုတ်လုပ်တဲ့ပစ္စည်းဈေးက ဈေးကွက်ပေါက် ဈေးထက် များနေရင် ဘယ်သူက ပင်ပန်းခံပြီး ထုတ်နေတော့မလဲ ခင်ဗျာ။ လွယ်လွယ်ရတဲ့ ဈေးကွက်မှာ ဝယ်ယူလိုက်ရုံပဲ ရှိတာပေါ့။

          နောက်တစ်ခုက ကုန်ထုတ်လုပ်မှုစာရင်း မှာ စာရင်းသမားတိုင်း နားလည်ထားတဲ့ အချက်က အဓိက ကုန်ကျစရိတ်(Prime Cost) ရယ်၊ ထုတ်လုပ်မှုဝန်ဆောင်စရိတ် (Factory Overhead) တွေကို ဘာ့ကြောင့် ထုတ်လုပ်မှုတန်ဖိုးထဲ ထည့်ဆွဲရသလဲဆိုတော့ ဒီထုတ်လုပ်မှုလုပ်ငန်းဟာ ဘယ်လိုစရိတ်မျိုးတွေရှိသလဲ။ ဘယ် စရိတ်တွေက မရှိမဖြစ် အဓိကအကျဆုံးလဲ။ ဒီလိုထုတ်လုပ်မှုလုပ်ရင် ဘယ်လိုဝန်ဆောင်စရိတ်တွေ ကုန်နိုင်သလဲ ဆိုတဲ့ အချက်တွေကို စာရင်းသမားတွေကြည့်ရုံနဲ့သိအောင်၊ ပြီးတော့ ထုတ်ကုန်လုပ်ငန်းကို ရင်းနှီးမြှုပ်နှံသူတွေက စာရင်းကိုမြင်ရုံနဲ့ သဘောပေါက်အောင် ဖော်ပြကြတာလို့ နားလည်ပါတယ်။

          တစ်နည်းအားဖြင့် Production ပိုင်းက ကုန်ကျသမျှကိုသာ မီးမောင်းထိုးပြချင်လို့ ကုန် ထုတ်လုပ်မှုစာရင်း ( Manufacturing A/C ) ကို ဆွဲကြရတာပါ။

 

ဆရာခင်ဗျား...

          ဘဏ်တိုးဆိုတာက ကိုယ့်ဘာသာ ငွေလိုအပ်လို့ ဘဏ်ကသွား ချေးမှ အတိုးပေးရတဲ့ စရိတ်ပါ။ ကုန်ထုတ်လုပ်ငန်းနဲ့ ဘာမှမပတ်သက်တာ စာရင်းသမားတိုင်း နားလည်ကြ ပါတယ်။ တစ်နည်းအားဖြင့်ပြောရင် ဘဏ္ဍာရေးစရိတ် (Financial Expense) လို့ ပြောလို့ရ ပါတယ်။

          စောစောက ကျွန်တော်ပြောခဲ့တဲ့ ထုတ်ကုန်ပစ္စည်းတစ်ခုရဲ့ တစ်ယူနစ်ကုန်ကျတန်ဖိုး နဲ့ စုစုပေါင်းထုတ်လုပ်မှု ကုန်ကျတန်ဖိုးတွေမှာ ဘဏ်တိုးကို ထည့်မဆွဲမှသာ တကယ် ကုန်ထုတ်လုပ်မှုရဲ့စရိတ် ကုန်ကျမှုကို စာရင်းအတိုင်း နားလည်နိုင်ပါလိမ့်မယ်လို့ ကျွန်တော် သဘောပေါက်ထားပါတယ်။

 

ဆရာစာရင်းပညာရှင်ခင်ဗျား...

          ကျွန်တော် ခုလို စာရေးရတာဟာ ဆရာ့ ရဲ့ ဆရာဂုဏ်၊ သမား ဂုဏ်ကို မလေးစားလို့ မဟုတ်ပါဘူး။ လူတတ်ကြီးလုပ်ပြီး ဆရာ့ကို ဆင်ခြေဆင်လက် ထူချင်လို့လည်း မဟုတ်ပါ ဘူး။ ဒါပေမဲ့ စာရင်းနဲ့ ပတ်သက်တဲ့ ကျောင်းသူ ကျောင်းသားတွေ၊ စာရင်းကိုင်တွေအတွက် ဆရာ့မှာ အခြားအဖြေတစ်ခုခုများ ရှိနေမလားလို့ပါ ဆရာခင်ဗျား။

 

မောင်ကျောက်တိုင် (ဝါးတရာ)၏ဆွေးနွေးချက်

အယ်ဒီတာခင်ဗျား...

          Account Care ဂျာနယ် အတွဲ-၁၊ အမှတ်-၅ ပါ စာဖတ်သူအမြင် ကဏ္ဍ၌ စာရင်းချစ်သူတစ်ဦးက စာရင်းပညာရှင်တစ်ဦးထံ အိတ်ဖွင့်ပေးစာရေး၍ ဆွေးနွေး ထားချက်ကို ဖတ်ရသည့်အခါ ကျွန်တော်လည်း ယင်းကိစ္စအပေါ် ဝင်ရောက်ဆွေးနွေး ချင်ပါသဖြင့် ကျွန်တော့်ကို ဆွေးနွေးခွင့်ပြုပါရန် ခွင့်ပန်ပါရစေ။

          ကျွန်တော် ပထမဆုံး ဆွေးနွေးချင်သောအချက်မှာ ဘဏ်ချေး ငွေပေါ်အတိုးသည်စာရင်းရေးဆွဲရသည့် သဘာဝအရ မည်သည့် စာရင်းခေါင်းစဉ်အောက်မှ ကျခံရမည် ဆိုသော အချက်ဖြစ်ပါသည်။ ဘဏ်ချေးငွေပေါ်အတိုးဟုဆိုသည့် အမည်နှင့်လိုက်အောင် ပင် ဘဏ်မှ ငွေချေးရသောကြောင့် အတိုးပေးရသည့်အတွက် ဖြစ်ပေါ်လာသော စရိတ်ဖြစ် ပါသည်။ မူလအခြေခံသဘောအရ ဘဏ်ချေးငွေပေါ် အတိုးမှာ ဘဏ္ဍာရေးစရိတ် သက်သက်ဖြစ်ပါသည်။ Financial Expense ဟုပြောသော စာရင်းချစ်သူတစ်ဦး နှင့် အယူအဆတူပါသည်။ ဤအချက်ကို ကန့်ကွက်ရန်မရှိပါ။

          ဆွေးနွေးချင်သောအချက်မှာ ဘဏ်ချေးငွေပေါ်အတိုး ဖြစ်ပေါ် လာသောအကြောင်း ဖြစ်ပါသည်။ အရှင်းဆုံးအဖြေမှာ ဘဏ်မှချေးငွေရယူထားသဖြင့် အတိုးပေးရခြင်း ဖြစ်ပါသည်။ ဘဏ်မှ ချေးငွေရယူထားခြင်း အကြောင်းမှာ ဘဏ္ဍာငွေမလုံလောက်သောကြောင့်ဟု လွယ်လွယ်ပြောနိုင် ပါသည်။ဘဏ္ဍာငွေမလုံလောက်ခြင်း၏ကိစ္စမှာ အကြောင်း များစွာ ရှိနိုင်ပါသည်။ ယခုကိစ္စ၌ ထုတ်လုပ်မှုလုပ်ငန်းအတွက် အမှန်ပင် ဘဏ္ဍာငွေ မလုံလောက်ခြင်းကြောင့် ဘဏ်ချေးငွေရယူထားခြင်းလား၊ အခြားလုပ်ငန်း တိုးချဲ့

ဆောင်ရွက်မှုကိစ္စများအတွက် ကုန်ကျခံရန် ဘဏ်ချေးငွေရယူထားခြင်းလားဟူ၍ စဉ်းစား ရန်ရှိပါသည်။ ဤကိစ္စကို ရှင်းလင်းစွာဖော်ပြမထားပါ။

          ရင်းနှီးငွေထည့်ဝင်မှုကိစ္စတိုင်း၌ ရင်းနှီးမြှုပ်နှံသူများဘက်က ရင်းနှီးငွေပေါ် ပြန်ရချက်ကို စဉ်းစားရာတွင် ထိုက်သင့်သော အတိုးနှုန်းဖြင့် ရရှိမည့်အတိုးငွေကို ခန့်မှန်းတွက်ချက်တတ်ပါသည်။ ထုတ်လုပ်မှု လုပ်ငန်းအတွက် ထုတ်လုပ်မှုစရိတ်ကို စဉ်းစား ရာတွင် ယင်းထုတ်လုပ်မှုအတွက် အမှန်လိုအပ်၍ ကုန်ကျသော ငွေကြေးပမာဏသည် လုပ်ငန်းအတွက် လိုအပ်သောရင်းနှီးငွေ ဖြစ်ပါသည်။ ယင်းအမှန်လိုအပ်သော ရင်းနှီးငွေ အတွက် ပြန်ရသောအတိုးငွေသည် ထုတ်လုပ်မှုလုပ်ငန်းတိုင်းအတွက် မရှိမဖြစ် ပါဝင်သင့် သော ဝန်ဆောင်စရိတ်တစ်မျိုး ဖြစ်ပါသည်။ 

          စာရင်းချစ်သူတစ်ဦး ပြောသကဲ့သို့ပင် “ကျွန်တော်နားလည်တဲ့ ကုန်ထုတ်လုပ်စာရင်း ဆိုတာ ကုန်ထုတ်လုပ်ငန်းတစ်ခုမှာ ထုတ်လုပ်ကုန် တစ်ခုရဲ့ တစ်ယူနစ်တန်ဖိုး(Unit Cost) ကိုဖြစ်စေ၊ စုစုပေါင်း ထုတ်လုပ်မှု တန်ဖိုး (Cost of Production) ကိုဖြစ်စေ သိဖို့ဆွဲကြ တာပါ။ ကိုယ်ထုတ် လုပ်တဲ့ ကုန်စည်တစ်ခုရဲ့ တန်ဖိုးက ဈေးကွက်မှာ သူများပစ္စည်းတွေနဲ့ ယှဉ်ရင် နည်းသလား၊ များသလားဆိုတာ လုပ်ငန်းရှင်တိုင်းက အဓိကသိချင်ကြပါ တယ်” ဟူသော စကား၌ပင် ဈေးကွက်မှာ သူများပစ္စည်းတွေ နဲ့ယှဉ်ရင်ဟူသောအချက်ကို လက်ခံ ထားသည့်သဘောပေါ်လွင်နေပါသည်။

           မိမိထုတ်လုပ်သည့် ကုန်စည်ကို သူများကုန်စည်နှင့် ယှဉ်ကြည့်မည်ဆိုပါက ရင်းနှီးငွေအတိုးကို ထည့်သွင်းစဉ်းစားခြင်းသည်လည်း ပဓာန ကျနေပါသည်။ ယနေ့ခေတ်၌ အရင်းနည်းနည်းဖြင့် ထုတ်လုပ်သောပစ္စည်း နှင့် အရင်းများများဖြင့် ထုတ်လုပ်လုပ်သော ပစ္စည်းချင်း အရည်အသွေးတူ သည်ဆိုလျှင် အရင်းများများထည့်သူက ရှုံးပေလိမ့်မည်။

          ဥပမာ-၈ သိန်းခန့်ကုန်ကျသော စက်ဖြင့်ထုတ်လုပ်သူတစ်ဦး၏ ကုန်ထုတ်လုပ်ငန်းကို အခြားတစ်ဦးက ၁၈ သိန်းဖြင့် ကုန်ကျပြီးမှ အရည်အသွေးအားဖြင့် ခြားနားမှုမရှိသော ကုန်စည်တစ်ရပ်ကို ထုတ်လုပ်ရောင်းချသည်ဆိုလျှင် ၈ သိန်းသမားက အရင်းကြေ ကာလတိုပြီး အကျိုးအမြတ် များနိုင်ပါသည်ကို စဉ်းစားသင့်ပါသည်။

          ထို့ကြောင့် ကျွန်တော်ဆွေးနွေးချင်သောအချက်မှာ ကုန်ထုတ်လုပ်ငန်းတစ်ခု၏ စွမ်းဆောင်ရည်(efficiency) ကို စဉ်းစားရာတွင် ရင်းနှီးငွေ မည်မျှကျခံထားရသည် ဆိုသော အချက်ကလည်း အရေးကြီး သည့်အတွက် ရင်းနှီးငွေနှင့် ရင်းနှီးငွေရယူခြင်းကြောင့် ဖြစ်ပေါ်လာ သော အတိုးငွေကို ထည့်သွင်းစဉ်းစားခြင်းသည် တကယ့်တန်ဖိုး အမှန်ဟုသာ ဆုံးဖြတ်ချင်ပါ သည်။

          ယခုကိစ္စ၌ မူလပြဿနာအစတွင် ဘဏ်တိုးကို ကုန်ထုတ်လုပ်စာရင်းပါ စက်ရုံ ဝန်ဆောင်စရိတ်ထဲ ထည့်ဆွဲသင့်မသင့် ဆွေးနွေးကြသည့် အချက်ဖြစ်ပါသည်။ ကျွန်တော် သဘောကျသောအဖြေမှာ ဤဘဏ်ချေးငွေသည် အမှန်ပင် ဤကုန်ထုတ်လုပ်ငန်းအတွက် မရှိမဖြစ်လိုအပ်သော ငွေကြေးပမာဏဖြစ်သည်ဆိုပါက၊ တစ်နည်းအားဖြင့် ရင်းနှီးငွေ စိုက်ကုက် မှုသဘာဝနှင့် တူပါသည်။ ရင်းနှီးငွေပေါ် တွင် ထိုက်သင့်သော အတိုးပေးသင့် သည့် အမြင်အရ ရင်းနှီးငွေပေါ် အတိုးကို ထည့်သွင်းမှသာ ထုတ်လုပ်ကုန်စည်၏ တန်ဖိုး အမှန်ကို ဖော်ပြရာရောက်သဖြင့် ဘဏ္ဍာရေးရှုထောင့် မှကြည့်လျှင် ထည့်သွင်းသင့်သည်ဟု အဆိုပြုချင်ပါသည်။

          သို့သော် ရင်းနှီးငွေရယူမှုသည် ဤကုန်ထုတ်လုပ်မှုလုပ်ငန်း၏ မရှိမဖြစ်(Essential) အနေအထားမျိုးမဟုတ်ဘဲ ဤလုပ်ငန်းအပါ အဝင် အခြားအခြားသော ကိစ္စရပ်များ အတွက်ပါ ချေးငှားရသည့်ကိစ္စ ဖြစ်ပါမူ စက်ရုံဝန်ဆောင်စရိတ်တွင် ထည့်သွင်းခြင်းထက် ဘဏ္ဍာရေး စရိတ်အနေ ဖြင့်သာ ဖော်ပြသင့်သည်ဟု ထပ်မံအဆိုပြုချင်ပါသည်။ ကျွန်တော့် အား ပါဝင်ဆွေးနွေးခွင့်ပြုသည့်အတွက် ကျေးဇူးတင်ပါသည်။