ခက်သီ - တောင်ကြားမြစ်

တောင်ကြားဖြစ်

မင်းမှာလည်း အခက်အခဲနဲ့

ငါ့မှာလည်း အခက်အခဲနဲ့။

ငါတို့နှစ်ယောက်ပေါင်းတော့လည်း

 အခက်အခဲနဲ့။

အတူရင်ဆိုင်ရမယ့်အခက်အခဲဆိုတော့

ပျော်တာပေါ့။ ။

          တောင်ကြားဖြစ် ၂

ကဗျာရေးတတ်တာလေးနဲ့တော့

ဘဝင်မမြင့်ပါနဲ့ကွာ။

အာဏာရသွားရုံလေးနဲ့တော့

ဘဝင်မမြင့်ပါနဲ့ကွာ။

ရွှေကြောကို ဖင်ခုထိုင်ထားလို့လည်း

ဘဝင်မမြင့်ပါနဲ့ကွာ။

မင်းဘဝင်မြင့်နေချိန်မှာ

လူ့ဘဝရဲ့အရသာကို ဆုံးရှုံးရတော့မှာ။ ။

တောင်ကြားမြစ် ၃

မင်းနားထောင်တဲ့ သီချင်းထဲမှာ

မြစ်ပြင်ထက်က လရောင်

ငါနားထောင်လိုက်တော့

ပင်လယ်ထဲကကျောက်ဆောင်။

မင်းရဲ့ရက်ဆီဗာနဲ့

ငါရဲ့ ရက်ဆီဗာ မတူဘူး။

ဒါပေမဲ့

ငါတို့ ပြိုင်တူညည်းမိကြ

ဒီသီချင်းပဲ။

တောင်ကြားဖြစ် ၄

မောပန်းနွမ်းနယ်တဲ့အခါ

ဘုရားသွားအပန်းဖြေရတာ

ငါကြိုက်မိ။

ညည ဘုရားရှိခိုးမအိပ်မိတာ တသက်လုံးနီးပါး

ဒါပေမဲ့ ငါက ဘုရားကို ရိုသေတယ်။

ဘုရားတိုင်းကိုလည်း ရိုသေတယ်

ငါ့ဘုရားက ဘယ်ဘုရားကိုမှ မုန်းအောင် မဟောခဲ့ဘူး။

တောင်ကြားဖြစ် ၅

ဒါလေးက ဘာမှမဟုတ်ဘူး

ဟုတ်တယ် ဘာမှမဟုတ်ဘူး။

ရှူသွင်းပြီး မှုတ်ထုတ်လိုက်သလိုပဲ

ဘာမှ မဟုတ်ခဲ့ဘူး။

ဘာမှမဟုတ်မှန်း ခက်ခက်ခဲခဲ သိခဲ့ရလို့

အဲ့ဒီ ဘာမှမဟုတ်တာလေးကို

ငါ မြတ်မြတ်နိုးနိုးလေးနက်နေခဲ့မိ။ ။