ဦးလှမင်း - ပေါင်းသင်းဆက်ဆံမှုစွမ်းရည်

အခန်း - ၁

အောင်မြင်မှုရဖို့အတွက် ပေါင်းသင်းဆက်ဆံမှုစွမ်းရည်ဟာ

ဘာကြောင့် အရေးကြီးသလဲ

ပေါင်းသင်းဆက်ဆံမှုစွမ်းရည်ဟာ အသင်းအဖွဲ့ တစ်ခုမှာ ပါဝင်တဲ့ အဖွဲ့သားတွေကို တစ်ယောက်နဲ့တစ်ယောက် ရင်းနှီးမှုခိုင်မြဲအောင် ကပ်ပေးတဲ့ “ကော်” ဖြစ်ပါတယ်။

၁၉၆၀ ပြည့်နှစ်တွေရဲ့ စောစောပိုင်း ကာလမှာ နိုင်ငံရေးလုပ်ဖို့ က အထုံဝါသနာပါတဲ့ လူငယ်တစ်ယောက်ဖြစ်တဲ့ မိုက်ကယ် (လ်)ဒီဗားဟာ သူ့အနေနဲ့ ယုံကြည်အားကိုးနိုင်တဲ့အပြင် အတုယူ စရာလည်း ဖြစ်မယ့် ခေါင်းဆောင်တစ်ယောက်ကို ရှာဖွေခဲ့ပါတယ်။ သူ တွေ့ရတဲ့ ပုဂ္ဂိုလ်ကတော့ ရုပ်ရှင်သရုပ်ဆောင် ဘဝကနေ နိုင်ငံရေး သမား ဖြစ်လာတဲ့ ရိုနယ်(လ်)ရီဂင် ဆိုတဲ့ သူပါပဲ။ ၁၉၆၆ ခုနှစ်မှာ ရီဂင်ဟာ ကယ်လီဖိုးနီးယားပြည်နယ်ရဲ့ အုပ်ချုပ်ရေးမှူးအဖြစ် ရွေး ချယ်တင်မြှောက်ခြင်း ခံရပါတယ်။ ရီဂင်ဟာ အဲဒီရာထူးမှာ သက် တမ်းနှစ်ကြိမ် အရွေးခံရပါတယ်။ ၁၉၆၇ ခုနှစ်ကနေ ၁၉၇၅ ခုနှစ် အထိ ဖြစ်ပါတယ်။ အဲဒီသက်တမ်းကာလမှာ ဒီဗားဟာ ရီဂင်ရဲ့ ရုံးအဖွဲ့ ဦးစီးမှူးချုပ်အဖြစ် တာဝန်ထမ်းဆောင်ခဲ့သလို ရီဂင်ဟာ အမေရိကန်ပြည်ထောင်စုရဲ့ သမ္မတဖြစ်တဲ့ အချိန်မှာလည်း သမ္မတ ရုံးမှာ အဲဒီရာထူးကိုပဲ ထမ်းဆောင်ခဲ့ရပါတယ်။

ရီဂင်ရဲ့ လက်အောက်မှာ သူဟာ နှစ်ပေါင်းသုံးဆယ်လောက် အမှုထမ်းဆောင်ခဲ့ရတဲ့ ကာလအတွင်း ရီဂင်နဲ့ ပတ်သက်ပြီး ချီးကျူး စရာအချက်တွေ အများကြီး သူ တွေ့ ရှိခဲ့ပါတယ်။ ရီဂင်ရဲ့ တိုင်း ပြည်ချစ်စိတ်နဲ့ တိုင်းပြည်အကျိုးကို သယ်ပိုးဖို့ လေးလေးနက်နက် ခံယူထားမှုတွေ၊ သူ့ကိုယ်သူ နားလည်သိမြင်မှုတွေ၊ လူထုနဲ့ ထိတွေ့ ဆက်သွယ်ရာမှာ ထူးချွန်ပုံတွေ၊ သူ့ရဲ့ ရိုးသားမှုနဲ့ ဖြောင့်မတ် မှန်ကန်မှုတွေဟာ ပြောပြလို့ မကုန်နိုင်အောင်ပါပဲ။ “သူဟာ မရိုး သားတဲ့ အလုပ်နဲ့ ဖြောင့်မတ်မှန်ကန်မှု မရှိတဲ့ အလုပ်တွေကို တကယ်မလုပ်တဲ့ပုဂ္ဂိုလ်ဖြစ်တယ် ဆိုတာကို ကျွန်တော် မပြောဘဲ ထားလို့ မရပါဘူး” လို့ ဒီဗားက ပြောပါတယ်။ ဒါပေမဲ့ ရိုနယ်(လ်) ရီဂင်နဲ့ ပတ်သက်ပြီး တကယ် လေးစားစရာ အထင်ကြီးစရာ အကောင်းဆုံး အချက်က လူထုနဲ့ ဆက်ဆံရာမှာ အင်မတန်တော်တဲ့ သူ့ရဲ့ ထက်မြက်တဲ့စွမ်းရည် ဖြစ်တယ်လို့ ပြောနိုင်မယ် ထင်ပါ တယ်။

ဒီဗားက “ရိုနယ်(လ်)ရီဂင်ဟာ ကျွန်တော် တွေ့ဖူးတဲ့လူတွေထဲမှာ အရှက်တတ်ဆုံး ပုဂ္ဂိုလ်တစ်ယောက် ဖြစ်ပါတယ်” လို့ မှတ်ချက်ပြုခဲ့ပါတယ်။ အဲဒီလို ရှက်တတ်တဲ့တိုင်အောင် သမ္မတ ကြီးဟာ နိုင်ငံအကြီးအကဲတစ်ယောက်နဲ့ ဖြစ်ဖြစ်၊ သာမန် ကာယ လုပ်သား တစ်ယောက်နဲ့ဖြစ်ဖြစ်၊ တက်ကြွတဲ့ စာနယ်ဇင်းနဲ့ ရေဒီယို၊ ရုပ်မြင်သံကြား အဖွဲ့ဝင်တွေနဲ့ ဖြစ်ဖြစ် တွေ့ဆုံတဲ့အခါ လူတိုင်းနဲ့ အဆင်ပြေအောင် ဆက်ဆံတတ်ပါတယ်။ ရိုနယ်(လ်)ရီဂင်ဟာ ဆိုခဲ့တဲ့ စာနယ်ဇင်း (သတင်း) နယ်ပယ်က လူတွေနဲ့ သိပ်ပြီး ဆက်ဆံမှု ပြေပြစ်တယ်၊ သင့်သင့်မြတ်မြတ် ရှိတယ်လို့ လူတွေက ဘာကြောင့် ပြောကြတာလဲ ဆိုတဲ့ မေးခွန်းနဲ့ ပတ်သက်ပြီး ဒီးဗား က “အဲဒါကတော့ ရီဂင်ဟာ ပင်ကိုအားဖြင့် လူတွေကို ချစ်ခင် နှစ်သက်တယ်၊ အဲဒီလူတွေဟာ စာနယ်ဇင်းနယ်ပယ်က ပုဂ္ဂိုလ် တွေဖြစ်ဖြစ်၊ သာမန် လူတန်းစားတွေဖြစ်ဖြစ်ပေါ့၊ သူဟာ အားလုံး ကို ခင်ခင်မင်မင် ဆက်ဆံတတ်တယ်။ စာနယ်ဇင်းလောကက ပုဂ္ဂိုလ်တွေအနေနဲ့ ရီဂင်ရဲ့ မူဝါဒ သဘောထားကို လက်မခံကြတဲ့ တိုင်အောင် သူတို့ဟာ လူပုဂ္ဂိုလ်အရ ရီဂင်ကို ကြိုက်နှစ်သက် ကြပါတယ်” လို့ ဖြေကြားပါတယ်။

ရီဂင်ရဲ့ အဲဒီစွမ်းရည်ဟာ သူ့ရဲ့ ပါရမီကြောင့် ဖြစ်သလို ဟောလီးဝု(ဒ်)မှာ သူ ကျင်လည်စဉ်က ရရှိခဲ့တဲ့ ရုပ်ရှင်သရုပ်ဆောင် တွေရဲ့ အမူအကျင့်အတိုင်း လူတွေနဲ့ စကားပြောတဲ့အခါ သွက်သွက် လက်လက်နဲ့ ရွှန်းရွှန်းဝေအောင် ပြောတတ်တာမျိုးလည်း ဖြစ်ပါ တယ်။ ဒါပေမဲ့ အဲဒါထက် ပိုပြီး ကြီးမားတဲ့ လေ့ကျင့်ပျိုးထောင်မှု ကတော့ အထွေထွေ လျှပ်စစ်လုပ်ငန်း အဖွဲ့အစည်း (GE) မှာ တာဝန် ထမ်းဆောင်တုန်းက ဆယ်နှစ်ကျော်ကျော် နယ်တကာလှည့်ပြီး အဲဒီကုမ္ပဏီက ထုတ်လုပ်တဲ့ ပစ္စည်းတွေအကြောင်းကို ရှင်းလင်း ပြောပြခဲ့ရတဲ့ အတွေ့ အကြုံပဲ ဖြစ်ပါတယ်။

ရီဂင်ဟာ သူနဲ့ အရင်တုန်းက တစ်ခါမှ မတွေ့ခဲ့ဖူးတဲ့ လူ တစ်ယောက်ကိုတောင် အဲဒီလူအနေနဲ့ သူဟာ ရီဂင်ရဲ့ အရင်းနှီးဆုံး မိတ်ဆွေလို့ ထင်မှတ်လာအောင် ပြောနိုင်တယ်လို့ ဆိုကြပါတယ်။ မှတ်သားစရာကောင်းတဲ့ အရေးအကြီးဆုံး အချက်တစ်ခုက ရီဂင်ဟာ သူနဲ့ အနီးကပ်ဆုံး နေသူတွေကို ရင်းရင်းနှီးနှီး ဆက်ဆံပုံပါပဲ။ သူဟာ သူ့ရဲ့ ရုံးအဖွဲ့ ဦးစီးမှူးချုပ်ကိုဖြစ်ဖြစ်၊ ဥယျာဉ်မှူးကိုဖြစ်ဖြစ်၊ သူ့ရဲ့ ကိုယ်ရေးလက်ထောက် (အတွင်းရေးမှူး) ကိုဖြစ်ဖြစ် တစ်ပြေးညီ ဆက်ဆံပါတယ်။ ရာထူးအဆင့် ဆိုတာ သူ့ခေါင်းထဲမှာ မရှိပါဘူး။ သူ့အဖို့ သူနဲ့ အနီးကပ်နေတဲ့ ပုဂ္ဂိုလ်အားလုံးဟာ အရေးကြီးတဲ့ ပုဂ္ဂိုလ်တွေချည်းပါပဲလို့ ဒီဗားက အမှတ်တရ ပြန်ပြောပြပါတယ်။

ဒီဗားက သူနဲ့ သမ္မတကြီးအကြား ရင်းရင်းနှီးနှီး ပတ်သက်မှု ရှိခဲ့တဲ့ အတွေ့အကြုံတစ်ခုအကြောင်းကို ပြောပြဖူးပါတယ်။ ၁၉၇၅ ခုနှစ်တုန်းက ရီဂင်ဟာ ဆန်ဖရန်စစ္စကိုမှာရှိတဲ့ သဘာဝပတ်ဝန်း ကျင်ကို ထိန်းသိမ်းစောင့်ရှောက်မှု စိတ်ဓာတ်ရှိတဲ့ မုဆိုးတစ်စုနဲ့ တွေ့ဆုံပြီး မိန့်ခွန်းပြောခဲ့ပါတယ်။ အဲဒီအဖွဲ့ အစည်းက ကြေးဝါနဲ့ လုပ်ထားတဲ့ ခြင်္သေ့ရုပ်ကလေး တစ်ရုပ်ကို အမှတ်တရလက်ဆောင် အဖြစ် သမ္မတကြီးကို ပေးအပ်ပါတယ်။ အဲဒီ ခြင်္သေ့ရုပ်ကလေးကိုသမ္မတကြီးကိုယ်စား ဒီဗားက လက်ခံရယူပြီးတဲ့အခါ ခြင်္သေ့ရုပ် ကလေးက သိပ်လှပြီး သိပ်လက်ရာမြောက်တာပဲလို့ သူက သမ္မတ ကြီးကို ပြောပြပါတယ်။

နောက်ဆယ်နှစ်လောက် ကြာသွားတဲ့အခါ ဒီဗားဟာ သမ္မတ ကြီးဆီမှာ တာဝန်ထမ်းဆောင်မှုကို ရပ်ဆိုင်းဖို့အတွက် သူရဲ့ အလုပ်က နုတ်ထွက်စာကို သမ္မတကြီးထံ တင်ပြပါတယ်။ ရီဂင်က နောက်တစ်နေ့မနက်မှာ သူ့ရဲ့ ရုံးခန်းမှာ လာတွေ့ဖို့ ဒီဗားကို မှာပါ တယ်။ နောက်တစ်နေ့မနက် သမ္မတကြီးရဲ့ ရုံးခန်းကို ဒီဗား ဝင်သွားတဲ့အခါ သမ္မတကြီးက သူရဲ့ စားပွဲရှေ့မှာရပ်ပြီး ဒီဗားကို ကို ကြိုဆိုနှုတ်ဆက်ပါတယ်။

သမ္မတကြီးက “မိုက်(ခ်)ရေ၊ ကျုပ်တို့နှစ်ယောက် နှစ်ပေါင်း များစွာ အတူရှိခဲ့တဲ့ အချိန်တွေကို အမှတ်တရ ဖြစ်စေမယ့် ပစ္စည်း တစ်ခု ခင်ဗျားကို လက်ဆောင်ပေးဖို့ ကျုပ် တစ်ညလုံး စဉ်းစား ခဲ့တယ်” ... လို့ပြောပြီး သူ့နောက်ဘက် စားပွဲပေါ်ကနေ ပစ္စည်း တစ်ခုကို လှမ်းယူလိုက်တယ်။ “ကျုပ် မှတ်မိသလောက်တော့ ခင်ဗျားဟာ ဒီပစ္စည်းကလေး အတော်နှစ်သက်တာကို သတိရတယ်” လို့ သမ္မတကြီးက ပြောတယ်။ သူ့မျက်လုံးထဲမှာ မျက်ရည်တွေက ဝိုင်းလို့ ။ အဲဒီနောက် သမ္မတကြီးက ဆန်ဖရန်စစ္စကိုမှာ ရခဲ့တဲ့ကြေးဝါနဲ့ လုပ်ထားတဲ့ ခြင်္သေ့ရုပ်ကလေးကို ဒီဗားရဲ့ လက်ထဲကိုကမ်းပေးလိုက်တဲ့အခါ ဒီဗားဟာ အံ့သြလွန်းလို့ တစ်ကိုယ်လုံး - မွှန်ထူသွားပါတယ်။ ဒီလောက် နှစ်တွေကြာခဲ့တာတောင် ရီဂင်ဟာ