ဦးနု - ရှေ့တန်းခေါင်းဆောင်ဖြစ်လိုသော်

နှလုံးရည်တိုက်ပွဲ

(၁) ဘာအတွက် ဒီမိုကရေစီ

ကာကွယ်ရေးတိုက်ပွဲဝင်ရသလဲ

နှလုံးရည်တိုက်ပွဲဆိုသည်မှာ အခြားမဟုတ်၊ ဒီမိုကရေစီကို ကာကွယ်ရန်အတွက် ဒီမိုကရေစီအခွင့်အရေးများကို ဖိနှိပ်ချုပ်ချယ် ဖျက်ဆီးနေသောသူများအား အကြမ်းမဖက်သည့် ဒီမိုကရေစီနည်းဖြင့် တိုက်ရမည့်တိုက်ပွဲဖြစ်သည်ဟု အချို့ သန့်ရှင်းဖဆပလအဖွဲ့ဝင်များက ယူဆလျက်ရှိကြသည်။ ဤယူဆချက်မှာ တစ်ပိုင်းသာ မှန်သေးသော ယူဆချက်ဖြစ်သည်။

တစ်ဖက်သားကို နှလုံးရည်နှင့်တိုက်မည်ဆိုလျှင် တိုက်ပွဲဝင်တိုင်း၌ နှလုံးရည် ရှိရပေလိမ့်မည်။ ထို့ကြောင့် နှလုံးရည်တိုက်ပွဲဆိုသည်မှာ အခြားမဟုတ်၊ ဒီမိုကရေစီ အခွင့်အရေးများကို ဖိနှိပ်ချုပ်ချယ် ဖျက်ဆီးနေသောသူများကို နှလုံးရည်ဖြင့် တိုက်ရမည့်တိုက်ပွဲလည်း ဖြစ်သည်။ တိုက်ပွဲဝင်ပုဂ္ဂိုလ်တို့၏ ကိုယ်တွင်း၌ရှိသော နှလုံးရည်ကို ဖျက်ဆီးပစ် တတ်သည့် အညစ်အကြေးများကို တွန်းလှန်ပစ်ရမည့် တိုက်ပွဲလည်း ဖြစ်သည်ဆိုသည်ကို နှလုံးရည်တိုက်ပွဲဝင်ပုဂ္ဂိုလ်တို့သည် အထူးမှတ် သားထားကြစေချင်ပါသည်။

ထို့ကြောင့် တစ်ဖက်က ဒီမိုကရေစီကာကွယ်ရေး နှလုံးရည်တိုက်ပွဲဝင်နေစဉ် အခြားတစ်ဖက်ကလည်း မိမိကိုယ်ကို နှလုံးရည် တိုးတက်ပြည့်ဝ လာအောင် အထူးကြိုးစားကြရမည်။

ဤကဲ့သို့ နှလုံးရည် ပြည့်ဝစေရေးအတွက် မိမိကိုယ်တွင်းရှိ အညစ်အကြေးများကို တော်လှန်နေခြင်းသည်ပင်လျှင် နှလုံးရည်တိုက်ပွဲ ဝင်နေခြင်း ဖြစ်သည်ဆိုသည်ကို သန့်ရှင်းဖဆပလအဖွဲ့ ဝင်တိုင်း အထူး သတိချပ်ကြစေချင်ပါသည်။

ဒီမိုကရေစီကာကွယ်ရေး၊ နှလုံးရည်တိုက်ပွဲ အောင်မြင်ရေးသည် ကျွန်တော်တို့အတွက် အခက်ဆုံး ပြဿနာမဟုတ်။ တိုက်ပွဲဝင်ရသော အကြောင်းရင်းသည် မှန်လည်းမှန်၍ အကျိုးလည်းရှိမည်၊ တိုက်ပွဲဝင်သူ များမှာလည်း ဖြူစင်သောစေတနာ၊ မတုန်မလှုပ်သောသတ္တိ၊ မလျှော့သောဇွဲ၊ ကောင်းသောအရည်အချင်းတို့နှင့် ပြည့်စုံမည်ဆိုလျှင် မည်သည့် တိုက်ပွဲမဆို အောင်မြင်ရမည်။

ဘာအတွက် ဒီမိုကရေစီကာကွယ်ရေး နှလုံးရည်တိုက်ပွဲထဲသို့ ဝင်လာသည်ဆိုသည့်အချက်ကို တိုက်ပွဲဝင်ပုဂ္ဂိုလ်တိုင်း ကောင်းစွာ သဘောပေါက်ရမည်။ ဤကဲ့သို့ သဘောပေါက်နိုင်ရန်အတွက် အခြေခံ ရပ်ကွက်များအထိ ဆွေးနွေးပွဲများကို စနစ်တကျ ကျင်းပပေးရမည်။

ခေါင်းဆောင်အသီးသီး၏ မိန့်ခွန်းများကိုလည်း စနစ်တကျ လေ့လာနိုင်လျှင်လည်းကောင်း၊ ဤသို့ လေ့လာပြီး မိန့်ခွန်းများထဲမှ မှတ်သားဖွယ်ကောင်းသော အချက်များကို စနစ်တကျ ဆွေးနွေးနိုင်လျှင် လည်းကောင်း အထောက်အပံ့ဖြစ်နိုင်သည်။ .

အများယောင်လို့ ယောင်ရသည်၊ အမောင် တောင်မှန်း မြောက်မှန်း မသိဆိုသော စကားကဲ့သို့ ဘာကြောင့် နှလုံးရည်တိုက်ပွဲ ဝင်ရသည်ကို ကိုယ်တိုင်မသိဘဲ သူများဝင်သည်ကို မြင်သောကြောင့်သာ ဝင်လာကြသော သူများအတွက် အခက်အခဲတစ်ခုခုနှင့် ရင်ဆိုင်တွေ့လျှင် စိတ်ပျက် တတ်သည်။ တစ်ခါတစ်ရံ ဟိုက သည်က ပြောသံဆိုသံတွေကို ကြားရ သည့်အခါများတွင်လည်း နားယောင်ပြီး လမ်းလွဲကို လိုက်တတ်သည်။

ထို့ကြောင့် ဘာအတွက် နှလုံးရည်တိုက်ပွဲ ဝင်ရသည်ဆိုသည့် အချက်ကို သဘောပေါက်အောင် နှလုံးရည်တိုက်ပွဲဝင် ပုဂ္ဂိုလ်တိုင်း အထူးကြိုးစားပါ။ ဤအချက်ကို ရိုးတွင်းခြင်ဆီထဲမှာ စွဲနေအောင် အထူးကြိုးစားပါ။

ဤအချက်ကို အထင်မသေးပါနှင့်။ အထူးဦးစားပေး၍ ကြိုးစားပါ။

* * *

(၂) အဓိဋ္ဌာန်ရှိရမည်။

နှလုံးရည်တိုက်ပွဲတွင် အနိမ့်အမြင့်များ ရှိလိမ့်မည်။ ရံဖန်ရံခါ ပြည် သူ လူထု၏ တစ်ခဲနက်အုံကြွ၍ ထောက်ခံမှုများကို တွေ့ရမည်။ ရံဖန်ရံခါ ပြည်သူလူထု၏ ထောက်ခံမှုများကို တွေ့ရမည်မဟုတ်။ ရံဖန်ရံခါ ပြည်သူလူထု၏ တစ်ခဲနက်ချီးကျူးခြင်းကို ခံရမည်။ ရံဖန်ရံခါ လူထု၏ တစ်ခဲနက်ရှုတ်ချခြင်းကို ခံရမည်။ ရံဖန်ရံခါ ပျော်စရာရွှင်စရာများ နှင့် တွေ့ရမည်။ ရံဖန်ရံခါ အဖမ်းအဆီး၊ အချုပ်အနှောင်၊ အနှိပ်အစက်၊ အသတ်အဖြတ် အစရှိသည့် စိတ်ညစ်စရာများနှင့်လည်း တွေ့ရမည်။

လေးသင်္ချေနှင့် ကမ္ဘာတစ်သိန်း ပါရမီဖြည့်ခဲ့သဖြင့် ဘုန်းတော် အနန္တ၊ ကံတော်အနန္တ၊ ဉာဏ်တော်အနန္တ၊ စကြဝဠာကမ္ဘာမြေမိုး ဖြန်းဖြန်း ကျိုးမျှ တန်ခိုးတော်အနန္တတို့နှင့် ပြည့်စုံတော်မူသော မြတ်စွာဘုရားသခင် ကိုယ်တော်မြတ်ကြီးသော်မှ ဤလောကဓံတရားများက မလွတ်နိုင်သေး လျှင် ပါမွှားနိုင်ငံရေးသမားများသည် ဤလောကဓံတရားများမှ အဘယ် မှာလျှင် လွတ်နိုင်ပါမည်နည်း။

တာဝတိံသာနတ်ပြည်၌ အဘိဓမ္မာတရား ဟောပြီးသောအခါ လူ့ပြည်သို့ ပြန်ကြွလာရာတွင် အံ့မခန်းနိုင်လောက်အောင် ကြီးကျယ်လှ သည့် စောင်းတန်းကြီးကိုဖန်ဆင်းပြီး ဗြဟ္မာ၊ သိကြား၊ နတ်များကိုယ်တိုင် မြတ်စွာဘုရားသခင်ကို တစ်ခဲနက် ခြံရံလျက် သာယာနာပျော်ဖွယ်ကောင်းလှသော တူရိယာတို့ဖြင့် လိုက်ပို့ကြသည့်အခါမျိုးလည်း ရှိသည်။

မြတ်စွာဘုရားသည် ကောသမ္ဘီပြည်တွင်းသို့ ဆွမ်းခံအဝင်မှာ မာဂဏ္ဍီ၏ လက်ကိုင်တုတ်များက အမျိုးမျိုး ဟစ်အော်ဆဲဆိုသည်ကို ခံရသည့်အခါမျိုးလည်း ရှိသည်။

နိုင်ငံရေးသမားများသည် အများအားဖြင့် ပုထုဇဉ်များသာဖြစ် ကြရာ အမြင့်နှင့် တွေ့ရသည့်အခါများတွင် စိတ်တက်ကြွကြသလောက် အနိမ့်နှင့် တွေ့ရသည့်အခါများတွင် စိတ်ပျက်တတ်ကြသည်မှာ ဓမ္မတာ ပင်ဖြစ်သည်။

ထို့ကြောင့် နှလုံးရည်တိုက်ပွဲဝင် ပုဂ္ဂိုလ်တိုင်းသည် ဘာ့ကြောင့် တိုက်ပွဲဝင်ရသည်ကို ရှေးဦးစွာ သဘောပေါက်အောင်လုပ်ပြီး တိုက်ပွဲ ဝင်တော့မည်ဟု ဆုံးဖြတ်သည့်အခါတွင် အောက်ပါအတိုင်း အဓိဋ္ဌာန်ပြု သင့်သည်။

“ငါသည် လူရင့်မကြီးဖြစ်ပြီး လူဖြစ်ကျိုးရှုံးရမည့်ဘဝမျိုးကို ဘယ်နည်းနှင့်မှ လက်မခံနိုင်။ ငါ၏ သားစဉ်မြေးဆက်တို့နှင့်တကွ ဆွေမျိုးဉာတကာတို့သည်လည်း လူရင့်မကြီးဖြစ်ပြီး လူဖြစ်ကျိုးရှုံးရမည့် ဘဝသံသရာထဲမှာ တဝဲလည်လည်နေရမည်ကိုငါသည် ဘယ်နည်းနှင့်မှ မရှုဆိတ်နိုင်။”

“နှလုံးရည်တိုက်ပွဲသည် ငါ၊ငါ၏ သားစဉ်မြေးဆက်တို့နှင့်တကွ၊ ငါ၏ ဆွေမျိုးဉာတကာတို့အတွက် လူဖြစ်ကျိုးရှုံးရမည့် ဘဝဆိုးကြီးမှ လွတ်မြောက်စေနိုင်သည့် တစ်ခုတည်းသော ထွက်ရပ်လမ်းဖြစ်သည်ဟု ငါ လေးနက်စွာ ယုံကြည်သည်။”

“ထို့ကြောင့် အရိုးကြေကြေ အရေစုတ်စုတ် အသက်ဇီဝိန်ပင် ချုပ်ရပေစေ၊ ငါသည် ကြောက်ဒူးမတုန်ဘဲ၊ နောက်မဆုတ်ဘဲ၊ နှလုံး ရည်တိုက်ပွဲကြီးကို သစ္စာမဖောက်ဘဲ အောင်မြင်သည့်နေ့အထိ ပါဝင် ဆင်နွှဲရန် လေးနက်စွာ သစ္စာအဓိဋ္ဌာန်ပြုသည်။

နှလုံးရည် တိုက်ပွဲဝင်တိုင်းသည် တစ်နေ့လျှင် အနည်းဆုံးတစ်ကြိမ်လောက် လူစုလူဝေးနှင့်ဖြစ်စေ၊ တစ်ဦးချင်းဖြစ်စေ အထက်ပါ အတိုင်း အဓိဋ္ဌာန်ပြုသင့်သည်။

ဤသို့ နေ့စဉ်မှန်မှန် အဓိဋ္ဌာန်ပြုခြင်းဖြင့် နှလုံးရည်တိုက်ပွဲ အရေးမြင့်သည့်အခါမျိုးတွင်လည်း တိုက်ပွဲဝင်များသည် ဘဝင်မမြင့်နိုင်။ နှလုံးရည်တိုက်ပွဲ အရေးနိမ့်သည့်အခါမျိုးတွင်လည်း ညည်းညူသံများ၊ စိတ်ပျက်သံများ၊ အပြင်ထွက်ထိုင်မှုများ၊ ဟိုခုန်ဒီခုန်နှင့် ခုန်ကျော်ပျံလွှား မှုများသည် ပြောပလောက်အောင် ရှိနိုင်မည်မဟုတ်ပေ။

* * *

(၃) မေတ္တာပွားရမည်။

၎င်းထက် ပိုကောင်းသည့် စကားလုံးကို ရှာမတွေ့ သေးသဖြင့် “နှလုံးရည်တိုက်ပွဲ”ဆိုသည့် စကားလုံးကို အသုံးပြုထားရခြင်း ဖြစ်သည်။ နှလုံးရည်တိုက်ပွဲသည် ဖီလာကျနေသော စကားများဖြစ်သည်။ သို့ရာတွင် ထို့ထက် သင့်တော်သော စကားလုံးကို မတွေ့သေးသောကြောင့် ယာယီ သဘောမျိုးဖြင့် “နှလုံးရည်တိုက်ပွဲ” ဟုပင် အသုံးပြုကြပါစို့။

မတရားဖမ်းဆီးခြင်း၊ ချုပ်နှောင်ခြင်း၊ နှိပ်စက်ခြင်း၊ သတ်ဖြတ် ခြင်းခံရသောသူများသည် ပုထုဇဉ်များသာ ဖြစ်ကြသောကြောင့် မတရား လုပ်သူများအပေါ်တွင် အာဃာတများ ရှိကြမည်မှာ ဓမ္မတာပင်ဖြစ်သည်။

အမှန်အတိုင်းပြောရလျှင် အာဃာတ ထားနေခြင်းအားဖြင့် မတရားအပြုခံရသူမှာ အကျိုးမဖြစ်၊ အကျိုးသာယုတ်သည်။ အာဃာတ ဖြစ်တိုင်း ဖြစ်တိုင်း အကုသိုလ်ဖြစ်နေသည်ကို သတိရစေချင်သည်။

သို့ဖြစ်ရာ မတရားပြုခံရသူများမှာ ဤသို့ အပြုခံရပြီးနောက် အကျိုးမယုတ်ဘဲ အကျိုးဖြစ်အောင် အသင့်အတင့် နှလုံးသွင်းတတ်ရ မည်။

မတရားအပြုခံရခြင်းမှာ အခြားကြောင့်မဟုတ်၊ မိမိ၏အတိတ်က အကုသိုလ်ကံကြောင့်ပင်ဖြစ်သည်ဟု ဟုတ်မှန်သည့်အတိုင်း နှလုံးသွင်း