အိမ်ကြီးမောင် - နေပျော်အောင်မြင်ဘ၀သခင်

စည်းမျဉ်း (၂) ------

ပထမဆုံးနေ့

နေ့ ရက်တိုင်းဟာ ဘဝရဲ့ ပထမဆုံးနေ့ရက်ဖြစ်နေမယ်ဆိုရင် ပျော်ရွှင်ရလိမ့်မယ်။

လူ့ဘဝထဲ စတင်ရောက်ရှိတဲ့နေ့ဟာ ပျော်စရာဖြစ်တယ်။ ပညာစတင် သင်ယူတဲ့နေ့ဟာ ပျော်စရာဖြစ်တယ်။ လက်ထပ်ထိမ်းမြားရတဲ့နေ့ဟာ ပျော်စရာဖြစ်တယ်။ အလုပ်စတင်လုပ်ရတဲ့နေ့ဟာ ပျော်စရာဖြစ်တယ်။ မော်တော်ကားအသစ် စတင်ဝယ်ရတဲ့နေ့ဟာ ပျော်စရာဖြစ်တယ်။ မိတ်ဆွေသစ်တွေနဲ့ စတင်တွေ့ဆုံရတဲ့နေ့ဟာ ပျော်စရာဖြစ်တယ်။ ခရီးစတင်သွားရတဲ့နေ့ဟာ ပျော်စရာဖြစ်တယ်။ လေယာဉ်စတင်စီးရတဲ့နေ့ဟာ ပျော်စရာဖြစ်တယ်။ သားသမီးစတင်ရရှိတဲ့နေ့ဟာ ပျော်စရာဖြစ်တယ်။ ကလေးက မေမေလို့စတင်ခေါ်တဲ့နေ့ဟာ ပျော်စရာဖြစ်တယ်။

နေ့ရက်တိုင်းကို ဘဝရဲ့ ပထမဆုံးနေ့လို့ သဘောထားမယ်ဆိုရင် ပျော်စရာအတိ ဖြစ်နေလိမ့်မယ်။

ဘဝကို သင်္ချာပုစ္ဆာတစ်ခုလို သဘောထားမယ် ဆိုပါစို့ ။

တစ် အပေါင်း တစ် ဘယ်လောက်လဲမေးရင် နှစ်လို့ ဖြေကြပါ လိမ့်မယ်။

အကယ်၍များ ၈ x ၃၄၅၆၇၈ x ၄၆ ရဲ့ အဖြေကိုမေးရင်တော့ ဂဏန်းပေါင်းစက် အကူအညီယူမှ အဖြေပေးနိုင်ပါလိမ့်မယ်။

ဒါကြောင့် ဘဝမှာ လွယ်ကူတဲ့ပုစ္ဆာဖြစ်နေရင် အဖြေကို အလွယ်နဲ့ ရမှာဖြစ်တယ်။ ခက်ခဲတဲ့ပုစ္ဆာဖြစ်အောင် ဘဝကို လုပ်ဆောင်ထားရင်တော့ အဖြေရဖို့လည်း ခက်ခဲနေမှာ မလွဲပါဘူး။

ဒါကြောင့် ဘဝကို ပျော်ပျော်ဖြတ်သန်းချင်ရင် ခက်ခဲတဲ့ပုစ္ဆာတွေ လုပ်မထားရပါဘူး။ ပျော်ရွှင်မှုဆိုတာ သူတစ်ပါးထံက ရယူရတာ မဟုတ်ပါဘူး။ ကိုယ်တိုင်ပျော်ဖို့ ကိုယ်တိုင်ဖန်တီးယူရတာပါ။

ရာထူးအဆင့်အတန်း၊ ဂုဏ်သိက္ခာ၊ ငွေကြေး၊ ကျော်ကြားမှုတွေနဲ့ ဘဝကိုတည်ဆောက်ထားသူအဖို့ ဝန်လေး ပင်ပန်းနေရလိမ့်မယ်။

ရိုးသားဖြောင့်မတ်ခြင်းနဲ့ ဘဝကို တည်ဆောက်ထားသူဆိုရင် ပေါ့ပါးရလိမ့်မယ်။

ပေါ့ပါးသူဟာ ဘဝကို သက်သောင့်သက်သာ ဖြတ်သန်းရလိမ့် မယ်။

ဒါကြောင့် တပ်မက်တွယ်တာမှုတွေ လျော့ပါးအောင် လုပ်ဆောင် ပါ။ ။

အစားအသောက် ကြေးမများသူ၊ အပူအပင်ကင်းကင်းနဲ့ အိပ်စက် နိုင်သူ၊ အဆင့်အတန်းမခွဲဘဲ ဆက်ဆံတတ်သူ၊ အုပ်စု အားမကိုးတတ် သူတွေအဖို့ စိတ်ဖိစီးခံရမှုမရှိတာ သေချာပါတယ်။

ရာထူး၊ ငွေကြေး၊ ဂုဏ်သိက္ခာ၊ ကျော်ကြားမှုတွေနဲ့ ဘဝကို တည်ဆောက်ထားသူအဖို့ ဘဝတစ်လျှောက်လုံး အဲဒီဝန်ထုပ်ကြီးကိုသယ်ဆောင်နေရတာကြောင့် လေးလံပင်ပန်းနေရလိမ့်မယ်။

တောင့်တမှုများလေ ပိုမိုပင်ပန်းရလေ၊

တပ်မက်မှုများလေ၊ သံယောဇဉ်ပိုဖြစ်လေ၊

သင်ဆုပ်ကိုင်ထားတာမှန်သမျှ သံယောဇဉ်နှောင်ကြိုးတွေသာ ဖြစ်နေလိမ့်မယ်။

သံယောဇဉ်များလာလေလေ၊ ဝန်ထုပ်ဝန်ပိုး ကြီးမားလာလေလေ ပါပဲ။

ဘဝမှာ ဝန်ထုပ်ကြီးရွက်ပြီး သွားလာနေရသူအဖို့ ပင်ပန်းနေတာ ကြောင့် ပျော်ရွှင်နိုင်ဖို့ မလွယ်ကူပါဘူး။