သော်တာဆွေ - အမြုတေရတနာ

           ကမ္ဘာပေါ်တွင် အပူပြင်းထန်ဆုံးသော ဒေသတစ်ခုဖြစ်သည့် ဆီးရီး ယားနယ်အတွင်း မွန်းတည့်နီးပါးအချိန်ဝယ် ပင်လယ်သေ (Dead Sea) နှင့် မလှမ်းမကမ်းရှိ သဲကန္တာရတစ်ခုထဲ၌ ရင်ဘတ်မှာ အနီရောင်ကြက်ခြေ အမှတ်ရှိသော မြင်းစီးသမားတစ်ယောက်သည် လေးဆေးမှန်ကန်စွာ ခရီး သွားလျက်ရှိလေ၏။

          ထိုသူကား ပါလက်စတိုင်းနယ်တွင် ခရစ်ယာန်နှင့်မဟာမေဒင်တို့ ဖြစ်ပွားကြသည့် “ခရုဆိဒ်ခေါ် ဘာသာရေးစစ်ပွဲကြီးကို ဝင်ရောက်ယှဉ်နွှဲရန် မြောက်ဘက်အရပ်ရှိ မိမိဒေသရင်းမှ ထွက်ခွာရောက်ရှိလာသော ခရစ်ယာန် သူရဲကောင်းတစ်ယောက်ပေတည်း။

          ယခုမိနစ်ပိုင်းကလေးအတွင်းမှာပင် ဤသူရဲကောင်းသည် အံ့သြဖွယ် သော စီးချင်းတိုက်ပွဲကလေးတစ်ခုကို ရင်ဆိုင်ရတော့မည်ဖြစ်ပေရကား၊ ယခု သူနှင့်သူ့မြင်း၏ စစ်ဝတ်တန်ဆာ-လက်နက်ကိရိယာများကို ကျွန်ုပ်တို့သိရှိ ထားဖို့လိုပေလိမ့်မည်။

          စင်စစ်သော်ကား၊ ဤ သူရဲကောင်းနှင့် ၎င်း၏မြင်းတွင် ဝတ်ဆင်ထား သည်တို့မှာ ဤမျှ ပူပြင်းလှသောဒေသ၌ ဤကဲ့သို့ နေအရင့်ကျက်ဆုံး အချိန် မျိုးတွင် ယခုကဲ့သို့ ခရီးသွားနေရန် အနည်းငယ်မျှ မသင့်လျော်ပါချေ။ အကြောင်းမူ ထိုခေတ်တွင် ဥရောပတိုက်၌ Knight နိုက်ခေါ်ခရစ်ယာန်သူရဲ ကောင်းများ ဝတ်ဆင်ကြသည့် သံထည်ကိရိယာ တန်ဆာတို့မှာ လေးလံထူ ထပ်များပြားလှသောကြောင့်ဖြစ်ပေ၏။

          သူရဲကောင်း၏တစ်ကိုယ်လုံးမှာ သံမဏိ ကြိုးမျှင်များဖြင့်သာ ပိရိစေ့ စပ်စွာ ချုပ်လုပ်ထားသော ကိုယ်ချပ်ဘောင်းဘီနှင့် အင်္ကျီလက်ရှည်တို့ကိုဝတ်ဆင်ထား၍လက်တွင်သံမဏိလက်စွပ်အိတ်ဖြင့်လည်းကောင်း၊ ခြေထောက်မှာလည်း ဤအမျိုးတူ သံဘွတ်ခြေနင်းဖြင့် လည်းကောင်း၊ အဆုံး သပ်ထားလေရာ၊ မည်သည့်အပိုင်းအဆစ်မျှ ဟာသည့်နေရာမရှိပါချေ။ ရင် ဘတ်တွင်ကား ဤသံမျှင်အကျီအပေါ်မှ တစ်ဆင့် သံမဏိပြားတို့ကို ငါး ကြင်းအကြေးသဖွယ် ဆက်စပ်ပြုလုပ်ထားသော “ရင်ဘတ်ကာ” ဖြင့် ထပ်ဆင့် ဖုံးအုပ်ထားလျက် ဦးခေါင်းမှာလည်း မျက်စိနေရာတွင် ပြတင်းပေါက်သဖွယ် သံတိုင်ကာနှင့် အပြင်မြင်ရရုံ အပေါက်ကလေးရှိသော 'ဟဲလ်မက်” ခေါ် သံခေါင်းစွပ်ကို တပ်ဆင်ထားပြီး ထိုအပေါ်မှာတစ်ထပ် “ဟုဒ်” ခေါ် ဦးထုပ် ပြားကလေးရှိချေသေး၏။ ကိုယ်နှင့်ခေါင်းအကြားကိုလည်း မလစ်ပါချေ။ လည်ပင်းတွင် သံမျှင်လည်ပတ်ရှိရုံမက၊ ထိုအပေါ်မှတစ်ဆင့် သံခေါင်းစွပ်နှင့် ဆက်စပ်ထားသော သံမဏိလည်ဂျာမှာ နံဘေးပခုံးနှစ်ဖက်ကိုပါ လုံခြုံပြန်စေ သေး၏။

          ထိုအရာ အားလုံးတို့အပြင် ပန်းလှချည်တို့ဖြင့် ဖောက်လုပ်ဆင်ယင် ထားသော “ဆာကုတ်”ခေါ် အပေါ်အင်္ကျီကြီးကိုမြင်နိုင်သေးလေရာ၊ ၎င်းမှာ ကာလကြာမြင့်လှ၍ ဟောင်းနွမ်းနေပြီဖြစ်သော်လည်း ဝတ်ဆင်သူ၏အမှတ် တံဆိပ်ဖြစ်သည့် အိပ်ပျော်နေဟန် ကျားသစ်ရုပ်ကလေးများနှင့် ၎င်းတို့၏ အောက်မှ “ငါအိပ်နေသည် မနှိုးနှင့်” ဟု ထိုသူရဲကောင်း၏ စိတ်နေသဘော ထားကို ဖော်ပြသည့်အလား ရေးသားထားသော စာတိုကလေးမှာ ကျားသစ် ရုပ်တစ်ကောင်ကောင်နှင့်တစ်စီ တစ်ဆီ ခပ်မှုန်မှုန်ပင် ထင်လျက်ရှိချေသေးပေ၏။ ထိုဝတ်ရုံကြီးမှာ အမြင်အားဖြင့် ဝတ်ဆင်သူတို့ကို ပိုမို၍ ပူအိုက်စေမည် ထင်ရသော်လည်း အမှန်မှာ သူရဲကောင်း၏ အဖို့များစွာပင် အသုံးဝင်လေ သည်။ အကြောင်းမှာ၊ အကယ်၍သာ ဤဝတ်ရုံမရှိပါသဖြင့် နေပူရှိန်သည် အတွင်း၌ ဝတ်ဆင်ထားသော သံချပ်ထည်များပေါ်သို့ တိုက်ရိုက်ကျရောက်ခဲ့ပါမူ ထိုသူမှာ မခံမရပ်နိုင်သော တေဇောဓာတ်နှင့် တွေ့ထိရပေလိမ့်မည်ဖြစ်၏။

           ထိုသူရဲကောင်း၏ လည်ပင်းတွင် သုံးထောင့်သဏ္ဌာန်ကြီးမားထူထဲ သော ဒိုင်းကြီးကို ဆွဲချိတ်ထားသေး၏။ ၎င်းဒိုင်းကြီးမှာ အပွဲပွဲက ခုတ်ရာထစ် ရာများဖြင့် ပွန်းပိန်လှိုက်ချိုင့်နေပြီဖြစ်သော်လည်း အိပ်ပျော်နေဟန်ရှိသော ကျားသစ်ရုပ်ကြီးနှင့် ၎င်းအောက်က “ငါအိပ်နေသည်မနှိုးနှင့်” ဟူသော စာမှာ သဲကွဲစွာပင် ရှိနေသေးသောကြောင့် စစ်မြေပြင်တွင် ထိုသူရဲကောင်းအား “အိပ်ပျော်နေသော ကျားသစ်-သူရဲကောင်း” ဖြစ်ကြောင်းကို ထင်ထင်ရှားရှား ကြီး သိမြင်နိုင်လေ၏။

          ဤဖော်ပြခဲ့သည်တို့ကား ရာသီဥတုနှင့် ရန်သူ၏ လက်ချက်ဒဏ်ကို ခံနိုင်စွမ်းရှိရန် အကာအကွယ်များဖြစ်၍ ထိုသူရဲကောင်းက ရန်သူကို တိုက်ရန် လက်နက်များကား (၁) တောင့်တင်း ရှည်လျား၍ သံမဏိသွားရှိသော လှံတံ ကြီး။ ၎င်းမှာ ယခုမြင်းစီးနေစဉ်တွင် ညာဘက်ခြေနင်းကွင်းပေါ်၌ အရိုး

ထောက်၍ အနားဘက်မှာ ပခုံးနှင့် မှီထားပြီး နောက်ဘက်သို့ ခပ်ယွန်းယွန်း ကလေး စွန်းထွက်လျက် အသွားရင်းက ပန်းပွားအတွဲကလေးမှာ လေထဲ တွင် တလှုပ်လှုပ်ကစားနေ၏။ (၂) လက်ဝါးကပ်တိုင်ပုံ အရိုးနှင့် အသွား နှစ်ဖက်ရှိ ဦးချွန်ဓားရှည်ကြီး၊ သူ၏လက်ဝဲဘက်တွင် ချိတ်ဆွဲ၍၊ (၃) ခါး လက်ယာဘက်တွင် ကြီးမားထက်မြက်လှသော ဓားမြှောင်ကြီးတစ်ချောင်းနှင့်။ (၄) မြင်းကုန်းနှီးတွင် ဆွဲချိတ်ထားသည့် ပစ်ခတ်ရန် လည်းကောင်း၊ ခုတ် ထစ်ရန်လည်းကောင်း နှစ်မျိုးအသုံးကျသော “မေ့စ်” ခေါ် ဆပ်သွားဖူးပုံ သံမဏိရဲဒင်းတို့ ဖြစ်လေသည်။

          ဤကား ရှေးခေတ်သူရဲကောင်းတစ်ယောက်၏ အဝတ်တန်ဆာ အပြည့်အစုံတည်း။ ထိုမှ တစ်ဖန်သူစီးထားသော မြင်းကိုကြည့်ပါဦး။ သူ့ သခင်၏ ကိုယ်မှာရှိသော ကိရိယာတွေထက် အလေးချိန်လျော့ပါးသည် မဟုတ်ပါချေ၊ သံမဏိပြားတို့ကို ငါးကြင်းအကြေးကွက် ဆက်စပ်ပြုလုပ်ထား

သော မြင်းကိုယ်ပတ် သံချပ်အင်္ကျီကြီး၊ ၎င်းမှာမြင်း၏ ဝမ်းဗိုက်နံဘေးတင်ပါး တို့ကို လုံခြုံစေလျက် ရှေ့ရင်အုံတွင် ဖုံးအုပ်ထားသော အမျိုးတူသံချပ်ထည် နှင့် တစ်ပြင်တည်းဆက်စပ်ထားလေသည်။ ဦးခေါင်းကိုလည်း နားရွက်,မျက်စိ, နှာခေါင်း, ပါးစပ်, အပေါက်များနှင့် ကျနစွာ ပြုလုပ်ထားသော သံချပ်-မြင်းမျက်နှာဖုံးကို စွပ်ထား၍ နဖူးအလယ်တည့်တည့်တွင် ကြံ့ချိုနှင့်တူ သော သံချွန်ကြီးတစ်ခုရှိသေးပေ၏။

           အမှန်စင်စစ်အားဖြင့် ထိုမြင်းစီးသူရဲကောင်းနှင့် သူ့စစ်မြင်းကြီး၏ ပုံသဏ္ဌာန်မှာ အသွေးအသားရှိသော ကိုယ်နှစ်ခုပူးပေါင်းနေသည်နှင့်မတူဘဲ သံကိုအရည်ကျို၍ မြင်းစီးရုပ်ပုံကြီးတစ်ခု သွန်းလုပ်ထားသည်နှင့်သာ တူ လှပေတော့သတည်း။

          သို့ရာတွင် မည်သို့ပင်ဖြစ်လင့်ကစား သဘာဝဓမ္မသည် သက်ရှိ သတ္တဝါမှန်သမျှတို့အား အစာရေစာနှင့် အနားယူရန်လိုခြင်းဖြစ်ပေါ်စေတတ် သည့်အတိုင်း ဤကျားသစ်သူရဲကောင်းသည်လည်း သဘာဝအမိန့်ကို မလွန် ဆန်နိုင်ပေဘဲ မွန်းတည့်အချိန်၌ အဆင်သင့်ပင် ဆိုက်ရောက်လာခဲ့သော စွန်ပလွံပင်ကလေးများစုပြုံနေသည့် “အိုအေစစ်” ရေအိုင်ကလေးဆီသို့ သူ့ မြင်းကြီးကို ဦးတည်လိုက်ရလေ၏။ ဤနေရာကား ပင်လယ်သေနှင့် များစွာ မဝေးကွာလှ။ ထိုလမ်းခရီးတွင် သူ့အဖို့အသင့်လျော်ဆုံးသော နေ့လယ်ခရီး ထောက်ပေတည်း။

သို့သော် သူသည် အလွယ်တကူဖြင့် နေနားခွင့် မရရှာဘဲ အတော်ပင် အရေးပါသောတိုက်ပွဲကလေးတစ်ခုကို ရုတ်တရက်ကျင်းပလိုက်ရလေ၏။

          အကြောင်းမူကား သူသည် ထိုစွန်ပလွံပင် အုပ်ကလေးဆီသို့ သေချာ စွာ ကြည့်လိုက်သောအခါ၌ အခက်အလက်တို့ အကြားတွင် အရာဝတ္ထု တစ်ခု တိုးဝှေ့လှုပ်ရှားနေသည်ကို မြင်ရပြီးနောက် စက္ကန့်ပိုင်းကလေးအတွင်း မှာပင် ထိုအရာသည် သစ်ပင်စုထဲမှ ကွဲကွာလာကာ ဖြူဖွေးသော ခေါင်းပေါင်း ရှည်၊ စိမ်းသောအပေါ်ဝတ်ရုံ၊ ရှည်လျားသော လှံတံတို့နှင့် `ဆာရ်ဆင်”ခေါ် မဟာမေဒင်မြင်းစီးစစ်သားတစ်ယောက် ဖြစ်ကြောင်းကို သိရလေ၏။

         ဆာရ်ဆင်သည် ကမ္ဘာပေါ်တွင် မြင်းစီးနာမည်ကျော်သော အာရပ် လူမျိုးဖြစ်သည့်အားလျော်စွာ မြင်းကို ဇက်ကြိုးဖြင့်မအုပ်ချုပ်ဘဲ ကိုယ်ဖြင့် သာ အလိုက်သင့်ထိန်းဟန်လျက် လက်ဝဲလက်ဖြင့် ကြံ့ရေဒိုင်းကို ဝှေ့ရမ်း ၍ လက်ယာလက်မှာ သူ၏ ရှည်လျားသော လှံတံကို ဦးခေါင်းပေါ်တွင် ပန်ကာကဲ့သို့ လည်ပတ်အောင် ကျွမ်းကျင်လှပစွာ အစွမ်းပြရင်း ခရစ်ယာန်သူရဲကောင်းဆီသို့ တစ်ဟုန်ထိုးကဆုန်စိုင်းလာလေသည်။ သူ့မှန်းဆချက်မှာ သူ၏ရန်သူသည်လည်း သူကဲ့သို့ပင် အပြေးလာခဲ့၍ နှစ်ဦးသား အပြင်း အထန် ရင်ဆိုင်ရန် မျှော်လင့်ပေ၏။

         သို့သော် ဤ ဆာရ်ဆင်စစ်သားတို့၏ တိုက်ခိုက်နည်းကို ကောင်း ကောင်းကျွမ်းကျင်ပြီးဖြစ်နေသော ခရစ်ယာန်သူရဲကောင်းသည် အပိုမလိုအပ် သော မောပန်းခြင်းကို သူ့မြင်းအား မဖြစ်စေချင် ဘိသကဲ့သို့ နေရာမှ တစ်လှမ်း မျှ မရွေ့ လျားဘဲ ခိုင်မြဲစွာ မတ်မတ်ရပ်လျက်၊ သူ့ရန်သူ အနီးသို့ ရောက်လာ လျှင်သာ သူ၏အင်အား မြင်း၏အင်အားနှစ်ခုပေါင်းဖြင့် သူ့လှံကြီးကို အသုံး ချရန် ဟန်ပြင်နေ၏။

         ထို့ကြောင့် ဆာရ်ဆင်မှာ သူ့ရည်ရွယ်ချက် မကိုက်လေသဖြင့် ရန်သူ ၏ အနီးလှံနှစ်ပြန်ခန့်အကွာသို့ ရောက်သည်နှင့် တစ်ပြိုင်နက် ရှေ့ဆက် မလာတော့ဘဲ လက်ဝဲဘက်သို့ပတ်၍ ထိုးခုတ်ရန် အချက်ရှာရင်း ရန်သူကို စက်ဝိုင်းပတ်၍ စီးလေတော့၏။

          ဤစဉ်၌ ခရစ်ယာန် သူရဲကောင်းသည် သူ့နေရာမှ မရွေ့ လျားသော် လည်း မြင်းကိုမူ ပတ်ပတ်လှည့်ကာ ရန်သူနှင့် အမြဲတမ်း မျက်နှာချင်းဆိုင်နေ သဖြင့် ဆာရ်ဆင်မှာ အချက်ကောင်းကိုမတွေ့နိုင်သောကြောင့် နှစ်ပတ်မျှ လှည့်စီးပြီးသော အခါတွင် အခြားတစ်ဖက်သို့ စီးနင်းပြေးလေ၏။ ထိုမှတစ် ဖန် ကိုက်တစ်ရာမျှ ရောက်သောအခါ နောက်သို့ ပြန်လှည့်လာပြီး အပြင်း အထန် ကဆုန်စိုင်းလာပြန်သည်။

         သို့သော် ခရစ်ယာန် သူရဲကောင်းသည် ရှေ့နည်းအတိုင်းပင် နေရာ မရွေ့ မလျော့ဘဲ နေပြန်သဖြင့် အနီးသို့ရောက်လျှင် ဆာရ်ဆင်မှာ ပထမက ကဲ့သို့ပင် စက်ဝိုင်းလှည့်စီးရပြန်လေသည်။ ဤအခါ၌လည်း ခရစ်ယာန်သည် မူလနည်းပင်ခြင်းကိုလှည့်၍ မျက်နှာချင်းဆိုင်နေပြန်သဖြင့် ဆာရ်ဆင်သည် ဒုတိယအကြိမ်အဝေးသို့ စီးပြေးရပြန်လေ၏။

         ဤသို့လျှင် ဆာရ်ဆင်သည် ခရစ်ယာန်ထံသို့ ပြေးလာလိုက် ပတ်ပတ် လှည့်စီးလိုက် ပြန်ခွာပြေးလိုက်နှင့် သုံးကြိမ်မျှလုပ်ပြီးနောက် တတိယ အခေါက် ပြန်အပြေးတွင် ခရစ်ယာန်သူရဲကောင်းသည် မြင်းကုန်းနှီးမှ “မေ့စ်” ခေါ် ရဲဒင်းကိုဖြုတ်ပြီးမလွဲသောချိန်ခြင်းဖြင့် တအားလွှဲ၍ ပစ်လိုက်လေ၏။

          ဆာရ်ဆင်မှာ ဤသည်ကို သိ၍ ကြံ့ရေဒိုင်းကလေးဖြင့် သူ့နောက်စေ့ ကို ကာကွယ်လိုက်သောကြောင့်သာ ဦးခေါင်းထက်ခြမ်း ကွဲမသွားသည်။ သို့သော် လူမှာမူမြင်းပေါ်က ကားခနဲကျသွားလေ၏။

          သို့ရာတွင် ဆာရ်ဆင်သည် ခရစ်ယာန်သူရဲကောင်းက သူ့ကိုလဲနေစဉ် တိုက်ခိုက်ရန် အချိန်မရနိုင်မီပင် လျင်မြန်စွာ မြေပေါ်မှခုန်ထပြီး သခင့်အခြေ အနေကို စောင့်ကြည့်နေသော သူ့မြင်းလိမ္မာပေါ်သို့ ခြေနင်းကွင်းမျှ မနင်းဘဲ ငွေ့ခနဲ ခုန်တက်လိုက်လေ၏။ ဤအချိန်ကလေးတွင် တိုက်ပွဲမှပင် စိတ်နှလုံး အေးဆေးစွာထားနိုင်သော ခရစ်ယာန်သူရဲကောင်းမှာ သူပစ်လိုက်သော ရဲ ဒင်းကိုပြန်၍ ကောက်ယူပြီး ဖြစ်နေလေသည်။

         ဆာရ်ဆင်သည်မြင်းပေါ်သို့ပြန်ရောက်သည်နှင့်တစ်ပြိုင်နက်ရန်သူပစ်ခတ်သောလက်နက်မရောက်နိုင်သည့် နေရာသို့ အလျင်အမြန် စီးသွား ပြီး အနီးကပ်မဟုတ်ဘဲ၊ ပစ်ခတ်သောလက်နက်နှင့် တိုက်ခိုက်ရန် ဆုံးဖြတ် ချက်ချကာ သူ့လှံကိုမြေပေါ်သို့ ပစ်စိုက်လိုက်ပြီး ကျောတွင်အသင့်ပါလာ သော လေးမြားတို့ကို ပြင်ဆင်၍ ခရစ်ယာန်ဆီသို့ ပြန်ခဲ့ပြန်သည်။

          ဤအကြိမ်၌ အစဦးလောက်ရန်သူနှင့် နီးအောင် မလာတော့ပဲ၊ ပထမ ထက် နှစ်ဆမျှခွာ၍ ရန်သူကို စက်ဝိုင်းပတ်စီးကာ သူ၏မတုပနိုင်သော မြင်းစီးကျွမ်းကျင်ခြင်းဖြင့် ရိပ်ရိပ်ထင်အောင် လျင်မြန်နေရာမှပင် မြားတို့ကို တစ်စင်းပြီးတစ်စင်း ပစ်လေသည်၊ သူ့မြားတို့ကား တစ်ချက်မျှမလွဲ၊ ခရစ် ယာန်သူရဲကောင်း၏ သံချပ်အင်္ကျီကောင်းမွန်ခြင်းကြောင့်သာ တန်းလန်း စူးမနေခြင်းဖြစ်လေသည်။

          သို့သော် သတ္တမမြောက်မြားသည် သံချပ်အကျီ၏ လစ်လပ်သော နေရာကို ထိမှန်သွားလေဟန်တူသည်။ ခရစ်ယာန်သည် မြင်းပေါ်မှ မြေပေါ်သို့ လေးလံစွာ ပစ်ကျသွားလေ၏။ သို့ရာတွင် ဆာရ်ဆင်ကို အကြီးအကျယ် အံ့အားသင့်သွားစေသည်ကား။သူသည်မြားထိ၍မြေပေါ်လဲကျနေသောရန်သူကိုကြည့်ရှုစစ်ဆေးရန်လာသောအ

ခါတွင် သူကိုယ်တိုင်ပင်လျှင် ရုတ် တရက် ရန်သူ၏လက်တွင်းသို့ ရောက်နေခြင်းပင်တည်း။ အကြောင်းမှာ နီး ကပ်စွာတိုက်လိုသောခရစ်ယာန်သည်သူ့ရန်သူအနီးသို့ရောက်လာအောင်ပရိယာယ်ဆင်လိုက်ခြင်းကြောင့်ဖြစ်လေ၏။