မြတ်ငြိမ်း - စိတ်အလှဖြင့်ဘဝကိုအလှဆင်

          သင့်တွင် ခင်မင်နှစ်လိုဖွယ်ကောင်းသော စိတ်အလှတစ်ရပ် ရှိစေ လိုသည်ဆိုလျှင် သင်စကားပြောနေသူနှင့် သဘောတူလက်ခံလို့ရမည့် အချက်များကို ရှာကြည့်ရပါမည်။ ထိုသို့ ရှာကြည့်ရာ၌ သင်သဘောရိုး ဖြင့် အမှန်တကယ် လက်ခံနိုင်သော အချက်များသာ ဖြစ်ရပါမည်။မြှောက်ထိုးပင့်ကော် သို့မဟုတ် မျက်နှာလိုအားရ လက်ခံသောအချက်များ မဖြစ်ရပါ။

          ပြောသာပြောရသည် ထိုသို့ စစ်မှန်သော သဘောတူချက်များ ရှာဖွေဖို့ဆိုသည်မှာ ဤလုပ်ငန်းစဉ်တွင် အခက်ခဲဆုံးအပိုင်း ဖြစ်၏။

          ဘာကြောင့် အလွန်ခက်ခဲနေပါသလဲ။ အဘယ်ကြောင့်ဆိုသော် သင်၏ သဘောတူလက်ခံမှုသည် အပေါ်ယံ ဟန်ဆောင်ပန်ဆောင် သဘောတူမှုမျိုး မဟုတ်ရသောကြောင့် ဖြစ်၏။ အဘယ်ကြောင့်ဆိုသော် သဘောတူလက်ခံမှုကို ရှာဖွေဖို့ စိတ်ဓာတ်သွင်းရခြင်းသည် လူများစု၏ သဘာဝ စိတ်တိမ်းညွှတ်မှုနှင့် ဖီလာဆန့်ကျင် ဖြစ်နေသောကြောင့်ဖြစ်၏။

          ကျွန်တော်တို့ အစွန်းနှစ်ဖက်ကို လေ့လာကြည့်လို့ ရ၏။ သဘော တူလက်ခံကြောင်း ပြောသည့် အစွန်းတစ်ဖက်တွင်

 ... ခင်ဗျားပြောတာ သိပ်မှန်တာပဲဗျာ။

ခင်ဗျားပြောသမျှ အစစအရာရာကို ကျွန်တော် သဘောတူ တယ်။

ခင်ဗျားပြောသွားတာတွေ အားလုံးကို ကျွန်တော် အလုံးစုံ လက်ခံတယ်။

ခင်ဗျားပြောတာ အကြွင်းမဲ့ မှန်တယ်ဗျို့။ ..

ကျုပ်ကတော့ ခင်ဗျားတင်ပြချက်ကို ရာနှုန်းပြည့် သဘောတူတယ်ဗျို့။ ။

          သင်သည် အရာခပ်သိမ်းကို သဘောတူ လက်ခံနေမှတော့ သင် တို့နှစ်ယောက်အကြား ဆွေးနွေးစရာ ဘာရှိတော့မည်လဲ။ စကားလက်ဆုံ ကျစရာ အကြောင်းအချက် သိပ်များများ ရှိမည်မဟုတ်တော့။ ထိုနည်းတူ စွာပင် သင်တို့ တစ်ဦးနှင့်တစ်ဦး အတွေးအမြင်ချင်း ဖလှယ်စရာ အချက် အလက်ရယ်လို့ ရှိတော့မည်မဟုတ်။ သည်တော့ တစ်ဖက်လူပြောသရွေ့ ကို သင်က ခေါင်းတညိတ်တည်းညိတ်ပြီး တစ်ဖက်လူက ဟောပြော “ပို့ချနေသည်ကို သင်က နာယူမှတ်သားနေသည့်ပုံစံပဲ ဖြစ်နေတော့မည်။ သင်တို့နှစ်ယောက်ကို ကြည့်ရတာ အဆင်ပြေပါသည်။ စိတ်ချမ်းသာစရာ ကောင်းပါသည်။ ဘာအဖုအထစ်မျှမရှိ။ ဘာအငြင်းအခုံမျှမရှိ။ တစ်ခု တော့ရှိသည်။ သင်တို့နှစ်ယောက်၏ စကားဝိုင်းတွင် တစ်ဖက်လူက ပြောသူသက်သက်၊ သင်က နားထောင်သူသက်သက်။ သည်စကားဝိုင်း တွင် သင့်အခန်းကဏ္ဍက မှေးမှိန်လွန်းသည်။ သင်၏ အကြံပြုချက်၊ ပါဝင်ဆွေးနွေးချက်ရယ်လို့ မရှိတော့။

          သည်လို ပုတ်သင်ညိုအဖြစ်ကို မခံယူလိုသည့်အတွက် တစ်ဖက်လူ၏ တင်ပြချက်များကို လက်မခံ၊ သဘောမတူဘဲ ငြင်းခုံတော့မည် ဆိုပါစို့။ ထိုအခါ ဤအစွန်းတစ်ဖက်ကို ရှောင်ရတော့မည်။ ၎င်းအစွန်း တစ်ဖက်တွင်တော့ ...

ဟုတ်ကဲ့၊ ဒါပေမဲ့.....။ ..

ဒါတော့ ကျုပ် လုံးဝသဘောမတူဘူး။

 ... အဲဒီနေရာမှာ ခင်ဗျားမှားနေပြီ။

... အဲဒါကတော့ ခင်ဗျားပြောသလို မဟုတ်ဘူးနော။

          သည်စကားမျိုးတွေကတော့ တစ်ဖက်လူပြောသရွေ့ ကို သဘောမ တူ လက်မခံဘဲ ဘူးခံငြင်းသူတစ်ဦး ပြောတတ်သည့် စကားမျိုး။ သည် လူစားတွေက အငြင်းသန်သည့် လူစားတွေ။ တစ်ဖက်သား၏ စကားကို သဘောမတူ လက်မခံကြောင်း ငြင်းခုံပြီး မိမိ၏ ကြီးမြတ်မှု၊ သာလွန်မှုကို ပြချင်ကြသူတွေ။

          သည်လို ပြုကျင့်တတ်သူများသည် များသောအားဖြင့် ပညာရှင် တွေ၊ အဆင့်မြင့်ပညာ သင်ယူထားသူတွေ ဖြစ်လေ့ရှိ၏။ အဘယ်ကြောင့် ဆိုသော် ထိုသို့ ငြင်းခုံဖို့၊ ပယ်ချဖို့ သူတို့ကို အားပေးအားမြှောက် လုပ်ပေး ထားသောကြောင့်ပင်။ ဤစိတ်မျိုးသည် တစ်ဖက်လူအား တော်တော်ကြီး စိတ်ကသိကအောက် ဖြစ်စေ၏။ ဤစိတ်မျိုးကို လှပသောစိတ်၊ နှစ်လို ဖွယ်ကောင်းသောစိတ်ဟူ၍ သတ်မှတ်ဖို့ အလွန်ခက်ပါသည်။

          သည်တော့ သင်သည် ခင်မင်နှစ်လိုဖွယ်ကောင်းသူတစ်ဦး ဖြစ်လို လျှင်.....

          သင့်အနေဖြင့် အထက်ဖော်ပြပါ အစွန်းနှစ်ဖက်ကို ရှောင်ရမည်။ ထိုအစွန်းနှစ်ဖက်၏အကြား တစ်နေရာရာတွင် ရှိနေရပါမည်။ သင့်အနေ ဖြင့် တစ်ဖက်လူပြောသရွေ့ အစစအရာရာတိုင်းကို သဘောတူ ခေါင်း ညိတ်နေဖို့မလို။ ထိုနည်းတူစွာပင် ပြောသရွေ့ အရာရာတိုင်းကို ပစ်ပယ်ငြင်းခုံနေလို့လည်း မဖြစ်ပါ။

          ဤအချက်သည် အတ္တတရားနှင့် များစွာ သက်ဆိုင်နေ၏။ ငြင်းခုံ မှုတစ်ရပ်သည် အတ္တမာနများအကြား ဆင်နွှဲသည့် တိုက်ပွဲတစ်ပွဲနှင့် တူပါသည်။ သင်က သဘောတူ လက်ခံလိုက်လျှင် သင့်ဘက်က အညံ့ခံ အရှုံးပေးလိုက်ရာရောက်၏။ သည်တော့ သင်ရှုံးပြီ။ သင်က သဘောမတူ လက်မခံဘူးဆိုလျှင် သင်၏ အတ္တမာနကို တင်းတင်းမာမာ ပြတ်ပြတ် သားသား ထိန်းထားရာရောက်၏။ သည်အပြုအမူက သင်သည် တစ် ဖက်လူထက် သာလွန်ကြောင်း ပြသရာရောက်၏။

          ဤအလေ့အကျင့် အပြုအမူများအားလုံးနှင့် ငြင်းခုံခြင်းကို ဝါသနာထုံအောင် အားပေးအားမြှောက်ပြုခဲ့သည်မှာ ကျောင်းများတွင် ကျင်းပလေ့ရှိသည့် စကားရည်လုပွဲများပင်တည်း။ ထို့အတူ လူ့အဖွဲ့ အစည်းအတွင်းတွင် လည်းကောင်း၊ အစိုးရအဖွဲ့ အစည်းများအတွင်း တွင် လည်းကောင်း၊ တရားရုံးတော်များအတွင်းတွင် လည်းကောင်း၊ သတင်းနှင့် စာနယ်ဇင်းလောကအတွင်းတွင် လည်းကောင်း ဝေဖန်ခြင်း၊ ငြင်းခုံခြင်း၊ စောဒကတက်ခြင်း အမှုများ ပြုလေ့ပြုထရှိကြ၏။ ဤအလေ့ အထအားလုံးက ငြင်းခုံခြင်းကို နှစ်ခြိုက်စွဲမက်လာအောင် အားဖြည့်ပေး ပါသည်။

           နိုင်ငံရေးလောကတွင် အာဏာရပါတီပြောသမျှ၊ ဆောင်ရွက်သမျှ အားလုံးကို အတိုက်အခံပါတီက ငြင်းပယ်ဖို့၊ ပယ်ချဖို့ အခွင့်အရေးကိုပဲချောင်းကြ၏။ အာဏာရပါတီလုပ်သမျှ မကောင်းပြောကြ၏။ ထို့အတူ အာဏာရပါတီကလည်း ပြန်လှန်ဝေဖန်တိုက်ခိုက်၏။ ပုတ်ခတ် အပြစ်ပြော၏။ ဤအပြုအမူမျိုးသည် အလွန်မတန် ပေါကြောင်မိုက်မဲသော အပြုအမူဖြစ်သည်ဟု ယခုခေတ်လူများစုက သိမြင် သဘောပေါက်လာပါပြီ။

          သင်သည် အချေအတင် ငြင်းခုံပွဲတစ်ခု ပေါ်ပေါက်လာတိုင်း သင်ပဲ အမြဲအနိုင်ရဖို့ ဇွတ်ကြိုးစားသည်ဆိုလျှင် မုန့်လုံးစက္ကူကပ်သလို ချာလ ပတ်လည်နေခြင်းဖြင့်သာ ကြုံပါလိမ့်မည်။ တစ်ခုပဲရှိသည်။ သင်၏ အငြင်းအခုံ အရည်အသွေးတော့ တက်လာမည်ဖြစ်၏။

          အငြင်းအခုံတစ်ခုတွင် သင် ရှုံးသွားသောအခါ ပြဿနာတစ်ရပ် အတွက် ရှုထောင့်အသစ်တစ်ခု၊ အတွေးအမြင်အသစ်တစ်ခုကို သင် ရကောင်းရလာနိုင်၏။ ကိုယ့်ဘက်က အမြဲမှန်နေဖို့ လိုသည်ဆိုသည့် အချက်သည် ဤကမ္ဘာလောကကြီးပေါ်တွင် အရေးပါအရာရောက်ဆုံး အချက် မဟုတ်ပါချေ။ ပြီးတော့ ဤအယူအဆသည် အလွန်မတန် လှပသည့် အယူအဆ မဟုတ်တာလည်း သေချာပါသည်။

          ဆွေးနွေးခြင်းသည် အတ္တမာနများ အပြိုင်နွှဲသည့် တိုက်ပွဲတစ်ခု မဖြစ်သင့်ပါ။ ပြဿနာတစ်ရပ်အတွက် အဖြေရှာဖို့ ရိုးသားစစ်မှန်သော အားထုတ်မှုတစ်ရပ်သာ ဖြစ်သင့်ပါသည်။

ကြောင်းကျိုးဆက်စပ်မှု ပူဖောင်း

          ကျွန်တော်ရေးသားပြုစုသည့် ယခင်စာအုပ်တစ်အုပ်ထဲတွင် ကြောင်းကျိုးဆက်စပ်မှု ပူဖောင်း ဆိုသော အသုံးအနှုန်းတစ်ခု တီထွင်ခဲ့ ၏။ လူတစ်ဦး၏ တစ်စုံတစ်ခု ပြုမူသည်။ သို့မဟုတ် ပြောဆိုသည်။ သူ့အပြုအမူကို သင်က မနှစ်မြို့ ။ သို့မဟုတ် သူပြောဆိုချက်ကို သင်က သဘောမတူ၊ လက်မခံနိုင်။ ထိုအခါ သင့်အနေဖြင့် ထိုလူကို မိုက်မဲသူ။ အသိပညာ ခေါင်းပါးသူ သို့မဟုတ် ယုတ်မာကောက်ကျစ်သူ စသည်ဖြင့် တံဆိပ်ခတ်ပစ်လိုက်လို့ ရ၏။

          သို့ပေမဲ့ ထိုသူ သို့မဟုတ် သူမသည် သူ၏ ကြောင်းကျိုးဆက်စပ်မှု ပူဖောင်း အတွင်းမှ အမှန်တကယ် အကျိုးသင့်အကြောင်းသင့် ပြုမူပြောဆိုနေတာ ဖြစ်နိုင်၏။ အဆိုပါ ပူဖောင်းသည် ထိုလူ၏ အာရုံသိများ၊ တန်ဖိုးများ၊ လိုအပ်ချက်များနှင့် အတွေ့ အကြုံများဖြင့် ဖွဲ့စည်းထားသည်။ သင်ကသာ အမှန်တကယ် အားထုတ်မည်ဆိုလျှင် အဆိုပါ ကြောင်းကျိုး ဆက်စပ်မှု ပူဖောင်း အတွင်းသို့ ဝင်ရောက်ကြည့်မြင်လို့ရ၏။ တစ်နည်း ဆိုသော် ထိုလူ ဘယ်ကလာသလဲဆိုတာ လေ့လာလို့ရ၏။ ထိုအခါ ထိုလူ၏ အခြေအနေ သို့မဟုတ် ထိုလူ၏ သဘောထားကို အကဲခတ်လို့ရ၏။

           စာသင်ကျောင်းတွင် သင်ကြားပို့ချခဲ့သည့် စဉ်းစားတွေးခေါ်မှု အစီအစဉ် (CoRT program) တွင် အာရုံစိုက်မှုကို ထိန်းကျောင်းပေး သည့် နည်းလမ်းများ ပါဝင်သည်။ ၎င်းနည်းလမ်းများက အသိအမြင် များ ကျယ်ပြန့်လာစေ၏။ သည်တော့ စဉ်းစားတွေးခေါ်သူသည် အကြောင်းကိစ္စတစ်ရပ်ကို ကျယ်ကျယ်ပြန့်ပြန့် ရှုမြင် သုံးသပ်လို့ရသည်။ နောက်ပြီး ထိုအတိုင်း အရေးယူ ဆောင်ရွက်လို့ရသည်။ ၎င်း နည်းလမ်း များမှာ လားရာအရပ် ညွှန်ကြားချက်အဖြစ် အသုံးပြုသည့် အရှေ့၊ အနောက်၊ တောင်၊ မြောက်တို့နှင့် ဆင်တူသည်။

          ၎င်းနည်းလမ်းတွေထဲမှ တစ်ခုမှာ အခြားသူ၏ ရှုထောင့်မှကြည့်ဖို့ အားပေးသည်။ အခြားသူ၏ ရှုထောင့်မှ ကြည့်နည်းကို သင်ယူ ဆည်းပူး ထားသောအခါ တစ်ဦးကိုတစ်ဦး သဲကြီးမဲကြီး တိုက်ခိုက်နေသည့် တိုက်ပွဲ တွေ ရုတ်တရက် ရပ်တန့်သွားသည့် သာဓကတွေ မြောက်မြားစွာ ရှိပါ သည်။ အခြားသူ၏ ရှုထောင့်မှ ဝင်ကြည့်ခြင်းသည် အခြားသူ၏ ကြောင်းကျိုးဆက်စပ်မှု ပူဖောင်းထဲ ဝင်ကြည့်သည်သို့ ရှိလေသည်။

ထူးခြားအခြေအနေများ

          သဘောထားကွဲမှုအဖြစ်မှ သဘောတူညီမှုအဖြစ်သို့ ပြောင်းလဲစေ သည့် အဓိကနည်းသည် ဤနည်းဖြစ်၏။

          သင် ချက်ချင်းထပြီး ဆန့်ကျင်ကန့်ကွက်မည့် ပြောဆိုချက်တစ်ခု ကို တစ်စုံတစ်ဦးက ပြောဆိုသည်။

မိန်းမများသည် ဘိုးတော်များနှင့် ဗေဒင်ဆရာများကို ယောက်ျား များထက် ပိုပြီး ယုံကြည်အားထားကြသည်။

          သင့်ခေါင်းထဲ ချက်ချင်းပေါ်လာသည့် တုံ့ပြန်မှုမှာ ဤပြောဆို ချက် မမှန်ဟူ၍ ဖြစ်၏။

          မိန်းမများသည် ဗေဒင်ဆရာများကို ယုံကြည်အားကိုးတာ ဟုတ် ချင်မှ ဟုတ်မှာပေါ့။ ဗေဒင်ဆရာများကို ယုံကြည်အားကိုးခြင်း မဟုတ် သည့်တိုင် သူတို့သည် ဗေဒင်ဆရာများ၏ ဟောကြားချက်များကို စိတ်ပြေလက်ပျောက်အဖြစ် နားထောင်ကြတာလည်း ဖြစ်နိုင်တာပဲ။ တစ် နည်းတစ်ဖုံအားဖြင့် ငြီးငွေ့စရာကောင်းသည့် ဘဝများမှာ ကျင်လည်နေရ သည့် မိန်းမသားများအနေဖြင့် ဗေဒင်ဆရာများ ဟောကိန်းထုတ်သော ဖြစ်ရပ်အသစ်အဆန်းများကို နားထောင်ပြီး ကြည်နူးချင် ကြည်နူးနေကြမှာပေါ့။

          ဟိုတုန်းကဆိုလျှင် မိန်းမသားများသည် သူတို့ဘဝသူတို့ မပိုင် ကြ။ သူတို့ဘဝသူတို့ ထိန်းချုပ်ခွင့်အပြည့်အဝမရကြ။ သည်တော့ သူတို့ ဘဝတွင် ဘာတွေ အသစ်အဆန်းဖြစ်လာမည်လဲဆိုတာလောက်ပဲ ငံ့မျှော် နေကြရသည်။ သူတို့မှာ နိုင်ငံရေးအာဏာမရှိ။ စစ်ရေးအာဏာလည်းမရှိ။ သည်တော့ သူတို့ အားကိုးအားထားပြုရမည့် အာဏာကို ရှာရတော့၏။ သူတို့ ရှာလို့ရသည့်အာဏာမှာ ဂမ္ဘီရပညာ သို့မဟုတ် လျှို့ဝှက်ဆန်း ကြယ်သော လောကီပညာမှရသည့် အာဏာပင်တည်း။ ဆိုလိုသည်မှာ

ဘာသာပြန်သူ၏ အမှာ ဘာ

          စိတ်အလှဖြင့် ဘဝကို အလှဆင် စာအုပ်သည် How to have a Beautiful Mind by Edward de Bono ကို ဘာသာပြန်ထား ခြင်းဖြစ်ပါသည်။ ဒီဘိုးနိုးသည် စဉ်းစားတွေးခေါ်မှုနယ်ပယ်တွင် နှစ် ပေါင်းသုံးဆယ်ကျော် ကျင်လည်ခဲ့သူ ဖြစ်၏။ သူက ရှေးရိုးစဉ်လာ စဉ်းစားတွေးခေါ်နည်းကို တော်လှန်ပြီး ပိုမိုထက်မြက် ထိရောက်သော စဉ်းစားတွေးခေါ်နည်းများကို တီထွင် မိတ်ဆက်ပေးခဲ့သည်။ သိသာသော အကျိုးကျေးဇူးများကို ခံစားကြရသည်။ ဒီဘိုးနိုး၏ အားထုတ်ကြိုးပမ်းမှုကြောင့် နိုင်ငံတော်တော်များများရှိ စာသင်ကျောင်းများတွင် စဉ်းစားတွေး | ခေါ်ခြင်းကို ဘာသာရပ်တစ်ခုအဖြစ် သင်ကြားပို့ချနေလေပြီ။

           ဆရာကြီး ဒီဘိုးနိုး၏စာများနှင့် မြန်မာစာဖတ်ပရိသတ် သိပ်စိမ်း လှသည် မဟုတ်ပါ။ ဒီဘိုးနိုးကို မြန်မာစာဖတ်ပရိသတ်နှင့် ဦးစွာ မိတ် ဆက်ပေးခဲ့သူမှာ ဆရာကိုတာ ဖြစ်ပါသည်။ ကိုတာ၏ကျေးဇူးကြောင့် ကျွန်တော်လည်း ဒီဘိုးနိုး၏ စာများကို မြည်းစမ်း ဖတ်ရှုခဲ့သည်။ ထို့ နောက် Six Thinking Hats(ဦးထုပ်ခြောက်လုံးတွေးခေါ်နည်း)နှင့် Six Action Shoes(ဖိနပ်ခြောက်ရန်ဆောင်ရွက်နည်း) တို့ကို ဘာသာပြန်ခဲ့၏။

          ယခုလာပြန်ပြီ။ စိတ်အလှဖြင့် ဘဝကို အလှဆင်။ ဤစာအုပ်တွင် လည်း စဉ်းစားတွေးခေါ်မှု ပုံစံအမျိုးမျိုးကို မိတ်ဆက်ပေးထားသည်။ သို့သော် အဓိက ဇောင်းပေးတင်ပြထားသည်မှာ နှုတ်ရေးနှုတ်ရာ ပြော နည်းဆိုနည်းများ ဖြစ်၏။ စကားဝိုင်းများနှင့် ဆွေးနွေးပွဲများတွင် လိမ္မာ ပါးနပ်စွာ ပြောတတ်ဆိုတတ်အောင် လေ့ကျင့်ခြင်းဖြင့် ချစ်သူခင်သူ မိတ်ဆွေတွေများလာအောင်၊ မိမိကိုယ်မိမိ နှစ်လိုဖွယ်ကောင်းသူတစ်ဦး ဖြစ်လာအောင် တည်ဆောက်ယူဖို့ ဤစာအုပ်တွင် နည်းပေးလမ်းပြ ထား၏။ မိုးဂျာနယ်မှ ကိုအောင်မျိုး၏ အကူအညီတောင်းမှုကြောင့် မိုးဂျာနယ်တွင် နှစ်လိုဖွယ်ကောင်းသူတစ်ဦး ဖြစ်လာစေဖို့ ခေါင်းစဉ်ဖြင့် လစဉ် ဘာသာပြန်ဖော်ပြခဲ့ကြောင်း စာဖတ်ပရိသတ်အား အသိပေးလိုပါ သည်။

          ထုံးစံအတိုင်း ဤစာအုပ်သည် ဒီဘိုးနိုး၏ စာအုပ်ဖြစ်သည့် အလျောက် စာအုပ်ဆိုင်များတွင် တွေ့နေကျ၊ မြင်နေကျ စာအုပ်မျိုး မဟုတ်တာတော့ သေချာပါသည်။ ။

          ကျွန်တော်တို့ မြန်မာအများစု မသိသေး၊ မတတ်သေး၊ မစဉ်း စားမိသေးတာတွေတော့ တွေ့ရ ဖတ်ရမည်ဖြစ်၏။ လူ့ဘဝဆိုသည်မှာ တစ်သက်လုံး မဆုံးနိုင်သော သင်ယူမှု ဖြစ်စဉ်ကြီးဖြစ်သည် ဆိုသော အဆိုအမိန့်အတိုင်း ကျွန်တော်တို့လို မပြည့်အိုးများအနေဖြင့်တော့ နည်း နည်းရရ၊ များများရရ ဖြည့်ဆည်းဖို့ ကြိုးစားနေရမည်သာ ဖြစ်ပါသည်။

         စာဖတ်ပရိသတ်များ စိတ်အလှဖြင့် ဘဝကို အလှဆင်နိုင်ပါစေ သတည်း။

စာဖတ်သူများအား လေးစားလျက်

မြတ်ငြိမ်း