မောင်မောင်မြင့်သိန်း(စက်မှုတက္ကသိုလ်) - လူထုရဲ့လူလင်ကွန်းရဲ့ရုပ်ပုံလွှာကောက်ကြောင်းများ

လင်ကွန်းကို ကျွန်တော်မြင်ပုံ

သမိုင်းသူရဲကောင်းများတွင် အေဘရာဟင်လင်ကွန်းသည် အစစ် မှန်ဆုံး အမေရိကန်ပြယုဂ်အဖြစ် ပေါ်လွင် ထင်ရှားသည်။ ဘဝကြမ်းလှသော နယ်စပ်ဒေသတွင် ဆင်းရဲချို့တဲ့သော မိဘမှ မွေးဖွားလာခဲ့သော သူ၏ တစ်ဟုန်ထိုး ထွန်းပေါက်လာမှုသည် မလျော့မနည်း အားတက်စရာပင် ဖြစ်သည်။ လင်ကွန်းသည် သူ့ဘဝ တစ်လျှောက်လုံးတွင် ဆက်လက်ကြီး ထွား၊ သူ့ကိုယ်သူ ထပ်မံမွမ်းမံမှုမပြတ် ပြုခဲ့သည်။ နှစ်ပေါင်း ၂၀၀ နှောင်းမှာ ပင်လျှင် သူ၏ လမ်းညွှန်မှုကို ကျွန်တော်တို့ မျှော်ကိုးနေကြသေးသည်။ အမှန်အတိုင်းပြောရပါလျှင် ကျွန်တော်တို့ သည် ကျွန်တော်တို့ ၏ ၁၆ယောက်မြောက် သမ္မတကို တုပခြင်းထက် ပို၍ကောင်းသောနည်းဖြစ် ဘဝ ထူထောင်ရန် မရှိပါ။ မဆုတ်မနစ်အမေရိကန်ပီသစွာ ရည်မှန်းချက် ကြီးမား ခဲ့သည့်တိုင်အောင် ကိုယ့်ရိုးဂုဏ်ကို အထိပါးခံ လိုက်လျောမှုမပြုနိုင်လောက် အောင်ပင် ခံယူချက်ခိုင်မာခဲ့သူလည်း ဖြစ်ခဲ့သည်။

ကျွန်တော်တို့ လင်ကွန်းကား မည်သည့် အခါမှ ငြီးငွေ့ဖွယ်ရာ မဖြစ်ချေ။ ရိုးစင်းသောသူ၊ နားလည်ရ ခက်သောသူ၊ မကျွမ်းကျင်သော အလုပ်ကြမ်းသမား၊ လူနောက်၊ သင်းခွဲနေတတ်သူ၊ လက်တွေ့လုပ်တတ်သူ။ စိတ်ကူးမျှော်မြင်မှု ပြုတတ်သူစသဖြင့် ထွေပြားလှသည်။ သူ့ကို ကျွန်တော်တို့နားလည်ပြီဟု ထင်မှတ်ခါမှ ကျွန်တော်တို့အထင်နှင့် တလွဲအသွင်ခံယူတတ် ပြန်သည်။ သူသည် ချောင်ပိတ်သတ်မှတ်၍ မရသော လူစားဖြစ်သည်။ ကာလတိုင်းအနေအထားတိုင်းအတွက် လင်ကွန်းရှိသည်။ ။

ပညာရှင်တို့သည် လင်ကွန်း၏ များမြောင်လှသော အသွင်တို့တွင် ကုန်ကြမ်းရှာတွေ့ကြသည်။ သူတို့သည် သူ့ဘဝ၏ အနှစ်သာရကို ဆန်းစစ် သည်။ သူ၏ ကြေကွဲဖွယ်ရာ ဘဝနိဂုံး၏ ပို၍နက်ရှိုင်းသော အနက်ကို ဖွင့်ဆိုသည်။ သူ၏ လူမျိုးရေးအမြင်က မည်သို့ဖြစ်ထွန်းလာခဲ့ပါသနည်း။ ကျွန်စနစ်ဖျက်သိမ်းရေးကိစ္စကို သူ မည်သည့်အတွက်ကြောင့် သတိကြီးစွာ ထား၍ ဆောင်ရွက်ခဲ့ပါသနည်း။ စစ်တလင်းတွင် အောင်ပွဲခံနိုင်မှုနှင့် ပြည်ပ ရပ်ခြားမှ အပံ့အပိုးလိုအပ်မှုကြောင့်သာလျှင် ထိုကဏ္ဍကို ဆောင်ရွက်ခဲ့ပါ သလား။ ကျွန်တော်တို့ ကို နိုင်ငံသားအခွင့် အရေးအပြည့် အဝပေးရန် သဘောထားကို မည်သည့် အခါတွင် သူစတင်ခံယူခဲ့သနည်း။ သူ ၏ ပြန်လည်ထူထောင်ရေးအစီအစဉ်သည် ကျွန်တော်တို့ကို တရားဝင် ညီတူ ညီမျှအခွင့်အရေးပေးလျက်ကပင် တောင်နှင့် မြောက်ကို ပြန်လည်စည်းရုံး နိုင်ပါမည်လား။ လင်ကွန်းသည်သာလျှင် သူသေဆုံးပြီးနောက် ဖြစ်ထွန်း ခဲ့သော လူမျိုးရေးဆက်ဆံမှု၏ ကြေကွဲဖွယ်ရာလမ်းကြောင်းမှ နေ၍ကျွန်တော်တို့ကို ပဲ့ထိန်းခွာနိုင်ခဲ့ပေသည်။ အမေရိကန်သမိုင်းသုတေသီတို့၏ ဂုရုအဖြစ် သတ်မှတ်ခံရသော အာဖရိကန်-အမေရိကန်လူမျိုးပညာရှင် ဂျွန်ဟော့စ်ဖရန်ဂလင်းဆိုသည်ကဲ့သို့ “အမေရိကန်သမ္မတတွေအားလုံးမှာ လင်ကွန်းတစ်ယောက်သာ ညမအိပ်ဘဲ ကျွန်တော့် လူမျိုးတွေရဲ့ ကံကြမ္မာ အကြောင်း တွေးတောပူပန်ခဲ့တယ်”ဟု ဆိုရမည်။ ။

မျက်မှောက်ကာလတွင် လင်ကွန်းအား သူ့နိုင်ငံသားအားလုံးနီးပါးက နှစ်လိုကြပါသော်လည်း သူ အသက်ရှိစဉ်ကာလက သူသည် ရာသီစုံ ၊ အကြောင်းရပ်စုံနှင့် အလျဉ်းသင့်သော သူ မဟုတ်ခဲ့ချေ။ တောင်ပိုင်းသား အများအပြားနှင့် ဖျက်သိမ်းရေးသမားများက သူ့ကို မနှစ်လိုခဲ့ကြချေ။ ကျွန်ဟောင်းတစ်ဦးဖြစ်ပြီး ဖျက်သိမ်းရေး စာရေးဆရာ၊ စာတည်းနှင့် နိုင်ငံ ရေးပြုပြင်ရေးသမား (အင်္ဂလန်နိုင်ငံတွင် လူရိုသေ ရှင်ရိုသေဆုံးသူ) ဖြစ်လာ ခဲ့ သော ဖရက်ဒရစ် ဒေါက်ကလပ်သည် လင်ကွန်းအား ကျွန် စနစ်ဖျက်သိမ်းရေးကိစ္စဆောင်ရွက်ရန်အတွက် လေးဖင့်လွန်းခဲ့သည်ဟု အပြစ် ဆိုသည်။ လင်ကွန်းသည် တောင်ပိုင်းတော်လှန်ပုန်ကန်မှုတွင် ပါဝင်ပတ် သက်မှုမပြုခဲ့သော ကျွန်ထားသည့် နယ်စပ်ပြည်နယ်များပေါ်သက်ညှာလွန်း ခဲ့သည်ဟု ဒေါက်ကလပ်က ယူဆသည်။ ဒေါက်ကလပ်သည် လင်ကွန်း၏ နိုင်ငံရေးပရိယာယ်ကို နောက်မှ သဘောပေါက်လာခဲ့သည်။ သမ္မတလင် ကွန်းသည် အမေရိကန် နိုင်ငံသားတို့အား ဖျက်သိမ်းရေးမူသို့ မည်မျှမြန်ဆန် စွာနှင့် မည်မျှတာရောက်အောင် ထွက်နိုင်သည်ကို ကျွမ်းကျင် လိမ္မာစွာ သဘောပေါက်သူတစ်ဦးဖြစ်နေခဲ့သည်။

ပညာယူရန် အမြဲတစေအသင့်ရှိနေခဲ့သော လင်ကွန်းသည် အတိုက် အခံသမားတို့ကို အိမ်ဖြူတော်သို့ ဖိတ်ခေါ်ခဲ့သည်။ သူသည် သူတို့၏ ရိုးသား မှုကို အလေးထားခဲ့သည်။ ထိုသူတို့တွင် ဒေါက်ကလပ်လည်း ပါဝင် ခဲ့သည်။ အခြားတစ်ဦးမှာ အန်နာဒစ်ကင်းဆန်းဖြစ်သည်။ သူသည် ကွေကာလှုပ်ရှား ရေးသမား ဖျက်သိမ်းမှုစနစ် ဝါဒီဖြစ်ခဲ့သည်။ အမျိုးသမီးတို့ အခွင့်အရေး အတွက် ရှေ့တန်းမှ တိုက်ပွဲဝင်ဆော်ဩနေဖြစ်ခဲ့သည်။ လင်ကွန်းအား လွန်စွာ အထင်ကြီးလေးစားသူတစ်ဦးဖြစ်ခဲ့သည်။ သို့ သော် သူမက မောက်ကြွားသော နိုင်ငံရေးအကြံအဖန်သမား ဗိုလ်ချုပ်ဂျော့ခ်ဘီမက် ကလီလ်လန်အား နိုင်ငံတော်သစ္စာဖောက်မှုဖြင့် တရားစွဲ ဆိုသည်ကို လင်ကွန်းက မထောက်ခံခဲ့သောကြောင့် လင်ကွန်းကို တိုက်ခိုက်လာခဲ့သူ ဖြစ်သည်။ လင်ကွန်းသည် အမေရိကန်လူမျိုး လူစား အစုံစုံအဖုံဖုံ၏ စကားကို တလေးတစားနားထောင်ခဲ့သည်။ နီဂရိုးဖျက်သိမ်းရေးဝါဒီမှသည် ကွေကာ လှုပ်ရှားသူများအထိ သူ၏ ကက်ဘိနက်အဖွဲ့ ဝင်ပါရမီရှိ အဆင့်မြင့် စွမ်းအား ရှိ ပုဂ္ဂိုလ်ထူးတို့မှသည် သူ့နိုင်ငံရေးပြိုင်ဘက်များ၏ စကားအထိ လူသား အားလုံး၏ စကားကို နားထောင်သည်။ သို့သော် အရေးကြီးသော ဆုံးဖြတ် ချက်များကို သူတစ်ဦးတည်းသာချခဲ့သည်။

ခေါင်းဆောင်တစ်ဦးအနေဖြင့် လင်ကွန်းသည် အလွန်သတိထား လှုပ်ရှားခဲ့သည်။ နိုင်ငံရေးလေကို အမြဲတစေ စမ်းသပ်နေခဲ့သည်။ သူသည် မကြာခဏစိတ်ပြောင်းခဲ့သည်။ နာမည်ကြီးသမိုင်းပညာရှင် ဂျိမ်းဟေတွန် ၏ ခေတ်သစ်စကားဖြင့် ပြောရလျှင် သူသည် အတ္တိမ ဖလပ်ဖလပ်သမားဖြစ်ခဲ့သည်။ သို့သော် လူမှုရေး သိပ္ပံ ပညာရှင်ကြီး ဒဗလျူအီဘီဘွိုင်စ် က လင်ကွန်းအား “မပြတ်မလပ်ပြောင်းလဲနေနိုင်လောက်အောင် ကြီးမား သည်” ဟု ညွှန်းစကားဆိုသည်က အခြေခံအမှန်တရားထောက်ပြချက် ဖြစ်သည်ဟု ယူဆပါသည်။

လင်ကွန်းကို ကျွန်မသဘောအကျဆုံးအချက်မှာ သူ၏ မြင့်မြတ်သော စရိုက်ပင်ဖြစ်သည်။ သမိုင်းပညာရှင် ဂျွန်စတပ်ဖ်ဖာက သူ၏ ၁၉ ရာစု သဘာဝ ကိုယ်ထူကိုယ်ထဖြစ်ထွန်းပုံကို ဖော်ကျူးရာတွင် ညွှန်းဆိုသော စရိုက်ကို ဆိုလိုသည်။ သူ၏ အတွေးအခေါ်ကို သာတူညီမျှမှုနှင့် လွတ်လပ်မှု အတွေးအခေါ်တို့တွင် အခြေခံထားသောကြောင့် လင်ကွန်းထံမှ အရာအား လုံးကို စိတ်ကူးထဲ တွေးမြင်ခံယူနိုင်သည်။ သူသည် လူမျိုးရေးပြဿနာကို ဖြေရှင်းကောင်း ဖြေရှင်းနိုင်ခဲ့မည်။ အမျိုးသမီးများကို သာတူညီမှု အခွင့်အရေး ပေးနိုင်ကောင်းပေးနိုင်မည်။ အခြားသူအားလုံးတို့ထက် ပို၍ အမေရိကန် သူရဲ ကောင်း ပိုပီသသည်။

လင်ကွန်းနှင့် သူ့ဇနီးသည် မေရီတော့ဒ်လင်ကွန်းသည် သူ လုပ်ကြံ သတ်ဖြတ်မခံရခင်အချိန်ကာလ အနည်းငယ်စောစော နေသာသော နွေဦး ပေါက်တစ်ရက်တွင် မြင်းရထားစီးထွက်ခဲ့သည်။ ပြည်တွင်းစစ်ပြီးကာစ ဖြစ်သည်။ အကောင်းမြင်ဝါဒလွှမ်းနေခဲ့သည်။ လင်ကွန်းသည် အနာဂတ်ကို ရှုမျှော်သုံးသပ်လိုက်သည်။ သူ့သမ္မတ သက်တမ်းကုန်လျှင် သူတို့ဥရောပနှင့် ဥရောပအလွန်သို့ ခရီးထွက်နိုင်ရန် မျှော်လင့်ကြောင်း လင်ကွန်းက သူ့ဇနီး သည်ကို ပြောလိုက်သည်။ ထိုသို့ဖြစ်ခွင့်မသာခဲ့ချေ။ သို့သော် ပို၍ကြီးမြတ်သော သဘောသဘာဝအရ လင်ကွန်းသည် ကမ္ဘာတစ်ဝန်းခရီးနှင်ခဲ့ပြီးဟု ဆိုရမည်။ သာမန်လူတစ်ဦး သူ့ကိုယ်သူ အသစ်တစ်ဖန်ပြုပြင်တည်နိုင်သည် ဟူသော အချက်ကား ကျွန်တော်တို့အတွက် လှုံ့ဆော်အားပေးချက်အဖြစ် လုံလောက်ပေသည်။