နန္ဒာသိန်းဇံ - အတွေးအခေါ်တို့လွှင့်မျောခြင်းနှင့်လူ၏ဆောက်တည်ရာ

လူသည် လူကိုနားလည်ရန် ကြိုးစားရာမှ ဖြစ်ပေါ်လာသော သံသယများ

အနောက်တိုင်း ဘာသာရေး၊ ဒဿနပညာတို့ ဝန်းကျင်၌ ကြီးရင့် လာသော လူ၏စိတ်တွင်းသို့ အခြေအနေ အရပ်ရပ် ကြောင့် အောက်ပါ မေးခွန်းများသည် ဝင်လာတတ်ကြ၏။

“အဘယ်ကြောင့် ဤလောကလူ့ဘဝသို့ ငါရောက်လာ လေသနည်း။

 ဤလောကကြီးသို့ တစ်စုံ တစ်ရာသော ရည် ရွယ်ချက်ဖြင့် ရောက်လာခြင်း ပေလော။ ဘာလုပ်ဖို့ အတွက်ရောက်လာလေသနည်း။ ငါ့အား ဤလောကသို့ လာလို သလား၊ မလာလို သလား ....

ကို မမေးမြန်း မဆွေးနွေးဘဲနှင့် ဤလောကသို့ ရောက်လာအောင် အတင်းအကျပ် ပို့ပေးလိုက်သူကား အဘယ်သူနည်း။

 ငါ့ အား ဤလောက သို့ လူအဖြစ်နှင့် လာလို၏ မလာလို၏ ကို သဘောတူညီမှု မယူဘဲ ငါ့အား လူအဖြစ်ဖြင့် ရောက်လာအောင်ပို့လိုက်သူ တန်ခိုးရှင်၊ ဖန်ဆင်းရှင် ရှိလေသလော။

 ထိုသို့ ပို့လိုက်သူမရှိဟု ဆို ပါက.... “ငါသည် ဤလောက လူ့ဘဝသို့ လူ အဖြစ်ဖြင့် ရောက်ရှိ လာခြင်းသည် အကြောင်းမဲ့ ရှောင်တခင် အမှတ်မထင် ရောက်ရှိလာခဲ့ခြင်းပင် လော။

ဤလောကသို့ ငါရောက်ရှိလာခြင်းသည် ကောင်းသောလာခြင်းမှ ဟုတ်ပါလေ၏လော။

 ငါ ရောက်ရှိလာသော လူ့လောကကြီးသည် ကောင်းသော လောကကြီးမှ ဟုတ်ပါ လေ၏လော။

 ငါ ရပ်တည်နေထိုင်ရာ ကမ္ဘာလောကကြီး သည်လည်း ကောင်းသော ကမ္ဘာလောက၊ ... လူအတွက် သင့်တင့်လျောက်ပတ်သော ကမ္ဘာလောက ဟုတ်ပါလေ၏လော။ ဤကမ္ဘာလောကကြီးဖြစ်လာခြင်း၌ ရည်ရွယ်ချက် တစ်စုံတစ်ရာ ရှိပါလေ၏လော ...........။

အခန်း (၁) 

လူ၏ လွင့်လွင့်မျောမျော အတွေးအခေါ်များ

လွန်ခဲ့သော နှစ်ပေါင်း ၁၅ ဘီလျံ* (တစ်ဘီလျံတွင် သန်းတစ်ထောင် ရှိသောကြောင့် ၁၅ ဘီလျံ ဆိုပါက နှစ်သန်းပေါင်း မည်မျှ များမည်ကို ကြည့်ပါ) ခန့်က စကြဝဠာကြီးသည် ပုံသဏ္ဌာန်ဟူ၍ မရှိ

သေး။ ဂြိုဟ်များ၊ ကြယ်တာရာများ၊ ဂယ်လက်ဆီ” ဟုခေါ်သော ကြယ်စုကြီးများလည်း မရှိသေး၊ သက်ရှိဟူ၍လည်း မရှိသေး ... နေရာတကာ၌ အမှောင်ထုကြီးသာ ရှိသည်။ **...ဤသို့ စကြာဝဠာကြီး မဖြစ်ပေါ်မီအခြေအနေကို နက္ခတ္တပညာရှင် ကားလ်ဆေဂန်က တွေးဆပြသည်။ *** အခြားအခြားသော နက္ခတ္တပညာရှင်ကြီးများသည်လည်း စကြဝဠာကြီး မဖြစ်ပေါ်မီက အခြေအနေကို အမျိုးမျိုးတွေးဆခဲ့ကြသည်။

ပုံသဏ္ဌာန် ဟူ၍ မရှိသေးသော အခြေအနေမှ ပုံသဏ္ဌာန်ရှိသော စကြဝဠာကြီး ဖြစ်ပေါ်လာပုံနှင့် ပတ်သက်၍လည်း ပညာရှင်တို့ အမျိုးမျိုး တွေးဆခဲ့ကြ၏။ အချို့က စကြဝဠာကြီးသည် အစ ပထမက ပုံသဏ္ဌာန်ဟူ၍ အတိအကျ မရှိသေးဘဲ ဓာတ်ငွေ့ အစုအဝေးကြီး အဖြစ် ရှိခဲ့ရာမှ နှစ်သန်းပေါင်း များစွာကြာသောအခါ ထိုဓာတ်ငွေ့ အစုအဝေးကြီးသည် တဖြည်းဖြည်း စုစည်းမိ၍ အတိုင်းမသိ သိပ်သည်းမှု ကြီးမားသော အကြောင် အခဲကြီးဖြစ်လာသည်။ နောင်အခါ ထိုရုပ်အစိုင်အခဲကြီးသည် (အချို့က လွန်ခဲ့သော နှစ်ပေါင်း ၁ဝ ဘီလျံ လောက်ကဟု ခန့်မှန်းကြသည်။)

          ပြင်းထန်စွာ ပေါက်ကွဲ သွားသည်ဟု ဆိုကြသည်။* အချို့ကလည်း စကြဝဠာကြီးသည် မူလက ပုံသဏ္ဌာန်ဟူ၍ အတိအကျမရှိသေးဘဲ ဓာတ်ငွေ့ အစုအဝေးကြီးတစ်ခုအနေဖြင့်သာရှိခဲ့သည်။ နှစ်ကာလသန်းပေါင်းများစွာ ကြာသောအခါ ထိုဓာတ်ငွေ့ အစုအဝေးကြီးသည် တဖြည်းဖြည်း စုစည်း ကျစ်လျစ်ကာ အလွန်ပူသော အစုအဝေးလုံးကြီး အဖြစ်သို့ ရောက်ရှိလာ သည်။ ထိုအလွန်ပူသော အစုအဝေးလုံးကြီးသည် လွန်ခဲ့သောနှစ် ၁၈ ဘီလျံခန့်(ဤခန့်မှန်းချက်သည်လည်း အချို့သော ပညာရှင်တို့၏ ခန့်မှန်း ချက်သာ ဖြစ်ပါသည်)က ပြင်းထန်စွာ ပေါက်ကွဲသွားသည်ဟု ဆိုသည်။

ထိုသို့ ရုပ်အစိုင်အခဲကြီး (ဝါ) အလွန်ပူသော အစု အဝေးကြီး ပေါက်ကွဲရာမှ လွင့်စဉ်လာသော အစအနတို့သည် ယခုအချိန်တိုင်အောင် အပြင်သို့ ပြန့်ကားပြေးထွက်နေကြဆဲ ရှိသည်။ ဤသို့ ပြန့်ကားပြေးထွက် နေသော အစအနများသည်ပင် ဤစကြဝဠာ **ကြီး၏ ကြီးကျယ်လှသော “ဂယ်လက်ဆီ ကြယ်အုပ်စုကြီးများ” နှင့် အာကာသ လောကဆိုင်ရာ ဝတ္ထုပစ္စည်းများ” ဖြစ်လာကြသည်။ အချို့ပညာရှင်တို့က အပြင်ဘက်သို့ အစအနများ အနေဖြင့် ပြန့်ကား ပြေးထွက်နေကြသော ထိုဂယ်လက်ဆီ ကြယ်အုပ်စုများ၊ အာကာသဆိုင်ရာ ဝတ္ထုများသည် တဖြည်းဖြည်းနှင့်ပြေးနှုန်း လျော့လာကြပြီ ဖြစ်သည်။ နောင် နှစ်ပေါင်း သန်းပေါင်း သုံးသောင်းခန့်ကြာလျှင် ယင်းတို့၏ ပြေးနှုန်းသည် လျော့သည်ထက်လျော့လာပြီး ရပ်တန့်၍သွားကြမည်။ ထိုသို့ ရပ်တန့်သွားသော အချိန်မှ စ၍ စကြဝဠာကြီးသည် မိမိ၏ ဒြပ်ဆွဲအားကြောင့်ပင် ကျုံ့၍ ကျုံ့၍ လာမည်။ နောင်နှစ်ပေါင်း သန်းပေါင်း လေးသောင်းခန့် ကြာလာပါက စကြဝဠာအတွင်းရှိ အားလုံးသော ဂယ်လက်ဆီများသည် တစ်နေရာ တည်း၌ ပြန်လည် စုစည်းမိကြပြီးနောက် ယခင်ကကဲ့သို့ပင် အတိုင်းမသိ သိပ်သည်းမှု ကြီးမားသော ရုပ်အစိုင်အခဲကြီးဘဝသို့ ပြန်လည် ရောက်ရှိ ပေဦးမည်ဟု တွေးဆကြသည်။အထက်ပါ တွေးဆချက် အတိုင်းသာ ဆိုပါက မူလရုပ်အစိုင်အခဲ ကြီးသည် ပေါက်ကွဲပြီးနောက် စကြဝဠကြီး အနေနှင့် ဖြစ်ပေါ်ပြေး လွှားလိုက်၊ ထို့နောက် မူလရုပ်အစိုင်အခဲကြီးဘဝသို့ ပြန်လည်ရောက်ရှိ လိုက်နှင့် စကြဝဠာ၏ သံသရာသည် အတောမသတ် လည်နေပေလိမ့် မည်။

စဉ်းစားလေ့ရှိ၍ သံသယပွားတတ်သော လူသည် စကြဝဠာ၏ အစသည် သိပ်သည်းခြင်း အတိုင်းမသိရှိသော ရုပ်အစိုင်အခဲကြီး ဖြစ်သည် ဟူသောအဆိုကို “ထိုသိပ်သည်းခြင်း အတိုင်းမသိရှိသော ရုပ်အစိုင်အခဲကြီး ကကော အဘယ်မှအစပြုခဲ့သနည်း၊ အဘယ်မှ စတင်ဖြစ်ပေါ်လာသနည်း" ဟု မေးတတ်၏။ အချို့က အတိုင်းမသိ သိပ်သည်းခြင်း ကြီးမားသော ထိုရုပ်အစိုင်အခဲကြီးသည် အဏုမြူအောက်သေးငယ်သောရုပ်မှန်များမှ အစ ပြုသည်ဟူ၍လည်းကောင်း၊ ဒြပ်သဏ္ဌာန်မဲ့သော စွမ်းအင်မှ အစပြုခဲ့သည် ဟူ၍လည်းကောင်း တွေးဆ ဖြေရှင်းပြတတ်ကြသည်။ ထိုအခါ၌လည်း “ထိုရုပ်မှုန်၊ ထိုစွမ်းအင်တို့ကကော ဘယ်ကစ၍ ဖြစ်လာကြသနည်း” ဟု မေးနိုင်ပြန်သည်။ အချို့က ထိုရုပ်မှုန်၊ ထိုစွမ်းအင်တို့ကို တန်ခိုးတော်ရှင် တစ်ဦးက ဖန်ဆင်းသည်ဟု ဆိုကြသည်။ “ ထိုတန်ခိုးရှင်ကိုတော့ မည်သူက ဖန်ဆင်းသနည်း” ဟူသော ထပ်ဆင့် မေးခွန်းကို တင်လာသော အခါ၌ “ထိုတန်ခိုးရှင်ကိုမူ မည်သူကမျှ မဖန်ဆင်း၊ မည်သူကမျှ အကြောင်းမပြု၊ ထိုတန်ခိုးရှင်သည် အကြောင်းပြုမှု ကင်းသော (ဝါ) အကြောင်းမဲ့သော အကြောင်းတရားသာဖြစ်သည်။ အစမရှိသော အစ သာဖြစ်သည်။ သူကသာ အရာရာကို အစပြုပေးသူ၊ ဖန်ဆင်းပေးသူ ဖြစ် သည်” ဟူသော အယူအဆဖြင့် နိဂုံးချုပ်လိုက်တတ်ကြ၏။

     အထက်ပါမေးခွန်းမျိုးတို့နှင့် ကြုံလာပါက သိပ္ပံပညာနယ်နိမိတ်မှ လွန်သွားသောအဖြေပေးချက်များ ဖြစ်သွားနိုင်သည်။ သို့ရာတွင် သိပ္ပံနယ်ပယ် အတွင်း၌ တွေးဆချက် အမျိုးမျိုးဖြင့် ပေးနေသော အဖြေများကိုလည်း တိကျသောအဖြေ များဖြစ်သည်ဟု တိတိပပ မဆိုနိုင်သေးချေ။ ထိုအခါ စကြဝဠာ၏ သံသရာ ကိုလည်း အစမမြင်သော သံသရာကြီးအဖြစ် မှန်းဆနေရပြန်လေသည်။