ဂျာနယ်ကျော်မမလေး - မေတ္တာ

[ ၁ ]

          ပုံသဏ္ဌာန်လေးထောင့်ကျကျ အလျားရှည်သော ထင်းရှူးသား တစ်ထပ်အိမ်ကလေးသည် မြေပေါ်၌ ဆေးသုတ်ပြီး အလျားလိုက်ချ ထားသည့် ထင်းရှူးသေတ္တာကလေးတစ်လုံးနှင့် တူလေ၏။

          အိမ်ကို ခိုရောင်ရင့်ရင့် ဆေးရောင်သုတ်ထားသည်။

          အစဉ်သဖြင့် တိမ်တောင်တိမ်ခဲများ ဆိုင်းညို့နေသော ကောင်းကင် ကြီးအောက်၌ ညိုမွဲမှိုင်းခြောက်သော အဆင်းအရောင်ဖြင့် ဝပ်နေလေ သည်။ ။

          အိမ်၏ လေးထောင့်ကျကျ မျက်နှာစာတွင် ထောင့်ဘက်၌ အိမ်ထဲ ဝင်ရန် တံခါးပေါက်ကလေးထားသည်။

          ထိုနေရာတွင် ဖိနပ်ချွတ်ရန်နှင့် ထီး၊ ဦးထုပ်၊ မိုးကာအင်္ကျီတို့ကို ချွတ်ထားရန်နေရာ အခန်းကလေးသဖွယ် လုပ်ထားလျက် ထိုအခန်းက လေးမှ ဧည့်ခန်း တံခါးပေါက်သို့ ဝင်ရသည်။

          ဧည့်ခန်းထဲ၌ နီရဲသော သားမွေးကော်ဇောကြီးခင်းထားလျက် ဧည့် ခန်းနံရံပတ်လည်၌ ဆိုဖာကုလားထိုင်ကြီးများ မှီကပ်ခင်းထားသည်။

          ဆိုဖာကုလားထိုင်ကြီးများကို ဖွေးဖြူနေသော ဝတ်ရုံဖြူဖြင့် စွပ်ဖုံး ထားသည်။ - ဧည့်ခန်းထောင့်တွင် ရေဒီယိုနှင့် စာရေးစားပွဲခုံများရှိသည်။

          ဧည့်ခန်းအထက် မျက်နှာကြက်မှာ နိမ့်လျက် အမိုးတစ်ပြင်တည်းဖြစ် နေကာ ဆေးဖြူသုတ်ထားလေသည်။

          ဧည့်ခန်း၏ ရှေ့မျက်နှာစာနှင့် ဘေးတစ်လျှောက်လုံးတွင် မတ်တတ် ရပ်ပါက လက်ထောက်ရပ်သာလောက်သော အမြင့်တွင် ပြတင်းဆွဲ တံခါးများ ဖော်ထားသည်။

          တံခါးရွက်ကို မမြင်ရအောင် ဝှက်လျှက် တောက်လျှောက်ဟင်းလင်း ကြီး ပွင့်သွားနိုင်အောင် ဖောက်ထားလေသည်။

          တံခါးပေါက်တွင် ကြေးကွင်းတပ်ထားသော လှပသည့်အစိမ်းပွင့် ခက် ခန်းဆီးနိမ့်နိမ့် တပ်ဖုံးထားကာ အလင်းရောင်အလိုရှိက မျက်နှာ စာနှင့် ဘေးဘက်တစ်ဖက်လုံး ပွင့်လင်းသွားအောင် ဆွဲရွှေ့ထားလိုက် နိုင်သည်။ ။ ဧည့်ခန်းထဲတွင် နေရာနှစ်ပိုင်း ခွဲထားလေသည်။

          တစ်ပိုင်းကို ဧည့်ခန်းအသုံးပြုလျက်၊ တစ်ပိုင်းတွင် စားပွဲရှည်နှင့် ကုလားထိုင်များ ဝိုင်းခင်းလျက် ထမင်းစားပွဲလုပ်ထားသည်။

          ထမင်းစားပွဲ တစ်ဖက်နံရံတွင် ထင်းခနဲမြင်နိုင်သော ဂျပန်စာတန်း တစ်ခု ချိတ်ထားလေသည်။

          ထိုစာတန်း၏ အဓိပ္ပာယ်မှာ “မိတ်ဆွေကောင်းများသည် ရေကဲ့သို့ ဘယ်တော့မှမပြောင်း”ဟူ၏။

          ထမင်းစားပွဲပေါ်၌ လှပသောပန်းအိုးတစ်အိုး ချထားသည်။ ပန်းအိုး ထဲ၌ အပြာရောင်နုအရင့် နှစ်ထပ်ရောင်ဖြစ်လျက် ပန်းအိုးထဲ၌ ထိုးစိုက် ထားသော ရိုးတံနှင့် ပန်းခက်မှာ ဝါနုနုအရောင် တစ်ခက်တည်းရှင်းနေလျက် သွယ်လျလျဖြင့် ရက်ရက်စက်စက် လှနေသည်။

          စားပွဲနောက်၌ နံရံကိုကပ်လျက် ပန်းကန်များထည့်ထားသော ဗီရို ခုံရှည်ကြီးရှိဖြစ်သည်။ ဗီရိုပေါ်တွင် တစ်ဖက်စွန်း၌ ပန်းအိုးကြီးတစ်လုံး တင်ထားသည်။

          ကြက်သွေးရောင်ကျကျ ပန်းပွင့်အဆုပ်ကြီးများမှာ ပန်းအိုးကြီးကို မိုး၍ လှဂုဏ်ဝင့်လျက် ရှိကြသည်။

          အလယ်တွင် လျှပ်စစ်နှင့်သွားသည့် ဝက်စ်မင့်စတာ နာရီတစ်လုံး တင်ထားသည်။ အစွန်ဆုံးဘက်၌ သစ်သားခုံကလေးပေါ်တွင် ကီမိုနို အဝတ်အစားနှင့် ထီးကလေးမပွင့်တပွင့်ကို ဘေးစောင်းကိုင်လျက် ခေါင်း ကလေး မခို့တရို့ စောင်းနေသော ဂျပန်မလေးအရုပ်မှာ နွဲ့နွဲ့ ကလေးရပ် နေသည်။

          ဗီရိုကြီးအထက်၌ ပန်းချီကားတစ်ချပ် ချိတ်ဆွဲထားသည်။ ဂါဝန် အနီရောင်ဝတ်လျက် ရွှေရောင်ထနေသော ဆံပင်ရှည်ကြီးကို ရှေ့၌ချ ကာ ညာဘက်လက်တွင် ဆံပင်ပြီးရန်ဘီးကလေးကိုင်ထားသော အင်္ဂလိပ် မကလေး၏ ရုပ်ပုံဖြစ်သည်။ မျက်နှာကလေးမှာ ရယ်မလို ပြုံးမလိုဖြင့် တစ်ယောက်ယောက်ကို ငေးကြည့်နေဟန် ကျက်သရေရှိရှိဖြင့် ချောမွေ့ သော မျက်နှာကလေးဖြစ်သည်။

          ဗီရိုထဲ၌ နဂါးရုပ်၊ ဆေးရုပ်၊ ဆေးရောင်စုံခြယ် ပန်းကန်များ၊ ယွန်း ခွက်၊ ယွန်းထည်ပစ္စည်းများဖြင့် လှပစွာခင်းကျင်းပြသထားသည်။

          အိမ်ထဲ၌ အခန်းများဖွဲ့ ထားပုံမှာ တစ်ဖက်တွင် ဧည့်ခန်းနှင့် အရှည် လိုက်ဆက်လျက် အိပ်ခန်းနှစ်ခန်းရှိသည်။ တစ်ဖက်၌ ဖိနပ်ချွတ်ရန် အခန်းကလေးနှင့် အိမ်သာခန်း၊ မီးဖိုခန်း၊ ရေချိုးခန်းကလေးများနှင့် အရှည်လိုက်ဆက်လျက် အိပ်ခန်းတစ်ခန်း အပိုထားရှိလေသည်။

          တစ်ဖက်နှင့်တစ်ဖက် ခြားထားသော အလယ်တွင် လူသွားလမ်းပေးထားသည်။

          ဧည့်ခန်းနှင့် တစ်ဆက်တည်းရှိသော အခန်းနှစ်ခန်းအနက် အလယ် ခန်းတွင် တာတာမီမြက်ဖျာများ ခန်းလုံးပြည့်ခင်းထားသည်။

          အခန်းအလယ်၌ လေးထောင့်ကျကျ နီညိုရောင် စားပွဲနိမ့်ကလေး ခင်း၍ထားသည်။

          စားပွဲခုံမှာ ကျောက်သားထည်၊ ယွန်းထည်ကဲ့သို့ အကွက်ထလျက် ပြောင်လက်နေသည်။ ခုံပတ်ရံတွင် အဝတ်ထိုင်ဖုံကလေးတွေ ဝိုင်းချ ထားသည်။ ။

[ ၂ ]

          စားပွဲကလေးပေါ်၌ အစိမ်းရောင်ပန်းအိုး လုံးလုံးပုပုကလေးရှိသည်။ ပန်းအိုးထဲ၌ ရွှေရောင်တဝင်းဝင်းနှင့် ပတ္တမြားရောင် ရဲရဲစပ်ဖက်နေ သော ပန်းပွင့်မှ ပန်းဖတ်ကလေးများ လန်၊ အာ ကားပွင့်နေလျက် စိမ်း ညိုသော ရွက်ခက်မျှင်နွယ်ကလေးများသည် ပန်းပွင့်တို့အား ယှက်လိမ် ကာ နွဲ့ ငိုက်ကျနေသည်။

          ထိုအလယ်ခန်းနှင့် တစ်ဆက်တည်း နောက်တစ်ခန်းတွင်လည်း တာတာမီမြက်ဖျာများ ခန်းပြည့်ခင်းထားကာ ဗီရိုနံရံကာထားသည်။

          ဧည့်ခန်းနှင့် ကာခြားထားသော နံရံ၌ အတွင်းတွင် အိပ်ရာ၊ ခေါင်း အုံး၊ အဝတ်အထည်များ ထည့်ထားလျက် ဆွဲတံခါးစေ့ပိတ်ထားလျှင် နံရံအတိုင်းရှိနေသည်။

          နံရံပေါ်၌ အဝတ်စတွင် ရေးဆွဲထားသော တောပုံ၊ တောင်ပုံ ပန်း ချီကားချပ်များ အရှည်လိုက်ချဆွဲထားသည်။

          အိမ်ကလေးကို ခြံဝင်းခတ်ထား၏။ ခြံဝင်းဘက်မှ အခန်းနံရံများကို အလုံပိတ်ကာ ဆောက်မထားဘဲ ယင်းလိပ်ချထားသလို ဆွဲတံခါးများသာ ပိတ်ကာထားသည်။

          ဆွဲတံခါးကို နှစ်ဖက်ဆွဲ၍ တွန်းဖွင့်လိုက်လျှင် အခန်းမှာ ခြံဝင်းမြက် ခင်းနှင့် တစ်ပြင်တည်းဖြစ်နေသကဲ့သို့ ဟင်းလင်းကြီးပွင့်သွားလေကာ ခြံထဲသို့ ဆင်းလျှောက်သွားနိုင်သည်။ အိမ်ထဲမှ အခန်းတွေထဲသို့ ဝင်ရသောအပေါက်၌ စက္ကူနှင့်လုပ်သော ဆွဲတံခါးပင်ထားကာ အထဲကဖြစ် စေ၊ အပြင်ကဖြစ်စေ ဆွဲလိုက်လျှင် ပွင့်သွားလျက် အသေပိတ်နိုင်သော ချက်ကန့်လန့်များ တပ်မထားချေ။

          တစ်အိမ်လုံး သန့်ရှင်းပြောင်လက်လျက် ရှင်းလင်းသပ်ရပ်နေ၏။ အထူးသဖြင့် တိတ်ဆိတ်၍လည်းနေ၏။ အိမ်တွင်း၌ ဓာတ်မီးရောင် များ လင်းထိန်နေကာ အပြင်ဘက်တွင် မည်းမှောင်နေသည်။

          ကောင်းကင်၌ လထွက်နေလျက် လသာသောညနှင့်မတူ။ ။ လ၏အရောင်မှာ မြန်မာပြည်ကဲ့သို့ လင်းထိန် ဝင်းပခြင်းမရှိ။ ဖျော့ဖျော့သာ လင်းသာလျက်ရှိနေသည်။ ဂျပန်ပြည် တိုကျိုမြို့ရှိ ဆိတ်ငြိမ်နေသော ဤထင်းရှူးအိမ်ကလေး ထဲ၌ လူလေးယောက်ရှိကြသည်။

          ဧည့်ခန်းထဲ၌ ထမင်းစားပွဲအနီးရှိ နှစ်ယောက်ထိုင် ဆိုဖာပေါ်တွင် ပစ်လှဲလျက် စာဖတ်နေသူမှာ မစ္စတာအော့ဆူးဖြစ်လေသည်။

          မစ္စတာအော့ဆူးမှာ အသက် ၄၀ ကျော်အရွယ် ပိန်ပိန်မြင့်မြင့်ဖြစ် သည်။

          သူ့တွင် သားမယားမရှိ၊ လောကကြီးကို ကျောခိုင်းလျက်တစ် ယောက်တည်းသမား လူပျိုကြီးဖြစ်သည်။

          သူ့ဘဝတစ်လျှောက်လုံး အိမ်မရှိ၊ ယာမရှိ၊ အခြေအနေအတည် တကျမရှိ၊ ကျရာတွင် ပျော်မွေ့ လျက် ဖြစ်သလိုနေခဲ့လေသည်။

          ကျောင်းသားအရွယ်၌ အဖေအမေမရှိ၍ အစ်မက ကျောင်းထား ပေးသည်။

          ကျောင်းတွင် အနက်ရောင် ဘောင်းဘီ၊ အနက်ရောင်ကုတ်အင်္ကျီ၊ အနက်ရောင် ကက်ဦးထုပ်နှင့် ယူနီဖောင်း ဝတ်တက်ရခြင်းကို မုန်းတီး လှကာ ယူနီဖောင်းကို အစ်မကချုပ်ပေးတိုင်း ရောင်းသုံးပစ်လျက်ကျောင်း မတက်ဘဲ ကျောင်းပြေးဘဝနှင့် အချိန်ကုန်ခဲ့သည်။

          ကျောင်းကထွက်ပြီး ရှန်ဟဲမြို့တွင်ရှိသော ဂျပန်ကုမ္ပဏီတစ်ခုတွင် စာရေးဘဝနှင့် အလုပ်လုပ်နေသည်။

          သူ့ဝသီအတိုင်း အေးဆေးသောအလုပ်မျိုးကို ဝါသနာမပါ၍ နိုင်ငံ ရေးဘက်တွင် ဝင်လုပ်လေသည်။

          လျှို့ဝှက်သော မြေအောက်နိုင်ငံရေးကို တရုတ်လိုဝတ်လျက်၊ တရုတ် တွေနှင့် ရောနှောလျက် တရုတ်ပြည်တွင် ငါးနှစ်လုပ်ခဲ့ဖူးသည်။

          စစ်ဖြစ်လာသည့်အခါ၌ ဂျာဗားကျွန်းသို့သွားရာ သင်္ဘောမှောက်၍ ဂျပန်ပြည်သို့ ပြန်ရောက်လာသည်။

          ဂျပန်ပြည်မှ မြန်မာပြည်သို့ထွက်လာကာ သားရေနယ်ကုမ္ပဏီ၌ အလုပ်လုပ်နေလျက် ဂျပန်ပြည်သို့ ပြန်ပြေးကြရာတွင် စစ်ပြီးခေတ်၌ အခြေ မဲ့၊ အနေမဲ့ဖြစ်ကာ တစ်နှစ်လုံး ဘုန်းကြီးကျောင်းတွင် သွားနေလေသည်။

          ဂျပန်ပြည်တွင် နာမည်ကြီး ကုမ္ပဏီကြီးတစ်ခုနှင့် အပြိုင်အဆိုင်ဖြစ် သော ကုမ္ပဏီကြီးတစ်ခုက ကမကထလုပ်၍ သူ့အားမြန်မာပြည်နှင့် ကုန်ရောင်းကုန်ဝယ် ဆက်သွယ်လုပ်ကိုင်ရန် ငွေစုပေးလျက် ကုမ္ပဏီ ကြီးတစ်ခု ဝိုင်းထောင်ပေးကြ၏။ တိုကျိုမြို့တွင် အလုပ်တိုက်နှင့် ကိုယ်ပိုင်အိမ်နှင့် ဖြစ်နေသည်။

          သူ၏မျက်လုံးများမှာ စူးရှတောက်ပလျက် အကြည့်မှာ မာကျော လှသည်။

          ခရီးကြမ်းကြီး စိုင်းနှင်လာခဲ့သောဘဝနှင့် မဟပ်မိအောင် သိမ်မွေ့ နူးညံ့သည်။