ဦးသုခ - မင်္ဂလသုတ်

                                        ဓမ္မာစရိယ ဦးဌေးလှိုင်

                                အတွေးအခေါ်စစ်ပွဲကြားမှ အမေ့အသံ

          ဆရာသုခ၏ မင်္ဂလသုတ်သည် ယခင် မေတ္တာသုတ်ထက်ပင် ပြောင်မြောက်လာသည်ဟု ဆိုချင်ပါသည်။ ပါဠိပိဋကတ် တတ်ကျွမ်း နားလည်ထားပြီးသူများကိုပင် လက်က မချချင်အောင် ဆွဲဆောင် နိုင်ပါပေသည်။

          မင်္ဂလသုတ်ကို ဖတ်ရသောအခင်(ယခင် ဆရာသုခ ရေးခဲ့သော ဆောင်းပါး ၃ဝဝ ခန့်၊ ဝတ္ထု ၅၀ ကျော်၊ ရုပ်ရှင်ကား ၃ဝ ကျော် တို့က တိုင်းပြည်နှင့်သာသနာအတွက် မည်မျှအကျိုးပြုနိုင်ခဲ့သည် ဆိုသည်ကိုမူ ကျွန်ုပ်တို့ ဉာဏ်မဝင်ဆံ့နိုင်ခဲ့ပါ)။ “တိုင်းပြုပြည်ပြု သာသနာပြုဖက် ကလောင်တစ်ချောင်း အဖော်တိုးလာပြီ' ဟု လှိုက်လှဲစွာ ကြိုဆိုမိပါသည်။အဘယ့်ကြောင့်ဆိုသော် ဘာသာရေး စာပေများကို ရေးသား ညွှန်ပြကြရာ၌ “မီးပြသမား တွင်းကျွံမှား' ဆိုသကဲ့သို့ ပါဠိစာပေကျွမ်းကျင်သူတော်တော်များများပင် ဗုဒ္ဓဝါဒရေးရာတွင် ကြည်ကြည်လင်လင် စင်စင်ကြယ်ကြယ် အနည်ထိုင်အောင်နားလည်သူက ရှားလှပေသည်။ ပြောမကုန်၊ ရေးမကုန်အောင် ဗဟုသုတတွေများ သလောက် သဘောတရား ရေးရာတွင် “အံချော်" နေတတ်ကြ၏။ (ကြီးပွားချမ်းသာရေးကျမ်းကြီး လက်ထဲကိုင်ပြီး ဆင်းရဲနေကြရသည် မှာ မဆန်းပါချေ။) ဆရာသုခကား ချီးကျူးထိုက်ပါပေ၏။ ဗုဒ္ဓဝါဒ စာပေရေးရာလည်းနိုင်ပါပေသည်။ သဘောတရား ရေးရာလည်း ပိုင်ပါပေသည်။

          အသက် ၇၀ ကျော် ဖြတ်ကျော်ခဲ့ရသော လူမှုရေး ဗဟုသုတများကို ဗုဒ္ဓဝါဒအပေါ် ထင်ဟပ်ခြယ်မှုန်းထားရာ သူ့စာများမှာ မြိုင်ဆိုင် ကြိုင်လှိုင်၍ပင် နေပါတော့သည်။ စိတ်ချလက်ချ မှတ်သားနာယူ ကျင့်ကြံလောက်အောင်လည်း ခိုင်မာလှပေ၏။

          မင်္ဂလသုတ်ကို ခေတ်အဆက်ဆက် ဖွင့်ဆိုခဲ့ကြရာ ငါးရာငါးဆယ်၊ မဟာဝင်နှင့် ရာဇဝင်ဝတ္ထုဖြစ်ရပ်များကိုသာ ပုံစံ ရေလဲ အမျိုးမျိုးထုတ်၍ သက်သေထူခဲ့ကြ၏။ ရံခါ လိုအပ်သည် ထက်ပင် ပိုလွန်းနေသဖြင့် ဖတ်ရင်းငိုက်ချင်လာသည်။ အထူးသဖြင့် အတွင်းသား အနှစ်သာရ သဘောတရားရေး နှိုက်ချွတ်ဖော်ဆောင်သော မင်္ဂလသုတ်ကား ရှားပါးလျက်ရှိခဲ့၏။

          ဆရာသုခ၏ မင်္ဂလသုတ်ကား ထိုသို့မဟုတ်၊ ဇာတ်နိပါတ် ရာဇဝင် ပုံပြင်ဝတ္ထုထက် သဘောတရားရေး အထူးသဖြင့် ကိုယ်ကျင့်တရားနှင့် လူမှုရေးကို အလေးပေးထားသည်။ ယနေ့ လူ့အလွှာ အသီးသီး၏ နှလုံးသားကို ဗုဒ္ဓ၏မင်္ဂလာမှတ်ကျောက်၌ မှတ်တင်ပြထား၏။ ခေတ်နှင့် ဆီလျော်လှသည်။ လင်နှင့်မယား၊ သားသမီးနှင့်မြေး တစည်းတဝေး အေးအေးလူလူ ဝိုင်းဖွဲ့စကားပြောရင်း တစ်ခန်းပြီး တစ်ခန်း ဖတ်ရှုနာယူဖွယ် ကောင်းလှပေသည်။

          တကယ်တော့ ဆရာသုခ ရေးပြလိုက်ခါမှ မင်္ဂလသုတ်သည် အိမ်တိုင်း လက်စွဲထားရမည့် မိသားစု ကြီးပွားချမ်းသာရေး လမ်းညွှန် ကျမ်း အဖြစ် ပို၍ ပေါ်လွင်လာပါသည်။ (သူကိုယ်တိုင် ပင်လျှင် အဘယ့်ကြောင့် တစ်ဦးတည်း အက်ဒမီ ၆ ဆု ပိုင်ရှင် ဖြစ်လာရကြောင်း တစေ့တစောင်း သတိပြုဖွယ် ရှိပေ၏။)

(၁) “ဓမ္မစကြာ ဟောစဉ်က အရှင်အာနန္ဒာ အနီးအနားမှာ မရှိပါ ဘဲလျက် အဘယ့်ကြောင့်- ဧဝံမေသုတံ=အကျွန်ုပ် အာနန္ဒာဤသို့ ကြားနာခဲ့ရပါသည်” ဟု ဆိုထားပါသနည်း၊ 

(၂) “ မိဘနှင့်ဆရာတို့ကို ဘုရားနှင့် တစ်ဂိုဏ်းတည်းထားသင့်၊မထားသင့်” စသော သဘာဝ စူးစမ်းချက်များ 

(၃) “မကောင်းမြစ်တားလား၊ မကောင်းမြစ်ထာလား” စသောဝေါဟာရ အဆစ်အဖု မြန်မာမှုလေ့လာချက်များ။ 

(၄)ဇာတ်နိပါတ် ပိဋကတ်တော်လာ ဝတ္ထုဇာတ်ကြောင်းများကို အဆီထုတ် အနှစ်ချုပ်ကာ 'အီ” မသွားစေဘဲစွဲငြိလောက်ရုံ ချုပ်၍ချုပ်၍ ပေးထားခြင်း။ ၄ ပါး၊ ၅ ပါး၊ ၆ ပါးစသော မှတ်သားဖွယ်များကိုလည်း လျော်ရုံဖက်စပ် ပေးထားခြင်း မှာ... ဗုဒ္ဓစာပေ ရေးရာ၌ သဘောတရားရော အထွေထွေ ဗဟုသုတ ကြွယ်ဝကုံလုံရုံမျှမက အရေးအသား နိုင်နင်းမှု ကိုပါ သိသာစေပါသည်။ (အရေးအသား အတင်အပြနှင့် စပ်၍ကား ကျွန်ုပ်တို့ တမင် ချီးကျူးနေဖို့ပင် မလိုပါ။)

          ယနေ့ လူ့အဖွဲ့အစည်းအား ဆရာသုခ အရေးတကြီး ပြောချင်သော မင်္ဂလာစကားတစ်ခွန်းကို တွေ့ရ၏။ “မာတာပိတု ဥပဋ္ဌာနနှင့် ( ပုတ္တဒါရဿသင်္ဂဟမင်္ဂလာ'ဖြစ်ပါသည်။ ယနေ့လူ့ဘောင်တွင် “အမိသော်လည်းသားတော်ခဲ၊ လင်ဆိုးမယားတဖားဖား၊ သားဆိုးအမေတပေပေ” ဖြစ်နေသည်ကို ဆရာသုခ တော်တော် များများ မြင်နေရ ၏။

          ထို့ပြင် ဆရာသုခ၏ တစ်ဘဝ သံသရာတွင် “အမေ' သည် အခိုက်ဆုံးသော ဝေါဟာရတစ်လုံး ဖြစ်ပုံရသည်။ ခွန်းတုံ့ပြန်၍လည်း မရတော့သော “အမေ့အသံ'သည် အသက်ကြီးလေ ရင်နှင့်မဆံ့အောင် ကျယ်လောင်မြည်ဟည်းစွာ ရိုက်ခတ်မြဲပေတည်း။ ကျေးဇူးသိသော သားတို့၏ ဓမ္မတာပါပင်။

စင်စစ် ဤစာ “မေတ္တသုတ်၊ မင်္ဂလသုတ်” နှစ်အုပ်တို့သည် ပင် ဆရာသုခအဖို့ “နို့ဖိုးဆပ်တရား”လည်း မည်ပါပေတော့သည်။

မင်္ဂလာဟူသည် လူသားအားလုံးနှင့် သက်ဆိုင်သော “ကြီးပွား ချမ်းသာရေး နည်းပညာ" ကိုခေါ်ဆိုသော ပါဠိအမည် တစ်ခုဖြစ်၏။လူသားတိုင်း ကြီးပွားချင်ကြ၏။ ချမ်းသာချင်ကြ၏။ ကြီးပွားအောင်လည်း လုပ်နေကြ၏။ ချမ်းသာအောင်လည်း လုပ်နေကြ၏။ဆင်းရဲအောင်လုပ်သူ တစ်ဦးတလေမျှမရှိ။ ကြီးပွား ချမ်းသာချင်၍ လုပ်နေကြသော်လည်း ကြီးပွားချမ်းသာရသူကား မဆိုသလောက်၊ ဒုက္ခရောက်သူတွေသာ ကမ္ဘာနှင့်အ၀န်း။အကြောင်းကား "ဘယ်ပုံကြံစည်ပြောဆိုပြုမှုမှ ကြီးပွား ချမ်းသာ ရသနည်း" ဆိုသော ဘဝအသာ ပဓာန အချက်ကြီးကို မဆုပ်ကိုင်မိ သောကြောင့် ပေတည်း။

          ကမ္ဘာမြေပေါ်တွင် လူဟူ၍ဖြစ်လာသည့် အချိန်မှအစ ကိုယ့်အတွေး ကိုယ့်အယူအစွဲနှင့်ကိုယ်၊ ငါ့လှေငါထိုး ပဂိုး(ပဲခူး) ရောက် ရောက် သဘောပေါက်သလို ကြီးပွား ချမ်းသာနည်းများကို တွေးခေါ်ခဲ့ ကြ၏။ ကျင့်သုံးခဲ့ကြ၏။ ထုတ်ဖော်ခဲ့ကြ၏။ လူတွေ သာလား၊ မဟုတ်ချေ။ နတ်ဗြဟ္မာတွေလည်း ထိုနည်းလည်းကောင်း၊ သူတစ်မျိုး ငါတစ်ဖုံ စုံတကာစေ့အောင် ကြီးပွားချမ်းသာရေးနည်းများကို ထုတ် ဖော်ကျင့်သုံးလာကြရာ အစစ်အမှန်များမဟုတ်ကြသဖြင့် တစ်ဦးက ထုတ်၊ တစ်ဦးက ပုတ်ကာ တုတ်ထမ်းမင်္ဂလာချည်း ဖြစ်ခဲ့ကြရသည်။ 'လူရော နတ်ဗြဟ္မာတွေပါ ကြီးပွားရေး အတွေးအခေါ် “ဖီလော်ဆော်ဖီ' စစ်ပွဲကြီး ၁၂ နှစ် တိုင်တိုင် ကြာခဲ့၏။ (ယခု ကော ပြီးဆုံးပါပြီလား။)

           ယင်း.. ကြီးပွားချမ်းသာရေး “မင်္ဂလာ' အတွေးအခေါ်နှင့်စပ်၍ ကမ္ဘာဦးလူသားတို့၏ မင်္ဂလာ အယူအစွဲကအစ ယနေ့သိပ္ပံပညာ ထွန်းကားသော အမေရိကန်ပြည်သူပြည်သားတို့၏ မင်္ဂလာ အယူအစွဲ များအထိ နောက်ခံရာဇဝင် မင်္ဂလာ ရေစီးကြောင်း ကို ဆက်စပ်ပေါင်းကူး ပေးထားပုံမှာ ဆရာသုခ၏ ကိုယ်ပိုင်အစွမ်းကို ရိပ်စားမိနိုင် ပါသည်။

          အားလုံးကို ခြုံလိုက်သောအခါ ဗုဒ္ဓရှင်တော်မြတ် ဖြေရှင်း ညွှန်ပြတော် မူခဲ့သော မင်္ဂလသုတ္တန်သည် လူမျိုး၊ ဘာသာ၊ အရွယ် မရွေး လူသားတိုင်းမည်မျှ အလေးမူထိုက်ကြောင်း ဝါတစ်ခေတ် တစ်ခေတ် အသစ်အသစ်ကို ရှာသော်လည်း ရေသာများ၍ ငါးမတွေ့နိုင် တော့ကြောင်း ပေါ်လွင်လှပါပေသည်။

         “ဒကာကြီး မေတ္တသုတ်ကို အင်္ဂလိပ်လိုရေးပြီး အမေရိကန် ပို့လိုက်စမ်းပါ”

          ဟုကမ္ဘာ့သာသနာပြု ကျေးဇူးရှင် တောင်ပုလု ဆရာတော်ဘုရားကြီး ဒုတိယအကြိမ် အမေရိကန်ကြွခါနီး ချီးမြှောက် အားပေးခြင်း ခံယူရသော ဆရာသုခအား ဤမင်္ဂလသုတ်ကို ဖတ်ပြီးသော ပရိသတ်များထံမှ သုတိမင်္ဂလာ သြဘာသံများ မည်ကဲ့သို့ ရိုက်ခတ်လွင့်ပျံလာမည်ကို မခန့်မှန်းနိုင်ကြောင်းပါခင်ဗျား။

          ထိုထို အသံများတွင် ထက်ဝေဟင် တစ်နေရာမှ... “ဒါနဲ့ပဲ အမေတော့ မွေးရကျိုးနပ်ပြီ သားရေ၊ သာဓု... သာဓု.. သာဓု.. ကျန်းကျန်းမာမာနဲ့ ငါ့သားကြီး အမျိုး ဘာသာ သာသနာပြုနိုင်ပါစေတော်” ဟူသောအကျယ်လောင်ဆုံး အချို့မြိန်ဆုံး သော အသံတစ်သံကိုလည်း ကြားယောင်လျက်ပါခင်ဗျား။

                                                    လူသားတိုင်းအတွက် မင်္ဂလာပါ...

                                                                  ဓမ္မာစရိယ ဦးဌေးလှိုင်

                                              မင်းယုဝေ

                                              စာအုပ်ထူး

          မြန်မာ့ယဉ်ကျေးမှုနှင့် မြန်မာ့လူနေမှုစနစ်တွင် မင်္ဂလသုတ်သည် အဓိကအခန်းမှ ပါဝင်သည်။ မြန်မာတို့သည် မွေးဖွားသည်မှစ၍ ကွယ်လွန်သည်အထိ မင်္ဂလသုတ် တရားတော်ကို ဦးထိပ်ပန်ကာ ပြုမူကျင့်ကြံဆက်ဆံနေထိုင်သွားကြပေသည်။ စင်စစ် မင်္ဂလသုတ် သည် ဗုဒ္ဓ၏ လူမှုရေး တရားတော်တို့တွင် အရေးပါ အရာရောက်ဆုံး ဖြစ်ပေသည်။ ယင်းသည် လူကြီး, လူရွယ်, လူငယ် အရွယ်သုံးပါးနှင့် သက်ဆိုင်သည်။ မည်သည့်ခေတ်, မည်သည့် နိုင်ငံမှ မည်သည့်လူမျိုး၊ မည်သည့်ဘာသာဝင်, မည်သည့်လူတန်းစား ကိုမဆို အကျိုးကျေးဇူး ပြုနိုင်ပေသည်။

          ထို့ကြောင့် မင်္ဂလသုတ်ကို မူလ ပါဠိဘာသာမှ ဟိန္ဒီ, သီဟိုဠ် မြန်မာ, တရုတ်, ဂျပန်,ထိုင်း, အင်္ဂလိပ်,ဂျာမန်၊ ပြင်သစ် စသည့် ကမ္ဘာ့ဘာသာပေါင်းများစွာဖြင့် ပြန်ဆိုကြသည်။ သက်ဆိုင်ရာ ပညာရှင်အသီးသီးကလည်း အမျိုးမျိုး ဖွင့်ဆိုကြသည်။

           မြန်မာစာပေလောကတွင် ပညာရှင်များသည် မင်္ဂလသုတ်ကိုစကားပြေဖြင့် လည်းကောင်း၊ ကဗျာဖြင့် လည်းကောင်း ဖွင့်ဆိုခဲ့ကြသည်။ ယခု စာရေးဆရာကြီး ဦးသုခကလည်း သူ့နည်း၊ သူ့ဟန်၊ သူ့ပညာ ဉာဏ်စွမ်းဖြင့် မင်္ဂလသုတ်ကို ဖွင့်ဆိုလိုက်ပေပြီ။

          ဆရာကြီး ဦးသုခသည် အသက် ၇ဝ အရွယ် ရှိပြီဖြစ်ရာ နှစ်ပေါင်း ၇၀ အတွင်း သူလေ့လာဆည်းပူးခဲ့သော ပညာများကို ကိုးကား၍လည်းကောင်း၊အတွေ့အကြုံတို့ကိုအခြေပြု၍ လည်းကောင်း၊ ၀ေဝေဆာဆာ ဖွင့်ဆိုထားသည်။ ဆရာသည် ဖွင့်ဆိုရာတွင် ဗုဒ္ဓဝင် မဟာဝင်, ရာဇဝင်တို့ထဲမှ နှီးနွယ်ရာတို့ကို လည်း ထုတ်နုတ်ကိုးကားတင်ပြသည်။ ဝိနည်းပိဋကတ်, အဘိဓမ္မာပိဋကတ်, သုတ္တန် ပိဋကတ်တည်းဟူသော ပိဋကတ်သုံးပုံထဲမှ နှီးနွယ်ရာတို့ကိုလည်း ထုတ်နုတ်ကိုးကား တင်ပြသည်။ ဒီဃနိကာယ် မဇ္ဈိမနိကာယ်, သံယုတ္တနိကာယ်, အင်္ဂုတ္တရနိကယ် ခုဒ္ဒကနိကာယ် တည်းဟူသော နိကာယ်ငါးရပ်ထဲမှ နှီးနွယ်ရာတို့ကိုလည်း ထုတ်နုတ် ကိုးကား တင်ပြသည်။ ဓမ္မသတ်ကျမ်း, လောကနီတိကျမ်း စသည့် ကျမ်းများထဲမှ နှီးဖွယ်ရာ တို့ကိုလည်း ထုတ်နုတ်ကိုးကား တင်ပြသည်။ စွန်းလွန်းဆရာတော်, မဟာစည်ဆရာတော်, ဂန္ဓာရုံဆရာတော်အရှင်ဇနကာဘိဝံသ, တိပိဋကဓရ ဆရာတော် ဦးဝိစိတ္တသာရာဘိဝံသ စသော အရှင်သူမြတ်များ၏ အဆုံးအမများထဲမှ နှီးနွယ်ရာတို့ကိုလည်း ထုတ်နုတ်ကိုးကား တင်ပြသည်။ ရှင်မဟာသီလဝံသ, ရှင်မဟာရဋ္ဌသာရ,မန်လည်ဆရာတော် တို့မှအစ ဆရာကြီး သခင်ကိုယ်တော်မှိုင်း, ဆရာကြီးဒဂုန် ဦးထွန်းမြင့်တို့အလယ်, ဆရာတင်မိုး, ဆရာသမိန်သောင်းတို့အဆုံး ရှေးခေတ် စာဆိုများနှင့် ခေတ်သစ်စာဆိုများ၏ စာများထဲမှ နှီးနွယ်ရာတို့ကိုလည်း ထုတ်နုတ်ကိုးကား တင်ပြသည်။

          ကမ္ဘာ့စကားပုံ, ကမ္ဘာ့ကာတွန်းတို့မှအစ ရုရှစာရေးဆရာကြီး ဂေါ်ကီ၏အမေဝတ္ထုအထိ ကမ္ဘာ့စာပေ နှီးနွယ်ရာတို့ကိုလည်း ထုတ်နုတ်ကိုးကား တင်ပြသည်။ မြန်မာမှု၊ မြန်မာ့အနုပညာ စသည်တို့ထဲမှနှီးနွယ်ရာတို့ကိုလည်း ထုတ်နုတ်ကိုးကားတင်ပြသည်။ ထို့ပြင် ဆရာ ဦးသုခသည် ပြည်တွင်းပြည်ပ၌ကြုံတွေ့ရသော သူ့ကိုယ်တွေ့ ဖြစ်ရပ် များနှင့် သူ့မိတ်ဆွေများ၏ ကိုယ်တွေ့ဖြစ်ရပ်များ စသည်တို့ထဲမှ နှီးဖွယ်ရာများကိုလည်း ထုတ်နုတ်ကိုးကား တင်ပြသည်။ သူ့အမြင်သူ့အတွေး သူ့အယူအဆများထဲမှ နှီးဖွယ်ရာများကိုလည်း တင်ပြသည်။ အံ့ချီးဖွယ် ကျယ်ဝန်း ပြည့်စုံလှပေသည်။ဆရာသည် ယင်းသို့ မင်္ဂလသုတ်ကို ရှုထောင့်အမျိုးမျိုးမှ ဖွင့်ဆိုတင်ပြရာတွင် ရင်းနှီးသောသူငယ်ချင်းနှစ်ဦး အချီအချ ပြောဆိုဆွေးနွေးခန်း ပုံစံမျိုးဖြင့် ရေးသားတင်ပြသည်။ ဤ ဆွေးနွေးပုံစံမျိုးဖြင့်တင်ပြသည်မှာ ရဟန်းတော် ဆရာတော်ကြီးများနှင့် လူကြီးသူမများထံ မလျှောက်ဝံ့ဖွယ် ပြဿနာ ပုစ္ဆာများကို စောဒကတက်ခြင်း၊ ငြင်းခုံ၍ အဖြေရှာခြင်း စသည်တို့ကို လွတ်လပ်စွာ တင်ပြလို၍လည်း ဖြစ်သည်။ ဖတ်ရှုသူတို့ စိတ်ဝင်စားမှု ရှိစေရန်လည်း ဖြစ်သည်။ ခေတ်စကား အသုံးအနှုန်းတို့ကို ကြားညှပ်သုံးကာ ထိထိမိမိ ဖော်ပြနိုင်အောင်လည်း ဖြစ်သည်။ ဆရာဦးသုခသည် အချီအချ ပြောစကားဖြင့် ရေးသား ရာတွင် ထင်ရှားသူဖြစ်သည်။ သူ၏ဝတ္ထုများနှင့် သူ၏ရုပ်ရှင်များတွင်အချီအချ ပြောစကားများဖြင့် အလွန် ပြောင်မြောက်လှပေသည်။

          ယခု အချီအချ ပြောစကားများဖြင့် ပြောင်မြောက်စွာ ရေးသား ထားသည်ကို တွေ့ရပေသည်။

          ဆရာဦးသုခ၏ “မင်္ဂလသုတ်အဖွင့်” သည် ထူးခြားသော “စာအုပ်ထူး' ပင်ဖြစ်သည်။ မင်္ဂလသုတ် တရားတော်၏ သဘောနှင့် မင်္ဂလသုတ်တရားတော်၏တန်ဖိုးကို အထူး ပေါ်လွင်အောင်လည်းဖော်ကျူးနိုင်သည်။ စာဖတ်သူတို့ စိတ်ပါဝင်စားမှု ရှိအောင်လည်း စွမ်းဆောင်နိုင်သည်။ ထိုမျှမက နှီးနွယ်ရာ ဗဟုသုတ အစုံစုံကို ထည့်သွင်းတင်ပြထားရာ ဗဟုသုတစွယ်စုံကျမ်း သဖွယ်လည်း ဖြစ်နေ ပေသည်။ဤစာအုပ်သည် ခေတ်လူငယ်များအတွက် သာမက လူရွယ် လူကြီးများ အတွက်ပါ အလွန်တန်ဖိုးရှိသော 'စာအုပ်ထူး' ဖြစ်ပေ သည်။

          ကျွန်တော်သည် အမျိုးသားကျောင်းတွင် စ,တင် ပညာဆည်းပူးခဲ့သူဖြစ်ရာ ငယ်စဉ်ကပင် မင်္ဂလသုတ်ကို သင်အံမှတ်သားခဲ့ရသည်။ ကြီးပြင်းလာသောအခါတွင်လည်း စကားပြေ ကဗျာ နှစ်ထွေဖြင့် ဖွင့်ဆိုထားသော မင်္ဂလသုတ်အဖွင့်စာအုပ်များကို ဖတ်ရှု လေ့လာခဲ့ရသည်။ ယခု ဆရာဦးသုခ၏“မင်္ဂလသုတ်အဖွင့်” စာအုပ် ကို ဖတ်ရှုရသောအခါ မင်္ဂလသုတ်တရားတော်၏ သဘောကို ပိုမို သဘောပေါက်လာခဲ့သည်။ မင်္ဂလသုတ် တရားတော်၏တန်ဖိုးကို ပိုမိုသိမြင်လာခဲ့သည်။ မင်္ဂလသုတ် တရားတော်၏အလှကို ပိုမိုခံစား လာမိသည်။ ထို့ပြင် နှီးနွယ်ရာ ပညာ ဗဟုသုတ အစုံစုံကိုလည်း ရရှိခဲ့သည်။ ထို့ကြောင့် ဆရာ ဦးသုခကို များစွာ ကျေးဇူးတင်မိသည်။ ယင်းသို့ကျေးဇူးတင်ရာမှ ဆရာ၏ စေတနာနှင့် ဆရာ၏ ကြိုးပမ်းမှု တို့ကို သာဓု ခေါ်မိပေသည်။

                                                                                   မင်းယုဝေ